Read idoma 2 AƆ́CƐ́ 16 Bible Online

2 AƆ́CƐ́ 16 - idoma bible

2 AƆ́CƐ́ 16

¹Ipú iháyí igwáahāapa nɛ̄ Upɛ́ka, ɔyí kú Urɛmalíya lé ɔcɛ́ kú Ísrɛ̄lu ā, Áhāsi ɔyí kú Ujótam le ɔcɛ́ kú Ujúda lé.

²Ó lé ɔcɛ́ nyā eko nɛ̄ ó wɛ iháyí ofu ā. Ó ce ɔcɛ́ kú Ujúda iháyí igwɛ́ɛhīlī. Ó yɛ tá íkpa olɔhi kú Udéfīdi aádáádā nū ā ŋ́, ikɔkɔ ɔ́ɔmā, ó yá ɔdā nɛ̄ ó he Óndú, Ɔwɔicō ɔtū ŋ́.

³Ó kwú yɛce ɔwɛ kú ɛcí ōpā kú aɔ́cɛ́ kú Ísrɛ̄lu ā. Ó kwú ɔyí nɔ̄nyīlɔ kú nū éyi ú ŋmó, anɔ́ɔ kwú ɔ̄ ú gwɛ́ɛya o yɔlá dúúdú lɛ ɛcí. Ó yá ɛ̄nyā gbla ucē kú aéwo ɔhá nɛ̄ Óndú ā nū bɛ̄cɛ ŋmá ajɛ hīla ācɛ kú Ísrɛ̄lu dúúdú ā.

⁴Ó gē gwɛ́ɛya lɛ ɛcí klla gē yi ɔtulalī ɔlá lɛ ɛcí ikpɛ́cí mɛ́mla ɔkwu ɔcí ɛ̄mɛ̄ɛ̄mɛ̄ dóódu.

⁵Ɔcɛ́ kú Usírīya Urésin mɛ́mla Upéka, ɔyí kú Urɛmalíya ɔcɛ́ kú Ísrɛ̄lu ā le pɛ́ wā í kpɛ́fú tá Ujerúsālɛm. É le íbɔm cē tū ɔ̄, amáŋ é yá Ahási lé glá ŋ́.

⁶Eko ɔ́ɔmā piíí ā, ācɛ kú Ɛ́dɔm[11] wā gaá mīyɛ Ɛ́lāti ŋmá abɔ̄ kú ācɛ kú Ujúda. É le ācɛ kú Ujúda kpó nū ŋmá Ɛ́lāti. Anɔ́ɔ ācɛ kú Ɛ́dɔm ā gaá lā Ɛ́lāti jāā kwu eko nēé tɔ́kpá nyā á.

⁷Áhāsi le ɛhɔ̄ tū fu Utígaláti Upilɛ́sa, ɔcɛ́ nɛ̄hi kú Asírīya kahíníī, “N wɛ ɔ̄cocɛ̄hɔ̄ mɛ́mla ɔyí uwɔ nɛ, wā gaá tá um abɔ̄, cɛ́ɛ́ ká ā lɛ um hɛ́tá ŋmá abɔ̄ kú aɔ́cɛ́ kú Ísrɛ̄lu mɛ́mla Usírīya nēe bá yɔ̄ ī kpɔ́fú kwu um ā.”

⁸Anɔ́ɔ Áhāsi kwú oje nɛ̄hɛ́ mɛ́mla oje ɔdɔ (ugoolu) nēe bá ipú Agblīihɔ-nɛ̄hi kú Óndú ā, mɛ́mla ákú agblɔ̄cɛ́ ā ú kpó, anɔ́ɔ ó kwú kpó tɛ̄hɔ̄ gaá yá ɔcɛ́ nɛ̄hi kú Asírīya ɛhi á.

⁹Anɔ́ɔ ɔcɛ́ kú Asírīya wā í le abɔ̄ tá ɔ̄ á. Ɔcɛ́ kú Asírīya mɛ́mla aícɔ́ɔja kú nū wā í le ɛfú kpó tá ācɛ Ísrɛ̄lu, anɔ́ɔ é mīyɛ Udamáskɔsi, é le Urésin, ɔcɛ́ kú Usírīya ā ŋmó. É klla le ācɛ ɔlɛ́ uwá kú ipú igelī nɛ̄hi ā kpó kwú, kwú uwā ú piya alagbá kú ɛfú ga ajɛ kú Ukɛ́ru.

¹⁰Eko nɛ̄ Áhāsi le tá Udamáskɔ̄si gaá má ɔcɛ́ nɛ̄hi, Utígaláti Upilɛ́sa ā, ó le ede nōo yɔ̄ abɔ́ɔ ā má, anɔ́ɔ ó le ɛdɔ nū piíí ā tɛ̄hɔ̄ fu Uríya, ɔ̄cogwɛ́ɛya ā.

¹¹Anɔ́ɔ ɔ̄cogwɛ́ɛya ā lɛ ɛdɔ ede ɔ́ɔmā piíí ā gwó Ujerúsālɛm, ɛɛ́ nɛ̄ Áhāsi pīyɛyí ŋmá Udamáskɔsi á.

¹²Eko nɛ̄ Áhāsi pīyɛyí ŋmá Udamáskɔsi ā, ó má ka, Uríya ɔ́ɔ le ɛdɔ ede ɔ́ɔmā piíí ā gwó ɛɛ́.

¹³Anɔ́ɔ ó le ɛbɛ́ gwɛ́ɛya o yɔlá dúúdú ɛyí ede ā. Ó klla le īkpɔ̄dā gwɛ́ɛya o yɔlá dúúdú ɛyí ede ā dúú. Ó klla le enyi umu fu ɛyí ede ā abɔ́ɔ, anɔ́ɔ ó pīya oyī klá ɛyí ede ā dúú kā ɔ̄ wɛ ɛya kú olétɔ̄há.

¹⁴Anɔ́ɔ ó kwú ede kú ugóolu (oje ɔdɔ) nōo kwu ɔtāhɛ̄ kú Agblīihɔ-nɛ̄hi kú Óndú ā mɛ́mla ede ɛ̄yīpɛ̄ ú fu ŋmá abɔ́ɔ gaá kwú ɔ̄ kwu ābɔ̄ ɛhícō kú ede ɛ̄yīpɛ̄ ā.

¹⁵Anɔ́ɔ Áhāsi da Uríya ɔ̄cogwɛ́ɛya ā kahíníī, “Ɛyí ede nyā nāa gē gwɛ́ɛya kú ɔ̄cɔ̄ɔ̄ci mɛ́mla ákú ɔ̄nɔ̄ɔ̄nɛ̄, mɛ́mla ɛya o yɔlá dúúdú kú īkpɔ̄dā mɛ́mla ákú ɛbɔ́ mɛɛ́ á. Cɛ́ɛ́ ká ā mī oyī kú odúúdú aɛ́bɛ́ dóódu nēé bī í gwɛ́ɛya ā klá ɛyí ede ā. Amáŋ ede kú oje udɔ ā, géē wɛ ákú um ká n̄ bēé da Óndú ā ɔ̄kā ɛyí nū.”

¹⁶Anɔ́ɔ Uríya lɛ ɔdā nɛ̄ ɔcɛ́ ka ā yá á.

¹⁷Áhāsi klla kwú ítēbulu o lɛ akā kú oje udɔ kú Agblīihɔ-nɛ̄hi ā ú, anɔ́ɔ ó le aíyó nēe bá ɛyí nū ā kpó kpɛ́mm. Ó kwú utánki kú oje udɔ ā ú ŋmá ɛyí ojibó kú ɛna kú udɔ igwɛ́ɛpa nɛ̄ utánki ā ce ɔ́ ā. Anɔ́ɔ ó kwú utánki ā ú ce ɛyí ɛcɔ̄ kú ikpínu á.

¹⁸Ó yá ɛ́ɛ ka Áhāsi kóō yá ɔdā nōo he ɔcɛ́ kú Asírīya ɔtú ā, ó kwú ikpó kú akpa kú ɔcɛ́ kú ipú Agblīihɔ-nɛ̄hi ā ú kpó fu. Ó klla le ɔwɛ nɛ̄ ɔcɛ́ ōfōōfūnū gē bū wā ipú Agblīihɔ-nɛ̄hi ā gwū.

¹⁹Aɔ́dā o hile ɔhá dóódu nɛ̄ Áhāsi yá ā, é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda.

²⁰Áhāsi gekwú, anɔ́ɔ é kwú ɔ̄ ú nyi ikpámílī kú aɔ́cɛ́, igelī nɛ̄hi kú Udéfīdi ā. Anɔ́ɔ Uhɛsɛkíya, ɔyí nū le ɔcɛ́ lé kwɛyí nū á.