Read idoma 2 AƆ́CƐ́ 8 Bible Online

2 AƆ́CƐ́ 8 - idoma bible

2 AƆ́CƐ́ 8

¹Ɛláyíssa da ɔnyā nōo lā Ussúnɛm, nēé je ɔyí nū héyī ŋmá ɔlékwū ā ka, Óndú ɔ́ɔ yɔ̄ ī tū ɔkpɛtā wā ipú ajɛ ā. Ó ka ɔkpɛtā ā ɔ́ɔ géē ŋmó iháyí ahāapa. Ohígbū ɔ́ɔmā ɔ́ɔ kwú ɔyí nū ga ɛga ɔhá kéē nyɔ̄ í lā

²Anɔ́ɔ ɔnyā ā cāŋjɛ mɛ́mla aíkonó kú nū ɛ́gɛ́nɛ̄ Ɛláyíssa ka ā, gaá lā ajɛ kú Ufilístīya iháyí ahāapa á.

³O ŋmɛ́yí kú iháyí ɔ́mahāapa kú ɔkpɛtā ā, ɔnyā ā kwúcē wā Ísrɛ̄lu ŋmá ajɛ kú Ufilístīya. Anɔ́ɔ ó le yɛ tá ɛgiyí ɔcɛ́ kú Ísrɛ̄lu, cɛ́ɛ́ kɔ́ɔ̄ kwú ɔlɛ́ mɛ́mla ajɛ ɔlamu kú anúɔ ú kwúcē lɛ anúɔ á.

⁴Ɔnyā má bā ɔcɛ́ ā yɔ̄ gē kɛlā mla Ugɛ́hási, ɔ̄cocɛ̄hɔ̄ kú Ɛláyíssa ā, klla yɔ̄ ī da ɔ́ ɔ̄kā kú odúúdú úklɔ́ idáagó nɛ̄ Ɛláyíssa yá ā.

⁵Eko nɛ̄ Ugɛ́hási yɔ̄ í da ɔcɛ́ ɛ́gɛ́nɛ̄ Ɛláyíssa gē hɛ́ okwū eyī lɛ ā, nɛ̄ ɔnyā ā gbɔɔ́ ō kɛlā lɛ ɔcɛ́ á. Anɔ́ɔ Ugɛhási da ɔcɛ́ ā kahíníī, “Má ɔnyā nyā nɛ̄ Ɛláyíssa je ɔyí nū nōo háyi pī nyā héyī ŋmá ɔlékwū á.”

⁶Abɔ̄ ɔnyā ā yɔ̄ í cīla ɔ̄kā nɛ̄ ɔcɛ́ da ɔ́ ā, ó le okónū abɔ̄yīnū cɛ̄lā nɛ̄ Ugɛ́hási ka ā. Anɔ́ɔ ɔcɛ́ ā le igabɔ̄ kú nū éyi hīgwú, anɔ́ɔ ó da ɔ́ kɔ́ɔ̄ nyɔ̄ í kwú ajɛ mɛ́mla odúúdú agbénú kú ɔnyā ā mɛ́mla ije dóódu nēé lá ŋmá ɔdɛ̄hɔ̄ kú nū, ífī iháyí ahāapa nɛ̄ ɔ́ yɔ̄ ŋ́ má ú kpó lɛ ɔ́.

⁷Ɛláyíssa le tá Udamáskɔ̄si eko nɛ̄ Ubenhádādi, ɔcɛ́ kú Usiríya ā yɔ̄ gē doōcē ā. Eko nēé le da ɔcɛ́ ā ka Ɛláyíssa ɔ́ɔ yɔ̄ amānyā ā,

⁸Ó da Uhásɛ̄lu, éyi kú aígabɔ̄ kú nū ā kahíníī, “Kwú ɔdɛ̄hi ú káā ga ɛgiyí ɔ̄comɛ́ɛbɛ kú Ɔwɔicō ā káā gaá da ɔ́ ɔ̄kā ɔ́dāŋ ka n géē wī ŋmá ōcē nyā.”

⁹Uhásɛ̄lu le ɛdɔ iyó olɔhi dóódu kú Udamákɔ̄si gbō ce aínyankwūlūmī ofɛpa igbīhi. Anɔ́ɔ ó le tá ɛgiyí Ɛláyíssa á. Eko nɛ̄ Uhásɛ̄lu le ɔ́ má ā, ó da ɔ́ kahíníī, “Ɔ̄cocɛ̄hɔ̄ kú uwɔ, Ubēnhádādi, ɔcɛ́ ā tū um ɛhɔ̄ wā í da uwɔ ɔ̄kā, ɔ́dāŋ́ koó géē wī ŋmá ōcē kú nū ā, ámāŋ ka ó gáā wī ŋ́.”

¹⁰Anɔ́ɔ Ɛláyíssa tá ɔ̄ ohi kahíníī, “Óndú ā le mafú gā um ka ɔ́ɔ géē kwú. Amáŋ nyɔ̄ gaá da ɔ́ ka, ó géē wī ŋmá ōcē kú nú ā.”

¹¹Anɔ́ɔ Ɛláyíssa le ɔkɔnyɔ obɔ̄bí má ɔ̄, jāā gbéeko nɛ̄ uwēyī le Uhásɛ̄lu kwú nɛ̄ɛ̄nɛ̄hi. Anɔ́ɔ igbeékpónú Ɛláyíssa fōtíikwū blu icííci, gbɔɔ́ ō pɛ́ agīje blublu.

¹²Anɔ́ɔ Uhasɛ́lu le ɔ̄kā da ɔ́ kahíníī, “Ɔdíyá nāa gē jikwū ā gɛ, ɔkpáni?” Anɔ́ɔ Ɛláyíssa tá ɔ̄ ohi kahíníī, “Ohígbū ka n jé ɛdɔ kú ɔdōbɔ̄bí nɛ̄hi nāa gáā yá ācɛ kú Ísrɛ̄lu ā. A gēe je ɔlɛ́ uwá kpó yɔlá tāajɛ, a klla í kpó ayípōklóbiya nēe lɔhi fíyɛ́ dúú ā ŋmó, a klla í ca ayípōbene kú uwā bá pɔ́tɔ́kɔ́ɔ́ icííci, a klla í kpó anyā oyīipú kú uwā ipú yíla.”

¹³Anɔ́ɔ Uhasɛ́lu tá ɔ̄ ohi kahíníī, “Abɔ̄ ō yá lɛ ɛ́ɛ́ nɛ̄ n géē lɔfú yá ɔdā nyā glá ā? Ń kē wɛ ɔdā dúúmā ŋ́?” Anɔ́ɔ Ɛláyíssa tá ɔ̄ ohi kahíníī, “Óndú ā le mafú gā um ka, awɔ ɔ́ɔ gáā wɛ ɔcɛ́ kú Usiríya á.”

¹⁴Anɔ́ɔ Uhasɛ́lu kwúcē ga ɛgiyí Ubenhádādi nōo da ɔ́ ɔ̄kā ɔdā nɛ̄ Ɛláyíssa ka lɛ ɔ́ɔ ā? Uhasɛ́lu tá ɔ̄ ohi kahíníī, “Ó ka awɔ ɔ́ɔ géē wi piíi.”

¹⁵Amáŋ, oŋmɔ́ɔ̄cī nū ā, Uhasɛ́lu kwú áto o klíiyē ú, le ɔ́ wu éŋkpɔ̄, anɔ́ɔ ó kwú ɔ̄ ú pīya klla ɔcɛ́ eyī jāā gbéeko nōó gekwú. Anɔ́ɔ Uhasɛ́lu kwu pīya ɔcɛ́ kwɛyí nū á.

¹⁶Ipú iháyí ɛhīlī nɛ̄ Ujóram, ɔyí kú Áhābu lé ɔcɛ́ kú Ísrɛ̄lu ā, nɛ̄ Ujɛhóram, ɔyí kú Ujɛhóssāfati lé ɔcɛ́ kú Ujúda á.

¹⁷Ó wɛ iháyí ofu ce igwɛ́ɛpa ɛ́ɛ́, nɛ̄ ó lé ɔcɛ́ á. Ó kē ce ɔcɛ́ kú Ujúda iháyí ɛhīlī.

¹⁸Ɔnya nū wɛ ɔyínɔ̄nyā kú Áhābu, ɔcɛ́ kú Ísrɛ̄lu. Ó le yɛ ce íkpá kú ɔ́bíipú ō bí tū Óndú ā bɛ̄ɛka ācɛ ɔlɛ́ Áhābu, ohilí nū ā. Ó kē le ɔ́bíipú bī tū Óndú ā dúú.

¹⁹Amáŋ Óndú ā í tíne ō je Ujúda yíífi ŋ́, ohígbū ka, ó lɛ okónu ce lɛ Udéfīdi ka ayí nū ɔ́ɔ géē lé ɔcɛ́ kú Ujúda piyóó á.

²⁰Eko kú Ujɛhóram ā, ācɛ kú Ɛ́dɔm kwú hɛ́ ŋmá Ujúda, anɔ́ɔ é kwú pīya éwo kú abɔ̄yī uwā.

²¹Anɔ́ɔ Ujɛhóram le aícɔ́ɔja kú nū mɛ́mla aúgbɔ́ɔnya o bī kpɛ́fú kú nū kpó ga Usɛ́ru ɛga nɛ̄ aícɔ́ɔja kú Ɛ́dɔm cē ibɔm tū uwā ā. Amáŋ otú ā, anú mɛ́mla úgbɔ́ɔnya o bī kpɛ́fú kú nū le ɛga éyi má pēēleē, anɔ́ɔ é kwú pɛ́ kwu á, anɔ́ɔ aícɔ́ɔja kú nū kwú fíyákátā le pɛ́ kwu ga ɔlɛ́ uwā kpɛ́mm á.

²²Ɛ́dɔm kwú pīya éwo kú abɔ̄yī uwā ŋmífī ɔ́ɔma. Eko ɔ́ɔmā dúú ā, ācɛ kú Ulíbina kwú hɛ́ ŋmá Ujúda dúú.

²³Ɔdā o hile dóódu nɛ̄ Ujɛhóram yá ā, é lɛ uwā tá tū ipú ɔkpá kú ígwú ō gbo kú aɔ́cɛ́ kú Ujúda.

²⁴Ujɛhóram gekwú anɔ́ɔ é kwú ɔ̄ ú nyi ɛgiyí únóji kú aɔ́cɛ́ igelī nɛ̄hi kú Udéfīdi á. Anɔ́ɔ ɔyí nū, Ahasíya le ɔcɛ́ kú Ujúda lé kwɛyí nū á.

²⁵Ipú iháyí igwɛ́ɛpa nɛ̄ Ujóram ɔyí kú Áhābu lé ɔcɛ́ kú Ísrɛ̄lu ā, Ahasíya ɔyí kú Ujɛhóram le ɔcɛ́ kú Ujúda lé.

²⁶Ó wɛ iháyí ofu cɛpa ɛ́ɛ́ nɛ̄ ó lé ɔcɛ́ nyā á. Ó kē wɛ ɔcɛ́ ā iháyí éyi. Ɛ́nɛ́ nū wɛ Atálīya, ɔyínɔ̄nyá kú Áhābu, mɛ́mla ɔyí kú ɔyí kú Ómri, ɔcɛ́ kú Ísrɛ̄lu.

²⁷Abɔ̄ Ahasíya wɛ ocɛ̄ɛma kú Áhābu bū ɔwɛ kú ɔnyā nɛ̄ ó lɛ ŋmá abɔ̄ nū ā, ó le íne kú Óndú ā bīya ɛ́gɛ́nɛ̄ Áhābu mɛ́mla ācɛ ɔlɛ́ nū bīya ā.

²⁸Ahasíya, ɔcɛ́ kú Ujúda ā gáā le pīya tɔ̄há mla Ujóram, ɔcɛ́ kú Ísrɛ̄lu gaá le ɛfú kpó tá Uhasɛ́lu, ɔcɛ́ kú Usiríya. Aícɔ́ɔja kú ābɔ̄ ɛpɛplɛ́ɛpa gaá gbɛyí ipú Urámɔ̄tu nōo yɔ̄ ajɛ kú Ugílɛ̄di ā. Anɔ́ɔ é le Ujóram yá ágbe ɔgbɛ́fú ā.

²⁹Anɔ́ɔ ó kwúcē wā igelī nɛ̄hi kú Ujésiríili gaá le ágbe kú nū ā tá. Anɔ́ɔ ó kwú jé á. Ahasíya le tá abɔ́ɔ í má ɔ̄ kú ágbe kú nū ā dúú.