Read idoma 2 AƆ́CƐ́ 20 Bible Online

2 AƆ́CƐ́ 20 - idoma bible

2 AƆ́CƐ́ 20

¹Ɛpléeko ɔ́ɔmā, Uhɛsɛkíya gbɔɔ́ ō doōcē, ó hile lígíí kóō gekwú piyóó. Anɔ́ɔ Ayisáya, ɔ̄comɛ́ɛbɛ, ɔyí kú Amɔ̄si le yɛ nyɔ̄ gaá má ɔ̄. Anɔ́ɔ ó da ɔ́ kahíníī, “Lɛ ɔlɛ́ uwɔ tútū, ohígbū ka a géē kwú, á gáā bū ōcē nyā ŋ́.”

²Uhɛsɛkíya kwú eyī kú nū ī pīya kwu ɔdɔ, ɛyí agōdō kú nū lɛ igbīhi cē kwu ɛcɛ, anɔ́ɔ gbɔɔ́ ō gbɔ̄ɔkɔ lɛ Óndú ā kahíníī,

³“Óndú, blakwu ɛ́gɛ́nɛ̄ n gbā uwɔ ɛ̄gbā klla yɛce uwɔ lɛ ā. N klla lɛyítáajɛ ga uwɔ kpaakpa. Ɔdā dóódu nōo he uwɔ ɔtū ká n̄ yá ā, ɔdā ɔ́ɔmā nɛ̄ n gē yá á. “Anɔ́ɔ ó gbɔɔ́ ō jikwū nɛ̄hi á.

⁴Amáŋ gbɔbū kú Ayisáya kóō nyɛ̄ɛ̄ ŋmá odúdɔ̄lɛ́ ɔcɛ́ ā, Ɔwɔicō da ɔ̄ kahíníī,

⁵“Kwúcē ga ɛgiyí Uhɛsɛkíya, ɔcɛ́ kú ācɛ ɔlɛ́ um Ísrɛ̄lu ā, gaá da ɔ́ ka, ‘Ɛlā nɛ̄ Óndú, Ɔwɔicō kú ádā uwɔ Udéfīdi ā ka ā yɔ̄ á, N le ɔkɔ nāa gbā ā pó ɛɛ́, n klla le agīje kú uwɔ má ɛɛ́. Ipú ɛ̄cī ɛtá nōo yɔ̄ nyā ōcē kú uwɔ ā géē mɛ. A klla í ga ipú Agblīihɔ-nɛ̄hi kú Óndú ā.

⁶N géē lɛ iháyí igwɛ́ɛhɔ̄ tū oyēeyī kú uwɔ gā uwɔ. N klla í hɛ́ awɔ mɛ́mla igelī nɛ̄hi kú Ujerúsālɛm tá ŋmá abɔ̄ ɔcɛ́ kú Asírīya, N klla í cɛ̄pɔ̄ igelī nɛ̄hi ā, ohígbū iyē kú um mɛ́mla ákú Udéfīdi ɔ̄cocɛ̄hɔ̄ kú um.”

⁷Anɔ́ɔ Ayisáya da ɔ̄cɛ nōo gē leyīkwu ɔcɛ́ ā kɔ́ɔ̄ lɛ ēpū kú ɔcí ufigi ŋmɔ́lá, cɛ́ɛ́ kɔ́ɔ̄ lɛ ɔ́ gba bá ínálēgbé kú ɔcɛ́ ā. Ó ka ínálēgbé ā ɔ́ɔ í je jé.”

⁸Anɔ́ɔ Uhɛsɛkíya da Ayisáya kahíníī, “Ɔdi géē wɛ ɔdā ocābɔ̄ ka Óndú ā géē hɛ́ um tá, nɛ̄ n klla í ga ipú Agblīihɔ-nɛ̄hi kú nū ɛ̄cīhɔ̄ ā?”

⁹Anɔ́ɔ Ayisáya tá ɔ̄ ohi ka ɔdā nōo í cābɔ̄ ka Óndú ā í yá ɔdā nɛ̄ ó cokónu ka anúɔ ī yá gā awɔ ā yɔ̄ á, “A dɔɔ̄kā kú ojiji ā kóō giicō “ikpó igwó, kɛ̄ɛ ka ó í wā ajɛ ikpó igwó.”

¹⁰Anɔ́ɔ Uhɛsɛkíya tá ɔ̄ ohi kahíníī, “Ó tɔ́ɔtɛ́ fíyɛ́ ka ojiji kóō gicō ikpó igwó. Ikɔkɔ ɔ́ɔmā lɛ ɔ́ yá kóō ga igbīhi ikpó igwó.”

¹¹Anɔ́ɔ Ayisáya lɛ ɔkɔ gbā lɛ Óndú ā, anɔ́ɔ ojiji kwúcē ga igbīhi ikpó igwó á.

¹²Eko ɔ́ɔmā, ɔcɛ́ kú Ubábīlɔn, Umérōdaku Ubaládan, ɔyí kú Ubaládan le pó ka, Uhɛsɛkíya ɔcɛ́ kú Ísrɛ̄lu ɔ́ɔ gē doōcē, anɔ́ɔ ó le ɔkpá tá tɛ̄hɔ̄ fu ɔ́ mɛ́mla ɔdā ɛhi.

¹³Anɔ́ɔ Uhɛsɛkíya lɛ ācɛ nōó tɛ̄hɔ̄ ā blla klla le odúúdú iyó kú inu ɔlɛ́ ɔcɛ́, kwu oje nɛ̄hɛ́, ugóolu (oje ɔdɔ), oje udɔ, ɛcɔ̄ ōgbɔɔ́lá, áfū, ɛwɔ́, kwu iyó kú ɛfú kú nū mɛ́mla ɔdā dóódu nɛ̄ ó kpó tayínū ā, kpó mafú lɛ uwá. Ɔdā dúúmā í hile ɔlɛ́ ɔcɛ́, nɛ̄ Uhɛsɛkíya í mafú lɛ uwá ŋ́ nɛ̄ ŋ́.

¹⁴Anɔ́ɔ Ayisáya ɔ̄comɛ́ɛbɛ ā ga ɛgiyí Uhɛsɛkíya gaá da ɔ́ kahíníī, “Abɔ̄ ācɛ nēe bá nyā ka lɛ ā? Iní nɛ̄ uwá ŋmá ā?” Uhɛsɛkíya tá ohi ka, “É ŋmá ɛga oligbó nɛ̄hi ipú ɔlɛ́ kú Ubábīlɔn.”

¹⁵“Ɔdí nɛ̄ uwá má ɔlɛ́ uwɔ āa?” Anɔ́ɔ Uhɛsɛkíya tá ɔ̄ ohi kahíníī, “Odúúdú ɔdā nēe bá ɔlɛ́ um ā, é le uwá má ɛɛ́. Ɔdā dúúmā í tayínū ɔlɛ́ um nɛ̄ ń mafú lɛ uwá ŋ́ nɛɛ ŋ́.”

¹⁶Anɔ́ɔ Ayisáya da Uhɛsɛkíya kahíníī, “Pó ɛlā kú Óndú ā.

¹⁷Ɛ̄cī éyi géē wā, nɛ̄ ɔdā dóódu nēe bá ɔlɛ́ uwɔ mɛ́mla ɔlɛ́ ádā uwɔ ā, nēé géē je uwá kpó ga Ubábīlɔn. Ɔdā dúúmā í gáā hile tá ajɛ ŋ́. Ɛlā nɛ̄ Óndú ā ka ā yɔ̄ á.

¹⁸Ayí uwɔ ohi nēé ma ga uwɔ abɔ̄yī uwɔ ā, é géē je uwá kpó ga Ubálīlɔn, anɔ́ɔ é klla géē bá uwā udá nēé géē bá í yúklɔ́ lɛ ɔcɛ́ kú Ubábīlɔn piyóó.”

¹⁹Anɔ́ɔ Uhɛsɛkíya tá ɔ ohi kahíníī, “Ɛlā kú Óndú ā nāa ka ā lɔhi.” Ó ka ɛ̄nyā ohígbū ka ó kpéyī ce ka ɛbɔ́ mla ajɛ ō gbō lɔfú ɔ́ɔ géē yɔ eko kú anúɔ ā.

²⁰Aɔ́dā o hile ɔhá dóódu nɛ̄ Uhɛsɛkíya yá ā, kwu ɔ̄gɔ̄ nɛ̄ ó bū Ujerúsālɛm mla ɔdā ɔhá ā, é lɛ uwā tá tū ipú ɔkpá kú ígwú ō gbo kú aɔ́cɛ́ kú Ujúda.

²¹Uhɛsɛkíya gekwú, anɔ́ɔ ɔyí nú Umanásɛ lɛ ɔcɛ́ lé kwɛyí nū á.