Read idoma 2 AƆ́CƐ́ 10 Bible Online

2 AƆ́CƐ́ 10 - idoma bible

2 AƆ́CƐ́ 10

¹Ayí kú Áhābu ofɛtá ce igwó lā Usamérīya. Ujéhu le ɔkpá tá, anɔ́ɔ ó kwú kpó tɛ̄hɔ̄ fu anyākwɔ́cɛ mɛ́mla ācɛ o leyīkwu ayááyí kú Áhābu á. Ɔdā nɛ̄ Ujéhu tá tū ipú ɔkpá ā yɔ̄ á,

²“Aá gē leyīkwu ipɔ́ɔma mɛ́mla ayí kú ɔlɛ́ ɔcɛ́ á. Aɔ́nya kú ɛfú, aúgbɔ́ɔnya mɛ́mla aígelī nɛ̄hi nēé hɛ́ igá tū uwā ā bá ipú abɔ̄ kú aá. Ɔkwɔɔkwu nɛ̄ ɔkpá nyā gā abɔ̄ kú aá,

³aá kwú éyi kú ayí kú Áhābu nōo cíkā o lé ɔcɛ́ ā ú cɔcɛ́, cɛ́ɛ́ kú aá nuunu kú aá nya ɔ́ tá.”

⁴Amáŋ, aótrɛ̄yí kú ācɛ Usamérīya ā gbɔɔ́ ō yúufi. Anɔ́ɔ é kahíníī, “Ɔwɛ nyá nɛ̄ alɔ géē lɔfú lɛ eyī méyī mla Ujéhu glá ā? Ɔ̄cɛ nɛ̄ Ujóram mɛ́mla Ahasíya í fū ɔ̄ iyē ŋ́ mā ā?”

⁵Anɔ́ɔ aígabɔ̄ nēe gē leyīkwu ɔlɛ́ ɔcɛ́ ā, mɛ́mla ákú igelī nɛ̄hi kú Usamérīya, mɛ́mla ācɛ nēe gē gbō ayí kú ɔcɛ́ ā, le ɛhɔ̄ tū fu Ujéhu kahíníī, “Alɔ wɛ ācocɛ̄hɔ̄ kú uwɔ nɛ̄, ɔdā dúúmā nāa da alɔ, alɔ géē yá, amáŋ, alɔ í gaá je ɔcɛ́ ɔhá dúúmā ce ŋ́. Yá ɔdā dúúmā nāa má ka ɔ́ɔ lɔhi tū uwɔ ā mɛ́ɛnɛ.”

⁶Anɔ́ɔ Ujéhu tá uwá ohi mla ɔkpá ɔhá kahíníī, “Ɔ́dāŋ́ ka aá yɛce um, nɛ̄ aá í yɛce ɔ́da kú um, aá lɛ īkpɛ̄yí kú odúúdú ayí kú ipɔ́ɔnū kú Áhābu kpó hɛ́ gē um Ujesiríili, eko ɛ́gɛ́nyā óócí.” Ayí kú Áhābu ofɛtá cigwó kē bá ipú abɔ̄ kú ɔ̄cɛ o lɛ ojīlīmā éyi kú Usamérīya. Ó yɔ̄ gē bī uwá jɛ̄.

⁷Eko nēé mīyɛ ɔkpá kú Ujéhu ɔ́mpa ā, aígabɔ̄ kú Usamérīya ā le odúúdú ayínɔ̄nyīlɔ kú Áhābu ofɛtá cigwó ā kpó ŋmó, le uwá ɛyí kpó hɛ́ tū ómbilí kwú tɛ̄hɔ̄ fu Ujéhu, Ujésiríili.

⁸Eko nēé le ka lɛ Ujéhu kēé le īkpɛ̄yí kú ayí kú Áhābu ā kpó wā ɛɛ́ mā, ó da uwá ka ɛɛ́ le uwa tīkwū bá okónɔɔwɛ kú igá kú igelī nɛ̄hi ā jāā gbó ɔ̄cɔ̄ɔ̄cī kú oŋmɔ́ɔcī nū.

⁹Ɔ̄cɔɔcī ā, ó le tá okónɔɔwɛ kú igá kú igelī ā, anɔ́ɔ ó da ācɛ nēe bá abɔ́ɔ ā kahíníī, “Ami tū ujɔ̄ tū ɔcɛ́ Ujóram je ɔ́ ŋmó á. Ó wɛ aá lɛ ɛfiyɛ kú ɔ́ɔmā ŋ́, amáŋ ɔnyɛ ŋmó ācɛ ɛ̄nɛ̄ e bá nyā ā?”

¹⁰Ó klla da uwá kahíníī, “Ɛ̄nyā gē mafú ka, ɔdā dóódu nɛ̄ Óndú ā ka lɛyíkwu ipɔ́ɔnū kú Áhābu ā géē yá jīla. Óndú ā le ɔdā nɛ̄ó cokónu kū nū bū okónu kú Ɛláyíja, ɔ̄comɛ́ɛbɛ ā yá ɛɛ́.”

¹¹Anɔ́ɔ Ujéhu klla kwú odúúdú ācɛ ohile kú ācɛ ɔlɛ́ Áhābu mɛ́mla aɔ́máapú nū nēe lā Ujésiríili ā ú kpó ŋmó. Ó le aígabɔ̄ mɛ́mla aóklóbīya nū, mɛ́mla ācogwɛ́ɛya kú nū kpó ŋmó dúúdú, jāā gbéeko nɛ̄ ɔ̄cɛ dúúmā kú uwā í hile ŋ́.

¹²Anɔ́ɔ Ujéhu nyɛ̄ɛ̄ gbɔɔ́ ō ga Usamérīya. Abɔ̄ ó yɔ̄ í nyɔ̄ ɔwɛ ā, ɛga nēé hī áklɔ̄kpɛ kú ācogbāálá ā,

¹³Ujéhu jīla aɔ́máapú kú Ahasíya, ɔcɛ́ kú Ujúda ōhī ɔwɛ. Anɔ́ɔ ó da uwá ɔ̄kā kahíníī, “Ānyɛ nɛ̄ aá wɛ ā?” Anɔ́ɔ é tá ɔ̄ ohi kahíníī, “Alɔ wɛ ɔmáapu kú Ahasíya, alɔ yɔ̄ ī nyɔ̄ ga Ujésiríili gaá má Ujésēbɛ̄lu, ɔcányā mɛ́mla ayí ɔlɛ́ ɔcɛ́, Ujóram mɛ́mla Áhābu.”

¹⁴Anɔ́ɔ Ujéhu le ɔ́da je lɛ ācɛ ɔlɛ́ nū kahíníī, “Aá le uwá kpó kwú oyēeyī.” É le uwá kpó kwú, anɔ́ɔ Ujéhu kwú uwá ú kpó ŋmó ɛgiyí ɔ̄gɔ̄ éyi nōo kwu abɔ́ɔ ajaajɛ ā. É wɛ ācɛ ofɛpa ce ɛpa, ɔ̄cɛ dúúmā kú uwā í hile ŋ́.

¹⁵Ujéhu gbɔɔ́ kóō nyɔ̄ iyāwu kú nū, anɔ́ɔ ó klla gaá jīla Ujónādabu, ɔyí kú Urékabu ɔwɛ. Ujéhu le okónu hɛ́ tā ɔ̄ anɔ́ɔ ó le ɔ̄kā da ɔ́ kahíníī, “Awɔ mɛ́mla um gē gbɛlá ékpónú úū? A géē yɛce um m?” Anɔ́ɔ Ujónādabu cɛ̄ ka anɔ́ɔ géē yɛce ɔ́. Anɔ́ɔ Ujéhu da ɔ́ kɔ́ɔ̄ lɛ abɔ̄ je lɛ anúɔ. Anɔ́ɔ é kwú abɔ̄ ú fúlá tū iyī uwā abɔ̄ á. Anɔ́ɔ Ujéhu kwú abɔ̄ ú tū ɔ̄ abɔ̄ wā ipú úgbɔ́ɔnya klla da ɔ́ kahíníī,

¹⁶“Wā mla um kú ā má ɛ́gɛ́nɛ̄ n lɛyítáajɛ lɛ Óndú ā, gē yúklɔ́ lɛ ɔ́ lɛ ā.” Anɔ́ɔ é le yɛ tɔ̄há ga Usamérīya á.

¹⁷Eko nēé gā ā, Ujéhu le odúúdú aɔ́máapú kú Áhābu kpó ŋmó, o dúú kú uwá í hile ŋ. Ɛ̄nyā wɛ ɔdā nɛ̄ Óndú ā da Ɛláyíja ka ɔ́ɔ géē yá ipíinu kú Áhābu á.

¹⁸Ujéhu le odúúdú ācɛ Usamérīya kpó hīgwú tɔ̄há, anɔ́ɔ ó da uwá kahíníī, “Áhābu, ɔcɛ́ kú Ísrɛ̄lu gē gbā Ubáalu ɛ̄gbā lígílígí, amáŋ ami ā gáā gbā Ubáalu ɛ̄gbā fíyɛ́ ɔcɛ́, Áhābu mɛ́mla ācɛ ɔlɛ́ nū á.

¹⁹Aá le odúúdú ācɛ o gbā Ubáalu ɛ̄gbā ā kpó hīgwú wā, kwu odúúdú ācogwɛ́ɛya kú nū ā. Ɔ̄cɛ dúúmā kú uwā kóō híī hile táajɛ ŋ́. N gáā gwɛ́ɛya nɛ̄hi lɛ Ubáalu. Ɔ̄cɛ dúúmā nɛ̄ ó yɔ abɔ́ɔ ŋ́, n géē jé ɔ̄cɛ ɔ́ɔmā ŋmó”. Ɛ̄nyā wɛ ula nɛ̄ Ujéhu yá, cɛ́ɛ́ kú ō kwú odúúdú ācɛ o gbā Ubáalu ɛ̄gbā ú kpó ŋmó.

²⁰Anɔ́ɔ Ujéhu le ɔ́da je kahíníī, “Aá lɛ ɛ̄cī kú ɛ̄gbā ō gbā ubáalu ā tū, cɛ́ɛ́ kú ālɔ̄ le ojīlīmā je lɛ ɔ́. Anɔ́ɔ é le ɛ̄cī kú ɛ̄gbā ō gbā Ubáalu ā tū á.

²¹Ujéhu klla lɛ ɛhɔ̄ tū nyɔ̄ ga odúúdú ajɛ kú Ísrɛ̄lu. Anɔ́ɔ ɛjɛ̄ɛ̄jī ācɛ nēe gē gbā ubáalu ɛ̄gbā ā le pɛ́ wā ā. Ɔ̄cɛ dúúmā í hile ɔlɛ́ nɛ̄ ó wā ŋ́ nɛɛ ŋ́. Anɔ́ɔ é le pɛ́ tū ipú inu kú Ubáalu. É le mu inu ā jāā kwɛcɛ.

²²Anɔ́ɔ Ujéhu da ɔ̄cogwɛ́ɛya, nōo gē leyīkwu awulú nɛ̄ ācɛ o gbā Ubáalu ɛ̄gbā gē wiiyē ɛ́ɛ́ kéē gbā Ubáalu ɛ̄gbā a kpó wɛ̄ɛcɛ gé lɛ uwá.

²³Eko nēé le awulú ā kpó wiiyē kwɛyí ā, Ujéhu le tá ipú inu kú Ubáalu ā mɛ́mla Ujónādabu, ɔyí kú Urékābu gaá da uwá kahíníī, “Aá má ka ācɛ nēe gē gbā Ubáalu ɛ̄gbā ā ōfōōfū uwā géē wā amānyā á, ɔ̄cɛ dúúmā nōo gē gbā Óndú ā ɛ̄gbā ā kóō híī yɔ̄ amānyā ŋ́.”

²⁴Anɔ́ɔ anú mɛ́mla Ujónādabu le tá eyīpú kéē gaá gwɛ́ɛya ō yɔlá dúúdú lɛ Ubáalu. Ó le ācɛ ofɛnɛ kpó kwāajɛ eyīyɛ̄ɛcɛ kú agbla kú Ubáalu ā, ó le ɔ́da je lɛ uwá kahíníī, “Aá le odúúdú ācɛ nēe bá ā kpó ŋmó. Ɔ̄cɛ dúúmā kú aá nōo cɛ̄ lɛ ékpónú kú uwā le kwu, n géē je ɔ̄cɛ ɔ́ɔmā ŋmó kwɛyí ɔ̄cɛ nɛ̄ ó cɛ̄ lɛ ɔ́ kwu ā.”

²⁵Ɔkwɔɔkwu nɛ̄ Ujéhu kwú ɔdā ō bī gwɛ́ɛya ā ú ce ɛyí ede kú Ubáalu ā, ó da ācɛ a kahíníī, “Aá nyɔ̄ gaá lɛ uwá kpó ŋmó dúúdú, aá cɛ̄ lɛ ɔ̄cɛ dúúmā kú uwá kwu ŋ́.” Anɔ́ɔ é le ɔkpacaŋgelī kpó pi ce wu abɔ̄, anɔ́ɔ é le tá ipú agbla kú Ubáalu ā, gaá lɛ uwá kpó ŋmó dúúdú. Anɔ́ɔ é le okwū kú uwā kpó ga ɛcɛ. Anɔ́ɔ é le tá eyīpú kú agbla kú Ubáalu ā,

²⁶gaá le odúúdú ojibó kú ubáalu ā kpó wɛ̄ɛcɛ anɔ́ɔ ó kwú uwā ú kpó yɔlá.

²⁷É le ojibó kú ubáalu mɛ́mla agbla kú nū ā kpó yíífi, klla kwú ɔ̄ ú pīya ɛga okwū emī tū ɔ̄ jāā kwu ícɛ.

²⁸Ɛ́gɛ́nɛ̄ Ujéhu je ɛ̄gbā ō gbā kú ubáalu mɛ́mla ubáalu abɔ̄yī nū gwu bónū ŋmá Ísrɛ̄lu lɛ ā yɔ̄ abɔ́ɔ á.

²⁹Amáŋ Ujéhu le ɛdɔ kú ɔ́bíipú nɛ̄ Ujɛ́robōwam bī tū Óndú ā nɛ̄ ó klla kpó ācɛ kú Ísrɛ̄lu ikpó tū ā bī. Ó gbɔɔ́ ō gbā ojibó kú ɛna ɛpa nɛ̄ Ujɛ́robōwam ma, kpó ce Ubɛ́tɛlu mɛ́mla Udán ā ɛ̄gbā

³⁰Anɔ́ɔ Óndú ā da Ujéhu kahíníī, “Ɔdā dóódu nɛ̄ n tíne ka ā yá ipíinu kú Áhābu mɛ́mla ayí kú Áhābu mɛ́mla aɔ́máapú kú nū ā, a le uwá kpó yá ɛɛ́. Ohígbū ɔ́ɔmā, o ŋmá ayí uwɔ jāā ga ayááyí ɔ́mɛɛnɛ kú uwɔ ā géē bá í lé ɔcɛ́ kú Ísrɛ̄lu.”

³¹Amáŋ Ujéhu í lɛyítáajɛ lɛ aíne kú Óndú, Ɔwɔicō kú Ísrɛ̄lu mla odúúdú ɔtū kú nū ŋ́, ikɔkɔ ɔ́ɔmā ó gbɔɔ́ ō bī ɛdɔ kú ɔ́bíipú nɛ̄ Ujérobōwam bī nɛ̄ ó klla kpó ācɛ Ísrɛ̄lu ikpó tū ɔ̄ ā.

³²Eko ɔ́ɔmā, Óndú ā gbɔɔ́ ō ce ɛjī kú ajɛ kú Ísrɛ̄lu tū Uhásɛ́lu, ɔcɛ́ kú Usiríya mīyɛ odúúdú ajɛ kú Ísrɛ̄lu,

³³ŋmá ɛnɔ̄ɔ̄cī kú Ujɔ́dan jāā ga ɛháajɛ, gaá kwu ajɛ kú Árōwɛ nōo yɔ̄ okónu ísu kú Ánɔn ā, ɛ̄nyā ā wɛ ajɛ kú Ugílɛ̄di mɛ́mla Ubássan, ɛga nɛ̄ ipɔ́ɔma kú Ugádi mɛ́mla Urúbɛ̄n mɛ́mla ācɛ kú ɛnɔ̄ɔ̄cī kú Umanásɛ lā ā wɛ ipú ajɛ nɛ̄ Uhasɛ́lu mīyɛ ā dúú.

³⁴Ɔdā o hile ɔhá dóódu nɛ̄ Ujéhu yá ā, kwu úklɔ́ kú ɔtū ōlɛ kú nū, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

³⁵Ujéhu gekwú, anɔ́ɔ é kwú ɔ̄ ú nyi Usamérīya, anɔ́ɔ ɔyí nū Ujɛ́hōhasi lɛ ɔcɛ́ kú Ísrɛ̄lu lé kwɛyí nū á.

³⁶Ujéhu wɛ ɔcɛ́ kú Ísrɛ̄lu ipú Usamérīya iháyí ofu ce ahātá.