Read idoma 1 AƆ́CƐ́ 9 Bible Online

1 AƆ́CƐ́ 9 - idoma bible

1 AƆ́CƐ́ 9

¹Eko nɛ̄ Usólōmɔn lɛ Agblīihɔ-nɛ̄hi mɛ́mla agbla kú ɔcɛ́ kú nū mɛ́mla ɔdā dóódu ɔhá nōó tíne ō gwó ā gwó mɛ ā.

²Óndú ā gā ɛgiyí nū igbɔhá ɛ́gɛ́nɛ̄ ó tɛtɛ wā ɛgiyí nū Ugíbēyɔn ā.

³Anɔ́ɔ Óndú ā da ɔ́ kahíníī, “N lɛ ɔkɔ nɛ̄ a gbā ā mɛ́mla ɛ̄ba nɛ̄ a ba iyɔ̄bū um ā pó ɛɛ́. N lɛ ɔhá hɛ́ ce inu nɛ̄ a gwó nyā klla kwú ɔ̄ ú pīya ɛga nɛ̄ ācɛ í wā í gbā um ɛ̄gbā piyóó ipú ɛcɛ ɛɛ́. N géē leyīkwu abɔ́ɔ, ɔtū kú um klla í kwu abɔ́ɔ piyóó.”

⁴Óndú klla da ɔ́ kahíníī, “Awɔ ā, ɔ́dāŋ ka a lɛyítáajɛ gā um kpaakpa ɛ́gɛ́nɛ̄ ádā uwɔ Udéfīdi lɛyítáajɛ gā um ā. Ɔ́dāŋ ka a lɛ aíne kú um tū nɛ̄ a kē í yá ɛjɛ̄ɛ̄jī ɔdā nɛ̄ n tū uwɔ ukɔ́ kú nū ā,

⁵n géē lɛ okónu nɛ̄ n ce lɛ ádā uwɔ, Udéfīdi ka ayí nū géē wɛ ɔcɛ́ kú Ísrɛ̄lu piyóó ā tū

⁶Amáŋ ɔ́dāŋ ka awɔ, amáŋ ayí uwɔ í lɛ íne kú um tū gɛ ŋ́, nɛ̄ aá gbɔɔ́ ō gbā aɔ́wɔ ɔhá ɛ̄gbā,

⁷eko ɔ́ɔ́mā, n géē je ācɛ ɔlɛ́ um, Ísrɛ̄lu kpó ŋmá ipú ajɛ nɛ̄ n je lɛ uwá ā. N klla í je igbīhi cē kwu inu nɛ̄ n hɔ́hā ce ɔ́ ícɛ ka iyē kú um géē yɔ̄ abɔ́ɔ nōó klla í wɛ ɛga nɛ̄ ācɛ í gbā um ɛ̄gbā ā. Ísrɛ̄lu géē je pīya ɔdā nɛ̄ ācɛ í bī le kwu ita, ācɛ dóódu kē í yá ɔ̄ okónu.

⁸Agblīihɔ-nɛ̄hi nyā, gē je wúlatāajɛ klla í je tá alácɛ̄. Ɔ̄cɛ dúúmā nōo wā í yɛ, lɛ ɔ́ má géē tɔ́cɔ́ɔ, géē mī ɛyí jigijigi ka, ‘Ɔdí yá nɛ̄ Óndú ā yá ɛ̄nyā lɛyíkwu ajɛ nyā mɛ́mla Agblīihɔ-nɛ̄hi nyā ā?

⁹Cɛ́ɛ́ é klla í tá īyī uwā ohi kahíníī, “Ohígbū kéē kwú igbīhi í pīya kwu Óndú ā, nōo wɛ Ɔwɔicō kú uwā, nōo kpó uwā bɛ̄cɛ ŋmá Íjīpiti ā. É nyɛ̄ɛ̄ gaá mīyɛ aɔ́wɔ ɔhá, anɔ́ɔ é gaá gbɔɔ́ ō gbā aɔ́wɔ ā ɛ̄gbā á. Ɔdā ɔ́ɔmā yá ɛɛ́ nɛ̄ Óndú ā bī odúúdú ɔdōbɔ̄bí nyā wā í klá uwá á.”

¹⁰Ó je Usólōmɔn iháyí ofu kóō gwó Agblīihɔ-nɛ̄hi ā, mɛ́mla agbla kú ɔcɛ́ kú nū ā kwɛyí.

¹¹Uhíram, ɔcɛ́ kú Utáya kpó odúúdú aɔ́cí mɛ́mla oje udɔ nōó cɛgbá ā lɛ ɔ́, nōó bī le gwó aɔ́lɛ́ ā á. Eko nɛ̄ Usólōmɔn le ɔlɛ́ ā kpó gwó kwɛyí ā, ó lɛ igelī nɛ̄ŋcɛ́ kú ajɛ kú Ugálílii kpó lɛ Uhíram.

¹²Eko nɛ̄ Uhíram le aígelī nɛ̄ŋcɛ́ ā má ā, é he ɔ́ ɔtū ŋ́.

¹³Anɔ́ɔ ó da Usólōmɔn ka ɛdɔ ɔlɛ́ nyá nɛ̄ ɔ́ɔ kpó lɛ anúɔ á ā? Ohígbū ɔ́ɔmā ā, é gē hī abɔ́ɔ ka, ajɛ kú Úkábulu jāā kwu eko nɛ̄ é tá ɔkpa nyā a.

¹⁴Ogbɛnú kú oje ɔdɔ (ugóolu) nɛ̄ Uhíram le tɛ̄hɔ̄ fu Usólōmɔn kóō le yúklɔ́ ɔlɛ́ ā wɛ igbo oje ɔdɔ ofɛhīlī (120.)

¹⁵Usólōmɔn bī úklábɔ̄fú le gwó Agblīihɔ-nɛ̄hi ā, mɛ́mla agblɔ̄cɛ́ kú nū. Ó klla bī úklɔ́ ā le kpó ajɛ tū ɛnɔ̄ɔ̄cī kú igelī nɛ̄hi ā. Ó klla bī uwā le tū ɔdɔ kú igelī nɛ̄hi ā mɛ́mla aígelī nɛ̄hi kú Uhásɔ, Umegído mɛ́mla Ugɛ́sa.

¹⁶Ɔcɛ́ kú Íjīpiti ā tɛtɛ le ɛfú kpó tú Ugɛ́sa, mīyɛ igelī nɛ̄hi ā, le ācɛ ā kpó ŋmó, anɔ́ɔ ó klla le igelī ā tɔ̄lá. Anɔ́ɔ ó kwú ɔ̄ ú yá ɔyínɔ̄nyā kú nū éyi ɛhi eko nɛ̄ Usólómɔ̄n, ɔcɛ́ lɛ ɔyínɔ̄nyā ā.

¹⁷Anɔ́ɔ Usólōmɔn le ɔ́ tū gwó á. Ó bī úklábɔ̄fú nyā klla le igelī ā mɛ́mla Ubɛti Uhórɔn nōo yɔ̄ ɛháajɛ ā túgwó dúú.

¹⁸Usólómɔ̄n klla bī úklábɔ̄fú ā le Ubáalāti, Utáma, ipú ígbíli kú Ujúda ā,

¹⁹mɛ́mla odúúdú aígelī nɛ̄hi nēé gē kpó iyó úklɔ́ mɛ́mla ɔdōlé kú nū bá mɛ́mla aɔ́nya mɛ́mla aúgbɔ́ɔnya kú nū tū ā tú gwó. Ó gwó odúúdú ɔdā dóódu nōó tíne ō gwó ā Ujerúsālɛm.

²⁰Ācɛ nɛ̄ Usólōmɔn kpó le yúklɔ́ abɔ̄fú ā wɛ ācɛ kú ajɛ kú Ukénan abɔ̄yī uwā, nɛ̄ ācɛ kú Ísrɛ̄lu í je kpó ŋmó eko nēé mīyɛ ajɛ kú uwā ŋ́ mā.

²¹É wɛ ācɛ kú Ámɔ̄ri, Uhɛ́ti, Upɛ́risi, Uhám mɛ́mla ācɛ Ujɛ́būsi, nɛ̄ ayí uwá mɛ́mla aípɔ́ɔma kú uwá wɛ aɔ́fiyɛ jāā kwu eko nēé tá ɔkpá nyā ā.

²²Usólōmɔn í je ācɛ kú Ísrɛ̄lu abɔ̄yī uwá dúúmā yá ɔfiyɛ ŋ́. Ó lɛ uwá kpó tū aícɔ́ɔ́ja, kwú uwā ú yá aótrɛ̄yí kú aícɔ́ɔja mɛ́mla aótrɛ̄yí kú aícɔ́ɔ́ja o pɛ́ úgbɔ́ɔnya mɛ́mla aícɔ́ɔja o ce ɔnya kú ɛfú.

²³Ācɛ nēe gē leyīkwu úklábɔ̄fú kú Usólōmɔn dúúdú ā wɛ úlā cofahāapa cigwó (550).

²⁴Igbīhi kú eko nɛ̄ ɔyínɔ̄nyā kú ɔcɛ́ kú Íjīpiti nōo wɛ ɔnyā Usólómɔ̄n ā nyɛ̄ɛ̄ ŋmá igelī kú Udéfīdi, le tá ɔlɛ́ abɔ̄yī nū nɛ̄ ɔbá nū gwó ā, Usólómɔ̄n le ajɛ kpó tū ajɛ nōo yɔ̄ ɛnɔ̄ɔ̄cī kú igelī nɛ̄hi ā.

²⁵Usólómɔ̄n gē gwɛ́ɛya ō yɔlá dúúdú mɛ́mla ɛya kú ɛbɔ́ ɛyí ede, nōó gwó lɛ Óndú ā, ipú Agblīihɔ-nɛ̄hi kú nū igbɛɛtá ipú iháyí. Ó klla gē yi ɔtulalī ɔlá lɛ Óndú ā. Anɔ́ɔ Usólōmɔn lɛ Agblīihɔ-nɛ̄hi kú Óndú ā gwó kwɛyí á.

²⁶Usólōmɔn klla gwó aúgbéenyi alɛwa bá Ɛ́siyɔngēba nōo kwu Ɛ́lāti ajaajɛ okónu ísu igwɛ̄bɛ́, ipú ajɛ kú Ɛ́dɔm ā.

²⁷Uhíram klla lɛ ācɛ o pɛ́ aúgbéenyi kú nū ā tɛ̄hɔ̄ nyɔ̄ í yúklɔ́ mɛ́mla ācɛ o pɛ́ aúgbéenyi kú Usólōmɔn ā.

²⁸É le aúgbéenyi ā pɛ́ ga ajɛ kú Ófɛ̄ru gaá le oje ɔdɔ (ugóolu) ɔhá bī gé lɛ Usólōmɔn. Áluka kú nū wɛ igbó oje ɔdɔ (ugóolu) úlā éyi ce ofu (420).