Read idoma 1 AƆ́CƐ́ 7 Bible Online

1 AƆ́CƐ́ 7 - idoma bible

1 AƆ́CƐ́ 7

¹Usólōmɔn le agblɔ̄cɛ́ kú abɔ̄yī nū gwó dúú. Ó gwó inu ā iháyí igwɛ́ɛtá, anɔ́ɔ ó kwú ɔ̄ ú gwó kwɛyí á.

²Ó le inu nēé hī ka agbla kú Ūpū kú Ulɛ́bānɔn ā gwó dúú. Olīkpō kú nū wɛ ikpó ofahāapa cigwó. Olɔwá kú nū wɛ ikpó ofɛtá cigwɛ́hɔ̄. Olicō kú nú wɛ ikpó ofɛpa cɛ̄hɔ̄. É le aɔ́gba ɛtá kú akanába kú ɔcí nēé hī ka ɔcí usɛ́da kú ulɛ́bānɔn kpó kwu ɔ́. Aákanaba ā wɛ igwɛ́ɛhɔ̄ nēe bá ɔgba éyééye. É le ɔcí nēé hī ka usɛ́da ā kpó ce aákanaba ā ā ɛyí.

³Ɔcí usɛ́da ofɛpa cɛhɔ̄ nōo cɛyí ákanaba igwɛ́ɛhɔ̄ nēe kwu ɔgba ɛtá ā nēé bī le gba inu aā.

⁴Aúwíndo ɛtɛ́ɛ́tá hɔ́ɔgba tū abɔ̄ ɛpa kú ɔdɔ ā. Aúwíndo pīyēyi tú iyī uwā klla hɔ́ɔgba ɛtá tū ɔdɔ ā dúú.

⁵Odúúdú ɔcí kú uwíndo ā mɛ́mla ɔcí kú okómpīinu ā lɛ ɔ́kíkā ɛnɛ. Aúwíndo hɔ́ɔgba ígwu ɛtɛ́ɛ́tá klla lɛ eyī pīya kwu īyī uwā.

⁶Ó bī upíla le Agbla kú Aúpíla gwó. Olīkpō kú nū wɛ ikpó ofɛtá cigwɛ́hɔ̄, olɔwá kú nū kē wɛ ikpó ofɛpa cɛhɔ̄. Ó le áklɔ̄kpɛ gwó kwu ɔ́ iyɔ̄bū, le aúpíla kpó kwu ɔ́. Anɔ́ɔ ó le ɔ́ fīyɛ̄ klá aúpíla ā á.

⁷Inu kú akpa kú ɔcɛ́ kú nū ā, nōó hī ka, “Agbla Ɛgohɛ́pɔ̄ ā, yɔ̄ anú dúú.” Abɔ́ɔ ā nɛ̄ Usólómɔ̄n gē cīce ī hɛ́pɔ̄ á. Ó le ɔcí nēé hī ka usɛ́da ā hɛ́ bá ɔdɔ kú nū ŋmá ajɛ jāā kwu aflá kú icō.

⁸Inu ákú abɔ̄yī nū, nōo kwu igbīhi Agbla Ɛgohɛ́pɔ̄ ā, é lɛ ɔ́ gwó bɛ̄ɛka aínu ohile ā dúú. Ó lɛ ɛdɔ inu ékpónú ɔ́ɔmā gwó lɛ ɔnyā nū, nōo wɛ ɔyínɔ̄nyā kú ɔcɛ́ kú Íjīpiti ā.

⁹Ɛcɔ̄ ōgbɔɔ́lá nɛ̄hi nɛ̄ ācɛ ɔlɛ́ nū gbā ā nēé bī le gwó odúúdú aínu nēe bá ā mɛ́mla Agbla Ɛgohɛ́pɔ̄ nɛ̄hi ā mɛ́mla aóhile ā á, o ŋmá ikpíinu jāā gicō kú uwā. É gbā ɛcɔ̄ ā ŋmá lɛ ɛ́gɛ́nɛ̄ é miya uwá lɛ ā, kwu eyīpú kwu eyīyɛ̄ɛcɛ kú nū. É bī usɔ́ɔ le áklō kú ɛcɔ̄ ā kpó yá mɛ́ɛ́lɛ́ kpɛ́mm.

¹⁰Aígbɛ́cɔ̄ nɛ̄hi nōo likpō kú aóhī kú uwā lɔfú lɛbɛ̄ɛka ikpó igwɛ́ɛhɔ̄, ámāŋ ka ikpó igwɛ́ɛpa ā, nēé bī le táajɛ kú aíkpínu ā á.

¹¹Ɛcɔ̄ ōgbɔ́ɔlá ɔhá nēé gbā ā mɛ́mla aígbɔ́cí kú usɛ́da, nēé gbā ɛ́gɛ́nɛ̄ é tɛtɛ miya uwá táajɛ lɛ ā, nēé bī le hɛ́ ɔdɔ kú aínu ā gicō kpɛ́mm á.

¹²Inu kú ɔcɛ́ ā, mɛ́mla inu eyīpú kú Agblīihɔ-nɛ̄hi ā, mɛ́mla okómpinu kú Agblīihɔ-nɛ̄hi ā, é le aígbɔ́cí kú usɛ́da cila ɛplá ɔgba ɛtɛ́ɛ́ta kú aigbɛ́cɔ̄ plla ce ɔdɔ ā kú aígbɛ́cɔ̄ nēé gbā. Ɔwɛ ɛ́gɛ́nyā nēé bī le gwó aínu ā gicō kpɛ́mm lɛ á.

¹³Usólōmɔn le ɛhɔ̄ tū kéē lɛ ɔ̄cɛ éyi nēé hī ka Uhúram, nōo lā igelī nɛ̄hi kú Utáya, nōó wɛ ɔ̄coyúklábɔ̄ kú oje udɔ nɛ̄hi ā hīgwú wā.

¹⁴Ádā nū ŋmá Utáya, amáŋ ó tɛtɛ wɛ ɔ̄coyúklábɔ̄ nɛ̄hi dúú. Ɛ́nɛ́ kú Uhúram ŋmá ipɔ́ɔma kú Unáfutāli. Uhúram jē úklábɔ̄ nɛ̄hi. Anɔ́ɔ ó cīgwú nɛ̄ Usólōmɔn hī ɔ̄ ā. Anɔ́ɔ ó gaá mīyɛ úklábɔ̄ kú oje udɔ o yá tū ɔlɛ́ ā á.

¹⁵Uhúram bī okolo kú oje udɔ le aúpíla ɛpa ma. Olīkpō kú nū wɛ ikpó ofucahāapa, oyɛjīlanú tá koolo kú nū wɛ ikpó igwáahātá.

¹⁶Ó klla le ɔ́nɔ́ngblɔ kú oje udɔ ɛpa ma. Olīkpō kú ɛpɛplɛ́ɛpa kú uwā wɛ ikpó ahāapa ce āyā. Cɛ́ɛ́ kóō géē je kpó pīya ce ɛyí aúpíla ɛpa kú aflɛ́yí nōó ma ā.

¹⁷Ó bī agbá ō jítɔ̄há kú oje lɛ ija he tū ikpɛ̄yí icō kú aúpíla ā.

¹⁸Ó klla bī oje udɔ ā lɛ ɔgba ɛpa kú ikpō kú ɔcí nēé hī ka upɔmegrɛ́nēeti ā ma tū uwā dúú.

¹⁹É le aɔ́nɔ́ŋgblɔ ā yá bɛ̄ɛka ododó ā. Olīkpō kú nū lɛbɛ̄ɛka ikpó ɛhīlī ā.

²⁰Anɔ́ɔ ó kwú ɔ̄ ú kpó ce ɛga yōōlō kú ɛhícō kú agbá kú aúpíla ā á. Ó le īkpɔ̄cī kú upɔmegrɛ́nēeti ofigwó ɔgba ɛpa hijā tū éyééye kú ɔ́nɔ́ŋgblɔ ā, ofɛhɔ̄, (100) bá ɔgba éyééye.

²¹Anɔ́ɔ Uhúram kwú aúpíla ɛpa ā ú kpó bū tū okómpīinu kú Agblīihɔ-nɛ̄hi ā. Ó hī ɛ̄nɛ̄ o kwu ɛháajɛ kú Agblīihɔ-nɛ̄hi ā ka Ujákin, ó kē hī ɛ̄nɛ̄ o kē kwu ɛhícō ā, ka Ubówāsi.

²²Ɔ́nɔ́ŋgblɔ̄ nēé yá bɛ̄ɛka ododó ā kē le pīya jíla aúpíla ā ɛyí. Anɔ́ɔ úklɔ́ kú aúpíla ā gaá mɛ á.

²³Anɔ́ɔ Uhúram klla le utánki kú oje udɔ ma. Ɛ́gɛ́nɛ̄ ó nwuné lɛ ā yɔ̄ á. Oŋmá okónū ogwu éyi ga ɔhá ā wɛ ikpó igwɛ́ɛhɔ̄. Oŋmá okónu ogwu kú nū ga ɛháajɛ kú nū wɛ ikpó ahāapa ce āyā. Oŋmá áklō kú nū éyi ga ɔhá yɛjīlatá biílí kú nū wɛ ikpó ofɛpa cɛhɔ̄.

²⁴Ó klla lɛ ɔgba ɛpa kú ógo ɔcí kú oje udɔ ma kwu utánki ā ɛhícō. É ma uwá tɔ̄há mla utánki eko nēé ma ɔ́ ā.

²⁵Ó le utánki ā ma cɛyí aɛ́na kú oje udɔ́ igwɛ́ɛpa. Ɛtá kú uwá lɛ eyī pīya kwu ɛnɔ̄ɔ̄cī, ɛtá ɔhá kē leyī pīya kwu ɛnɔ̄ɔ̄nɛ̄, ɛtá ɔhá leyī pīya kwu ɛhícō, ɛtá ɔhá ā leyī pīya kwu ɛháajɛ.

²⁶Abɔ̄ kú ɔ̄cɛ í yɛ ocɔkpɛ́nú kú nū jīla glá ŋ́. É le okónu nū ā cēwɛ̄cɛ bɛ̄ɛka ákú íkókwū, ámāŋ ka ɛ́gɛ́nɛ̄ ododó gē nwūla wɛɛcɛ ā. Utánki ā lɔfú bī ɔjá kú éŋkpɔ̄ úlā ofu cofigwó (12,000) glá.

²⁷Anɔ́ɔ Uhúram klla lɛ ítēbulu nōo lɛ akā igwó ma ŋmá oje udɔ á. Olīkpō kú éyééye kú uwá ā wɛ ikpó ɛhīlī, ɔwá kú nū kē wɛ, ikpó ɛhīlī, anɔ́ɔ o licō kú nū kē wɛ ikpó ɛnɛ ce āyā.

²⁸Ítēbulu nyā kē lɛ oje oplákátá ōce ɛyí nū. Oje oplátáká ā klla wu ɛplá oje nēé yá ikpó kú nū ɛnɛ ā.

²⁹Ó le ijā kú ágábá, ɛna, ucérūbim he tū ipú oje oplákátá ā. Ɛplá kú ɛga nēé kpó ofu kú ɛna mla ágábá mla ucérūbim tū ipú ofúlēnjē ā, ó le ijā kú ɔdā okɛnɛ́kɛnɛ́ ɛyɛ́ɛyɛ́yí he tū ɔ̄.

³⁰Itébulu kú oje udɔ ā le akā ɛnɛ mɛ́mla aóje udɔ gblógbló nɛ̄ akā ā wu ɔ́ ā. Ɔdā ō lɛ ocíbú ce yɔ̄ ɔ́kíkā ɛnɛnrɛ́ɛnɛ kú nū, é kē le ofu kú ēpū ojíla tɔ̄há yá ikpó ā dúú.

³¹Ɛhícō kú utébulu o lɛ akā ā lɛ oje okokolo éyi nēé le cɛyí nū. Oje ā le tú wɛ̄ɛcɛ bɛ̄ɛka ikpó éyi ce āyā ā. Ɛga nōo tɔ́ɔtɛ́ kú nū ā kē wɛ ikpó ɛpa ce o kɔ̄ ɛga ɛnɛ oŋmá ābɔ̄ éyi ga ābɔ̄ ɔhá. É kē bī ofu kú ēpū o jíla tɔ̄há le yá ɔ̄ ifa. Oje oplákátá ā lɛ ɔ́gɔgɔ́ ɛnɛ, ó wɛ okokolo ŋ́.

³²É le akā ɛnɛ yá kwu ikpó kú utéblu ā, ó wu oje gblógbló nēé ma tɔ̄há mɛ́mla utéblu ā. Olɔwá kú aákā a wɛ ikpó ɛpa ce okɔ̄ ɛga ɛnɛ.

³³Aákā kú utéblu ā lɛbɛ̄ɛka akā kú úgbɔ́ɔya ā. Oje udɔ nēé bī le yá oje ogblógbló mɛ́mla oje oyoolo kú akā ā mɛ́mla usipóku mɛ́mla uhɔ́bu kú nū á.

³⁴Odōbī oje kwɔhá ɛnɛ kwu ɔ́kíka ɛnɛ kú ikpó kú utéblu ā. Oje ékpó nēé bī le yá uwā á.

³⁵Aflá kú oje nɛ̄ ɔwá kú nū nwuné fíyɛ́ ikpó éyi ā cɛyí utéblu olakā ā. Oje ékpónú nēé le yá oje nōo kwu utéblu ā ikpó kéē lɔfú iyē ā mɛ́mla oje oplákátá ō cɛyí utéblu ā á.

³⁶É le ofu kú ucérūbim mɛ́mla aálī mɛ́mla aágábá hijā tū oje plákátá, ɛgā pēē nōo táajɛ ipú nū ā. É klla le ofu kú ēpū ōjílatɔ̄há hijā tū ɔ̄ jīla tá.

³⁷Ɛ́gɛ́nyā nɛ̄ Uhúram yá aútéblu igwó nōo lɛ akā ā á. É yá odúúdú uwā jōnjīlɛ̄, é klla lɛ ɔ́gɔgɔ́ ɛdɔ ékpónú.

³⁸Uhúram klla le ɔgbanjɛ̄ igwó yá, éyééye kú nū cɛyí utéblu o lɛ akā ā éyééyē. Oŋmá ābɔ̄ okónū kú ɔgbanjɛ̄ ā ga ābɔ̄ ɔhá kú nū wɛ ikpó ɛhīlī, éyééye kú nū lɔfú bī ɔgálūwā kú énkpɔ̄ ofigwóléyi glá.

³⁹Ó kwú aútéblu ɛhɔ̄ ā ú kpó háyi ābɔ̄ ɛháajɛ kú Agblīihɔ-nɛ̄hi ā. Óle ɛhɔ̄ ɔhá kwú ābɔ̄ ɛhícō. Anɔ́ɔ ó kwú utánki nēé hī ísu nɛ̄hi ā ú háyi ɛplá kú ābɔ̄ kú ɛháajɛ mɛ́mla ɛnɔ̄ɔ̄cī kú Agblīihɔ-nɛ̄hi ā.

⁴⁰Uhúram klla le aɛ́tɛ́, aúsóbɛ̄lu o bī fɔ́ɔlá mɛ́mla aócíbú kpó yá. Ɛ̄nyā wɛ oŋmɛ́yí kú uklɔ́ nōó yá lɛ Usólómɔ̄n, ɔcɛ́ ā, kú Agblīihɔ-nɛ̄hi kú Óndú nōó gwó ā á.

⁴¹Aúpíla ɛpa mɛ́mla aɔ́dā ɛpa nēe lɛbɛ̄ɛka ocíbú nōo ce ikpɛ́yí nū ā. Kwu agbá nēé jílatɔ̄há nēé le yá aúpíla ā ifa ā.

⁴²Aíkpō kú ɔcí kú upɔmegrɛ́nēeti úlā (400) éyi nēé yá playi ɔgba ɛpa kú aágbá ā. Ɔ́ɔmā lé ka aíkpō kú upɔmegrɛ́nēeti ofɛhɔ̄ nēé yá tū agbá éyééye nēé hā ɔgba ɛpɛɛpa kú nū tū icō kú aúpíla ā.

⁴³Itébulu igwó nōo lɛ akā kú oje udɔ nōó yá mɛ́mla oje oplákátá ō cɛyí uwā ā.

⁴⁴Utánki kú oje udɔ mɛ́mla aɛ́na igwɛ́ɛpa kú oje udɔ nōó yá utánki ā cɛyí uwā ā.

⁴⁵Ɛtɛ́ mɛ́mla ocíbú mɛ́mla usóbɛ̄lu o bī fɔ́ɔlá ā mɛ́mla aɔ́gbanjɛ̄ ā. Ɛ́nɛ́nɛ̄ oje udɔ olɔhi nɛ̄ Uhúram bī le yá odúúdú iyó kú Agblīihɔ-nɛ̄hi nōó yá lɛ Usólōmɔn kpɛ́mm á.

⁴⁶Ɔ̄gɔ̄ kú ɔmɛ nōo yɔ̄ ɔtāhɛ̄ kú Usúkōtu mɛ́mla Usáretan, ɔpɛ́ kú Ujɔ́dan ā nɛ̄ Usólómɔ̄n, ɔcɛ́ ā, je lɛ Uhúram nōó le yá odúúdú aɔ́dā nēe bá ā kpɛ́mm á.

⁴⁷Usólōmɔn í lɛ uwá ce oje o bī miya ɔdā ogbɛnú cɛ́ɛ́ kóō má ōgbɛnú kú uwá ŋ́, ohígbū kéē le nwuné gla ajɛ.

⁴⁸Usólōmɔn cɛ̄ lɛ uwa bī oje ɔdɔ (ugoolu) le hijā tū Agblīihɔ-nɛ̄hi ā dúú. Ɛyí ede kú Óndú ā, mɛ́mla ɛga nēé gē lɛ igbō kú ɛya nēé gē gwó ā ce ā wɛ ugóolu (oje ɔdɔ)

⁴⁹Aɔ́dā ōlé agege ce ɔ́ igwó ā nōo gē háyi iyɔ̄bū kú ɛga otīihɔ fíyɛ́ dúú ā, nēé le ɛhɔ̄ háyi ābɔ̄ ɛháajɛ, nɛ̄ ɛhɔ̄ klla háyi ābɔ̄ ɛhícō, mɛ́mla ododó, mɛ́mla agege, alápā ō bī je ahɔ̄lá,

⁵⁰aíkókwū mɛ́mla aɔ́gbanjɛ̄, aócíbú kú ɔtulalī, mɛ́mla aócíbú ōbī le fɔ́ɔlá, mɛ́mla aɔ́gɔ̄ nēé ī le odūngwɔ́wɛ kú eyīpú Agblīihɔ-nɛ̄hi ā wu ā. Odúúdú aɔ́dā nēe bá ā, oje ɔdɔ (ugoolu) nōó bī le yá uwā á.

⁵¹Eko nɛ̄ Usólōmɔn le úklɔ́ kú Agblīihɔ-nɛ̄hi ā yá kwɛyí ā, odúúdú ɔdā nɛ̄ ádā nū Udéfīdi kpó le Óndú ā, kwu oje nɛ̄hɛ́, oje ɔdɔ, oje udɔ mɛ́mla aɔ́dɔ̄há ohile kpɛ́ɛ́m ā, Usólōmɔn kwú uwā ú kpó tū ɛga o kpó ɔdā tū kú Agblīihɔ-nɛ̄hi ā.