Read idoma 2 AƆ́CƐ́ 19 Bible Online

2 AƆ́CƐ́ 19 - idoma bible

2 AƆ́CƐ́ 19

¹Ɔkwɔɔkwu nɛ̄ Uhɛsɛkíya le ɛlā kú uwā pó ā, ó le úwé kú nū híla, anɔ́ɔ ó kwu īlī ekwu ú kpó wiiyē á. Anɔ́ɔ ó le tá ipú Agblīihɔ-nɛ̄hi kú Óndú á.

²Ó le Ɛlíyākim nōo gē leyīkwu ɔlɛ́ nū ā, mɛ́mla Ussɛ́bina, ɔmálɛ otɔ́kpá ā, mɛ́mla ɔnyākwɔ́cɛ kú ācogwɛ́ɛya éyi, tɛ̄hɔ̄ fu Ayisáya ɔyí kú Ámɔ̄si, ɔ̄comɛ́ɛbɛ ā.

³Olɛhɔ̄ kú nū ā kahíníī, “Ícɛ wɛ ɛ̄cī kú unwalu mla ɛcá ō cá alɔ, mla uwēyī ō je lɛ alɔ. Ɛ̄cī nɛ̄ ɔma lɛ ɔnyā ō yīīpú kwú ɛɛ́, amáŋ ɔnyā ɔ́ɔmā í má ɔ́fú nɛ̄ ó bī gbōkwici ma ɔyí ā wɛ̄ɛcɛ ɛ́ɛ́ gɛ ŋ́.”

⁴Ó ka ɛ́ɛ̄ da ɔ́ kahíníī, “Ekōhī, Óndú ā, Ɔwɔicō kú uwɔ kē pó odúúdú ɛlā kú Urábisāke otrɛ̄yí kú aícɔ́ɔja kú ɔcɛ́ nɛ̄hi kú ācɛ Asírīya, nɛ̄ ɔkpani nū, ɔcɛ́ kú Asírīya tū wā í cá Ɔwɔicō oyēeyī kú alɔ ɛcá ā. Óndú, Ɔwɔicō kú uwɔ kóō lɛ ɛcá ā pó, cɛ́ɛ́ kɔ́ɔ̄ lɛ italā yá ɔ̄cɛ nōo kɛlā nēe bá abɔ́ɔ ā. Ohígbū ɔ́ɔmā, gbɔ̄ɔkɔ lɛ Ɔwɔicō ohígbū ācɛ kú alɔ nēe hile ā.”

⁵Eko nɛ̄ ācocɛ̄hɔ̄ kú Uhesekíya le ɛhɔ̄ ā cɛ̄ lɛ Ayisáya ā,

⁶ó da ācɛ nēé tɛ̄hɔ̄ ā kahíníī, “Aá nyɔ̄ gaá da ɔkpani aá, ɔcɛ́ ka, ‘Abɔ̄ Óndú ā ka lɛ á. Ā híī yúufi ohígbū ɛlā nɛ̄ ɔcɛ́ nɛ̄hi kú Asírīya ka ka ami ɔ́ɔ tá uwɔ abɔ̄ glá ŋ́ mā ŋ́.

⁷N géē je alelékwū éyi tá ipú nū, nōo géē cɛ̄ lɛ ɔ́ pó uwɔ́ɔkɔ nōo géē cɛ̄ lɛ ɔ́ kóō kwúcē ga ɔlɛ́ nū. Cɛ́ɛ́ Óndú ā géē yá kéē kwú ɔ̄ ú ŋmó ipú ajɛ kú ɔlɛ́ nū.”

⁸Urabisáke, igabɔ̄ nɛ̄ ɔcɛ́ kú Asírīya tɛ̄hɔ̄ ā pīyɛyí, anɔ́ɔ ó le pó ka ɔcɛ́ kú Asírīya ɔɔ́ nyɛ̄ɛ̄ ŋmá Ulákissi le yɛ gaá yɔ̄ ī kpɛ́fú tá Ulíbina. Anɔ́ɔ ó le tá abɔ́ɔ gaá miya ɛlā mla anú.

⁹Ɔ̄kā gaá le kā ācɛ kú Asírīya ka, aícɔ́ɔja kú Íjīpiti, nēe bá ɛháajɛ kú Utɛháka, ɔcɛ́ kú Ukússi ā bá yɔ̄ ī wā í kpɛ́fú tá uwā. Eko nɛ̄ ɔcɛ́ kú Asírīya le ɛlā ā pó ā, ó le ɔkpá tá fu Uhɛsɛkíya ɔcɛ́ kú Ujúda.

¹⁰O da ɔ́ ka, “Ā cɛ̄ lɛ Ɔwɔicō nāa lɔtūce ɔ́ ā pllá uwɔ cokónu gā uwɔ ka Ujerúsālɛm ɔ́ɔ́ gáā ga ipú abɔ̄ kú ɔcɛ́ kú Asírīya ŋ́ nɛɛ ŋ́.”

¹¹Ó klla ka kpɔ́ kahíníī, “A kē pó ɔdā nɛ̄ ɔcɛ́ kú Asírīya yɔ̄ í yá aéwo dóódu nōo dɔɔ̄kā ō kpó yíífi ŋmá ajɛ dúúdú ā. A gbɛlá ka a géē nyatá glá tū īyī uwɔ nɛɛ?

¹²Aɔ́wɔ kú éwo kú igelī nɛ̄hi kú Ugósan, Uháran, mɛ́mla Urésefa, Ubɛ́teden mɛ́mla ācɛ nēe lā Utelása, nɛ̄ ádā um jē kpó yíífi ā, lɛ uwá hɛ́tá ŋmá abɔ̄ kú ɔcɛ́ kú Asírīya glá nɛɛ?

¹³Iní nɛ̄ aɔ́cɛ́ kú aígelī nɛ̄hi kú Uhámati, Ápādi, Usefafém mɛ́mla Uhɛ́na mɛ́mla Ifá bá ā?”

¹⁴Eko nɛ̄ Uhɛsɛkíya mīyɛ ɔkpá kú ɔcɛ́ kú Asírīya ā klla le ɔ́ jé ā, anɔ́ɔ ó le tá ipú Agblīihɔ-nɛ̄hi kú Óndú ā. Anɔ́ɔ ó lɛ ɔkpá ā nwūla tá iyɔ̄bū Óndú ā.

¹⁵Anɔ́ɔ ó gbɔ̄ɔkɔ lɛ Óndú ā kahíníī, “Óndú, Ɔwɔicō kú Ísrɛ̄lu, nōo cīce akpa kú ɔcɛ́ kú nū ɔtāhɛ̄ Ucérūbim ā. Awɔ ōfōōfū uwɔ wɛ Ɔwɔicō nōo yɔ̄ gē gbō odúúdú ajɔ̄ɔ̄cɛ́ kú ɛcɛ á. Awɔ yá ɔkpáncō mla ɛcɛ á.

¹⁶Abālɔbányā, Óndú, lɛ eyī kú uwɔ nwūla kú ā má, lɛ ahɔ̄ kú uwɔ nwūla ká ā pó ɛhɔ̄ nɛ̄ Usenakéribu tū wā í cá awɔ nōo wɛ Óndú, nōo yēeyī ā ɛcá ā.

¹⁷Ɔkwɛ̄yi gbóó, Óndú, ɔcɛ́ kú Asírīya ā le aéwo dóódu kpó yíífi ɛɛ́.

¹⁸Ó klla le aɔ́wɔ kú uwá kpó tū ipú ɔlá, ohígbū kēé wɛ ɔwɔ ŋ́, amáŋ íkpékwīja kú ɔcí mɛ́mla ɛcɔ̄ nōo wɛ úklɔ́ abɔ̄ kú ɔlɛɛcɛ ícííci nɛ̄ n.

¹⁹Abālɔbányā, Óndú, Ɔwɔicō kú alɔ, lɛ alɔ nyatá ŋmá abɔ̄ kú ācɛ Asírīya, cɛ́ɛ́ ka odúúdú aéwo kú ɛcɛ kéē géē le jé ka, awɔ Óndú ā, awɔ ōfōōfūwɔ wɛ Ɔwɔicō á.”

²⁰Anɔ́ɔ Ayisáya, ɔyí kú Amɔ̄si le ɛhɔ̄ tū fu Uhɛsɛkíya kahíníī, “Abɔ̄ Óndú, Ɔwɔicō kú Ísrɛ̄lu ā ka lɛ á. N le ɔkɔ nāa gbā gā um ohígbū Usenakéribu, ɔcɛ́ kú Asírīya ā pó ɛɛ́.”

²¹Ɛlā nɛ̄ Óndú ka ohígbū nū ā yɔ̄ á, “Usenakéribu, igelī nɛ̄hi kú Ujerúsālɛm gē yɛhɛ tū uwɔ klla ī leyī gwū uwɔ bónū

²²Ɔ̄nyɛ̄ nāa gbɛlá ka anúɔ húmáyī ī kɛlá lɛ ɔ́ klla ī yɛ́ɛbɛ́ ā? Ami Óndú, Ɔwɔicō kú Ísrɛ̄lu, nāa yɔ̄ í cɛ́ɛcá klla ī kɛlá klá um, í klla lɛ ojīlīmā ce um ŋ́ má āā.

²³A le ɛhɔ̄ tū wā í gwō tū um ka anúɔ bī odúúdú aúgbɔ́ɔnya ɛfú kú anúɔ le ɛyí ɛfu nōo lɛ icō fíyɛ́ dúú kú Ulébānɔn ā yálé. A gwō ka anúɔ le aɔ́cí kú usayípurɛ̄si mɛ́mla aɔ́cí nēé hī usayípurɛ̄si nōo jē fíyɛ́ dúú ā kpó hɛ́ ɛyí ɛfu abɔ́ɔ. A klla gwō ka anúɔ le tá eyīpíípú kú ūpū nɛ̄hi dúú.

²⁴A gē gwō ka anúɔ le obugā bu klla le éŋkpɔ̄ gwá ajɛ kú éwɔhá. A gwó ka ikpó kú aícɔ́ɔja kú ɔlɛ́ anúɔ ɔ́ɔ kwú ísu kú Unáyilu ú ŋmó ŋmá ajɛ.”

²⁵Óndú ā klla da ɔ́ kahíníī, “Á pó ka ami ɔ́ɔ tɛtɛ le ojuju kú ɔdā nāa yā ɔ́ɔmā yá táajɛ á ŋ́ nɛɛ? N kē lɛ ɔ́ yá jīla ɛɛ́. N je ɔfú gā uwɔ ká ā kwú igelī nɛ̄hi nēé hɛ́ igá tū ɔ̄ ā ú pīya ɛyétutulu.

²⁶Ācɛ nēe lā abɔ́ɔ ā í lɔfú dúúmā ŋ. É bá ī yúufi, klla jé ɔdā nēé lɔfú yá ā ŋ́. É lɛbɛ̄ɛka ácí kú ipácí, ámāŋ ka ácí nōo jɛ̄ kwɛyí inu eko ɔnɔ̄ ā.

²⁷Amáŋ ń jé ɔdā dóódu lɛyíkwu uwɔ. Ɔdā nāa gē yá mɛ́mla ɛga nāa gē nyɔ̄ ā. N jé ɛ́gɛ́nɛ̄ a cɔ̄nū lɛyíkwu um lɛ ā.

²⁸Ɔnū kú uwɔ lɛyíkwu um, mɛ́mla ɔbɔ́ɔcɛ kú uwɔ lɛyíkwu um ā gaajɛ um ɛɛ́. N géē je agá bū uwɔ ɛnwū, cɛ́ɛ́ n klla kwu anjámī ú wu uwɔ okónu, cɛ́ɛ́ n kwú uwɔ ú cīgbīhi bū ɔwɛ pií nāa yɛ wā ā.”

²⁹Anɔ́ɔ Ayisáya klla da Uhɛsɛkíya kahíníī, “Ɛ̄nyā géē wɛ ɔdā ocābɔ̄ ga uwɔ á. Ɛyí mā mɛ́mla ɛyí ɛ́há, a géē yɔ̄ í lé ɔdōlé nōo jɛ́ ŋmá ajɛ abɔ̄yī nū nɛ̄ ó wɛ aá hí ā ŋ́. Amáŋ iháyí ɔ́mɛtá ā, aá géē hɛ́hɔ̄ kú abɔ̄yī aá klla í nyi ɔcí ufáyin kú aá tāajɛ klla í cē ɔdɛ̄hɔ̄ ŋmá ɛhɔ̄ kú aá.

³⁰Ācɛ o hile kú Ujúda ā géē bá ī jɛ bɛ̄ɛka, īkpɔ̄cí nōo tá ɛgba ga ipú ajɛ lipú, nōo yɔ̄ gē gwá eko dóódu ā.

³¹Ācɛ géē bá Ujerúsālɛm ɛyí ɛfú kú Usáyɔn, nōo géē hile ā pií ohígbū ka Óndú ā tɛtɛ le ɔ́ ŋmótá ka ɔ́ɔ í yá ɔ̄ lɛ ā.

³²Ɛ̄nyā wɛ ɔdā nɛ̄ Óndú ā ka, ohígbū ɔcɛ́ kú Asírīya á. “Ó gáā wā igelī nɛ̄hi ā ɛ́ɛ́ nɛ̄ ó kōō gē tá ɔyī ékpónú lɛ ācɛ kú Ujúda ŋ́. Aícɔ́ɔja dúúmā nēe bī ɔ́kplɛ́fú ā í gáā túblá igelī nɛ̄hi ā ŋ́, ɛ́ɛ́ nēé kōō ī mīyɛ ɔ́ abɔ̄fú glá ŋ́.

³³Ɔwɛ nēé bū wā pií ā, nēé gáā bū kwúcē ŋmá Ujerúsālɛm á. Ami nōo wɛ Óndú ā le ɛlā ka ɛɛ́.

³⁴N géē cɛ̄pɔ̄ ācɛ kú igelī nɛ̄hi ā klla í hɛ́ uwā tá ohígbū Udéfīdi, ɔ̄cocɛ̄hɔ̄ kú um.”

³⁵Otū piíí ɔ́ɔmā, alelékwū ɔtɛ̄hɔ̄ kú Óndú ā le tá ɛga nɛ̄ ācɛ Asírīya bá ádɛ́fú kú uwā ā, gaá le aícɔ́ɔja kú uwá úlā bá ɛga úlā ce úlā ofɛtá cɛ̄hɔ̄, ce ofu igwɛ́ɛhɔ̄ (185,000) kpó ŋmó. Ɔŋmɔ́ɔ̄cī nū, é má okwū bá ajɛ ɛbɛɛbɛ,

³⁶anɔ́ɔ Usenakéribu kwú aícɔ́ɔja kú nū ú kpó kwúcē ga Unínīfɛ á.

³⁷Ícíícɛ ɔ́ɔmā piíí ā, ó yɔ̄ ī pā ɛcí ipú inu kú ɛcí kú nū nēé hī ka Unísiroki ā. Ayí abɔ̄yī nū ɛpa, Adramélēki mɛ́mla Usáresa bī ɔkpacaŋgelī lɛ ɔ́ ŋmó. Anɔ́ɔ é kwú pɛ́ kwu ga ajɛ kú Árāratu. Anɔ́ɔ ɔyí nū ɔhá Esahádɔn lɛ ɔcɛ́ kú Asírīya lé kwɛyí nū á.