Read idoma 1 AƆ́CƐ́ 3 Bible Online

1 AƆ́CƐ́ 3 - idoma bible

1 AƆ́CƐ́ 3

¹Usólōmɔn le pīyatɔ̄há mɛ́mla ɔcɛ́ kú Íjīpiti ŋmá o lɛ ɔyínɔ̄nyā kú ɔcɛ́ kú Íjīpiti ā. Usólōmɔn lɛ ɔnyā ā bī wā í lā ipú igelī nɛ̄hi kú Udéfīdi jāā gbéeko nōó lɛ inu kú abɔ̄yī nū mɛ́mla Agblīihɔ-nɛ̄hi kú Óndú ā mɛ́mla ɔdɔ nōo yɛ Ujerúsālɛm ā tá ā gwó mɛ.

²Abɔ̄ é gwó Agblīihɔ-nɛ̄hi kú Óndú ā ɛɛ́ ŋ́ mā, ācɛ bā í gwɛ́ɛya ɛyí ede kú ɛyí ɛfu ɛcɛ ɛga dóódu.

³Óndú ā he Usólōmɔn ɔtū nɛ̄hi anɔ́ɔ ó gē yɛce ɔwɛ kú ádā nū klla ī bī ɛlā nū le yúklɔ́ á. Amáŋ ó gē ŋmó aɛ́bɛ́ alɛwa ī kpó uwā gwɛ́ɛya ɛyí ede alɛwa.

⁴Ɛ̄cī éyi, Usólōmɔn, ɔcɛ́ ā, le tá Ugíbēyɔn gaá gwɛ́ɛya. Ohígbū ka abɔ́ɔ nēé gē gwɛ́ɛya fíyɛ́ dúú á. Ó kē ī kpó aɛ́bɛ́ úlā ɛpa cofigwó gwɛ́ɛya o yɔlá dúúdú ɛyí ede ɔ́ɔmā.

⁵Otū ɔ́ɔmā, Óndú ā gā ɛgiyí Usólōmɔn ipú ɔ̄na gaá da ɔ́ ɔ̄kā kahíníī, “Ɔdí nɛ̄ a dɔɔ̄kā ká n je ga uwɔ ā?”

⁶Anɔ́ɔ Usólōmɔn tá Óndú ā ohi ka ɔ́ɔ ma ihɔtū nɛ̄hi kú nū ā fú lɛ Udéfīdi, ádā anúɔ, eko dóódu. Ohígbū ka ɔ́ɔ yá ucē okpaakpa lɛyíkwu ɔ̄, ɔ́ɔ klla lɛyítáajɛ lɛ ɔ́ klla lɛ ɔtū ɔkwɔ̄ɔ̄kwɛ̄yi ipú ɛma kú nū mla anú. Usólōmɔn da Óndú ā kpɔ́ ka ɔ́ɔ ma ihɔtū nōo ī pīyabɔ̄ ŋ́ mā fú lɛ ádā anúɔ gɔbū, oŋmá ō je ɔyínɔ̄nyīlɔ éyi lɛ ɔ́ kóō cīce akpa kú ɔcɛ́ eko ɔ́ɔmā ā.

⁷Usólōmɔn yɔ̄ ī kɛlā gɔbū kpɔ́ kahíníī, “Óndú, Ɔwɔicō kú um, a klla kwú ami nōo wɛ ɔyínɔ̄nyīlɔ kú ádā um, Udéfīdi ā ú cɔcɛ́ kwɛyí ádā um, nááná nɛ̄ n wɛ ɔyípɛ̄ nɛ̄ n kē jé ɔwɛ nɛ̄ n géē bī lɛ gbō ācɛ ŋ́ mā.

⁸Ami klá ipú ācɛ ɔlɛ́ uwɔ nɛ̄ ɛwa kú uwā í tōō gbaáluka ŋ́ mā.

⁹Ohígbū ɔ́ɔmā, kóocōō, kwú odo ojɔ́dā mɛ́mla íjééyī i ga um nɛ̄ n géē bī le gbō ācɛ ɔlɛ́ uwɔ. Odo nɛ̄ n géē bī le jé ɔdā olɔhi ɛyɛ́ɛ́yí hɛ̄ ɔdōbɔ̄bí tá. Ohígbū ka ɔ́dāŋ nōó lɛ ā ŋ́, abɔ̄ n gáā gbō ācɛ ɔlɛ́ uwɔ nɛ̄hi nēe bá nyā glá ā?”

¹⁰Ɔtū he Óndú ā nɛ̄hi abɔ̄ Usólōmɔn le ɛ̄ba kú íjééyī ba ɔ́ ā.

¹¹Anɔ́ɔ Óndú ā da ɔ́ kahíníī, “Abɔ̄ a lɛ íjéeyī ba, nɛ̄ á ba oyēeyī olīkpō, ámāŋ agbénú, amáŋ ikwú kú aólɛlā kú uwɔ ŋ́ mā,

¹²n géē je ɔdā nɛ̄ a bá ā ga awɔ. N géē je odo ojéeyī mɛ́mla odo ojɔ́dā gā uwɔ, nɛ̄ ɔ̄cɛ dúúmā í gáā yɔ̄ ipú ɛcɛ nyā bɛ̄ɛka awɔ ā ŋ́, ɛɛ́ nɛ̄ ɔ̄cɛ dúúmā í kē gáā yɔ̄ bɛ̄ɛka awɔ ā igbīhi uwɔ ŋ́.

¹³N klla í kpó aɔ́dā nɛ̄ á ba ŋ́ mā ga awɔ. Ipú odúúdú oyēeyī kú uwɔ, n géē kpó agbénú mɛ́mla ojīlīmā gā awɔ fíyɛ́ ɛ́gɛ́nɛ̄ ɔcɛ́ ɔhá dóódu lɛ ipú ɛcɛ nyā.”

¹⁴Óndú klla da ɔ́ ka, ɔ́dāŋ ka ɔ́ɔ lɛyítáajɛ lɛ aíne kú anúɔ klla yɔ̄ ī yɛ ɔwɛ kú anúɔ, ɛ́gɛ́nɛ̄ ádā nū, Udéfīdi ɔ́ɔ yá ā, ka anúɔ í je oyēeyī ōlīkpō lɛ ɔ́.

¹⁵Usólōmɔn le héyī ŋmá iyɔ̄lā, anɔ́ɔ ó má ka, ɔ̄na nɛ̄ anɔ́ɔ nā á. Ó kwúcē wā Ujerúsālɛm gaá háyi iyɔ̄bū ikpati kú kú ɛka kú Óndú ā. Anɔ́ɔ ó le ɛya o yɔlá dúúdú mɛ́mla ɛya kú ɛbɔ́ gwó, klla le ucɛ yá lɛ odúúdú aígabɔ̄ kú nū á.

¹⁶Ɛ̄cī éyi aákwuna ɛpa lɛ iyī uwā kpó wā iyɔ̄bū ɔcɛ́ Usólōmɔn.

¹⁷Anɔ́ɔ éyi kú uwá da ɔ́ ka, Óndú, anúɔ mɛ́mla ɔnyā ɔ́mpa anúɔ nyā lā ipú inu ékpónú á. Ó ka anúɔ le ɔyí ma eko nɛ̄ ɔ́ɔ yɔ̄ inu mɛ́mla anúɔ ā.

¹⁸Anɔ́ɔ ɛ̄cī ɔ́mɛtá igbīhi nɛ̄ anúɔ le ɔyí ma ā, ɔnyā ɔhá ā ɔ́ɔ le ɔyí ma dúú á. Ó ka aá lā ōfōōfū aá. Ɔ̄cɛ dúúmā ɔ́ɔ kē yɔ̄ mɛ́mla aá ŋ́.

¹⁹Ɔnyā yɔ̄ ī kɔkɔ gɔbū ka otú éyi, ɔnyā ɔhá ā ɔ́ɔ má gwutá ce ɔyí nū, kwú ɔ̄ ú da ŋmó.

²⁰Anɔ́ɔ ó nyāŋjɛ ahāpōtú gaá kwú ɔyí anúɔ ú ŋmá iyɔ̄bū anúɔ, eko nɛ̄ anúɔ yɔ̄ í gbiyɔ̄lā ā. Anɔ́ɔ ɔ́ɔ kwú ɔ̄ ú gwutá iyɔ̄bū iyī nū á. Ó klla da ɔcɛ́ ka ɔnyā ɔ́mpa anúɔ ā klla kwú okwū kú ɔyí nū ā ú gaá gwutá iyɔ̄bū anúɔ.

²¹Ɔnyā ā ka eko nɛ̄ anúɔ cāŋjɛ ɔcɔ̄ɔ̄cī gáā je amɛ̄ lɛ ɔyí anúɔ ā, anɔ́ɔ anúɔ má ka ɔyí ā wɛ okwū á. Ó klla ka abɔ̄ anúɔ leyīkwu ɔ́ cíí ā, anɔ́ɔ anúɔ má ka ɔyí ɔ́ɔmā ɔ́ wɛ ɔyí nɛ̄ anúɔ ma ā ŋ́ má.

²²Amáŋ ɔnyā ɔhá ā ka ehée, ɔyí nɛ̄ ɔ́ɔ yēeyī ā wɛ ákú anúɔ á, o ka ɔyí nōo kwú ā kē wɛ ákú ɔnyā aflɛ́yí ā á. Anɔ́ɔ ɔnyā kú aflɛ́yí ā da ɔnyā ɔ́mpa ā ka ɔyí nōo kwú ā ɔ́ɔ wɛ ákú ɔnyā ɔhá ā á, ka ɛ̄nɛ̄ oyēeyī ā wɛ ákú anúɔ á. Ɔwɛ ɛ́gɛ́nyā nēé bá gē táafú mla iyī uwā iyɔ̄bū ɔcɛ́ á.

²³Anɔ́ɔ Usólōmɔn, ɔcɛ́ ā, ká ɔnyɔɔnyɛ kú uwā ɔ́ɔ gē ka ka ɔyí oyeeyī ā wɛ akú anúɔ á, ɔyí nōo kwú ā ɔ́ɔ kē wɛ ákū ɔ́mpa anúɔ.

²⁴Anɔ́ɔ ɔcɛ́ ā le ɔ́da je kéē lɛ akpacáŋgelī bī gé lɛ anúɔ. Anɔ́ɔ é lɛ akpacáŋgelī ā bī gé lɛ ɔ́ á.

²⁵Anɔ́ɔ ó da éyi kú ācɛ nēe ī gbō ɔ̄ ka ɔ́ɔ̄ lɛ ɔyí nōo yēeyī ā yíla ɛpa, cɛ́ɛ́ kú ɔ̄ kwú āyā kú nū éyi ú lɛ ɔnyā éyi, cɛ́ɛ́ ká ɔ̄ kē kwú āyā kú nū ɔhá ā ú lɛ ɔnyā ɔhá ā.

²⁶Anɔ́ɔ ɔnyā nɛ̄ ɔyí nū yēeyī ā, abɔ̄ ó piyɔtū ɔyí nū, da ɔcɛ́ kahíníī, “Kóocō ō óndú um, ó lɛ ā, kwú ɔyí oyēeyī ā ú lɛ ɔnyā ɔhá ā, ā je ɔ́ ŋmó ŋ́.” Amáŋ ɔnyā ɔ́mpa ā tóohi kahíníī, “Ó gáā wɛ ákú um ɛɛ́ nōó gē wɛ ákú nū ŋ́, lɛ ɔyí ā yíla ɛpa lɛ alɔ.”

²⁷Anɔ́ɔ Usólōmɔn, ɔcɛ́ ā da uwá kéē kwú ɔyí oyēeyī ā ú lɛ ɔnyā kú aflɛ́yí ā. Ó kéē híī ŋmó ɔyí ā ŋ́. Ó ka ɔnyā ɔ́ɔ wɛ ɛ́nɛ́ ɔyí ā á.

²⁸Eko nɛ̄ odúúdú ācɛ kú Ísrɛ̄lu le ɛpɔ̄ nɛ Usólōmɔn, ɔcɛ́ ā, hɛ́ ā pó ā, é gbɔɔ́ ō lɛ ojīlīmā ce ɔ́ nɛ̄ɛ̄nɛ̄hi. Ohígbū kéē le jé ka Ɔwɔicō ɔ́ɔ kwú íjééyī ú lɛ ɔ́ ka ɔ́ɔ̄ hɛ́pɔ̄ kpaakpa ɛɛ́.