Read idoma 2 AƆ́CƐ́ 17 Bible Online

2 AƆ́CƐ́ 17 - idoma bible

2 AƆ́CƐ́ 17

¹Ipú iháyí ɔ́migwɛ́ɛpa nɛ̄ Áhāsi lé ɔcɛ́ kú Ujúda ā, Uhósīī ɔyí kú Ɛlā le ɔcɛ́ kú Ísrɛ̄lu lé. Ó ce ɔcɛ́ kú Ísrɛ̄lu Usamérīya, iháyí ahāanɛ.

²Ó le íne kú Óndú ā bīya amáŋ íne nɛ̄ ó bīya ā í lɛbɛ̄ɛka ákú aɔ́cɛ́ kú Ísrɛ̄lu nēe tɛtɛ bá gbɔbū lɛ ɔ́ ā ŋ́.

³Ussalimanɛ́sa, ɔcɛ́ nɛ̄hi kú Asírīya wā í le ɛfú kpó tá ɔ̄. Uhósīī cɔ̄nyā lɛ ɔ́. Anɔ́ɔ ó klla ī gbā ɔ̄ ɛ̄gbā abɔ̄fú iháyí dóódu á.

⁴Amáŋ iháyí éyi, Uhósīī lɛ ɛhɔ̄ tū fu Usóo, ɔcɛ́ kú Íjīpiti kú ɔ̄ gaá tá anúɔ abɔ̄. Anɔ́ɔ ó gbā ɔcɛ́ kú Asírīya ɛ̄gbā abɔ̄fú ā ɛ́ɛ́ gɛ ŋ́ má. Eko nɛ̄ ɔcɛ́ kú Asírīya lɛ ɛ̄nyā pó ā, ó lɛ Uhósīī kwú, anɔ́ɔ ó kwú ɔ̄ ú tū agbá.

⁵Anɔ́ɔ ɔcɛ́ kú Asírīya gaá le ɔfú kpó kwu Ísrɛ̄lu, anɔ́ɔ ó le íbɔm cē tū Usamérīya á. Iháyí ɔ́mɛtá kú íbɔm nɛ̄ ó cē tū Usamérīya ā,

⁶nōo kē wɛ iháyí ɔ́mahāanɛ nɛ̄ Uhósīī cɔcɛ́ ā, ɔcɛ́ kú Asírīya gaá miyɛ Usamérīya á. Ó kwú ācɛ kú Ísrɛ̄lu ú kpó ŋmá Usamérīya dúúdú. Anɔ́ɔ ó kwú uwā ú kpó ga ajɛ kú Asírīya. Ó kwú aóhī ú kpó lā Uhála ɛga nōo kwu ísu kú Uhábɔ ipú ajɛ kú Ugósan á. Anɔ́ɔ ó kpó ācɛ ohile kú uwā lā ipú aígelī nɛ̄hi kú Umédesi.

⁷Ɔdā nyā yá lɛ ā ohígbū ka ācɛ kú Ísrɛ̄lu le íne kú Óndú, Ɔwɔicō kú uwá, nōo bī ɔkābɔ̄ olɔfú kpó uwá bɛ̄cɛ ŋmá abɔ̄ kú Uféro, ɔcɛ́ kú Íjīpiti ā, bīya. É gaá gbɔɔ́ ō gbā aɔ́wɔ ɔhá ɛ̄gbā.

⁸É klla gbɔɔ́ ō yɛ ce ucē obɔ̄bí kú ɛcí ō pá kú aéwo, nɛ̄ Óndú ā nū bɛ̄cɛ hīla uwá ā.

⁹Aɔ́cɛ́ kú Ísrɛ̄lu yá aɔ́dā alɛwa tayínu nōó he Óndú, Ɔwɔicō ɔtū ŋ́. É le aíkpɛ́cí kpó gwó tū ipú aípɔ́lɛ́ nɛ̄ŋcɛ́ mɛ́mla aípɔ́lɛ́ kú eyīpú kú uwā kpɛ́mm.

¹⁰Ācɛ Ísrɛ̄lu le ojibó ɔwɔ kú ɔ̄cɛnyā kú Ássera mɛ́mla ɛcɔ̄ gbā kwaajɛ ɔkwu ɔcí ɛ̄mɛ̄ɛ̄mɛ̄ dóódu mɛ́mla ɛyí ɛfu dóódu á.

¹¹É klla ī yi ɔtulālí ɔlá lɛ ɛcí ā ɛyí ede. É gē gbla ucē kú ɛcí ō pá kú aéwo nɛ̄ Óndú ā nū bɛ̄cɛ hīla uwá ŋmá ipú ajɛ ā yá. É bīya íne kú Óndú ā klla kē yá ucē kú ɔ́bíipú alɛwa nēe cɛ̄ lɛ Óndú ā cɔ̄nū nɛ̄hi.

¹²É lɛyítáajɛ lɛ íne kú Óndú ā nɛ̄ ó je lɛ uwá ka kéē híī pā ɛcí ŋ́ mā ŋ́.

¹³Óndú ā gē bī ācomɛ́ɛbɛ alɛwa le pi Ujúda mɛ́mla Ísrɛ̄lu ahɔ̄ kahíníī, “Aá kwúcē ŋmá ɔwɛ obɔ̄bí kú aá, ká aá lɛ odúúdú íne nɛ̄ n je lɛ aádáádā aá, ŋmá ɛgiyí ācomɛ́ɛbɛ kú um ā tū.”

¹⁴Amáŋ Ísrɛ̄lu mɛ́mla Ujúda tá kéē lɛyítáajɛ lɛ anú nōo wɛ Óndú ā, amáŋ é yíīkpɛ̄yí olɔfú bɛ̄ɛka aádā uwā nēé kpɔ́tū ce Óndú ā, Ɔwɔicō kú uwā ŋ́ mā ā

¹⁵É tá kéē bī aíne kú nū le yúklɔ́. É klla kē leyī gwō ɛka nɛ̄ ó gbo mla aádáádā uwā bónū. É klla kē je ahɔ̄ nɛ̄ ó pi uwá anú ā ka ɔdā dóódu ŋ́. É gbā aɔ́wɔ ɛ̄kɛ̄mgbɛ̄ ɛ̄gbā, anɔ́ɔ é kē kwú pīya ācɛ ɛ̄kɛ̄mgbɛ̄ dúú á. É klla kwú yɛce ucē kú aéwo nēe yɛ uwá jīla tá biílí ā, gē mafú ka ukɔ́ nɛ̄ Óndú ā tū kéē híī gbla uwá yá ŋ́ mā í wɛ ɔdā dúúmā ŋ́.

¹⁶É kwú mlanyī odúúdú aíne kú Óndú ā, Ɔwɔicō kú uwā. Anɔ́ɔ é klla le ojibó kú ɛna, Ássɛ̄ra mɛ́mla ubáalu kpó ma lɛ iyī ūwā, anɔ́ɔ é gbɔɔ́ ō gbā uwā ɛ̄gbā

¹⁷É le ayí uwā nɔ̄nyīlɔ mɛ́mla ayí uwā nɔ̄nyā kpó gwɛ́ɛya o yɔlá dúúdú lɛ aɔ́wɔ kú ācɛ o pā ɛcí. É klla gē nyɔ̄ ī gwɛ́bā ī ga ɛgiyí aólobócí kéē má uwā ɛbɛ. É klla kwú eko kú uwā ú táajɛ dúú lɛ ɔdōbɔ̄bí ō yá piyóó. Anɔ́ɔ é cɛ̄ lɛ Óndú ā kwú cɔ̄nū nɛ̄hi

¹⁸Anɔ́ɔ Óndú ā kwú cɔ̄nū mla Ísrɛ̄lu, klla lɛ uwá kpó ŋmá eyī kú nū. Ɔ̄cɛ dúúmā kú uwā í hile ipú ajɛ kú Ísrɛ̄lu ā ŋ́, ayíka ipɔ́ɔma kú Ujúda ōfōōfū uwā nɛ.

¹⁹Ujúda nááná ā í le íne kú Óndú, Ɔwɔicō kú uwá tū ŋ́ dúú. Ikɔkɔ ɔ́ɔmā ucē obɔ̄bí nɛ̄ ācɛ Ísrɛ̄lu mīyɛ bɔ́tū ā nēé yɛce á.

²⁰Óndú ā tá odúúdú ācɛ kú Ísrɛ̄lu ā. Ó le italā yá uwá, anɔ́ɔ kwú uwā ú kpó tū aólɛlā ōbɔ̄bíipú nɛ̄hi abɔ̄, jāā gbéeko nɛ̄ ó le uwá kpó nū ŋmá eyī nū piyóó.

²¹Eko nɛ̄ Óndú ā kwú ācɛ kú Ísrɛ̄lu ú hɛ́ ŋmá ipɔ́ɔnū kú Udéfīdi ā, é kwú Ujérobōwam, ɔyí kú Unébati ā ú pīya ɔcɛ́ kú uwā. Ujérobōwam le ācɛ Ísrɛ̄lu eyí pīya ŋmá oōgbā Óndú ā ɛ̄gbā. Anɔ́ɔ ó le uwá plla tū ɔ́bíipú ō bī tū Óndú á.

²²Ācɛ kú Ísrɛ̄lu yɛce odúúdú ɔ́bíipú nɛ̄ Ujérobōwam bī ā kpɛ́mm. É habɔ̄ ɔ̄ tá ŋ́,

²³jāā gbéeko nɛ̄ Óndú ā lɛ uwá kpó ŋmá eyī kú nū, ɛ́gɛ́nɛ̄ ó tɛtɛ pi uwá ahɔ̄ bū okónu kú ācomɛ́ɛbɛ kú nū ā. Anɔ́ɔ é kwú ācɛ kú Ísrɛ̄lu ú kpó ŋmá ajɛ kú uwā ga ajɛ kú Asírīya á. É bá abɔ́ɔ jāa kwu eko nēé tɔ́kpá nyā ā.

²⁴Ɔcɛ́ kú Asírīya le ācɛ kpó ŋmá aígelī nɛ̄hi kú Ubábīlɔn, Ukútan, Áfa, Uhámati, mɛ́mla Uséfāfém gaá kwú uwā ú kpó nyɔ̄ ú lā ipú aígelī nɛ̄hi kú Usamérīya, kwɛyí ācɛ kú Ísrɛ̄lu. Anɔ́ɔ é mīyɛ Usamérīya, anɔ́ɔ é má lā anú á.

²⁵Eko nēé lā abɔ́ɔ aflɛ́yí ā, é gbā Óndú ā ɛ̄gbā ŋ́, anɔ́ɔ Óndú ā lɛ aágábá tɛ̄hɔ̄ gaá gbɔɔ́ ō kpó uwá ŋmó á.

²⁶Anɔ́ɔ é le ka lɛ ɔcɛ́ nɛ̄hi kú Asírīya kahíníī, “Ācɛ nāa kpó gaá lā ajɛ kú Usamérīya ā, abɔ̄ é jé íne kú Ɔwɔicō kú ajɛ abɔ́ɔ ŋ́ mā, ó le ágábá tɛ̄hɔ̄ gaá gbɔɔ́ ō kpó uwá ŋmó ɛɛ́ n.”

²⁷Anɔ́ɔ ɔcɛ́ nɛ̄hi kú Asírīya ā da uwá kahíníī, “Aá lɛ éyi kú ācogwɛ́ɛya kú aálagbá kú Ísrɛ̄lu nɛ̄ alɔ kpɔ́ ŋmá abɔ́ɔ ā kwúcē gaá lā abɔ́ɔ, cɛ́ɛ́ kóō nwū ācɛ ā íne kú Ɔwɔicō kú ajɛ ɔ́ɔmā.”

²⁸Anɔ́ɔ ɔ̄cogwɛ́ɛya kú Ísrɛ̄lu éyi nēé nū ŋmá Usamérīya ā gaá lā Ubɛ́tɛlu, ɛga nɛ̄ ó yɔ̄ í nwū ācɛ ɛ́gɛ́nɛ̄ é géē gbā Óndú ā ɛ̄gbā lɛ ā.

²⁹Amáŋ ācɛ nēe lā Usamérīya ā bá ī pā ɛcí klla bá ī yá aɔ́wɔ lɛ iyī uwā kpɔ́. É le ɛcí kú uwá kpó bá ipú inu kú ɛcí nɛ̄ ācɛ kú Ísrɛ̄lu tɛtɛ gwó bá abɔ́ɔ ā. Ígwu ɛyɛ́ɛyɛyí kú uwá lɛ ojibó ɛcí kú uwā kpó bá igelī nɛ̄hi nēé lā ā.

³⁰Ācɛ kú Ubábīlɔn le ojibó kú ɛcí kú Usúkōtu Ubɛnótu ma, ācɛ kú Ukútan, le ojibó kú ɛcí kú Unágali ma, ācɛ kú Uhámati ā kē le ojibó kú Assíma ma.

³¹Ācɛ kú Áfa le ojibó kú Uníbihāsi mɛ́mla ákú Utátāki ma. Ācɛ kú Uséfāfem gē je ayí uwā gwɛ́ɛya o yɔlá dúúdú lɛ aɔ́wɔ kú uwā nēé hī ka Adramélēki mɛ́mla Anamélēki ā.

³²Ācɛ nēe bá ā gē gbā Óndú ā ɛ̄gbā dúú, anɔ́ɔ é le ɛdɔ ācɛ dóódu fu ŋmá ipú ācɛ ɔlɛ́ uwā, cɛ́ɛ́ kéē wɛ ācogwɛ́ɛya, nēe géē gwɛ́ɛya lɛ uwá aíkpɛ́cí dóódu kú uwā.

³³Ɔ́ɔmā léka é gē gbā Óndú ā ɛ̄gbā, nááná ā, é gē pā ɛcí kú uwā ɛ́gɛ́nɛ̄ ucē kú aéwo nēé kpó uwā ŋmá wā ā lɛ ā.

³⁴Jāā kwu eko nēé tɔ́kpá nyā ācɛ ā gē pā ɛcí kpɔ́. É gē gbā Óndú ā ɛ̄gbā klla gē lɛyítáajɛ lɛ aíne nɛ̄ ó je lɛ ayááyí kú Ujékɔ̄pu, nɛ̄ ó hī ka Ísrɛ̄lu ā ŋ́.

³⁵Óndú ā le okónu ce mla uwá klla le ɔ́da je lɛ uwá tɛtɛ ka, “Aá híī gbā aɔ́wɔ ɔhá dúúmā ɛ̄gbā ŋ́. Aá híī túkpɛɛ́ lɛ uwá, ɛ́ɛ́ nɛ̄ aá kōō ī cɛ̄ uwā ɛhɔ̄ ŋ́, ɛ́ɛ́ nɛ̄ aá gē je ɔdā dúúmā gwɛ́ɛya lɛ uwá ŋ́.”

³⁶Óndú ā klla da uwá kpɔ́ kahíníī, “Aá géē lɛyítáajɛ lɛ ami nōo wɛ Óndú ā, nōo kpó aá bɛ̄cɛ ŋmá Íjīpiti, mɛ́mla abɔ̄ o lɔfú mla íkwu nɛ̄hi kú um ā. Ami nɛ̄ aá géē gbā um ɛ̄gbā klla í gwɛ́ɛya gā um á.”

³⁷Óndú ā klla da uwá kpɔ́ kahíníī, “Aá géē lɛyítáajɛ lɛ aíne mɛ́mla ɔ́da nɛ̄ n tá lɛ aá ā. Aá gaá gbā aɔ́wɔ ɔhá dúúmā ɛ̄gbā ɛ́ɛ́, nɛ̄ aá kōō ī yúufi uwā ŋ́.”

³⁸Ó klla yɔ̄ gē kɛlā kpɔ́ kahíníī, “Aá híī je mlanyī okónu nɛ̄ ami mla aá ce nyā ŋ́.

³⁹Aá géē lɛyítáajɛ lɛ ami, nōo wɛ Óndú, Ɔwɔicō kú aá ā. N kē í hɛ́ aá tá ŋmá abɔ̄ kú aólɛlā kú aá.”

⁴⁰Amáŋ ācɛ ɔ́ɔmā í jāhɔ̄ lɛ ɛlā kú anú nōo wɛ Óndú ā ŋ́. Anɔ́ɔ é bá ī yá ucē kú ɛcí ōpā kú uwā kpɔ́ á.

⁴¹Anɔ́ɔ ācɛ nēe bá abɔ́ɔ ā gē gbā Óndú, Ɔwɔicō ɛ̄gbā. É klla í pā ɛcí kú uwā kpɔ́. Jāā kwu eko nēé tɔ́kpá nyā ayááyí uwā gē yá ucē ɛdɔ éékpó ɔ́ɔmā kpɔ́.”