Read idoma 2 AƆ́CƐ́ 7 Bible Online

2 AƆ́CƐ́ 7 - idoma bible

2 AƆ́CƐ́ 7

¹Anɔ́ɔ Ɛláyíssa tá ɔ ohi kahíníī, “Eko ɛ́gɛ́nyā oócí, a géē bī īkpīje nɛ̄hɛ́ ékpónú le lá okoolo kú umu ɛhīlī mla ákú īkpɔ̄dā ɛhīlī.”

²Anɔ́ɔ ɔ̄cɛ nōo ī tá ɔcɛ́ abɔ̄ ā da Ɛláyíssa kahíníī, “Ɔ́dāŋ́ ka Óndú ā abɔ̄yī lɛ uwíndo kú ɔkpáncō nwūla nááná, ɔdā nāa ka nyā í yá glá ŋ́” Anɔ́ɔ Ɛláyíssa da ɔ́ kahíníī, “A géē bī īkpēyī abɔ̄yī uwɔ má ɔ̄, amáŋ á gáā lé ɔdā dúú kú nū ŋ́.”

³Aólagwú ɛnɛ éyi nēe bá iyɛ̄ɛcɛ kú okónpíinu kú igá kú Usamérīya, bá gē ba ɔdā ā, da īyī uwā kahíníī, “Ɔdíyá nɛ̄ alɔ géē bá amānyā ká ālɔ̄ le pɛ́ gekwú bónū ā?”

⁴É klla ka kpɔ́ kahíníī, “Ɔ́dāŋ ka alɔ ka ka ālɔ̄, ga ipú igelī nɛ̄hi ā, ɔkpɛtá nōo yɔ̄ ī ŋmó ācɛ ipú igelī nɛ̄hi ā géē je alɔ kpó ŋmó bónū. Amáŋ, ɔ́dāŋ ka alɔ kē cīce amānyā, alɔ géē pɛ́ kwú dúú. Ó lɛ ā, ālɔ̄ nyɔ̄ aáklɔ̄kpɛ kú ɛfú kú ācɛ Usiríya ā. Ɔ́dāŋ́ keé le alɔ ŋmó, ayíka alɔ kē le pɛ́ gekwú, ɔ́dāŋ́ kēé kē ŋmó alɔ ŋ́, ayíka alɔ kē í yēeyī.”

⁵Anɔ́ɔ é le pɛ́ cāŋjɛ ɔ̄nɔ̄nɛ̄ fulufulu, le tá aáklɔ̄kpɛ kú ɛfú kú ācɛ Usiríya, eko nēé gā okónōgwu kú aáklɔ̄kpɛ kú ɛfú ā, é pó ofu ɔ̄cɛ dúúmā abɔ́ɔ ŋ́.

⁶Ohígbū ka, Óndú ā cɛ̄ lɛ ācɛ kú Usiríya le ɛdɔ kú ekwukwu nɛ̄hi nōo lɛbɛ̄ɛka ákú ɛwa nɛ̄hi kú aícɔ́ɔja mɛ́mla aɔ́nya mɛ́mla aúgbɔ́ɔnya o bī kpɛ́fú kú uwā bá gē kwinya ga ɔgbɛ́fú ā pó, anɔ́ɔ ācɛ Usiríya gbɛlá ká ɔcɛ́ kú ācɛ Ísrɛ̄lu ɔ́ɔ nyɔ̄ gaá le aɔ́cɛ kú ācɛ Uhɛ́ti mɛ́mla Íjīpiti kpó pūla wā mla aícɔ́ɔja kú uwā kéē nuunu tá aá.

⁷Anɔ́ɔ é le inya kú oyēeyī kú uwā kwu ŋmá aáklɔ̄kpɛ kú ɛfú kú uwā, ofúlɔ̄cí. É habɔ̄ áklɔ̄kpɛ, aɔ́nya mɛ́mla aíjakī kú uwā tá bá aáklɔ̄kpɛ kú ɛfú ā.

⁸Eko nɛ̄ aólagwú ā le pɛ́ wā okónōgwu kú aáklɔ̄kpɛ kú ɛfú kú Usiríya ā, é le pɛ́ tá ipú áklɔ̄kpɛ éyi. É le ɔdōlé má, anɔ́ɔ é le lé klla le gwá. É kpó ije nɛ̄hɛ́, ije ɔdɔ, mɛ́mla īlī. Anɔ́ɔ é le aɔ́dā nēé wu ŋmá abɔ́ɔ kpó nyɔ̄ í tayínū á, anɔ́ɔ é klla le pɛ́ nyɔ̄ kpɔ́. É le pɛ́ tá áklɔ̄kpɛ ɔhá, anɔ́ɔ é kē le ɔdā éékpónú ɔ́ɔmā yá kpɔ́ á.

⁹Anɔ́ɔ é da īyī uwā kahíníī, “Alɔ í yá lɔhi ŋ́, ícɛ nyā wɛ ɛ̄cī kú ɔ̄kā olɔhi, ɔ́dāŋ ka alɔ lɛ okónu klá kpɔ́ jāā gbéeko nɛ̄ eyī le nyā, ōwē géē wā í ce alɔ ɛyí. Ó lɛ ā nɛɛ ālɔ̄ nyɔ̄ gaá lɛ ɔ̄kā nyā ka ipɔ́ɔnū kú ɔlɛ́ ɔcɛ́.”

¹⁰Anɔ́ɔ é le pɛ́ nyɔ̄ í lɛ ɔ̄cɛ nōo gē gbō ɔwɛ kú ɔlɛ́ ɔcɛ́ ā hīgwú, anɔ́ɔ é da ɔ́ kahíníī, “Alɔ le tá aáklɔ̄kpɛ kú ɛfú kú ācɛ Usiríya, amáŋ alɔ í má ɔ̄cɛ dúúmā ɛ́ɛ́ nɛ̄ alɔ gē pó ofu ɔ̄cɛ, amáŋ ka ɔdā dúúmā ŋ́. Amáŋ ɔnya kú uwā wɛ oōwā ajɛ ɔcí, mɛ́mla aɛ́na kú uwā. Áklɔ̄kpɛ kú uwā kē bá ɛ́gɛ́nɛ̄ é lɛ tɛtɛ ā iyí nū kpɔ́.”

¹¹Anɔ́ɔ ɔ̄cɛ nōo gēe gbō ɔwɛ ā gaá le ka lɛ ācɛ ɔlɛ́ ɔcɛ́ ā.

¹²Anɔ́ɔ ɔcɛ́ ā cāŋjɛ otú klla le da ācɛ ɔlɛ́ nū kahíníī, “N géē da aá ɔdā nɛ́ ācɛ kú Usiríya yá ā. Abɔ̄ é le jé ka ɛmiyɛ ɔ́ɔ gē ŋmó alɔ ā, anɔ́ɔ é je pɛ́ bɛ̄cɛ ŋmá aáklɔ̄kpɛ kú ɛfú kú uwá gaá tayínū ipácí á. É gbɛlá kahíníī, “Eko dúúmā nēé kwú bɛ̄cɛ ŋmá ipú ɔlɛ́ uwā ɛɛ́, cɛ́ɛ́ alɔ lɛ uwá kwú oyēeyī klla mīyɛ igelī kú uwā.”

¹³Anɔ́ɔ éyi kú aígabɔ̄ kū ɔlɛ́ nū ā tá ɔ̄ ohi kahíníī, “Ācɛ ɛhɔ̄ kéē lɛ aɔ́nya ɛhɔ̄ nēe hile ā kpó ohígbū ka ācɛ nēe hile ipú igelī nɛ̄hi amānyā ā, géē pɛ́ kwú bɛ̄ɛka ɛwa nōo je pɛ́ yíífi ɛɛ́ mā ā. Ālɔ̄ lɛ ɛhɔ̄ tū nyɔ̄ í lɛ ɔdā nēé ka ā má eyī abɔ̄yī alɔ.”

¹⁴Anɔ́ɔ é lɛ ɔnya ɛpa kpó lɛ ācɛ ɛpa, anɔ́ɔ ɔcɛ́ ā da uwá kahíníī, “Aá le tá aáklɔ̄kpɛ kú aícɔ́ɔja kú Usiríya ā nyɔ̄ í lɛ ɛlā nēé ka ā má.”

¹⁵Anɔ́ɔ é tá ɔgwu aícɔ́ɔja kú Usiríya ā jāā ga Ujɔ́dan, anɔ́ɔ é má īlī, ɔdōlé mɛ́mla ɔdā nēe hɛ́ uwā abɔ̄ bá ajɛ ɔwɛ ā, mɛ́mla iyɔ́fú kú uwā nēé je kpó bónū eko nēé bá yɔ̄ ī kwinya ágágā ā. Anɔ́ɔ ācɛ nɛ̄ ɔcɛ́ tɛ̄hɔ̄ ā pīyɛyí gaá le ohi kpó lɛ ɔcɛ́.

¹⁶Anɔ́ɔ ācɛ kú Usamérīya le wu klɛ́cɛ gaá je aáklɔ̄kpɛ kú ɛfú kú ācɛ Usiríya kpó wu ɛ́gɛ́nɛ̄ Óndú ā ka lɛ ā. Okoolo kú īkpɔ̄dā ɛtá, mɛ́mla ákú umu ɛhīlī wɛ īkpō ije nɛ̄hɛ́ ékpónú.

¹⁷Anɔ́ɔ ɔcɛ́ ā le ɔ̄cɛ nōo gē gbō ɔwɛ kú ɔlɛ́ nū ā fu kɔ́ɔ̄ ɔ̄ leyīkwu oōje lá kú ɔdōlé ā. Anɔ́ɔ ācɛ ā kwú ɔ́ ú cē gwōnū klla kwú ɔ̄ ú da ŋmó ikpó ɛ́gɛ́nɛ̄ Ɛláyíssa, ɔ̄comɛ́ɛbɛ kú Ɔwɔicō ka ā.

¹⁸Ohígbū ka, eko nɛ̄ ɔ̄comɛ́ɛbɛ kú Ɔwɔicō ā da ɔcɛ́ ā kahíníī, “É géē lá okoolo ɛpa kú īkpɔ̄da usɛ́kɛlu ékpónú, é klla kē í lá okoolo kú umu ɛhīlī usɛ́kɛlu ékpónú, eko ɛ́gɛ́nyā oócí, okónu igá kú Usamérīya” ā

¹⁹Ó tá ɔ̄comɛ́ɛbɛ kú Ɔwɔicō ā ohi kahíníī, “Ɔ́dāŋ́ ka Óndú ā abɔ̄yī nū lɛ uwíndo kú ɔkpancō nwūla nááná, abɔ̄ ɛ̄nyā géē yá lɛ ā glá ā? Ó da ɔ́ eko ɔ́ɔmā kahíníī, “A géē má ɔ̄ eyī kú uwɔ, amáŋ á gāa lé ŋ́.”

²⁰Anɔ́ɔ ɛ̄nyā le yá ɔkwɛ̄yí, ohígbū ka ācɛ lɛ ɔ́ cē gwōnū klla le ɔ́ da ŋmó ikpó ɔwɛ kú ɔdōlé ā.