Read idoma 1 AƆ́CƐ́ 4 Bible Online

1 AƆ́CƐ́ 4 - idoma bible

1 AƆ́CƐ́ 4

¹Usólōmɔn wɛ ɔcɛ́ kú odúúdú Ísrɛ̄lu á.

²Ācɛ nēe bá nyā wɛ aígabɔ̄ nɛ̄hi kú nū á. Ɔ̄cogwɛ́ɛya ā wɛ Asárīya, ɔyí kú Usádɔ̄ku.

³Ɛlihórēfu mɛ́mla Ahíja, ayí kú Ussíssa ā wɛ aɔ́málɛ otɔ́kpá kú ɔlɛ́ ɔcɛ́ á. Ujɛhóssāfāti, ɔyí kú Ahilúd gē leyīkwu ɔkpá nēé gē tá tāajɛ ā á.

⁴Ubenáya, ɔyí kú Ujɛhóyāda wɛ otrɛ̄yí kú aícɔ́ɔja á. Usádɔ̄ku mɛ́mla Abíyāta wɛ ācogwɛ́ɛya á.

⁵Asárīya, ɔyí kú Unátan gē leyīkwu odúúdú aígbómína kú ɛga ɛyɛ́ɛyɛ́yí kú ajɛ ā á. Usábūdu, ɔyí kú Unátan gē nwū ɔcɛ́ ɛlá á.

⁶Ahíssa gē leyīkwu ācoyúklɔ́ kú ɔlɛ́ ɔcɛ́ á. Adónīram, ɔyí kú Ábuda gē leyīkwu úklábɔ̄fú kú ɔlɛ́ ɔcɛ́ á.

⁷Usólōmɔn lɛ ācɛ igwɛ́ɛpa fu kéē wɛ aígbómína kú ɛga igwɛ́ɛpa kú ajɛ kú Ísrɛ̄lu nōó kɔ̄ ā. É géē bá í bī ɔdōlé ŋmá ɛga kú uwā wā ipɔ́ɔ́nū kú ɔlɛ́ ɔcɛ́. Ɔnyɔɔnyɛ kú uwá gē bī ɔdōlé wā ɔlɛ́ ɔcɛ́ ɔgbace ɔgbace, ɔyā dóódu.

⁸Aígbómína igwɛ́ɛpa ā mɛ́mla ɛga kú ajɛ nēé gē leyīkwu ɔ́ ā bá yɔ̄ á. Ubɛnhɔ́ wɛ igbómína kú ɔlɛ́ ɛyí ɛfú kú Ɛ́frem.

⁹Ubendéka wɛ igbómína kú aígelī nɛ̄hi kú Umákasi, Ussáálubím, Ubetissémɛ̄ssi mɛ́mla Ɛ́lɔ̄n Ubɛtiánan.

¹⁰Ubɛnhésedi wɛ igbómína kú Áruboti, mɛ́mla Usóko mɛ́mla odúúdú ajɛ kú Uhɛ́fa.

¹¹Ubɛnabínādabu (ɔyínɔ̄nyā kú Usólōmɔn nēé hī Utáfāti wɛ ɔnyā nū ā) wɛ igbómína kú ajɛ kú Udɔ́ɔ.

¹²Ubaána, ɔyí kú Ahilúdu ā wɛ igbómína kú aígelī nɛ̄hi kú Utáánāku, Umegído mɛ́mla odúúdú ajɛ nēe kwu igelī kú Usáretan ajaajɛ ā, ɛháajɛ kú Ujɛsiríili jāā ga igelī kú Ébɛl Umɛhóla mɛ́mla Ujokmēyam ā.

¹³Ubengéba wɛ igbómína kú Urámɔtu ipú Ugílɛ̄di mɛ́mla aígelī nɛ̄hi kú ācɛ Ujɛ́ɛ, ipú ajɛ kú ipɔ́ɔma kú Umanásɛ nēe bá ajɛ kú Ugílɛ̄di mɛ́mla ajɛ kú Ágɔ̄bu nōo yɔ̄ ipú Ubássan ā. Odúúdú uwā wā aígelī nɛ̄hi ofɛtá nēé le igá hɛ́ tū uwā klla lɛ ogbló kú oje udɔ nēe ī le cílá okómpīinu kú uwā.

¹⁴Ahínādabu, ɔyí kú Íddo wɛ Ugbómína kú Umahánēyim.

¹⁵Ahímāasi nōo lɛ Ubásēmati, ɔyínɔ̄nyā kú Usólōmɔn ɔhá ā, wɛ Ugbómína kú Unáfutāli.

¹⁶Ubaána, ɔyí kú Uhussáyi, wɛ Ugbómína kú Ássa mɛ́mla Ubeyálɔ̄tu á.

¹⁷Ujɛhóssāfāti, ɔyí kú Upárūwa wɛ Ugbómína kú Ísāka.

¹⁸Ussímēyi, ɔyí kú Ɛlā wɛ Ugbómína kú ajɛ kú Ubɛ́njamīn á.

¹⁹Ugɛ́ba, ɔyí Úri wɛ igbómína kú Ugílɛ̄di, nɛ̄ Usíhɔn, ɔcɛ́ kú Ámɔ̄ri mɛ́mla Ógu, ɔcɛ́ kú Ubássan tɛtɛ gbō ā á. Ugbómína éyi yɔ̄ nōo wɛ ɛyɛ́ɛ́yí gwō aóhile nēe bá ā tā, nōo gē leyīkwu odúúdú ajɛ kú Ujúda.

²⁰Ɛwa kú ācɛ kú Ujúda mɛ́mla ācɛ kú Ísrɛ̄lu a lɛbɛ̄ɛka ɔjɛ kú okónu ísu ā. É gē lé klla í gwá, ɔtū kē he uwá nɛ̄hi eko kú Usólōmɔn ā.

²¹Usólōmɔn gē gbō odúúdú aájɔ̄ɔ̄cɛ́ nēe ŋmá ísu kú Uyúfarētīisi jāā ga ipú ajɛ kú ācɛ Ufilístiya mɛ́mla o yɛ ga ɛjī kú Íjīpiti. Odúúdú aéwo ā gē lɛyítáajɛ lɛ ɔ́ klla ī da ije ɔlɛ́ lɛ ɔ́ ɛpléeko nōó wɛ ɔcɛ́ ā.

²²Ɔdōlé kú ɛ̄cī ékpónú kú ipɔ́ɔ́nū kú ɔlɛ́ Usólōmɔn, ɔcɛ́ ā, wɛ okolo umu úlā igwɛ́ɛpa cofigwó (5,000), okolo kú īkpɔ̄dā úlā ofu cɛhɔ̄ (10,000).

²³Aɛ́na ojɔ̄kwū nɛ̄hi igwó. Ɛna ɔlamu ofu. Aálá ofɛhɔ̄, ikpɛ́ɛnū, ɔblá, ɔ́wa, mɛ́mla aúgwu mɛ́mla aígbáanɔ ɛdɔ ɛ́yɛ́ɛyɛ́yí.

²⁴Usólōmɔn gbō ajɛ ā ŋmá ɛnɔ̄ɔ̄nɛ̄ kú ísu kú Uyúfarētīisi ɛgiyí Utífisa ā jāā ga Ugása. Odúúdú aɔ́cɛ́ kú abɔ́ɔ ā lɛyítáajɛ lɛ ɔ́, klla bá ɛbɔ́ mɛ́mla anú.

²⁵Eko nɛ̄ Usólōmɔn cɔcɛ́ ā, ācɛ kú Ujúda mɛ́mla Ísrɛ̄lu bá ɛbɔ́ ipú odúúdú ajɛ kú uwā, gē hɛ́hɔ̄ kú ɔcí kú ufáyin mɛ́mla Ufígi kú uwā.

²⁶Usólōmɔn lɛ aádá úlā ofɛhɔ (40,000) gwó lɛ aɔ́nya kú aúgbɔ́ɔnya kú nū. Ó klla le ɛga ō lɛ ɔnya wū ajɛ anú, úlā ofɛpa cigwó (12,000) gwó.

²⁷Aígbómína kú nū igwɛ́ɛpa ā gē bī ɔdōlé gé lɛ anú mɛ́mla ācɛ ɔlɛ́ nū. Ɔnyɔɔnyɛ kú uwā gē bī ɔcɛ́ mɛ́mla ācɛ ɔlɛ́ nū ɔdōlé ɔyā éyééye.

²⁸Ɔnyɔɔnyɛ kú aígbómína ā gē je ɔdōlé lɛ aɔ́nya mɛ́mla aɛ́bɛ́ ɔlɛ́ kú nū ā dúú á.

²⁹Ɔwɔicō le íjééyī mɛ́mla ohílīpú nɛ̄hi je lɛ Usólōmɔn nɛ̄ɛ̄nɛ̄hi nɛ̄ ɔ̄cɛ dúúmā í lɛ ɔ́ mīya ɔdā dúúmā ɔhá glá ŋ́.

³⁰Usólōmɔn jé íjééyī fíyɛ́ ācɛ ojéeyī kú ɛnɔ̄ɔ̄cī mɛ́mla Íjīpiti kpɛ́mm á.

³¹Anú jíjééyī fíyɛ́ odúúdú ācɛ ohile kú ipú ɛcɛ ɔ́ɔmā kpɛ́mm á. Anú jíjééyī fíyɛ́ Étan, ɔ̄cɛ Ésrah mɛ́mla Uhɛ́mān, Ukálkolu mɛ́mla Udáda, ayí kú Umáhɔlu á. Ācɛ kú ɛga dóódu mɛ́mla ajɛ kú aéwɔhá nēe yɛjīla ɔ́ tá ā le ɔ̄kā kú íjééyī kú nū ā pó dúú.

³²Usólōmɔn kwu ita úlā ahāapa cofigwó (3,000), klla tá ijē fíyɛ́ úlā ɛpa cofigwó (1,000).

³³Ó kɛlā ohígbū aɔ́cí kú Ulɛ́bānɔn ā, kwu ɔcí nēé hī ka uháyísɔ̄pu nōo gē tá klá ɔdɔ ā dúú. Ó kɛlā ohígbū aɛ́bɛ́, aígbáanɔ, mɛ́mla aɛ́bɛ́ ō lɛ āpū mɛ́mla aɛ́béenyi.

³⁴Odúúdú aɔ́cɛ́ kú ipú ɛcɛ nyā le ɔ̄kā kú íjééyī kú Usólōmɔn ā pó kpɛ́mm. É klla í tū ācɛ ɛhɔ̄ nyɔ̄ í jāhɔ̄ lɛ ɔ́.