Read idoma 2 AƆ́CƐ́ 13 Bible Online

2 AƆ́CƐ́ 13 - idoma bible

2 AƆ́CƐ́ 13

¹Ipú iháyí ofu ce ɛtá nɛ̄ Ujówāsi, lé ɔcɛ́ kú Ujúda ā, nɛ̄ Ujɛ́hōhasi, ɔyí kú Ujéhu lé ɔcɛ́ kú Ísrɛ̄lu á. Ó wɛ ɔcɛ́ kú Ísrɛ̄lu Usamérīya iháyí igwáahāapa.

²Ɛdɔ kú ɔ́bíipú nɛ̄ Ujérobōwam ɔyí kú Unébāti bī tū Óndú ā nɛ̄ ó klla kpó ācɛ kú Ísrɛ̄lu ikpó tū ɔ̄ á. Ó kē habɔ̄ ɔdōbɔ̄bí ō yá tá ŋ́.

³Anɔ́ɔ Óndú ā kwú cɔ̄nū mla ācɛ kú Ísrɛ̄lu, anɔ́ɔ ó cɛ̄ lɛ Uhasɛ́lu, ɔcɛ́ kú Usiríya, mla ɔyí nū Ubenhádādi bá gē yá ācɛ Ísrɛ̄lu lé ɔgbɛ́fú eko éyi tá eko ɔhá piyóó á.

⁴Anɔ́ɔ Ujɛ́hōhasi le ɔkɔ gbā lɛ Óndú ā, anɔ́ɔ Óndú ā le ɔkɔ nɛ̄ ó gbā ā pó á, ohígbū ka, ó le ɔdōbɔ̄bí mla ucē kú ɔbíipú nɛ̄ aɔ́cɛ́ kú Usiríya bá gē yá ācɛ kú Ísrɛ̄lu ā má ɛɛ́.

⁵Anɔ́ɔ Óndú ā le ɔ̄cɛ éyi tɛ̄hɔ̄ gaá lɛ ācɛ kú Ísrɛ̄lu hɛ́tá ŋmá abɔ̄ kú ācɛ kú Usiríya ā. Anɔ́ɔ Ísrɛ̄lu má bá ɛbɔ́ ɛ́gɛ́nɛ̄ é tɛtɛ bá ā.

⁶Amáŋ é nyɛ̄ɛ̄ ŋmá ɔ́bíipú ō bī tū Óndú ā o ŋmá ō yɛce ɛdɔ kú ɔ́bíipú kú ɛcí ō pā kú Ujérobōwam mla ipɔ́ɔnū kú nū, mla ɛ̄nɛ̄ ó klla kpó ācɛ Ísrɛ̄lu ikpó tū ɔ̄ ā ŋ́.

⁷Aícɔ́ɔja kú Ujɛ́hōhasi dúúmā í hile fíyɛ́ ācɛ okpɛ́fú ɔnya ofɛpa ce igwó, mla úgbɔ́ɔnya igwó mla aícɔ́ɔja īkpó úlā ofu ce ɛhɔ̄ (10,000) ŋ́, ohígbū ka ɔcɛ́ kú Usiríya kwú aóhile ā ú kpó ŋmó klla lɛ uwá nya tū ipú úmúlá.

⁸Ɔdā o hile ɔhá dóódu nɛ̄ Ujɛ́hōhasi yá ā, é le uwá tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

⁹Ujɛ́hōhasi gekwú. Anɔ́ɔ é kwú ɔ̄ ú nyi Usamérīya á. Anɔ́ɔ ɔyí nū Ujɛhówāsi lɛ ɔcɛ́ kú nū lé á.

¹⁰Ipú iháyí ofu ce igwáahāapa nɛ̄ Ujówāsi lé ɔcɛ́ kú Ujúda ā, Ujɛhówāsi, ɔyí kú Ujɛhóhāsi le ɔcɛ́ kú Ísrɛ̄lu lé dúú. Ó wɛ ɔcɛ́ kú Ísrɛ̄lu ipú igelī nɛ̄hi kú Usamérīya, iháyí igwɛ́ɛhīlī.

¹¹Ó le íne kú Óndú ā bīya dúú klla le yɛce ucé kú ɔ́bíipú mla ɛ̄cī ō pā kú Ujérobōwam nɛ̄ ó kpó ācɛ Ísrɛ̄lu ikpó tū ɔ̄ ā.

¹²Ɔdā o hile ɔhá dóódu nɛ̄ Ujɛhówāsi yá ā, kwu ɔtú ōlɛ kú nū ɔgbɛ́fú ā, é le uwá tá tū ipú ɔkpá kú ɔ̄kā kú aɔ́cɛ́ kú Ísrɛ̄lu.

¹³Ujɛhówāsi gekwú, anɔ́ɔ é kwú ɔ̄ ú nyi ɛgiyí únóji kú aɔ́cɛ́ kú ācɛ Usamérīya, anɔ́ɔ ɔyí nū Ujérobōwam ɔ́mpa le ɔcɛ́ lé kwɛyí nū á.

¹⁴Eko nɛ̄ Ɛláyíssa gbɔɔ́ ō doōcē nɛ̄hi, nɛ̄ ó gaá kwú ā, Ujɛhówāsi, ɔcɛ́ kú Ísrɛ̄lu le tá ɛgiyí nū, gaá le ikwū je klá anú iyē kahíníī, “Ádā um! Ádā um! úgbɔ́ɔnya mla ɔnya ku ɛfú kú Ísrɛ̄lu, awɔ gwutá yɔ̄ á ā?”

¹⁵Anɔ́ɔ Ɛláyíssa da ɔ́ kahíníī, “Lɛ ɔtā mla ɔyī kpó,” anɔ́ɔ ó le ɔtā mla ɔyī kpó á.

¹⁶Anɔ́ɔ Ɛláyíssa da ɔcɛ́ kú Ísrɛ̄lu ā kahíníī, “Kwú ɔyī ú kwu ɔtā ká ā kpó abɔ̄ ɔtā.” Anɔ́ɔ ó le abɔ̄ ɔtā kpó á.

¹⁷Anɔ́ɔ ó da ɔcɛ́ ā kahíníī, “Lɛ uwíndo nwūla kwu ɛnɔ̄ɔ̄cī,” anɔ́ɔ ó le uwíndo nwūla kwu ɛnɔ̄ɔ̄cī á. Anɔ́ɔ Ɛláyíssa da ɔ́ kahíníī, “Lɛ ɔyī tá.” Anɔ́ɔ ó lɛ ɔyī ā tá ga ɛnɔ̄ɔ̄cī á. Anɔ́ɔ Ɛláyíssa da ɔ́ kahíníī, “Ɔyí kú oyálé nɛ̄ Óndú ā gáā cɛ̄ gā awɔ yá ācɛ Usiríya lé ā yɔ̄ abɔ́ɔ á. A gē kpɛ́fú tá ācɛ kú Usiríya Áfēki, jāā gbéeko nāa gē yá uwá lé klla í kpó uwā yíífi ŋmáajɛ dúúdú.”

¹⁸Ó klla da ɔcɛ́ ā kahíníī, “Lɛ ɔyī ā kpó.” Anɔ́ɔ ó le ɔyī ā kpó á. Anɔ́ɔ ó klla da ɔcɛ́ kú Ísrɛ̄lu ā kahíníī, “Lɛ ɔyī ā tá kwu ajɛ.” Anɔ́ɔ ɔcɛ́ ā le ɔyī ā tá kwa ajɛ igbɛ ɛtá.

¹⁹Anɔ́ɔ Ɛláyíssa kwú cɔ̄nū mla anú, anɔ́ɔ ó da ɔ́ kahíníī, “A géē yɛ í lɛ ɔyī ā tá gbo ajɛ igbɛhɔ̄, ɛhīlī, ámāŋ ka ahāapa, cɛ́ɛ́, á géē yɛ í lɛ ācɛ Usiríya yálé dúúdú, ámāŋ, igbɛ ɛtá piyóó nāa géē yá ācɛ Usiríya lé mɛ́ɛ́ á.”

²⁰Anɔ́ɔ Ɛláyíssa gekwú. É kwú ɔ̄ ú nyi. Iháyí dóódu ígwu kú ācɛ onuunu kú Umówābu gē wā i wu ajɛ kú Ísrɛ̄lu abɔ̄fú.

²¹Eko éyi, é gáā nyi okwú éyi, é le ígwu éyi kú ācɛ ɔ́ɔmā má, anɔ́ɔ ācɛ ā kwú okwū nēé gáā nyi ā ú tá ga ipú únóji kú Ɛláyíssa, anɔ́ɔ é le kwu á. Ɔkwɔɔkwu nɛ̄ okwū ɔ́ɔmā gaá kwú iyē ú kwu ikpokwú kú Ɛláyíssa ā, ɔ̄cɛ nōo kwú ā le héyī klla cāŋjɛ háyi ikpó abɔ̄yī nū.

²²Odúúdú eko kú ɔcɛ́ kú Ujɛ́hōhasi ā, ācɛ kú Ísrɛ̄lu móōwē abɔ̄ kú Uhasɛ́lu, ɔcɛ́ kú Usiríya nɛ̄hi.

²³Amáŋ Óndú ā gē gbonɛnɛ klla ī ményīnyi uwá. Anɔ́ɔ ó cɛ̄ lɛ Uhasɛ́lu je uwá kpó yíífi dúúdú ŋ́ má. Amáŋ ó gē tá uwá abɔ̄ ohígbū okónu nōo ce mla Ébrahām, Áyísīki, mɛ́mla Ujékɔ̄pu ā. Ó je mlanyī ācɛ ɔlɛ́ nū jéjée ɛ́ɛ́ ŋ́.

²⁴Eko nɛ̄ Uhasɛ́lu, ɔcɛ́ kú Usiríya gekwú ā, ɔyí nū Ubenhádād lɛ ɔcɛ́ kú Usiríya lé.

²⁵Anɔ́ɔ Ujɛhówāsi ɔcɛ́ kú Ísrɛ̄lu lɛ Ubenhádādi yálé ɔgbɛ́fú igbɛ ɛtá á. Ó klla mīyɛ aígelī nɛ̄hi kú Ísrɛ̄lu nɛ̄ Ubenhádādi mīyɛ eko kú Ujɛhóhāsi ádā kú Ujɛhówāsi ā cīgbīhi.