Read idoma 1 AƆ́CƐ́ 5 Bible Online

1 AƆ́CƐ́ 5 - idoma bible

1 AƆ́CƐ́ 5

¹Uhíram, ɔcɛ́ kú Utáya tɛtɛ wɛ oklóbīya kú Udéfīdi, ɔcɛ́ ā. Eko nōó le pó ka, Usólōmɔn ɔ́ɔ lɛ ɔcɛ́ lé kwɛyí ádā nū Udéfīdi ā, ó lɛ ɛhɔ̄ tū fu Usólōmɔn.

²Anɔ́ɔ Usólōmɔn le ɛhɔ̄ tū cīgbīhi gaá fu ɔ́ ka

³ɔ́ɔ jé ka ohígbū ɛfú nɛ̄ ádā anúɔ Udéfīdi yɔ̄ í kpó ojigógó ā, ɔ́ɔ gwó Agblīihɔ-nɛ̄hi lɛ Óndú ā, nōo wɛ Ɔwɔicō kú nū ā glá ŋ́, jāā gbéeko nɛ̄ Óndú ā cɛ̄ lɛ ɔ́ kóō lɛ odúúdú aólɛlā kú nū ā kpó yálé.

⁴Usólōmɔn klla ka kpɔ́ eko ɔ́ɔma ka amáŋ, Óndú ā, nōo wɛ Ɔwɔicō kú anúɔ ā, ɔ́ɔ le ɛbɔ́ je lɛ anúɔ ipú ajɛ ā, nɛ̄ anúɔ í lɛ ɛfú dúúmā nɛ̄ anúɔ gē kpó ipu ɛjɛ̄ɛ̄jī ajɛ kú anúɔ ɛ́ɛ́ gɛ ŋ́. Ó ka anúɔ í lɛ olɛlā dúúmā ɔhá nɛ̄ anúɔ gē kpɛfú tú ɔ̄ gɛ ŋ́.

⁵Ó ka Óndú ā ɔ́ɔ cokónu lɛ ádā anúɔ, Udéfīdi kahíníī, “Ɔyí uwɔ nōo géē lé ɔcɛ́ igbīhi uwɔ ā géē gwó Agblīihɔ-nɛ̄hi gā um á”. Usólómɔ̄n ka anúɔ kē cɛ̄ abālɔbányā ka anúɔ gáā gwó Agblīihɔ-nɛ̄hi ɔ́ɔmā, kóō wɛ ɛga nēe ī gbā Óndú ā, nōo wɛ Ɔwɔicō kú anúɔ ā ɛɛ́

⁶Ó da ɔ́ ka ohígbū ɔ́ɔmā ā, ɔ́ɔ lɛ ācɛ tɛ̄hɔ̄ ga Ulébānɔn kéē gaá lɛ ɔcí hɛ́ klá ajɛ lɛ anúɔ. Ó ka ācɛ kú ɔlɛ́ anúɔ géē wā í yúklɔ́ mɛ́mla uwá. Ɛdɔ ulé dóódu nɛ̄ ɔ́ɔ ka ā, anúɔ géē cílá ācɛ ɔlɛ́ nū. Usólómɔ̄n da ɔ́ ka ɔ́ɔ kē jé ka ācɛ ɔlɛ́ anúɔ í jé ō hɛ́ ɔcí bɛ̄ɛka ācɛ ɔlɛ́ nū ā ŋ́.

⁷Eko nɛ̄ Uhíram mīyɛ olɛhɔ̄ kú Usólōmɔn nyā, ɔtū he ɔɔ nɛ́hi. Anɔ́ɔ ó ka anúɔ cɛ̄tra Óndú ā klla tá ɔ̄ ahínya. Anú nɛ̄ ɔ́ɔ je ɛdɔ ɔyí ójéeyī nyā lɛ Udéfīdi, cɛ́ɛ́ kóō wɛ ɔcɛ́ kú éwo nɛ̄hi kú Ísrɛ̄lu nyā kwɛyí nū eko ɔ́ɔmā ā.

⁸Anɔ́ɔ Uhíram klla lɛ ɛhɔ̄ ɔhá tū fu Usólōmɔn ka anúɔ le ɛhɔ̄ nɛ̄ ɔ́ɔ tū wā ā pó ɛɛ́. Ó ka anúɔ géē yá ɔdā nɛ̄ ɔ́ɔ ka ā, ka anúɔ klla í hɛ aɔ́cí ā klá ajɛ lɛ ɔ́.

⁹Ó ka ācɛ ɔlɛ́ anúɔ géē kpó ígbɔ́cí ā ŋmá Ulɛ́bānɔn ga okónu ísu, cɛ́ɛ́ é lɛ uwá kpó gbō bɔ́há kwú uwā ú kpó ce eyī éŋkpɔ̄ cɛ́ɛ́ kéē ceyī enyi wā ɔgblɛga, ɛga nɛ̄ a géē kpó uwā ā. Ó klla da ɔ́ ka ācɛ ɔlɛ́ anúɔ í kpó aígbɔ́cí ā kpó wī abɔ́ɔ, cɛ́ɛ́ ācɛ ɔlɛ́ ɔcɛ́ ā lɛ uwá kpó ŋmá abɔ́ɔ. Ó ka ɔdōlé ōfōōfūnū nɛ̄ ɔ́ɔ géē je lɛ ācɛ ɔlɛ́ anúɔ eko nēé géē yúklɔ́ nyā lɛ ɔ́ á.

¹⁰Anɔ́ɔ Uhíram le ɛdɔ ɔcí nɛ̄ Usólōmɔn tíne ā kpó hɛ́ lɛ ɔ́ á.

¹¹Usólōmɔn je ɛkpa kú īkpɔ̄dā úlā ɛhɔ̄ (2,000) mɛ́mla ɔgālā kú anɔ̄ kú ɔcí nēé hī ka ólīifu ā, ulá ɛpa cofigwó (1,000) le Uhíram iháyí dóódu kóō bī le je ɔdōlé lɛ ācɛ ɔlɛ́ nū.

¹²Óndú ā lɛ okónu nōó ce lɛ Usólōmɔn ā tū. Ó lɛ íjééyī je lɛ Usólōmɔn. Ɛbɔ́ klla yɔ̄ ɔtáhɛ́ kú Usólōmɔn mɛ́mla Uhíram. É klla le abɔ̄ tɔ́ɔkpá, kéē lā mɛ́mla īyī uwā ɛbɔ́.

¹³Ācoyúklábɔ̄ kú Usólōmɔn nēé kpó ŋmá Ísrɛ̄lu ā wɛ úlā ofɛtá cigwɛ́ɛhɔ̄ (30,000).

¹⁴Ó klla kwú Adónīram ú kóō leyīkwu uwá. Ó lɛ uwá kpó kɔ̄ igwíígwu kú úlā ofu cɛhɔ̄ (10,000). Ígwu éyééye ā gē nyɔ̄ í yá ɔyā éyi Ulébānɔn, klla í yá ɔyā ɛpa ɔlɛ́ ɛ́ɛ́ kéē géē nyɔ̄ igbɔhá

¹⁵Usólōmɔn klla lɛ ācocɛɔ̄ kú inu ā úlā ofu ahātá ce ulā ɛhɔ̄ (80,000). Ācɛ nēe kē í kpo ɛcɔ̄ wā ɔlɛ́ ā wɛ úlā ofu ahātá ce igwó (70,000).

¹⁶Ācɛ nēe gē leyīkwu úklɔ́ nyā ā wɛ ācɛ ulá ahātá cofɛhɔ̄ (3,300).

¹⁷Usólōmɔn le ɔ́da je lɛ uwá ka ápátɛ́cɔ̄ olɔhi, nōo klla nwuné nēé géē gbā kú etikpa kú Agblīihɔ-nɛ̄hi ā á.

¹⁸Anɔ́ɔ ācoyúklɔ́ kú Usólōmɔn mɛ́mla ācoyúklɔ kú Uhíram, ɔcɛ́ ā, mɛ́mla ācɛ nēe ŋmá igelī kú Ugɛ́balu ā lɛ ɛcɔ̄ mɛ́mla ɔcí ō le gwó Agblīihɔ-nɛ̄hi ā tútū.