Read idoma 2 AƆ́CƐ́ 12 Bible Online

2 AƆ́CƐ́ 12 - idoma bible

2 AƆ́CƐ́ 12

¹Ipú iháyí ahāapa nɛ̄ Ujéhu lé ɔcɛ́ kú Ísrɛ̄lu ā, Ujówāsi, ɔyí kú Ahasíya ā lɛ ɔcɛ́ kú Ujúda lé. Ó wɛ ɔcɛ́ kú Ujúda, ipú Ujerúsālɛm, igelī nɛ̄hi iháyí ofɛpa. Ɛ́nɛ́ nū lé ka Usíbīya, nōo ŋmá Ubiyɛssɛ́ba ā.

²Odúúdú eko kú ɔcɛ́ kú Ujówāsi mɛ́mla eko nɛ̄ ó yēeyī ā, ó yá ɔdā nōo he Óndú ā ɔtū eko dóódu, ohígbū ka Ujɛhóyāda ɔ̄cogwɛ́ɛya ā yɔ̄ gē nwū ɔ̄, ɔdā nɛ̄ ó géē yá ā.

³Amáŋ ó kpó ikpɛ́cí ca ŋ́, anɔ́ɔ ācɛ ā bá gē pā ɛcí, klla gē yi ɔtulalī ɔlá lɛ ɛ̄cī abɔ́ɔ kpɔ́ á.

⁴Ujówāsi lɛ ɔ̄cogwɛ́ɛya ā hīgwú, anɔ́ɔ ó da ɔ́ kahíníī, “Aá le odúúdú ije nɛ̄ ācɛ gē bī wā ipú Agblīihɔ-nɛ̄hi kú Óndú ā, kwu ije nēé hɛ́ lɛ ɔnyɔɔnyɛ kóō gba ā, mɛ́mla ije kú ɛ̄gbā, mɛ́mla ije kú ahínyá nēé gē wā í tá Ɔwɔicō ā mɛ́mla ije kú okónu ō ce ā kpɛ́mm ā kpó tayínū ɛgéégée

⁵Ɔ̄cogwɛ́ɛya dóódu géē leyīkwu ije nɛ̄ ācɛ nɛ̄ ó gē yúklɔ́ lɛ uwá gē bī wā a. É gē bī ije ā le tú Agblīihɔ-nɛ̄hi kú Óndú ā yá.”

⁶Amáŋ eko nɛ̄ ɔcɛ́, Ujówāsi wɛ iháyí ofu ce ɛtá nááná ā, ācogwɛ́ɛya ā í tá Agblīihɔ-nɛ̄hi kú Óndú ā yá ɛga dúúmā ŋ́.

⁷Anɔ́ɔ ó le Ujɛhóyāda mɛ́mla ācogwɛ́ɛya o hile ā kpó hīgwú, anɔ́ɔ ó da uwá ɔ̄kā kahíníī, “Oŋmífi iháyí ofu ce ɛtá nyā, ɔdíyá nɛ̄ aá tá Agblīihɔ-nɛ̄hi kú Óndú ā yá ɛga dúúmā ŋ́ mā a? Aá híī mīyɛ ije dúúmā ɛ́ɛ́ ká aá bī gɛ ŋ́. Ije dúúmā nɛ̄ aá mīyɛ ā, aá kwú kpó wā, kú aá bī le tá Agblīihɔ-nɛ̄hi kú Óndú ā yá.”

⁸Ācogwɛ́ɛya ā cɛ̄ ɛlā nɛ̄ ɔcɛ́ ka ā, anɔ́ɔ é klla cɛ̄ ka aá í gáā mīyɛ ije ŋmá ɛgiyí ācɛ ɛ́ɛ́ gɛ ŋ́. É klla kē cɛ̄ ka aá í gáā tá Agblīihɔ-nɛ̄hi ā yá ɛ́ɛ́ gɛ ŋ́.

⁹Anɔ́ɔ Ujɛhóyāda le ikpati gbā, lɛ ɔ́ hɛ́bū ɛyí nū, kwú ɔ̄ ú ce ɛyí ede abɔ̄lɔ́ná kú ipú Agblīihɔ-nɛ̄hi ā. Ɔ̄cogwɛ́ɛya nōo géē yɔ̄ í yúklɔ́ kú Agblīihɔ-nɛ̄hi eko ɔ́ɔmā ā, géē je odúúdú ije nɛ̄ ācɛ nēe gē wā í gbā Ɔwɔicō ɛ̄gbā gē bī wā í le tá ɔ̄ ahínyá ɔ̄ ā í kpó tū ipú ikpati ā.

¹⁰Eko dúú nēé má ka ije nōo yɔ̄ ipú ikpati ā ɔ́ɔ le nwuné ɛɛ́, ɔmálɛ o tɔ́kpá kú ɔlɛ́ ɔcɛ́ mɛ́mla otrɛ̄yí kú ācogwɛ́ɛya ā géē wā í lɛ ije ā gba áluka[7] cɛ́ɛ́ é lɛ ɔ́ gbō ipú ɛkpa.

¹¹Cɛ́ɛ́ é kwú ije nēé le gba áluka klla lɛ ɔ́ miya ɛɛ́ mā ú kpó lɛ ācɛ nēe gē yúklɔ́ kú Agblīihɔ-nɛ̄hi ā. Cɛ́ɛ́ kéē bī ije ā lɛ gbā ulé lɛ ācogbɔ̄ɔcí mɛ́mla ācɛ o ma inu,

¹²mɛ́mla ācɛ o glla inu yá, ācɛ o gbā ɛcɔ̄. É klla í bī le lá ɔcí mɛ́mla ɛcɔ̄ nēé bī le glla odée yá. Cɛ́ɛ́ kéē bī ije ā le cíla ulé kú aɔ́dā ɔhá dóódu nōo cɛgbá ipú Agblīihɔ-nɛ̄hi kú Óndú ā ā.”

¹³Ó ka ka ɛ́ɛ bī āyā dúúmā kú ijē nyā le yá íkókwū, aógo, opo, iyó ō bī le yúklɔ́ kú aágege ámāŋ íyó ɔhá kú oje ɔdɔ (ugoolu) mla ije nɛ̄hɛ́ kú ipú Agblīihɔ-nɛ̄hi ā ŋ́.

¹⁴Ó klla ka ka ɛ́ɛ géē bī odúúdú ije ā le cíla ācɛ o yúklɔ́ ā ulé mɛ́mla oōbī le lā iyó nēé géē bī le glla odée yá ā.

¹⁵Ācɛ nēe gē leyīkwu úklɔ́ nyā, wɛ ɛ́nɛ́nɛ̄ ācɛ, nɛ̄ abɔ̄ kú uwā le yēŋēē. É gē cē ɔdā dúúmā bá ŋ́, ohígbū ɔ́ɔmā, é gē da uwá ɔ̄kā ɛ́gɛ́nɛ̄ é ŋmó ije ā lɛ á ŋ́.

¹⁶Ije nēé gbā kú ɛya kú ínoōbīya mɛ́mla ákú ɛpɔ̄bí ō lé ā, é bī ɔ́ɔmā wā ipú Agblīihɔ-nɛ̄hi kú Óndú ā ŋ́. Ɛdɔ ije ɛ́gɔ́ɔmā wɛ ákú ācogwɛ́ɛya ā nɛ.

¹⁷Eko ɔ́ɔmā, Uhasɛ́lu, ɔcɛ́ kú Usiríya le ɛfú kpó tá ācɛ Ugáti klla le uwá yálé. Ó mīyɛ Ugáti, anɔ́ɔ ó ka anúɔ géē gaá kpɛ́fú tá Ujerúsālɛm.

¹⁸Anɔ́ɔ Ujówāsi, ɔcɛ́ kú Ujúda ā, le odúúdú ɛhi nɛ̄ aɔ́cɛ́ nēe tɛtɛ yɔ̄ gbɔbū lɛ ɔ́ ā, Ujɛhósāfati, Ujɛhóram, mɛ́mla Ahasíya kpó lɛ Óndú ā, mɛ́mla ákú abɔ̄yī nū dúú ā kpó tɔ̄há mɛ́mla ugóolu (oje ɔdɔ) nēe bá ipú Agblīihɔ-nɛ̄hi mɛ́mla ɛ̄nɛ̄ o bá ipú agbla kú ɔcɛ́ ā kpó tɛ̄hɔ̄ gé lɛ Uhaɛ́lu, ɔcɛ́ kú ācɛ Usiríya. Anɔ́ɔ ɔcɛ́ ā kwú aícɔ́ɔja kú nū eyī ú pīya ŋmá Ujerúsālɛm á.

¹⁹Ɔ́dā o hile ɔhá dóódu nɛ̄ Ujówāsi yá ā, é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda.

²⁰Aígabɔ̄ kú Ujówāsi ɛpa, le ujɔ tū tū ɔ̄, anɔ́ɔ é kwú ɔ̄ ú ŋmó ɔlɛ́ Umílo ɔwɛ nōo yɛ ga Usíla ā.

²¹Ujósáka, ɔyí kú Ussímīiti, mɛ́mla Ujɛhósābadi, ɔyí kú Ussóma aígabɔ̄ kú Ujówāsi ā lɛ ɛ̄wā gɔ̄ ɔ̄ le ɔ́ ŋmó. Anɔ́ɔ é lɛ ɔ́ nyi mla aádáádā nū ipú igelī nɛ̄hi kú Udéfīdi á. Anɔ́ɔ Amásīya ɔyí nū lɛ ɔcɛ́ lé kwɛyí nū á.