Read idoma 2 AƆ́CƐ́ 14 Bible Online

2 AƆ́CƐ́ 14 - idoma bible

2 AƆ́CƐ́ 14

¹Ipú iháyí ɔ́mpa nɛ̄ Ujɛhówāsi, ɔyí kú Ujɛhóhāsi lé ɔcɛ́ kú Ísrɛ̄lu ā, Amásīya ɔyí kú Ujówāsi le ɔcɛ́ kú Ujúda lé dúú.

²Ó wɛ iháyí ofu ce ɛhɔ̄ ɛɛ́ nɛ̄ ó le ɔcɛ́ kú Ujúda á. Ó wɛ ɔcɛ́ kú Ujúda Ujerúsālɛm iháyí ofu ce ahāanɛ.

³Ó yá ɔdā nōo he Óndú ā ɔtú, amáŋ ó yá bɛ̄ɛka aádáádā nū Udéfīdi ā ŋ́, amáŋ ó yá bɛ̄ɛka Ujówāsi ádā nū ā.

⁴Ó je aíkpɛ́cí ā kpó ca tāajɛ ŋ́. Ācɛ kú Ujúda ā klla ī bá í pā ɛcí, bá ī gwɛ́ɛya lɛ ɛcí klla yi ɔtulalī ɔlá lɛ ɛcí.

⁵Ɔkwɔɔkwu nɛ̄ Amásīya gaá ce akpa kú ɔcɛ́ kú nū ā, ó le aígabɔ̄ kú ádā nū ɛpa, nēe je ádā nū Ujówāsi, ŋmó ā kpó ŋmó.

⁶Amáŋ, ó kpó ayí uwa ŋmó ŋ́. Ɔhígbū ka, ó yɛce ɔdā nɛ̄ Óndú ā ka ipú íne kú Umósīsi kahíníī, “É gáā je ayí kpó ŋmó ohígbū íne nɛ̄ ádā uwā bīya ā ŋ́, ɛ́ɛ́ nēé gē je ádā mɛ́mla ɛ́nɛ́ ŋmó ohígbū íne nɛ̄ ayí uwā bīya ā ŋ́. Ɔnyɔɔnyɛ géē kwú ikwū kú íne nɛ̄ ó bīya ā.”

⁷Amásīya lɛ ācɛ kú Ɛ́dɔm úlā ofu ce ɛhɔ̄ (10,000) kpó ŋmó ɔpɛ́ nēé hī ka ɔpɛ́ kú ɔmā ā. Ó klla mīyɛ igelī nɛ̄hi kú Usɛlá ŋmá ɛgiyí uwá ɔgbɛ́fú, ó kwú iyē ɛ̄yīpɛ̄ ú ce ɔ́ ka, Ujókutíli jāā kwu ícɛ.

⁸Anɔ́ɔ Amásīya le ɛhɔ̄ kú ɛfú tū fu Ujɛhówāsi ɔcɛ́ kú Ísrɛ̄lu kɔ́ɔ̄ wā ká aá leyī méyī ɔgbɛ́fú[8]

⁹Anɔ́ɔ Ujɛhówāsi, ɔcɛ́ kú Ísrɛ̄lu ā le ohi kpó gē lɛ ɔ́ kahíníī, “Eko éyi, ácí ujē kú Ulébānɔn le ɛhɔ̄ tū fu ɔcí Usɛ́da kú Ulébānɔn (nōo jē bɛ̄ɛka ulóko) ā kahíníī, “Kwú ɔyí uwɔ nɔ̄nyā ú lɛ ɔyí um kóō le lɛ ɔnyā. Anɔ́ɔ ɛbɛ́ kú ipácí gaá le yɛ, anɔ́ɔ ó kwú ácí ujē nyā ú ca tāajɛ á.”

¹⁰Awɔ, Amásīya, a lɛ ācɛ kú Ɛ́dɔm yálé klla le uwá ca tāajɛ, anɔ́ɔ ɔbɔ́ɔ̄cɛ í cɛ̄ gā awɔ gɛ ŋ́ má. Ofu nāa lé ā kóō jɛ uwɔ mɛ́ɛ̄, cɛ́ɛ́ ká ā klá ɔlɛ́ uwɔ cíí. Ɔdíyá nāa gē pla unwalu nōo géē bī ífi wā í klá iyī uwɔ mla ācɛ ɔlɛ́ uwɔ āa?”

¹¹Amáŋ Amásīya tá kóō jāhɔ̄ lɛ ɛlā nɛ̄ Ujɛhówāsi ka lɛ ɔ́ ā. Anɔ́ɔ Ujɛhówāsi, ɔcɛ́ kú Ísrɛ̄lu mɛ́mla ācɛ ɔlɛ́ nū le pɛ́ ga ɛcɛ kéē leyí méyī ɔgbɛ́fú kú Ubɛ́ti Ussémēssi kú Ujúda ā.

¹²É lɛ aícɔ́ɔja kú Amásīya yálé, anɔ́ɔ ɔnyɔɔnyɛ kú aícɔ́ɔja kú nū ā kwú pɛ́ kwu ga ɔlɛ́ uwā á.

¹³Anɔ́ɔ Ujɛhówāsi lɛ Amásīya abɔ̄yī nū ā kwú. Ó klla le bēé ga igelī nɛ̄hi kú Ujerúsālɛm gaá le ɔdɔ kú nū wúla tāajɛ ŋmá ɔwɛ kú Ɛ́frem jāā ga ɔwɛ kú ɔ́kíkā kú ɔlɛ́ ā, ɛga nɛ̄ ó ca tāajɛ a lɛbɛ̄ɛka ikpó úlā ce ofu igwó.

¹⁴Anɔ́ɔ ó kwú odúúdú ugóolu (oje ɔdɔ), oje nɛ̄hɛ́ nɛ̄ ó má ipú Agblīihɔ-nɛ̄hi kú Óndú ā, mɛ́mla ákú ɔlɛ́ ɔcɛ́ ā, mɛ́mla odúúdú iyō kú Agblīihɔ-nɛ̄hi mɛ́mla agblɔ̄cɛ́ ā ú kpó ga Usamérīya. Ó klla le ācɛ ā kpó kwú kéē wɛ aálagbá kú ɛfú ŋmá abɔ́ɔ dúú.

¹⁵Ɔdā ohile ɔhá dóódu, nɛ̄ Ujɛhówāsi yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

¹⁶Ujɛhówāsi gekwú, anɔ́ɔ é kwú ɔ̄ ú nyi ipú únóji kú ɔcɛ́ Usamérīya, anɔ́ɔ ɔyínu Ujérobōwam ɔ́mpa lɛ ɔcɛ́ lé kwɛyí nū á.

¹⁷Amásīya, ɔcɛ́ kú Ujúda yēeyī iháyí igwɛ́ɛhɔ̄ igbīhi ikwú kú Ujɛhówāsi, ɔcɛ́ kú Ísrɛ̄lu ā.

¹⁸Ɔdā o hile ɔhá dóódu nɛ̄ Amásīya yá ā, é le uwá tá tū ipú ɔkpá kú ígwú ō gbo kú aɔ́cɛ́ kú Ujúda.

¹⁹É le ujɔ̄ tū ipú Ujerúsālɛm kéē lɛ Amásīya ŋmó, anɔ́ɔ ó le jé, kwú kwu ga igelī kú Ulákissi. Amáŋ aólɛlā kú nū ā nū ɔ̄ nyɔ̄ abɔ́ɔ gaá lɛ ɔ́ ŋmó kpɔ́.

²⁰É kwú okwū kú nū ú ce ɔnya le ɔ́ bī jāā wā Ujerúsālɛm gaá kwú ɔ̄ ú nyi ikpámilíī kú aɔ́cɛ́ ipú igelī nɛ̄hi kú Udéfīdi ā.

²¹Ācɛ kú Ujúda kwú ɔyínɔ̄nyīlɔ kú nū nōo wɛ iháyí igwɛ́ɛhīlī ā ú lé ɔcɛ́.

²²Usíya klla mīyɛ Ɛ́lāti kwúcē, klla le ɔ́ tūgwó, igbīhi ikwú kú ádā nū ā.

²³Ipú iháyí igwɛ́ɛhīlī nɛ̄ Amásīya, ɔyí kú Ujówāsi lé ɔcɛ́ kú Ujúda ā. Ujérobōwam ɔ́mpa, ɔyí kú Ujɛhówāsi le ɔcɛ́ kú Ísrɛ̄lu lé. Ó wɛ ɔcɛ́ kú Ísrɛ̄lu, Usamérīya iháyí ofɛpa ce éyi.

²⁴Ó le íne kú Óndú ā bīya klla le ɔ́bíipú bī tū Óndú ā dúú, ɔwɛ ékpónú nɛ̄ Ujérobōwam, ɔyí kú Unébāti bī klla kpó ācɛ kú Ísrɛ̄lu ikpó tū ɔ̄ ā.

²⁵Odúúdú ajɛ nēe tɛtɛ wɛ ákú Ísrɛ̄lu ā, ó mīyɛ uwá kwúcē lɛ Ísrɛ̄lu, ŋmá Uhámati, gaá bū ɛhícō kú ísu ɔmā ā ɛháajɛ. Ɛ̄nyā wɛ ɔ́da mɛ́mla okónu nɛ̄ Óndú ā tɛtɛ ce táajɛ bū okónu kú ɔ̄comɛ́ɛbɛ Ujóna, ɔyí kú Amítāyi, nōo ŋmá Ugatéfa ā.

²⁶Óndú ā le ōwē nɛ̄hi nɛ̄ ācɛ kú Ísrɛ̄lu bá gē má, nēé má ɔ̄cɛ dúúmā ō tá uwá abɔ̄ ŋ́ mā má ɛɛ́.

²⁷Ó wɛ ɔtū kú Óndú ā kóō lɛ ācɛ kú Ísrɛ̄lu yíífi ŋmá ajɛ dúúdú ŋ́, anɔ́ɔ ó bī Ujérobōwam ɔ́mpa le uwá hɛ́tá á.

²⁸Aɔ́dā o hile ɔhá dóódu nɛ̄ Ujérobōwam ɔ́mpa ā yá ā, ɛ́gɛ́nɛ̄ ó mīyɛ Udamáskɔ̄si mɛ́mla Uhámati lɛ Ísrɛ̄lu lɛ ā,[9] é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

²⁹Ujérobōwam ɔ́mpa ā gekwú, anɔ́ɔ é kwú ɔ̄ ú nyi ikpámilíī kú aɔ́cɛ́ kú Usamérīya, anɔ́ɔ ɔyí nū Usékarīya le ɔcɛ́ lé kwɛyí nū á.