Read idoma 1 AƆ́CƐ́ 20 Bible Online

1 AƆ́CƐ́ 20 - idoma bible

1 AƆ́CƐ́ 20

¹Ubenhádādi, ɔcɛ́ kú Usiríya le odúúdú aícɔ́ɔja kú nū kpó mɛ́mla aɔ́cɛ́ kú aéwɔhá ofu cigwɛ́ɛpa, mɛ́mla aɔ́nya kú ɛfú mɛ́mla aúgbɔ́ɔnya kú uwá. Anɔ́ɔ ó gaá le íbɔm cē tū Usamérīya o yá ɛ́ɛ́ kóō mīyɛ ɔlɛ́ ā á.

²Anɔ́ɔ Ubenhádādi le ɛhɔ̄ tū ga igelī nɛ̄hi ā fu Áhābu, ɔcɛ́ kú Ísrɛ̄lu, yɔ̄ ī da ɔ́ ka ɛlā nɛ̄ Ubenhádādi, ɔcɛ́ kú Usiríya ā ka ā yɔ̄ á.

³Ó ka ɔ́ɔ̄ lɛ oje nɛ̄hɛ́, oje ɔdɔ (ugóolu), anyā ɔlɛ́ nū mɛ́mla ayí nū nōo lɔfú iyē fíyɛ́ dúú ā kpó lɛ anúɔ.

⁴Anɔ́ɔ Áhābu, ɔcɛ́ kú Ísrɛ̄lu tóohi kahíníī, “Ɛ́gɛ́nɛ̄ a ka ā, óndú um, ɔcɛ́ Ubenhádādi, kwu ami mɛ́mla aɔ́dā nɛ̄ n lɛ ā wɛ ákú uwɔ kpɛ́mm.”

⁵Ācocɛ̄hɔ̄ kú ɔlɛ́ Ubenhádādi, ɔcɛ́ ā, kwúcē wā ɛgiyí Áhābu gaá da ɔ́ ka anúɔ da ɔ́ gbɔbū ka ɔ́ɔ̄ lɛ oje nɛ̄hɛ́ mɛ́mla oje ɔdɔ (ugóolu) mɛ́mla anyá ɔlɛ́ nū mɛ́mla ayí nū í kpó gé lɛ anúɔ.

⁶Ó da ɔ́ ka óócí, anúɔ géē tū ācocɛ̄hɔ̄ kú anúɔ ɛhɔ̄ wā kéē lɛ ɔlɛ́ nū mɛ́mla ɔlɛ́ ācɛ ɔlɛ́ nū wu. Ó ka ɔdā dúúmā nɛ̄ ɛ́ɛ lɛ abɔ̄ kwu ɔ́ nōo le he uwá ɔtū ā, ɛ́ɛ géē kpó uwā gé lɛ anúɔ.

⁷Anɔ́ɔ Áhābu le odúúdú anyākwɔ́cɛ kú Ísrɛ̄lu kpó hīgwú anɔ́ɔ ó da uwá kahíníī, “Áá má ɛ́gɛ́nɛ̄ ɔ̄cɛ ā gē dɔɔ̄kā ɛlā alɔ ā. Ó le ɛhɔ̄ kú oje nɛ̄hɛ́, oje ɔdɔ (ugóolu) anyā ɔlɛ́ um mɛ́mla ayí um tū fu um, ń kē tá glá ŋ́.”

⁸Anɔ́ɔ odúúdú anyākwɔ́cɛ ā da ɔ́ ka ɔ́ɔ̄ cɛ̄, ɛ́ɛ́ nɛ̄ ɔ́ɔ gē kpó uwā lɛ ɔ́ ŋ́.

⁹Náaná, ó lɛ ɛhɔ̄ tū ācɛ nɛ̄ Ubenhádādi tū wā a kahíníī, “Aá nyɔ̄ í da óndú um, ɔcɛ́ kahíníī, “Ɔdā dóódu nōó tɛ̄hɔ̄ nū wā aflɛ́yí aā, n géē yá ɔ̄, amáŋ ákú igbo ɔ́mpa nyā, ń gáā yá ɔ̄ glá ŋ́.” Anɔ́ɔ ācɛ ā nyɛ̄ɛ̄ gaá le ohi kpó lɛ ɔcɛ́ kú Usiríya á.

¹⁰Anɔ́ɔ Ubenhádādi klla lɛ ɛhɔ̄ tū fu ɔ́ kpɔ́ kahíníī, “Ɔwɔ um kóō lɛ um ŋmó, ɔ́dāŋ ka ń je ajɛ kú Usamérīya wúlatāajɛ, nɛ̄ úmúlá dúúmā í gáā hile nōo ī mu abɔ̄ kú ɔnyɔɔnyɛ kú aícɔ́ɔja kú ɔlɛ́ um ŋ́.”

¹¹Anɔ́ɔ Áhābu le ɛhɔ̄ tū fu ɔ́ kahíníī, “Ícɔ́ɔ́ja ɔkwɔ̄ɔkwɛ̄yi gē gwó ī kokónu eko nōó le ɛfú yálé, ó wɛ eko nōó gáā kpɛ́fú ā ŋ́.”

¹²Ubenhádādi mīyɛ olɛhɔ̄ kú Áhābu eko nōó yɔ̄ í gwá ejé mɛ́mla aɔ́cɛ́ ɔhá ipú aáklɔ̄kpɛ kú ɛfú kú uwā ā. Anɔ́ɔ ó da aícɔ́ɔja ɔlɛ́ nū kéē lɛ pɛ́ nyɔ̄ í kwāajɛ, cɛ́ɛ́ kéē gbɔɔ́ ō kpɛ́fú tá Usamérīya. Anɔ́ɔ é má kwāajɛ le tútū kéē kpó ɔfú gwō igelī ā.

¹³Anɔ́ɔ ɔ̄comɛ́ɛbɛ éyi kú Ɔwɔicō gaá háyi pī Áhābu, ɔcɛ́ kú Ísrɛ̄lu, anɔ́ɔ ó da ɔ́ kahíníī, “Óndú ā ka a yúúfi ɛwa nɛ̄hi kú aícɔ́ɔja ɔ́ɔmā ŋ́. N géē je uwá kpó tá ipú abɔ̄ kú uwɔ ícɛ, cɛ́ɛ́ ká ā jé ka amíyɔ̄ wɛ Óndú á.”

¹⁴Anɔ́ɔ Áhābu da ɔ́ ɔ̄kā kahíníī, “Ɔnyɛ̄ géē gbɔbū ɛfú lɛ alɔ ā?” Anɔ́ɔ ɔcomɛ́ɛbɛ ā tá Áhābu ohi kahíníī, “Ayípōklóbīya kú aícɔ́ɔja nēe bá ɛháajɛ kú aígbómína kú ɛga ɛyɛ́ɛ́yɛ́yí kú ajɛ ā géē gbɔbū ɛfú nyā á.” Áhābu klla da ɔ́ ɔ̄kā kpɔ́ kahíníī, “Ɔ̄nyɛ kē í wɛ otrɛ̄yí kú odúúdú aícɔ́ɔja āa?” Anɔ́ɔ ɔ̄comɛ́ɛbɛ ā tá Áhābu ohi kahíníī, “Awɔ nɛ.”

¹⁵Anɔ́ɔ ɔcɛ́ ā le ɔdúúdú aótrɛ̄yí kú ayípōklóbīya nēe wɛ áícɔ́ɔja nēe bá ɛháajɛ kú aígbómína kú ɛga ɛyɛ́ɛ́yɛ́yí kú ajɛ kú nū ā kpó hīgwú. Odúúdú uwá wɛ ofu igwóléyi, cigwɛ́ɛpa (232). Ó klla le ɔdúúdú aícɔ́ɔja kú Ísrɛ̄lu ā kpó hīgwú, okatɔ̄há kú odúúdú uwā wɛ úlā igwáahāapa cofigwó (7,000).

¹⁶Anɔ́ɔ ɛfú a gbo ɔ́ ɔlɛ́ɛnɔ, eko nɛ̄ Ubenhádādi mɛ́mla aɔ́cɛ́ ofu cigwɛpa nēe wā í cē ɔ̄ kpɛ́fú ā, le ejé gwá cɛɛnyi ipú aáklɔ̄kpɛ kú ɛfú kú uwā.

¹⁷Aícɔ́ɔja kú ayípōklóbīya ā gbɔɔ́ ō ga ɔgbɛ́fú aflɛ́yí. Ācɛ nɛ̄ Ubenhádādi, ɔcɛ́ tɛ̄hɔ̄ kéē nyɔ̄ í jila ajɛ ā, lɛ ohi kpó gē lɛ ɔ́ ka aá má ígwu kú aícɔ́ɔja bá ī pɛ́ wɛɛcɛ ŋmá Usamérīya.

¹⁸Anɔ́ɔ Ubenhádādi le ɔ́da je kéē lɛ uwá kpó kwú oyēeyī, ɔ́dāŋ ka ɛ́ɛ kōō wā í kpɛ́fú, amáŋ wā í yá ɛbɔ́ náaná.

¹⁹Aícɔ́ɔja kú ayípōklóbīya nēe bá ɛháajɛ kú aígbómína kú Ísrɛ̄lu ā gbɔbū ɛfú á, ɛ́ɛ́ nɛ̄ aícɔ́ɔja kú Ísrɛ̄lu ohile ā gbo ce uwá á.

²⁰Anɔ́ɔ ɔnyɔɔnyɛ kú uwā le aícɔ́ɔja kú Usiríya dúúmā nōó nuunu tá ɔ̄ ā ŋmó. Anɔ́ɔ ācɛ kú Usiríya le pɛ́ kwu, anɔ́ɔ Ísrɛ̄lu kē le nū uwā bīī á. Amáŋ, Ubenhádādi, ɔcɛ́ kú ācɛ Usiríya ā le icō ɔnya kú nū tū le kwu mɛ́mla ācokpɛ́fɔ́nya ōhī.

²¹Áhābu mīyɛ aáklɔ̄kpɛ kú ɛfú kú uwā, le aɔ́nya mɛ́mla aúgbɔ́ɔnya o bī kpɛ́fú kú uwā kpó kwú klla le Usiríya yálé nɛ̄ɛ̄nɛ̄hi.

²²Anɔ́ɔ ɔ̄comɛ́ɛbɛ kú Ɔwɔicō ā le tá ɛgiyí Áhābu, ɔcɛ́ ā, gaá da ɔ́ ka ɔ́ɔ̄ lɛ aícɔ́ɔja kú nū tútū, cɛ́ɛ́ ka ɔ́ɔ̄ lɛ ɛfú ā miya lɔɔlɔhi, ohígbū ka ācɛ Usiríya géē wā ɛplá ɔgwá kú iháyí ɔhá ā kpɔ́ ɛɛ́.

²³Anɔ́ɔ aígabɔ̄ kú Ubenhádādi da ɔ́ ka Ɔwɔicō kú ācɛ kú Ísrɛ̄lu ā ɔ́ɔ wɛ Ɔwɔicō kú ɛyí ɛfu nɛ. Ɛfu ā yá ɛ́ɛ́ nɛ̄ ɛ́ɛ gē yá aá lé ɔgbɛ́fú á. É ka ɔ́dāŋ ka aá lɛ ɛfú kpó tá uwā ajɛ ɔlamu, aá géē yá uwá lé.

²⁴É da ɔ́ kóō yá ɛ́ɛ́ ka ɔ́ɔ yá ɔdā nēé ka ā glá āa, ɔ́ɔ̄ lɛ aɔ́cɛ́ ofu cigwɛ́ɛpa ā kpó ŋmá ɛga nēé ce ā cɛ́ɛ́ ɔ́ɔ lɛ aótrɛ̄yí kú aícɔ́ɔja o kpɛ́fú ajɛ ɔlamu kpó kwɛyí uwā.

²⁵É klla da ɔ́ kpɔ́ ka ɔ́ɔ lɛ áluka kú aícɔ́ɔ́ja nēe kwu ŋmá ɛgiyí nū ā túbā kpɔ́ mɛ́mla áluka kú aɔ́nya kú ɛfú mɛ́mla áluka kú aúgbɔ́ɔnya o bī kpɛ́fu ɛdɔ ékpónú bɛ̄ɛka ákú aflɛ́yí ā túbá kpɔ́. É ka aá ɔ́ɔ géē nuunu tá ācɛ Ísrɛ̄lu ajɛ ɔlamu, cɛ́ɛ́ igbɛ́ɛmā, aá géē yá uwā lé piíí. Anɔ́ɔ Ubenhádādi, ɔcɛ́ ā, jāhɔ̄ le ɛlā kú uwā pó anɔ́ɔ ó le ɔdā nēé ka ā yá á.

²⁶Ɛplá kú ɔgwā iháyí ɔhá ā, Ubenhádādi le aícɔ́ɔja kú nū tútū, anɔ́ɔ é yɛ lɛyíkwu igelī nɛ̄hi kú Áfēki gaá kpɛ́fú tá ācɛ kú Ísrɛ̄lu.

²⁷Áhābu lɛ ācɛ kú Ísrɛ̄lu kpó hīgwú, le iyɔ́fú kpó. Anɔ́ɔ é le pɛ́ gɛcɛ gaá le aáklɔ̄kpɛ kú ɛfú kú uwā cēce ígwu ɛpa leyī pīya kwu ācɛ kú Usiríya. Ācɛ kú Ísrɛ̄lu lɛbɛ̄ɛka igwú kú ɛwū ɛpa piyóo ā, ɔ́dāŋ ka ɔ̄cɛ lɛ uwā gblla ɛwa kú ācɛ Usiríya nēe nyīla bá ɛcɛ ɛga dóódu bɛ́ɛ́ɛ̄ á.

²⁸Ɔ̄comɛ́ɛbɛ éyi ɔ́ɔmā le tá ɛgiyí Áhābu gaá da ɔ́ kā ɛlā nɛ̄ Óndú ā ka ohígbū ɛlā nɛ̄ ācɛ kú Usiríya ka ka anúɔ ɔ́ɔ wɛ Ɔwɔicō kú ɛfu nɛ̄ anúɔ ɔ́ wɛ Ɔwɔicō kú ajɛ ɔlamu ŋ́ mā, ɔ́ɔma anúɔ géē yá kú ācɛ ā kóō lɛ ɛwa nɛ̄hi kú aícɔ́ɔja kú uwā ā kpó yálé. Cɛ́ɛ́ anú mɛ́mla ācɛ ɔlɛ́ nū ɛ́ɛ géē jé ka anúɔ wɛ Óndú ā á.

²⁹Ācɛ kú Usiríya mɛ́mla Ísrɛ̄lu bá aáklɔ̄kpɛ kú ɛfú kú uwá le eyī hɛ́ kwu īyī uwá ɛ̄cī ahāapa. Ɛ̄cī ɔ́mahāapa ā, é gbɔɔ́ ō kpɛ́fú, anɔ́ɔ aícɔ́ɔja kú Ísrɛ̄lu le aícɔ́ɔja kú Usiríya úlā ofu igwɛ́ɛpa cigwó (100,000) kpó ŋmó á.

³⁰Ācɛ ohile kú aícɔ́ɔja kú Usiríya nēe yēeyī ā kwú pɛ́ kwu ga igelī nɛ̄hi kú Áfēki, amáŋ ɔdɔ nēé le hɛ́ igá tū igelī nɛ̄hi ā kwú wúla klá uwá le ācɛ úla ofɛtá cahāapa cofu igwɛ́ɛhɔ̄ (27,000) kú uwá kpó ŋmó. Ubenhádādi le kwu ga igelī nɛ̄hi kú Áfēki, gaá taánū igbīhi inu kú ɔlɛ́ éyi.

³¹Anɔ́ɔ aígabɔ̄ kú Ubenhádādi da ɔ́ ka aá pó ka aɔ́cɛ́ kú Ísrɛ̄lu wɛ ācɛ nēe ī ményīnyinyi ācɛ. É ka ɔ́ɔ lɛ ɛga je lɛ aá ká aá lɛ ewo kpó klla ɛyí lɛ īlī ekwu kpó wiiyē, cɛ́ɛ́ aá klla lɛ ɔ́ngbá kpó kwú ɔkɔ kú aá nyɔ̄ ɛgiyí ɔcɛ́ kú Ísrɛ̄lu. É ka ekoōhī ɔ́ɔ géē ményīnyinyi anú nōo wɛ ɔcɛ́ ā, nēé gáā je ɔ́ ŋmó ŋ́.

³²Anɔ́ɔ é le īlī ekwu kpó tū ohí, klla le ewo wu klá ɛyí, le ɔ́ŋgbá kpó kwú ɔkɔ anɔ́ɔ é le tá ɛgiyí Áhābu gaá da ɔ́ ka ɔ̄cocɛ̄hɔ̄ kú nū Ubenhádādi í gbɔ̄ɔkɔ ga uwɔ ka ā híī je anúɔ ŋmó ŋ́. Áhābu tá uwá ohi ka ɔcɛ́ ā ɔ́ɔ yēeyī kpɔ́ ɛ́ɛ́ nɛɛ, anɔ́ɔ ó ka ɔ́ɔ lɔhi, Ubenhádādi ɔ́ɔ lɛbɛ̄ɛka ɔyínɛ́ anúɔ ā nɛ.

³³Aígabɔ̄ kú Ubenhádādi bā í gbēyī kú ɔdōcābɔ̄ kú olɔhi dúúmā. Ikpíikpó nɛ̄ Áhābu ka ɔ́ɔ wɛ ɔyínɛ́ anúɔ ā, anɔ́ɔ é kwú ɛlā nōó ka ā ú bī abɔ̄ anɔ́ɔ é da ɔ́ ka ɔ́ɔ ka Ubenhádadi, ɔ́ɔ wɛ ɔyínɛ́ nū. Anɔ́ɔ Áhābu da uwá kahíníī, “Áá lɛ ɔ́ bī wā.” Eko nɛ̄ Ubenhádādi gā ā, Áhābu da ɔ́ ka ɔ́ɔ̄ wā ipú úgbɔ́ɔnya mɛ́mla anúɔ.

³⁴Ubenhádādi da ɔ́ kahíníī, “Aígelī nɛ̄hi nɛ̄ ádā um mīyɛ ŋmá ɛgiyí ádā uwɔ ā, n géē je uwá kpó kwúcē igbīhi gā uwɔ. Alɔ kwú Udamáskɔ̄si ú pīya ɔlɛ́ o yúklɔ́ mla ɔ́sú kú uwɔ, ɛ́gɛ́nɛ̄ Ádā um yá Usamérīya ā.” Anɔ́ɔ Áhābu da ɔ́ɔ kahíníī, “Ohígbū ɛ̄nyā nɛ̄ a gáā yá ā, ń gáā ŋmó uwɔ ɛ́ɛ́ gɛ ŋ́.” Anɔ́ɔ ó le Ubenhádādi hɛ́tá á.

³⁵Anɔ́ɔ éyi kú ipú ayí kú ācomɛ́ɛbɛ ā da ɔ́mpānū ka ɔ́ɔ̄ lɛ odée fīyɛ̄ anúɔ, amáŋ ɔcɛ́ ā tá kóō fīyɛ̄ ɔ̄ odéē.

³⁶Anɔ́ɔ ó da ɔ́ ka, abɔ́ɔ ɔ́ɔ tá kóō lɛyítáajɛ lɛ ɛlā kú Ɔwɔicō ā, ɔ́dāŋ ka ɔ́ɔ nyɛ̄ɛ̄ ŋmá ɛgiyí anúɔ, ágábá éyi ɔ́ɔ géē je ɔ́ ŋmó. Anɔ́ɔ ɔkwɔɔkwu nōó nyɛ̄ɛ̄ ŋmá ɛgiyí nū āa, ágábá jīla anú ɔwɛ le ɔ́ ŋmó

³⁷Anɔ́ɔ ó klla lɛ ɔ̄cɛ ɔhá má, anɔ́ɔ ó da ɔ́ ka ɔ́ɔ̄ kóocōō lɛ odée fīyɛ̄ anúɔ, anɔ́ɔ ɔ̄cɛ ā cɛ̄ lɛ odée fīyɛ̄ ɔ̄ le ágbe yá ɔ̄ á.

³⁸Anɔ́ɔ ɔ̄comɛ́ɛbɛ ā gaá kwú igbogbo ú gbō eyī gaá háyi ɔwɛ gbēyī Áhābu, ɔcɛ́ ā, ka ɔ́ɔ̄ wā í yɛ á.

³⁹Abɔ̄ Áhābu wā gaá yɛ ā, ɔ̄comɛ́ɛbɛ ā le ɛgba dɛ̄ hī ɔcɛ́ ā igwú, anɔ́ɔ ó da ɔ́ ka Ágábáidu, anúɔ nyɔ̄ í kpɛ́fú, anɔ́ɔ ícɔ́ɔ́ja éyi lɛ ɔ̄cɛ éyi nēé kwú ɔgbɛ́fú ā bī wā anɔ́ɔ ó da anúɔ ka anúɔ leyīkwu ɔ́. Ó ka ɔ́ɔ da anúɔ ka ɔ́dāŋ nɛ̄ anúɔ cɛ̄ lɛ ɔ̄cɛ ā le kwu ɔwɛ dúúmā, oyēeyī kú anúɔ ɔ́ɔ géē kwɛyí oyēeyī kú nū, ámāŋ anúɔ géē gbā íne kú ije nɛ̄hɛ́ úlā ahāapa cofu igwó (3,000) lɛ anúɔ ɔ́dāŋ koó le kwu.

⁴⁰Ó klla da ɔcɛ́ ka abɔ̄ anúɔ gbɔɔ́ ō yúklɔ́ ɔhá nɛ̄hi ā, anɔ́ɔ ɔ̄cɛ nɛ̄ ɛ́ɛ bī gē lɛ anúɔ ā, ɔ́ɔ kwú kwu á. Anɔ́ɔ Áhābu tá ɔ̄ ohi kahíníī, “A lɛ ɛpɔ̄ ka tū īyī uwɔ ɛɛ́, a géē cíla anú ulé kú ɔ̄cɛ nōo je kwu ɔ́ɔmā piíí.”

⁴¹Anɔ́ɔ ɔ̄comɛ́ɛbɛ ā kwu ɔdā nōó le gbēyī ā ú híla ŋmá eyī, anɔ́ɔ Áhābu lɛ ɔ́ jé ka, ɔ́ɔ wɛ éyi kú ācomɛ́ɛbɛ kú Óndú ā nɛɛ.

⁴²Ɔ̄comɛ́ɛbɛ ā da Áhābu, ɔcɛ́ ā ka ɛlā nɛ̄ Óndú ā ɔ́ɔ ka lɛ anúɔ ā yɔ̄ á. Ó ka ɔ́ɔ ka ohígbū nɛ̄ awɔ cɛ̄ lɛ ɔ̄cɛ nɛ̄ anúɔ kéē lɛ ɔ́ ŋmó ā ka ɔ́ɔ̄ le kwu ā, anú géē bī oyēeyī kú nū cíla ulé nū. Ó klla da ɔ́ ka ɛ́ɛ géē je aícɔ́ɔja kú ɔlɛ́ nū kpó ŋmó ŋmáajɛ dúúdú, ohígbū koó cɛ̄ lɛ aícɔ́ɔja kú ɔ̄cɛ ɔɔ́mā le pɛ́ kwu dúú ā.

⁴³Anɔ́ɔ Áhābu, ɔcɛ́ ā, kwúcē ga Usamérīya mɛ́mla ɔtūnōbí mɛ́mla ɛlá ōgbo á.