Read idoma 2 AƆ́CƐ́ 11 Bible Online

2 AƆ́CƐ́ 11 - idoma bible

2 AƆ́CƐ́ 11

¹Ɔkwɔɔkwu nɛ̄ Atálīya, ɛ́nɛ́ kú Ahasíya le pó ka é le ɔyí anúɔ ŋmó ā, ó nyɛ̄ɛ̄ gaá le odúúdú ipɔ́ɔnū kú ɔlɛ́ ɔcɛ́ kpó ŋmó.

²Amáŋ, Ujɛhósɛ̄ba, ɔyínɔ̄nyā kú Ujóram, ɔyí ádā kú Ahasíya kwú Ujówāsi, ɔyí kú Ahasíya ú tayínū ŋmá ɛgiyí Atálīya. Ó kwú ɔ̄ ú tayínū ipú inu eyīpú, anɔ́ɔ ó gbɔɔ́ ō bī ɔ̄ jɛ̄ á. Anɔ́ɔ Atálīya í ŋmó ɔ̄ ɛ́ɛ́ gɛ ŋ́ má.

³Ó lɛ ɔ́ tayínū eyīpú kú ipú Agblīihɔ-nɛ̄hi kú Óndú ā iháyí ɛhīlī. Eko ɔ́ɔmā Atálīya kwú pīya ɔcɛ́ kú Ujúda ɛɛ́.

⁴Amáŋ iháyí ɔ́mahāapa ā, Ujɛhóyāda, ɔ̄cogwɛ́ɛya ā le ɛhɔ̄ tū kéē lɛ aígabɔ̄ kú ɔlɛ́ ɔcɛ́ mɛ́mla anyākwɔ́cɛ a kpó hīgwú wā ipú Agblīihɔ-nɛ̄hi. Anɔ́ɔ ó cɛ̄ lɛ uwá le okónu ce lɛ ɔ́ klla le ɛka gwá lɛ ɔ́. Anɔ́ɔ ó lɛ Ujówāsi, ɔyí kú Ahasíya ā mafú lɛ uwá ipú Agblīihɔ-nɛ̄hi á.

⁵Anɔ́ɔ ó le ɔ́da je lɛ uwá kahíníī, “Ɔdā nɛ̄ aá géē yá ā yɔ̄ á, okɔ̄ ɛga ɛtá kú aá nēe géē wā úklɔ́ ɛ̄cī usábāti ā í gbō agbla kú ɔcɛ́

⁶O kɔ̄ ɛga ɛtá kú ācɛ ohile ā géē bá okónɔ̄ɔwɛ kú igá kú Ussúru, o kɔ̄ ɛga ɛtá kú ācɛ ɔhá í bá okónɔ̄ɔwɛ igá nōo yɔ̄ igbīhi kú ācogbāājɛ ā[5] É géē bá ī gbō ɔlɛ́ ɔcɛ́ abɔ́ɔ.

⁷Ígwu ɛpa kú aá nē é gáā yúklɔ́ ɛ̄cī usábāti ŋ́ ma, ke í gbō Agblīihɔ-nɛ̄hi kú Óndú ā, cɛ́ɛ́ kú aá gbō ɔcɛ́ ā ɛyí.

⁸Aá lɛ ɔkpacaŋgelī kú aá pi wu abɔ̄, cɛ́ɛ́ kú aá gbō ɔcɛ́, Ujówāsi ɛyí, ipú Agblīihɔ-nɛ̄hi ā. Aá le ɔ́ jīla tá. Aá nyɔ̄ mla anú ga ɛga dóódu nɛ̄ ó gē nyɔ̄ ā, kwu inu kwu ɛcɛ. Ɔ̄cɛ dúúmā nōo túbla aá, áa lɛ ɔ̄cɛ ɔ́ɔmā ŋmó bōōbū.”

⁹Anɔ́ɔ aótrɛ̄yí kú ācogbāājɛ ā cɛ̄ɛ̄lā kú Ujɛhóyāda ā, anɔ́ɔ é le ācɛ ā kpó gē lɛ ɔ́ á. Ígwu nōo gē yúklɔ́ ɛ̄cī usábāti mɛ́mla ígwu nɛ̄ ó yúklɔ́ ɛ̄cī usábāti ŋ́ mā.

¹⁰Anɔ́ɔ ó kwú aóbō[6] mɛ́mla ɔ́kplɛ́fú kú Udéfīdi, nēé kpó bá ipú Agblīihɔ-nɛ̄hi ā ú kpó lɛ aícɔ́ɔja o gbō ɔcɛ́, Ujówāsi ɛyí ā.

¹¹Ó lɛ odúúdú ācɛ ā kpó kwu ajɛ le ɔkpacaŋgelī kpó pi wu abɔ̄ Okómpinu kú Agblīihɔ-nɛ̄hi ā, kéē gbō ɔcɛ́ ā ɛyí.

¹²Anɔ́ɔ Ujɛhóyāda kwú Ujówāsi ú bī wɛ̄ɛcɛ, kwú ukata kú ɔcɛ́ ú kwu ɔ́ ɛyí, klla kwú ɔkpá kú íne, nōo gē gbō aɔ́cɛ́ ā ú wu ɔ́ abɔ̄. Anɔ́ɔ é le anɔ̄ tū Ujówāsi ɛyí klla le opo tá kahíníī, “Ujówāsi wɛ ɔcɛ́ kú Ujúda mɛ́ɛ̄ á ooo.” Anɔ́ɔ ācɛ gbɔɔ́ ō gwāābɔ̄ klla gē kahíníī, “Ɔwɔ kóō lɛ ɛyí kú ɔcɛ́ tápɛ́tɛ̄cɔ̄ ooo, ɔcɛ́ kóō yēeyī piyóó.”

¹³Anɔ́ɔ ɔcányā, Atálīya le uya nɛ̄ ācogbāājɛ ā bá ī yá ipú Agblīihɔ-nɛ̄hi ā pó á, anɔ́ɔ ó páápá le yɛ tá ɛga nɛ̄ ɛwa jīla bá ā.

¹⁴Abɔ̄ ó le tá abɔ́ɔ ā, ó má ɔcɛ́ ɛ̄yīpɛ̄ māháyi pī upíla kú Agblīihɔ-nɛ̄hi ā, ɛ́gɛ́nɛ̄ uculo kú ɔcɛ́ kú ɔlɛ́ uwá lɛ ā, ācogbāājɛ mɛ́mla ācɛ o tá opo ā le yɛ ɔ́ jīla tá. Ācɛ ajɛ ohile ā, bá í tá opo, bá gē jīījē, é klla bá gē gwéeyē. Anɔ́ɔ Atálīya lɛ īlī kú nū híla, le ɛgba dɛ̄ ka, “Ibīyājɛ. Ibīyājɛ.”

¹⁵Anɔ́ɔ Ujɛhóyāda, ɔ̄cogwɛ́ɛya ā da ācɛ nēe bá ī gbō ɔcɛ́ ɛyí ā kahíníī, “Aá kwú ɔ̄ ú ga ɔtāhɛ̄ kú ācogbāājɛ, nēe hɛ́ ɔgba ā, aá lɛ ɔ̄cɛ dúúmā nōo í wā í hɛ́ ɔ̄ tá ā ŋmó.”

¹⁶Anɔ́ɔ é le ɔ́ kwú, klla kwú ɔ̄ ú ga okónɔɔwɛ kú igá kú aɔ́nya ā, anɔ́ɔ é kwú ɔ̄ ú ŋmó abɔ́ɔ á.

¹⁷Anɔ́ɔ Ujɛhóyāda cɛ̄ lɛ Ujówāsi, ɔcɛ́, mɛ́mla ācɛ ā le okónu ce mla Óndú ā ka aá ɔ́ɔ géē wɛ ācɛ kú nū. Ó klla cɛ̄ lɛ ɔcɛ́ mɛ́mla ācɛ ā le okónu ce mla īyī uwā dúú.

¹⁸Anɔ́ɔ ācɛ ā le tá agbla kú Ubáalu ā lɛ ɔ́ gblla wā ajɛ kwú ɔ̄ ú ca, nyɛŋɛnyɛŋɛ mɛ́mla ojibó kú Ubáalu ā. É klla kwú Umátan, ɔ̄cogwɛ́ɛya kú ubáalu a ú ŋmó iyɔ̄bū ede kú Ubáalu ā. Ujɛhóyāda kwú ācɛ ú kpó gbāajɛ kú Agblīihɔ-nɛ̄hi kú Óndú ā.

¹⁹Anɔ́ɔ anú mɛ́mla aígabɔ̄ mɛ́mla odúúdú ācɛ nēe hile ā le ɔcɛ́, Ujówāsi bī tá jāā ga agbla kú ɔlɛ́ ɔcɛ́. Ujówāsi le bēé tá ipú agbla kú ɔcɛ́ ā, ɔwɛ nɛ̄ ācɛ ogbāajɛ ā bá ā, anɔ́ɔ ó gaá cīce akpa kú ɔcɛ́ kú nū á.

²⁰Éeyē le mu odúúdú ācɛ ā ipú. Abɔ̄ é kwú Atálīya ú ŋmó ŋmá agbla ɔlɛ́ ɔcɛ́ ā. Odúúdú ācɛ nēe bá igelī nɛ̄hi ā má bá ɛbɔ́.

²¹Ujówāsi wɛ iháyí ahāapa ɛɛ́ nɛ̄ ó lé ɔcɛ́ kú Ujúda á.