Read idoma 2 AƆ́CƐ́ 23 Bible Online

2 AƆ́CƐ́ 23 - idoma bible

2 AƆ́CƐ́ 23

¹Anɔ́ɔ Ujosíya le odúúdú anyākwɔ́cɛ kú Ujúda mɛ́mla ákú Ujerúsālɛm kpó hīgwú.

²Anɔ́ɔ anú mɛ́mla uwá, mɛ́mla ācogwɛ́ɛya mɛ́mla ācomɛ́ɛbɛ mɛ́mla odúúdú ācɛ o hile kú Ujerúsālɛm ā le pɛ́ tá ipú Agblīihɔ-nɛ̄hi kú Óndú ā. Anɔ́ɔ é le ɔkpá Ɛka kú Óndú ā, nēé pīyɛ̄ ā jé tɛ́ɛcɛ lɛ uwá iyɔ̄bū odúúdú uwá abɔ́ɔ á.

³Ɔcɛ́ ā gaá háyi pīyɛ̄ ede kú Óndú ā, anɔ́ɔ ó le okónu ce iyɔ̄bū Óndú ā ka anúɔ géē bī odúúdú ɔtū mɛ́mla odo kú anúɔ lɛyítáajɛ lɛ Óndú ā. Ó klla ka anúɔ í lɛ aíne mɛ́mla ɔ́da kú nū tū. Ó klla cokónu ka anúɔ í bī ɔdā nēe bá Ɛka kú Óndú ā iyē ā le yúklɔ́, ɛ́gɛ́nɛ̄ é tá ɔ̄ tū ɔkpá ā lɛ ā. Anɔ́ɔ odúúdú ācɛ kú Ujúda ā le okónu ā ce mla anú dúú á.

⁴Anɔ́ɔ Ujosíya da Uhilikáya, otrɛ̄yí kú ācogwɛ́ɛya ā, mɛ́mla aɛ́nɛ̄ e kpó okónu ce ɔ́ ā, mla ācɛ nēe gē leyīkwu Agblīihɔ-nɛ̄hi kú Óndú ā, kéē lɛ odúúdú ɛcí kú ubáalu, ojibó kú ɔwɔ nɔ̄nyā nēe hī ka Ássɛ̄ra ā mɛ́mla aínyílɔ́wɔ nēé ma bá ipú Agblīihɔ-nɛ̄hi ā, mɛ́mla iyó kú uwā dóódu ā kpó wɛ̄ɛcɛ ŋmá ipú Agblīihɔ-nɛ̄hi, cɛ́ɛ́ kéē kwú uwā ú kpó ga eyɛ̄ɛ̄cɛ kú Ujerúsālɛm gaá lɛ uwá tɔlá ipácí kú Ukídrɔn, cɛ́ɛ́ é lɛ ewo kú nū kpó ga Ubɛ́tɛlu.

⁵Ó klla lɛ ācogwɛ́ɛya kú ɛcí nɛ̄ ɔcɛ́ kú Ujúda kpó ce kéē gwɛ́ɛya klla yi ɔtulalī ɔlá lɛ ɛcí ɛyí ede kú uwā ɛga dóódu kú Ujúda mɛ́mla aígelī nɛ̄hi nēe yɛ Ujerúsālɛm jīla ā kpó bá ajɛ ŋmá úklɔ́ kú uwá. Odúúdú uwā wɛ ācogwɛ́ɛya, nēe gē gwɛ́ɛya lɛ ubáalu, Ássɛ̄ra, ɛnɔ, ɔyā, ínyílɔwɔ mɛ́mla ɔ́dā ɔhá dóódu ā.

⁶Ó kwú ikpɛ́cí kú Ássɛ̄ra ú kpó ŋmá ipú Agblīihɔ-nɛ̄hi ga eyɛ̄ɛ̄cɛ kú Ujerúsālɛm ga ɔpɛ́ kú Ukídirɔn ā, anɔ́ɔ ó kwú uwā ú kpó tɔ̄lá, anɔ́ɔ é le ewo kú nū wú ɔjī kwú ɔ̄ ú pīya ewo, anɔ́ɔ ó kwu ú pahīla klá ɛyí únóji kú aófulajɛ á.

⁷Ujosíya kwú aínu kú ipú Agblīihɔ—nɛ̄hi nɛ̄ aákwuna[12] kú ikpɛ́cí lā gē yá akwuna lɛ ɛcí ā ú kpó wúlatāajɛ. Abɔ́ɔ nɛ̄ ācɛnyā gē tá īlī ō klá ojibó kú ɔwɔ nēé hī Ássɛ̄ra ā iyē á.

⁸Ó le odúúdú ācogwɛ́ɛya nēe lā ipú aígelī nɛ̄hi ɔhá kú Ujúda ā ú kpó wā Ujerúsālɛm. Anɔ́ɔ ó le odúúdú ede kú ɛcí nēé gē kpó aódée gwɛ́ɛya lɛ aɔ́wɔ ɛyí uwā ā kpó tēelihɔ ɛga dúúmā nēé kwu kpɛ́mm ā. Ó klla le ede nɛ̄ Ujóssuwa, igbómína kú igelī nɛ̄hi ā, gwó lɛ anjɛnū ā, nōo kwu abɔ̄lúfīyē kú okónɔɔwɛ nɛ̄hi abɔ̄ ɔ̄cɛ gē bāé ga ipú igelī nɛ̄hi ā, kpó ca tāajɛ.

⁹Ó je ɛga lɛ ācogwɛ́ɛya nēe gwɛ́ɛya ɛyí ede kú ɛcí ā kéē túblá ede kú Óndú ā ŋ́. Amáŋ é je ɛga lɛ uwá kéē lé igbō nɛ̄ ó gē nū ŋ́ nɛ̄ ācɛ gē bī gé lɛ ācogwɛ́ɛya kú Óndú ɔ́mpa uwā.

¹⁰Ó klla kwú ikpɛ́cí kú Utófɛ̄ti nōo kwu ɔpɛ́ kú Uhínɔm ā ú nyílá, cɛ́ɛ́ kú ɔ̄cɛ dúúmā kóō je ɔyínɔ̄nyīlɔ ámāŋ ka ɔyínɔ̄nyā kú nū gwɛ́ɛya o yɔlá dúúdú lɛ ɔwɔ nēé hī ka Umólēki ā ɛ́ɛ́ gɛ ŋ́.

¹¹Ó le aɔ́nya nɛ̄ ɔcɛ́ kú Ujúda ā kpó lɛ ɛ̄gbā ō gbā ɛnɔ ā kpó. Ó klla le aúgbɔ́nya nēé gē bī le gbā ɛnɔ ɛ̄gbā ā kpó tɔ̄lá. É tɛtɛ lɛ aɔ́dā nēe bá nyā kpó bá odúdɔ̄lɛ́ kú Agblīihɔ-nɛ̄hi nōo kwu okómpīinu nɛ̄ ó ligbó lɛ ɔlɛ́ Unátan Uméleki, éyi kú aígabɔ̄ nɛ̄hi ā ŋ́ mā.

¹²Ujosíya kwú aéde nɛ̄ aɔ́cɛ́ kú Ujúda gwó kwu icō kú ɛyí inu kú ɛga nɛ̄ ɔcɛ́ Áhāsi lā ā mɛ́mla ede nɛ̄ Umanásɛ, ɔcɛ́ ma kwu ódúdɛ̄cɛ ɛpa kú Agblīihɔ-nɛ̄hi ú kpó ca tāajɛ nyɛŋɛnyɛŋɛ. Anɔ́ɔ ó le imini ā kpó pīya tá tū ɔpɛ́ kú Ukídirɔn

¹³Ujosíya klla le aíkpɛ́cí nɛ̄ Usólōmɔn gwó kwu ɛnɔ̄ɔ̄cī kú Ujerúsālɛm, ɛháajɛ kú ɛyí ɛfú kú ɔcí nēé hī ka ólīfu ā nyílá, cɛ́ɛ́ kú ācɛ kéē gbā ɔwɔ nɔ̄nyā nēé hī kā Ásitāte, ɔwɔ nɔ̄nyā kú Usídɔn, Ukɛ́mɔ̄si ɔwɔ kú Umówābu, mɛ́mla Umílikom ɔwɔ kú Ámɔn ā gɛ ŋ́.

¹⁴Ó kwu ɛcɔ̄ kú ede nēe bá aíkpɛ́cí ā ú kpó ca nyɛŋɛnyɛŋɛ, anɔ́ɔ ó kwu ojibó kú Ássɛ̄ra nēé ma kwu ajɛ ā ú kpó ca. Ajɛ ɛga nɛ̄ ede nēe bā ā mɛ́mla ɛga nɛ̄ ojibó kú Ássɛ̄ra kwu ā, ó lɛ ɔ́ bū klá ɛcɛ, anɔ́ɔ ó le ɔ́ tū mu mla ikpokwú kú ācɛ á.

¹⁵Ujosíya kwú ikpɛ́cí nɛ̄ Ujérobōwam, ɔyí kú Unébati gwó Ubɛ́tɛlu nɛ̄ ó kpó ācɛ kú Ísrɛ̄lu ikpó tū ínoōbīya ā ú kpó ca tāajɛ. Anɔ́ɔ ó kwú ɛcɔ̄ kú nū ú kpó ca, le ɔ́ gbā umu putuu á. Ó klla kwú ojibó kú Ássɛ̄ra nēé ma kwu ajɛ ā ú kpó yɔlá

¹⁶Ó pīyeyī má icō, anɔ́ɔ ó le aúnóji nēe bá ɛyí ɛfu ā má. Anɔ́ɔ ó cɛ̄ lɛ ācɛ le aíkpokwú nēe bá ipú aúnóji ā kpó wā ɛcɛ. Anɔ́ɔ ó le uwá kpó tū ɔlá ɛyí ede á. Ó bī ɔwɛ nyā le ede ā nyílá. Ó yá ɛ̄nyā cɛ́ɛ́ kú ɛlā nɛ̄ ɔ̄comɛ́ɛbɛ éyi ka eko kú ucɛ nɛ̄ Ujérobōwam, ɔcɛ́ ā háyi pī ede ā yɔ̄ ī gwɛ́ɛya ā kóō lɛ yá ɔkwɛ̄yi. Ujosíya pīyeyī, anɔ́ɔ ó le únóji kú ɔ̄comɛ́ɛbɛ kú Óndú ā má kwu ajɛ. Anɔ́ɔ ó da uwá ɔ̄kā kahíníī,

¹⁷“Únóji kú ɔnyɛ kwu yɔ̄ ā?” Anɔ́ɔ ācɛ kú igelī nɛ̄hi kú Ubɛ́tɛlu tá ɔ̄ ohi kahíníī, “Únóji kú ɔ̄comɛ́ɛbɛ nōo ŋmá Ujúda wā í kɛlā tɛ́ɛcɛ ka ɔ̄cɛ éyi í wā í yá ɔdā nāa yá ede nyā ā, yɔ̄ abɔ́ɔ á.”

¹⁸Anɔ́ɔ Ujosíya da uwá kahíníī, “Aá mā únóji ā ta kwu ɛ́gɔ́ɔmā cííí, é gáā kpó ikpokwú kú nū ŋmá ipú únóji ā ŋ́.” Anɔ́ɔ é kpó ikpokwu kú nū, ámāŋ ka ákú ācomɛ́ɛbɛ nōo ŋmá Usamérīya ā gɛ ŋ́ má.

¹⁹Ujosíya le ede mɛ́mla aíkpɛ́cí nɛ̄ aɔ́cɛ́ kú Ísrɛ̄lu kpó ma kwu ajɛ ipú igelī nɛ̄hi dóódu kú Ísrɛ̄lu á, nōo yá ka ɔtú kóō wú Óndú ā kpó ca tāajɛ. Anɔ́ɔ ó klla le uwá kpó tū ɔlá. Kwu aɛ́nɛ̄ e bá Ubɛ́tɛlu ā dúú.

²⁰Ó le odúúdú ācogwɛ́ɛya kú ɛcí ā kpó ŋmó ɛyí ede nēé gē gwɛ́ɛya lɛ ɛcí ā, anɔ́ɔ ó le ikpokwú kú uwá kpó tɔ̄lá ɛyí ede ɔ́ɔmā piíí ā. Anɔ́ɔ ó kwúcē wā Ujerúsālɛm á.

²¹Ujosíya, ɔcɛ́ ā le ɔ́da je lɛ odúúdú ācɛ kú Ujúda kahíníī, “Aá lɛ ucɛ kú onyatá ā yá lɛ Óndú ā, Ɔwɔicō kú aá, ɛ́gɛ́nɛ̄ é tá ɔ̄ tū ipú ɔkpá kú ɛka kú Óndú ā lɛ ā.”

²²O ŋmífi nɛ̄ ācɛ ohɛ́pɔ̄ gbɔɔ́ ō gbāajɛ kú Ísrɛ̄lu ā, ɔ̄cɛ dúúmā í lé ucɛ nyā jéjée ɛ́ɛ́ ŋ́.

²³Amáŋ, ipú iháyí igwáahātá nɛ̄ Ujosíya lé ɔcɛ́ ā, Ísrɛ̄lu le ucɛ kú onyatá ā lé iyɔ́bū Óndú ā Ujerúsālɛm.

²⁴Ó yá ɛ́ɛ́ kū ācɛ kéē géē lɛyítáajɛ lɛ íne kú ipú ɔkpá íne kú Óndú ā nɛ̄ Uhilikáya, otrɛ̄yí kú ācogwɛ́ɛya ā pīyɛ̄ ā, Ujosíya le odúúdú aɔ́hɛ, ācɛ ogwɛ́bá mɛ́mla odúúdú ɛcí mɛ́mla ede kú ɛcí, mɛ́mla ojibó kú ɛcí nēé gē gbā uwā ɛ̄gbā kpɛ́m ā kpó ŋmá Ujerúsālɛm.

²⁵Ɔcɛ́ ɔhá dúúmā í yɔ̄ gbɔbū lɛ Ujosíya nōo lɛyítáajɛ lɛ Óndú ā klla gbā ɔ̄ ɛ̄gbā mla odúúdú ɔtú mla ɔfú kú nū, klla yá ɔdā dóódu nɛ̄ Óndú ka ā bɛ̄ɛka anú ā ɛ́ɛ́ gɛ ŋ́. Ɔcɛ́ ɔhá dúú í klla wā igbīhī nū nōo yá odée gbla anú ɛ́ɛ́ gɛ ŋ́.

²⁶Amáŋ, Óndú ā le cɔ́nū nɛ̄hi lɛyíkwu ācɛ Ujúda ohígbū ka Umanásɛ tɛtɛ le ɔ́ yá cɔ̄nū o ŋmá lɛ ɔ́bíipú nɛ̄ ó bī tū Óndú ā. Ɔnū kú Óndú ā í mɛ ɛ́ɛ́ ŋ́.

²⁷Anɔ́ɔ Óndú ā kahíníī, “N géē yá Ujúda, ɔdā nɛ̄ n yá Ísrɛ̄lu ā. N géē je ācɛ kú Ujúda kpó nū ŋmá ɛgiyí um. N klla géē tá igelī nɛ̄hi kú Ujerúsālɛm, klla í cīgbīhi kwu ɔ́. Igelī nɛ̄hi nɛ̄ n fu, nɛ̄ Agblīihɔ-nɛ̄hi kú um kwu ɔ́ ā. Ɛga nɛ̄ n ka n géē yɔ̄ abɔ́ɔ kú ācɛ kéē wā í gbā um ɛ̄gbā ā.”

²⁸Aɔ́dā o hile ɔhá nɛ̄ Ujosíya yá ā, é lɛ uwá tá tū ipú ɔkpá kú ígwú ō gbo kú aɔ́cɛ́ kú Ujúda.

²⁹Eko kú Ujosíya, ɔcɛ́ ā, Uféro Unéko, ɔcɛ́ kú Íjīpiti le aícɔ́ɔja kpó ga okónu ísu kú Uyúfarētīisi kóō gaá tá ɔcɛ́ kú Asírīya abɔ̄. Ujosíya ī cɛ̄ lɛ aícɔ́ɔja kú Íjīpiti ā gaá bū Umegído ŋ́, amáŋ Unéko, ɔcɛ́ ā kwú Ujosáya ú ŋmó ɔgbɛ́fú abɔ́ɔ.

³⁰Aótrɛ̄yí kú aícɔ́ɔja kú nū kwú okwū kú nū ú tá ipú úgbɔ́ɔnya, anɔ́ɔ é kwú ɔ̄ ú cīgbīhi ga Ujerúsālɛm á. É kwú ɔ̄ ú nyi ikpámílī kú aɔ́cɛ́, Ujerúsālɛm. Anɔ́ɔ ācɛ kú Ujúda kwú ɔyí nū Ujehowáhāsi ú le anɔ̄ tū ɔ̄ ɛyí kwú ɔ̄ ú lé ɔcɛ́ kwɛyí ádā nū Ujosíya á.

³¹Ujehowáhāsi wɛ iháyí ofu ce ɛtá ɛɛ́ nɛ̄ ó lé ɔcɛ́ kú Ujúda á. Ó ce ɔcɛ́ Ujerúsālɛm ɔyā ɛtá. Ɛ́nɛ́ nū wɛ Uhamútali, ɔyínɔ̄nyā kú Ujeremíya nōo ŋmá igelī nɛ̄hi kú Ulíbina ā.

³²Ó le yɛ tíkpa kú odōbɔ̄bí mɛ́mla íne kú Óndú ā ō bīya.

³³Uféro Unéko, le Ujehowáhāsi kwú ɔgbɛ́fú, anɔ́ɔ ó kwú ɔ̄ ú pīya alagbá kú ɛfú á. Ó kwú ɔ̄ ga ipú ajɛ kú Uríbila nōo yɔ̄ ajɛ kú Uhámāti ā. Ó cɛ̄ lɛ ācɛ kú Ujúda le ije nɛ̄hɛ́ ofu ce igwɛ́ɛnɛ mɛ́mla ugóolu (oje ɔdɔ) ofu ce igwɛ́ɛnɛ gbā iháyí dóódu, cɛ́ɛ́ kóō wɛ ɛ̄gbā néē géē gbā ɔcɛ́ kú Íjīpiti.

³⁴Uféro Unéko, ɔcɛ́ kú Íjīpiti ā kwú Ɛlíyākim, ɔyí kú Ujosíya ú ce ɔcɛ́ kú Ujúda kwɛyí Ujehowáhāsi. Ó klla kwú iyē kú nū ú pīyabɔ̄ ŋmá Ɛlíyākim ga Ujehóyākim. Unekó, ɔcɛ́ kú Íjīpiti ā kwú Ujehowáhāsi ú ga Íjīpiti. Abɔ́ɔ nɛ̄ ó kwú á.

³⁵Ujehóyākim gē mīyɛ ije kú ɛ̄gbā ŋmá ɛgiyí ācɛ kú Ujúda ɛ́gɛ́nɛ̄ agbénú kú uwá lɛ ā. Cɛ́ɛ́ kóō géē má ije le cílá ulé ɛ̄gbā kú abɔ̄fú lɛ Uféro Unéko, ɔcɛ́ kú Íjīpiti ā.

³⁶Ujehóyākim wɛ iháyí ofu ce ɛhɔ̄ ɛ́ɛ́ nēé je ɔ́ pīya ɔcɛ́ kú Ujúda á. Ó ce ɔcɛ́ Ujerúsālɛm iháyí igwóléyi. Ɛ́nɛ́ nū wɛ Usébīda, ɔyínɔ̄nyā kú Upedáya nōo ŋmá Urúma ā.

³⁷Ó le yɛ tíkpa kú aádáádā nū, o ŋmá lɛ ɔ́bíipú ō bī tū Óndú ā mɛ́mla íne kú nū ō bīya.