Read idoma 2 AƆ́CƐ́ 18 Bible Online

2 AƆ́CƐ́ 18 - idoma bible

2 AƆ́CƐ́ 18

¹Ipú iháyí ɔ́mɛtá nɛ̄ Uhósīī, ɔyí kú Ɛlā lé ɔcɛ́ kú Ísrɛ̄lu ā, Uhɛsɛkíya, ɔyí kú Áhāsi le ɔcɛ́ kú Ujúda lé.

²Ó wɛ iháyí ofu ce ɛhɔ̄ ɛ́ɛ́ nɛ̄ ó lé ɔcɛ́ á. Ó wɛ ɔcɛ́ kú Ujúda iháyí ofu ce ahāanɛ. Ɛ́nɛ́ nū wɛ Ábīja, ɔyínɔ̄nyā kú Usekaríya.

³Ó yá ɔdā nōo he Óndú ā ɔtū bɛ̄ɛka aádáádā nū Udéfīdi ā.

⁴Ó le odúúdú aíkpɛ́cí kú ācɛ o pā ɛcí ā ú kpó ca. Ó klla le ojibó kú ɛcí ā kpó ca. Ó le ojibó kú ɛcí Ássɛ̄ra ā kpó ca dúú. Ó klla kwú ɛgwā kú ugóolu (oje ɔdɔ) nɛ̄ Umósīsi yá lɛ uwá, nēé hī ka, Unehústan ā ú ca. Jāā kwu eko ɔ́ɔmā, ācɛ kú Ísrɛ̄lu húmáyī yi ɔtulalī ɔlá lɛ ɛgwā kú Umósīsi nyā, klla í pā ɔ̄

⁵Uhɛsɛkíya lɔtūce Óndú, Ɔwɔicō kú Ísrɛ̄lu. Ujúda í lɛ ɔcɛ́ dúúmā bɛ̄ɛka anú ā ɛ́ɛ́ ŋ́. Ó kōō kwu eko oŋmá igbīhi kú nū mɛ́mla igbīhi ikwú kú nū ā, é lɛ ɔcɛ́ ɔ̄kwɛ̄yi bɛ̄ɛka anú ā ɛ́ɛ́ ŋ́.

⁶Ó lɛyítáajɛ lɛ Óndú ā eko dóódu klla yɛce Óndú ā kpaakpa mla ɔtū ékpónú. Ó klla le odúúdú aíne nɛ̄ ó je lɛ Umósīsi ā tū.

⁷Anɔ́ɔ Óndú ā yɔ̄ mla anú, anɔ́ɔ ɔdā dóódu nɛ̄ ó le abɔ̄ kwu ɔ́ klla yá ā, gē gɔbū kpaakpa klla lɔhi nɛ̄hi. Ó yá īkpɛ̄yí olɔfú tá ɔcɛ́ kú Asírīya klla tá ka anúɔí gbā ɔ ɛ̄gbā ŋ́.

⁸Ó kpɛ́fú tá ācɛ kú Ufilístiya klla le uwá yálé ŋmá Ugása jāā kwu igelī nɛ̄hi kú uwā nēé hí igá tū ɔ̄ ā.

⁹Ipú iháyí ɔ́mɛnɛ nɛ̄ Uhɛsɛkíya ce ɔcɛ́, nōo kē wɛ iháyí ɔ́mahāapa nɛ̄ Uhósīī wɛ ɔcɛ́ kú Ísrɛ̄lu ā. Ussalimanɛ́sa, ɔcɛ́ kú Asírīya cāŋjɛ kwú ɛyí ú hɛ́ kwú Ísrɛ̄lu, anɔ́ɔ ó gaá le íbɔm cē tū Usamérīya á.

¹⁰Ipú iháyí ɔ́mɛtá nɛ̄ ó cīíbɔm tū Usamérīya ā, ó le Usamérīya yálé klla mīyɛ ɔ́ abɔ̄fú. Ɔ̄da nyā yá ipú iháyí ɔ́mɛhīlī nɛ̄ Uhɛsɛkíya ce ɔcɛ́ kú Ujúda, nōo klla wɛ iháyí ɔ́maháanɛ nɛ̄ Uhósīī ce ɔcɛ́ kú Ísrɛ̄lu ā.

¹¹Ɔcɛ́ kú Asírīya kwú ācɛ kú Ísrɛ̄lu ú kpó ŋmá ajɛ kú uwā ga ajɛ kú Asírīya dúúdú. Ó kwú uwá ú kpó gaá lā Uhála, Uhábɔ mɛ́mla okónu isú kú Ugósan mɛ́mla ipú aígelī nɛ̄hi kú ācɛ Umédesi.

¹²É yá Usamérīya lé ohígbū kēé lɛyítáajɛ lɛ ɛlā nɛ̄ Óndú, Ɔwɔicō kú uwā da uwá ā ŋ́. É klla lɛyítáajɛ lɛ okónu oōce kú Óndú ā nɛ̄ Umósīsi, ɔ̄cocɛ̄hɔ̄ kú Óndú ā je lɛ uwá ā ŋ́.

¹³Ipú iháyí ɔ́migwɛ́ɛnɛ nɛ̄ Uhɛsɛkíya lé ɔcɛ́ kú Ujúda ā, Usenakéribu, ɔcɛ́ nɛ̄hi kú Asírīya ā gaá le ɔfú kpó kwu odúúdú igelī nɛ̄hi kú Ujúda nēé hí igá tū ɔ̄ ā, anɔ́ɔ ó mīyɛ uwá abɔ̄fú á.

¹⁴Anɔ́ɔ Uhɛsɛkíya le ɛhɔ̄ tū fu ɔcɛ́ nɛ̄hi kú Asírīya nōo yɔ̄ Ulákisi ā kahíníī, “Ɔdōbɔ̄bí nɛ̄ n yá á, kócōō ā kpó ɔfú kwu um gɛ̄ ŋ́, cɛ́ɛ́ ká ɔdā dúúmā nōo he uwɔ ɔtū ā, n géē gbā ga uwɔ kwɛ́yí nū.” Anɔ́ɔ ɔcɛ́ kú Asírīya da Uhɛsɛkíya ká ɔ̄ lɛ ɛkpa kú oje nɛ̄hɛ́ úlā ofu igwáahāānɛ ce igwó (136,000), mɛ́mla ɛkpa kú oje ɔdɔ (ugoolu) igwó (1,000) gbā lɛ anúɔ.

¹⁵Anɔ́ɔ Uhɛsɛkíya kwú odúúdú ugóolu (oje ɔdɔ) mɛ́mla ije nɛ̄hɛ́ kú Agblīihɔ-nɛ̄hi kú Óndú ā mɛ́mla ákú ɔlɛ́ ɔcɛ́ ā ú kpó lɛ ɔcɛ́ nɛ̄hi kú Asírīya.

¹⁶Ó klla lɛ (oje ɔdɔ) ugóolu kpó ŋmlá ŋmá odōngwɔ̄ɔwɛ kú Agblīihɔ-nɛ̄hi ā, klla kwú kpó tū ɛhɔ̄ fu Usenakéribu.

¹⁷Ɔcɛ́ nɛ̄hi kú Asírīya klla lɛ aícɔ́ɔja alɛwa nɛ̄hi tɛhɔ̄ ŋmá Ulákisi kóō gaá kpɛ́fú tá Uhɛsɛkíya Ujerúsālɛm. Aótrɛ̄yí kú aícɔ́ɔja ɛtá kú nū ā kpó uwā nyɔ̄ á. Eko nēé gā Ujerúsālɛm ā, é gaá mīyɛ ɔwɛ kú ɛga nɛ̄ ācɛ-o-tá-īlī bá ā tū abɔ̄, okónu ɔ́gilɔ́ nɛ̄ éŋkpɔ̄ ī bū ŋmá njɔlɔ kú ɛhícō wā ajɛ ā.

¹⁸Anɔ́ɔ é le ɛhɔ̄ tū fu Uhɛsɛkíya. Anɔ́ɔ aígabɔ̄ ɛtá kú ɔlɛ́ Uhɛsɛkíya le pɛ́ gaá jīla uwá ɔwɛ. É wɛ Ɛlíyākim ɔyí kú Uhilkíya, nōo leyīkwu agblɔ̄cɛ́ ā, Ussɛ́bina ɔmálɛ kú únɛ́pɔ̄ ā mɛ́mla Ujówa ɔyí kú Ásāfu nōo gē leyīkwu ɔkpá ɔ̄kā kú Ujúda, mɛ́mla aíyó kú ɔkpá ɔhá dóódu ā.

¹⁹Anɔ́ɔ éyi kú aótrɛ̄yí kú aícɔ́ɔja kú Asírīya ā da uwá ka, ɔ̄cɛ nɛ̄hi kú Asírīya tíne kóō jé ɔdā nɛ̄ Uhɛsɛkíya lɔtūce ɔ́ lɛ ā dúú ā.

²⁰Ó klla kahíníī, “Aá gbɛlá ka ɛlā okónu áncā gē kwɛyí íjééyī mɛ́mla ɔfú kú ɛfú ō kpó nɛɛ? Ɔnyɛ̄ nɛ̄ aá gbɛlá ka ó wā í tá aá abɔ̄ ɛ́ɛ́, nɛ̄ aá gē yīīkpɛ̄yí olɔfú tá ɔcɛ́ nɛ̄hi kú Asírīya ā?”

²¹Ó klla da uwá kahíníī, “Aá lɔtūce Íjīpiti kéē tá aá abɔ̄ nɛɛ? Ɔ́ɔmā lɛbɛ̄ɛka, o lɛ ɔnji yá ɔcí ō kwaajɛ, ó kē í je yíla í bū tū uwɔ abɔ̄. Ɛ́gɔ́ɔmā nɛ̄ ɔcɛ́ kú Íjīpiti lɛ, eko dúúmā nɛ̄ ɔ̄cɛ dúúmā le ɔtū kpóce ɔ́ á.”

²²Ɔnyīlɔ ā klla yɔ̄ ī kɛlā kpɔ́ kahíníī, “Kɛ̄ɛ ka, aá gē da um ka, aá gē lɔtūce Óndú, Ɔwɔicō kú aá. Ó wɛ aíkpɛ́cí mɛ́mla aéde kú nū nɛ̄ Uhɛsɛkíya je kpó ca tāajɛ, yɔ̄ ī da ācɛ kú Ujúda mɛ́mla Ujerúsālɛm kéē pɛ́ ga Ujerúsālɛm gaá gbā Óndú ā ɛ̄gbā ŋ́nɛɛ.”

²³Ó ka anúɔ géē cokónu mla uwá, o ŋmá lɛ iyē kú ɔcɛ́ nɛ̄hi kú Asírīya. Ó ka anúɔ géē kpó ɔnya úlā ɛhɔ̄ (2,000) lɛ uwá ɔ́dāŋ ka ɛ́ɛ géē má ācɛ ulá ɛhɔ̄ (2,000) nēe géē ce ɔnya ā glá.

²⁴Ó da uwá keé kōō fu aícɔ́ɔ́ja nɛ̄ŋcɛ́ kú Asírīya dúúmā iyē ɛ́ɛ́ ŋ́, nááná nɛ́ɛ kē ī leyīce ācɛ Íjīpiti kéē lɛ úgbɔ́nya mɛ́mla ācɛ o kpɛ́fú ɔnya tɛ̄hɔ̄ fu uwá ā.

²⁵Ó klla da uwá ka ɛ́ɛ̄ gbɛlá ka Óndú ā ɔ́ɔ jé abɔ̄ aá wā í kpɛ́fú tá uwā klla je ɔlɛ́ uwā ca tāajɛ ā ŋ́ nɛɛ? Ó da uwá ka Óndú ā abɔ̄yīnū ɔ́ɔ jɛga lɛ aá kú aá wā í kpɛ́fú tū uwā cɛ́ɛ́ kú aá kwú uwā í kpó yíífi á.

²⁶Anɔ́ɔ Ɛlíyākim, Ussɛ́bina, mɛ́mla Ujówa tá aótrɛ̄yí kú aícɔ́ɔja kú Asírīya ā ohi kahíníī, “Aá ka Aramáyīki lɛ alɔ, ɔkpani. Alɔ jɛ́ɛyí nū. Aá híī ka Uhíbru lɛ alɔ ŋ́, ohígbū ka odúúdú ācɛ kú Ujúda ā bá ɛyí ɔdɔ ā bá yɔ̄ ī jāhɔ̄.”

²⁷Anɔ́ɔ ó klla tá uwá ohi kahíníī, “Aá gbɛlá ka aá mla ɔcɛ́ ōfōōfū aá nɛ̄ ɔcɛ́ nɛ̄hi kú Asírīya tū um ɛhɔ̄ fu aá á nɛɛ? Ehée, n yɔ̄ í kɛlā lɛ ācɛ nēe cīce ɛyí ɔdɔ ā, nēe géē lé emī kú uwā klla í gwá encílé kú iyī uwā ɛ́gɛ́nɛ̄ aá géē gwá ákú aá ā.”

²⁸Anɔ́ɔ igabɔ̄ kú Usenakéribu ā le ɛgba dɛ̄ tá ɔ̄ okónu Uhíbru kahíníī, “Aá pó ɛlā nɛ̄ ɔcɛ́ nɛ̄hi kú Asírīya yɔ̄ í ka lɛ aá.

²⁹Ó pi aá ahɔ̄ kú aá cɛ̄ lɛ Uhɛsɛkíya pllá aá ŋ́, ohígbū ka Uhɛsɛkíya í nya aá tá glá ŋ́!”

³⁰Ɔ̄cɛ ā da uwá kahíníī, “Aá cɛ̄ lɛ ɔ́ pllá aá kú aá lɔtūce Óndú ā ŋ́. Aá híī gbɛlá ka Óndú ā géē nya aá tá ŋ́, ɛɛ́ nɛ̄ ó gē ci alɔ, aícɔ́ɔja kú Asírīya oō wā í mīyɛ igelī nɛ̄hi kú aá ŋ́.”

³¹Ó da uwá ká ɛ́ɛ híī jāhɔ̄ lɛ Uhɛsɛkíya ŋ́. Ka ɔcɛ́ nɛ̄hi kú Asírīya gē da uwá ka ɛ́ɛ̄ le bɛ̄cɛ ŋmá igelī nɛ̄hi kú uwā, cɛ́ɛ́ kɛ́ɛ̄ wā gaá cɔ̄nyā. Cɛ́ɛ́ kɔ́ɔ̄ géē cɛ̄ lɛ uwá lé īkpō ɔcí ufáyin mɛ́mla īkpō ufígi kú uwā. Ó klla da uwá ka ɛ́ɛ klla í gwá éŋkpɔ̄ ŋmá obugá kú uwā,

³²jāā gbéeko nɛ̄ ɔcɛ́ nɛ̄hi ā géē wā í kpó uwā bá ɔlɛ́ ɛ̄yīpɛ̄ nɛ̄ ɔ́ɔ í lɛbɛ̄ɛka ákú uwā ā. Ɛga nɛ̄ ɔcí ufáyin yɔ̄ nɛ́ɛ géē yá ejé, mɛ́mla ɛga nɛ̄ igbāmkpa yɔ̄ nɛ́ɛ géē yá igbō. Ó wɛ ajɛ kú ɔcí nēé hī ka ólīfu mɛ́mla anɔ̄ kú nū ā mɛ́mla ɛnwú. Ó da uwá kpɔ́ ka ɔ́dāŋ́ ka ɛ́ɛ lɛ ɔdā nɛ̄ ɔcɛ́ nɛ̄hi kú Asírīya ka á yá, ɛ́ɛ́ gáā kwú ŋ́. Ó da uwá kɛ́ɛ̄ híī cɛ̄ lɛ Uhɛsɛkíya, ɔcɛ́ ā plla uwá cɛ́ɛ́ kú ɛ́ɛ gbɛlá ka Óndú ā ɔ́ɔ géē wā í nya uwá tá glá ŋ́.

³³Ɔ̄cɛ ā klla da uwá ka ɔwɔ kú éwɔhá dúúmā ɔ́ɔ hɛ́ éwo dúúmā tá ŋmá abɔ̄ kú ɔcɛ́ nɛ̄hi kú Asírīya kú é pó jéjée ɛɛ́ ɛ̄.

³⁴Ó da uwá ka iní nɛ̄ aɔ́wɔ ɔ́ɔmā bá eko ɔ́ɔmā ā? Ó da uwá ka aɔ́wɔ kú Uhamáti mɛ́mla ákú Ápādi kɛ̄ɛ? Ó klla ka iní nɛ̄ aɔ́wɔ kú Usefafém, Uhɛ́na, mɛ́mla Ífa bá ā? Ó da uwá ka ɔ̄cɛ dúúmā ɔ́ɔ nya Usamérīya tá glá ā?

³⁵Ó da uwá ɔ̄kā ka eko nyá nɛ̄ aɔ́wɔ kú aéwo nɛ̄ ó cɔ̄ɔ̄cí mbá ā, hɛ́ uwā tá ŋmá abɔ̄ kū ɔcɛ́ nɛ̄hi kú Asírīya kú ɛ̄ pó āa? Ó da uwá ka ɔdí ɔ́ɔ cɛ̄ lɛ uwá gbɛlá ka Óndú ā ɔ́ɔ géē nya Ujerúsālɛm tá glá ā?

³⁶Amáŋ odúúdú ācɛ ā lɛ okónu kú uwá klá símm, ɔ̄cɛ dúúmā kú uwā í tá ohi ékpónú ŋ́, ohígbū ka Uhɛsɛkíya ɔcɛ́ ā le ɔ́da je lɛ uwá ka “Aá tá ɔ̄ ohi dúúmā ŋ́”

³⁷Anɔ́ɔ Ɛlíyākim, mɛ́mla Ussɛ́bina mɛ́mla Ujówa le úwé kú uwá kpó híla ipú ɔtū nōbí, klla nyɔ̄ í lɛ odúúdú ɛlā nɛ̄ otrɛ̄yí kú aícɔ́ɔja kú ācɛ Usiríya ka ā kpó ka lɛ Uhɛsɛkíya, ɔcɛ́ ā á.