Read idoma 2 AƆ́CƐ́ 3 Bible Online

2 AƆ́CƐ́ 3 - idoma bible

2 AƆ́CƐ́ 3

¹Ipú iháyí ɔ́migwáahātá nɛ̄ Ujɛhóssāfati lé ɔcɛ́ kú Ujúda ā, Ujɛhóram, ɔyí kú Áhābu le ɔcɛ́ kú Ísrɛ̄lu lé Usamérīya. Ó wɛ ɔcɛ́ ā iháyí igwɛ́ɛpa.

²Ó le ɔ́bíipú bī tū Óndú, amáŋ ɔdōbɔ̄bí nɛ̄ ó yá í bɔ̄bí bɛ̄ɛka ákú ádā nū, Áhābu mɛ́mla ɛ́nɛ́ nū Ujésēbɛlu ā ŋ́. Ikpékwīja kú Ubáal nɛ̄ ádā nū ma ā, ó lɛ ɔ́ ca tāajɛ.

³Amáŋ, ó lɛ abɔ̄ fúlá tū ɛdɔ kú ɔ́bíipú nɛ̄ Ujérobōwam, ɔyí kú Unébati bī, klla le ācɛ kú Ísrɛ̄lu ikpó kpó tū ɔ̄ ā.

⁴Umésa, ɔcɛ́ kú Umówābu lɛ aálá nɛ̄hi. Iháyí dóódu ó gē je aálá úlā ofu igwáahāapa ce úlā igwó (100,000) gbā ɔcɛ́ kú Ísrɛ̄lu ɛ̄gbā, mɛ́mla ɛkpa kú ɔnwū kú álá ulā ofu igwáahāapa ce igwó (100,000) gbā ɛ̄gbā ā dúú.

⁵Amáŋ, eko nɛ̄ Áhābu gekwú ā, Umésa tá ka anúɔ í gbā ɛ̄gbā abɔ̄fú ā ɛ́ɛ́ gɛ ŋ́.

⁶Okwɔɔkwu nɛ̄ ó tá ā, Ujóram, ɔcɛ́ kú Ísrɛ̄lu ā nyɛ̄ɛ̄ ŋmá Usamérīya gaá le odúúdú aícɔ́ɔja kú Ísrɛ̄lu túbá.

⁷Ó le ɛhɔ̄ tū fu Ujɛhóssāfati, ɔcɛ́ kú Ujúda kahíníī, “Ɔcɛ́ kú Umówābu tá um ɛɛ́, a géē wā mla um, cɛ́ɛ́ kú ālɔ̄ gaá lɛ ɛfú kpó tá ɔ̄ kɛ̄ɛ?” Anɔ́ɔ Ujɛhóssāfati tá ɔ̄ ohi kahíníī, “Ami mɛ́mla awɔ wɛ ācɛ ékpónú nɛ, ācɛ ɔlɛ́ um klla lɛbɛ̄ɛka ācɛ ɔlɛ́ uwɔ ā. Aɔ́nya o bī kpɛ́fú kú um kē wɛ ákú uwɔ dúú. N géē nyɔ̄ mla awɔ.

⁸Amáŋ ɔwɛ nyā nɛ̄ alɔ géē bū ga ɛfú nyā ā?” Anɔ́ɔ Ujóram tá ɔ̄ ohi kahíníī, “Ɔwɛ kú ígbíli kú Ɛ́dɔm ā nɛ.”

⁹Anɔ́ɔ Ujóram mɛ́mla ɔcɛ́ kú Ujúda mla ɔcɛ́ kú Ɛ́dɔm gbɔɔ́ ō nyɔ̄ á. Eko nēé le iyāwu yɛ jāā ɛ̄cī ahāapa ā, éŋkpɔ̄ kú uwá mɛ, kwu ācɛ mɛ́mla ɛbɛ́ í má éŋkpɔ̄ dúúmā gwá ɛ́ɛ́ gɛ ŋ́.

¹⁰Anɔ́ɔ Ujóram kahíníī, “Ákú alɔ mɛ ɛɛ́, Óndú ā kpó aɔ́cɛ́ ɛtá nyā í tū abɔ̄ kú ācɛ kú Umówābu kéē kpó alɔ ŋmó nɛɛ?”

¹¹Anɔ́ɔ Ujɛhóssāfati tá ohi kahíníī, “Ɔ̄comɛ́ɛbɛ dúúmā í yɔ̄ amānyā, nōo géē cā alɔ da Óndú ɔ̄kā ŋ́ nɛɛ?” Anɔ́ɔ éyi kú aótrɛ̄yí kú aícɔ́ɔja kú ɔcɛ́, Ujóram ā, tá ɔ̄ ohi kahíníī, “Ɛláyíssa, ɔyí kú Ussáfati yɔ̄ amānyā. Anú í tá Ɛláyíja abɔ̄ á.”

¹²Anɔ́ɔ ɔcɛ́ kú Ujúda tá ohi kahíníī, “Ó wɛ ɔ̄comɛ́ɛbɛ ɔ̄kwɛ̄yi.” Anɔ́ɔ aɔ́cɛ́ ɛtá ā le pɛ́ ga ɛgiyí nū á.

¹³Ɛláyíssa da ɔcɛ́ kú Ísrɛ̄lu kahíníī, “N lɛ ɔdā dúúmā ō yá mla awɔ ŋ́. Nyɔ̄ ga ɛgiyí ācomɛ́ɛbɛ nɛ̄ ádā uwɔ mɛ́mla ɛ́nɛ́ uwɔ gē ga ɛgiyí uwā ā?” Amáŋ Ujóram da ɔ́ kahíníī, “Ehée, Óndú ā kpó aɔ́cɛ́ ɛtá nēe bá ā gē lɛ ɔcɛ́ kú Umówābu kóō kpó uwā ŋmó á.”

¹⁴Anɔ́ɔ Ɛláyíssa da ɔ́ kahíníī, “Ohígbū Ɔwɔicō nōo yēeyī ā, nɛ̄ n gē gbā ā, ó wɛ ojīlīma kú Ujɛhóssāfāti ɔcɛ́ kú Ujúda ŋ́ nɛɛ, ń géē yɛ í má uwɔ ɛ́ɛ́, nɛ̄ n kōō ī ka ɔdā dúúmā gā uwɔ ŋ́.

¹⁵Amáŋ, lɛ ɔ̄cogwíje éyi hīgwú gā um abālɔbányā.” Anɔ́ɔ eko nɛ̄ ɔ̄cɛ ā yɔ̄ gē gwííjē klla í gwō ɛnwu tū ɔ̄ ā, ofú kú Óndú ā wā í klá Ɛláyíssa,

¹⁶Anɔ́ɔ ó kahíníī, “Ɛlā nɛ̄ Óndú ā ka ā yɔ̄ á, ‘Ɔkpá nōo je ŋmó nyā, n klla géē je ɔ́ mu mla éŋkpɔ̄ kpɔ́ ɛ́ɛ́. Áa lɛ ɔgɔ bū tá ɔtū ɔkpá nōo je ŋmó ā mɛ́ɛ́nɛ.

¹⁷Aá gaá má owu ámāŋ ka ɔwɔ ŋ́, nááná ā ɔkpa nyā géē je cēenyi, nɛ̄ aá mɛ́mla ɛbɛ́ kú aá géē gwá.

¹⁸Ɛ̄nyā í lɔnɔ tū Ɔwɔicō ō yá ŋ́, ó klla í cɛ̄ lɛ aá géē yá ācɛ Umówābu lé ɔgbɛ́fú.

¹⁹Aá klla géē mīyɛ odúúdú aígelī nɛ̄hi kú uwā nēé hɛ igá olɔfú nɛ̄hi tū ɔ̄ ā, mɛ́mla aígelī nɛ̄hi ɔhá dúúmā nōo lɔhi fíyɛ́ dúú ā. Aá klla í mīyɛ ɛhɔ̄ kú uwá, í je īkpɔ̄cí kú uwá kpó hɛ́ wāajɛ. Aá klla í kpó ɛcɔ̄ gwu klá ajɛ ɛhɔ̄ kú uwá, cɛ́ɛ́ kú ō kwú bīya.”

²⁰Oŋmɔ́ɔ̄cī nú, eko nēé gē gwɛ́ɛya kú ɔ̄cɔ̄ɔ̄cī ā, ɔkpá kwú cēenyi yɔ̄ í pɛ́ ŋmá āyā kú ajɛ kú Ɛ́dɔm, gaá le odúúdú ajɛ ā mu.

²¹Eko nɛ̄ ācɛ kú Umówābu le pó ka aɔ́cɛ́ ɛtá ɛ́ɛ í wā gaá kpɛ́fú tá aá ā, odúúdú uwā nēe kpɛ́fú gllá, kwu anyākwɔ́cɛ kwu ayípɛ̄ le pɛ́ gaá kwāajɛ ɔwɛ, ɛjī kú uwā mla Ísrɛ̄lu.

²²Eko nēé le héyī ɔcɔ̄ɔ̄cī ā, é má ɛnɔ yɔ̄ í tá ce éŋkpɔ̄ ā. Ó cɛ̄ lɛ éŋkpɔ̄ ā kóō kwú tɔ́wá bōō bɛ̄ɛka oyī ā.

²³Anɔ́ɔ ācɛ Umówābu ā ka “Oyī nɛ! Eko ōhī aɔ́cɛ́ ɛtá, aólɛlā kú alɔ ā le ɛfú kpó tá īyī uwā le īyī uwa kpó ŋmó ɛɛ́. Alɔ nyɔ̄ gaá lɛ iyó kú aáklɔ̄kpe kú ɛfú kú uwā wu.”

²⁴Amáŋ eko nēé gaá aáklɔ̄kpe kú ɛfú kú Ísrɛ̄lu ā, Ísrɛ̄lu le ɔfú kpó kwu uwā klla le uwá nū cīgbīhi. Ācɛ kú Ísrɛ̄lu le bá uwā ɔkwu yɔ̄ gē nū uwā inya nɛ̄hi klla bá gē ŋmó ācɛ Umówābu ā.

²⁵É gbɔɔ́ ō kpó aígelī nɛ̄hi kú uwā ca tāajɛ. Ɛhɔ̄ dúúmā nɛ̄ ācɛ kú Ísrɛ̄lu le yɛ wā í ce ɔ́ nɛɛ, ɔnyɔɔnyɛ kú uwā gē tá ɛcɔ̄ éyééye tū ipú nū, jāā gbéeko nɛ̄ ɛcɔ̄ mīya ajɛ ā tāabɔ̄ dúúdú. É le aɔ́cí ō gwíikpō dóódu kpó wúla wāajɛ klla le ɔ̄gɔ̄ njɔlɔ dóódu nēé yɛ ce ɔ́ ā kpó gwū. Igbīhāajɛ ā, igelī kú Ukɛ́ Uhɛ́rɛssɛti hile mɛ́ɛ̄ á, anɔ́ɔ ācɛ o tá ɛcɔ̄ ā le íbɔm cē tū ipú igelī nɛ̄hi ā, anɔ́ɔ é le ɔfú kpó kwu ɔ́ á.

²⁶Eko nɛ̄ ɔcɛ́ kú Umówābu le má ka ɛfú ɔ́ɔ gáā lé anúɔ ɛɛ́ mā, ó le aóklóbīya o bī ɔkpacaŋgelī úlā ce ofu igwɛ́ɛhɔ̄ kpó (700), cɛ́ɛ́ kéē le ɔwɛ ca bū ɔgbɛ́fú kú aólɛlā kú uwā, ācɛ Ísrɛ̄lu ā ipú ga ɛgiyí ɔcɛ́ kú Usiríya, [1] amáŋ ó tōō yá lɛ ɔ́ ŋ́.

²⁷Ɔcɛ́ kú Umówābu ā kwú ɔ́kpllá kú nū, nōo géē lé ɔcɛ́ igbīhi nū ā ú, anɔ́ɔ ó kwú ɔ̄ ú gwɛ́ɛya o yɔlá dúúdú ɛyí igá kú igelī nɛ̄hi ā lɛ ɔwɔ kú Umówābu. Ɔdā nɛ̄ ācɛ kú Ísrɛ̄lu má ā le tū uwā ufi nɛ̄hi,[2] anɔ́ɔ é kwúcē ŋmá igelī nɛ̄hi ā le pɛ́ ga ɔlɛ́ uwā á.