Read idoma 2 AƆ́CƐ́ 9 Bible Online

2 AƆ́CƐ́ 9 - idoma bible

2 AƆ́CƐ́ 9

¹Ɛ̄cī éyi, Ɛláyíssa le éyi kú ígwu kú ācomɛ́ɛbɛ ā hīgwú, anɔ́ɔ ó da ɔ́ kahíníī, “kwú oli kú anɔ̄ kú ɔcí nēé hī ka ólīfu nyā ú, cɛ́ɛ́ ká ā ga Urámɔtu nōo yɔ̄ ipú ajɛ kú Ugílɛ̄di ā.

²Eko nāa le tá abɔ́ɔ, dɔɔ̄kā ɔ̄cɛ éyi nōo lé ka Ujéhu ɔyí kú Ujɛhósāfati, ɔyí kú ɔyí kú Unímīssi ā. Eko nāa lɛ ɔ́ má, kwú ɔ̄ ú ga ɛkwūbá ŋmá ɛgiyí ɔ́mpānū,

³cɛ́ɛ́ a kwu anɔ̄ ā ú pīya klla anú ɛyí, cɛ́ɛ́ a da ɔ́ ka Óndú ā ka anúɔ̄ lɛ anɔ̄ tū ɔ̄ ɛyí kú ɔ̄ kwú pīya ɔcɛ́ kú Ísrɛ̄lu. Cɛ́ɛ́ ka á lɛ ɔwɛ nwūla ká ā kwú kwu ŋmá abɔ́ɔ bōōbū. A klá abɔ́ɔ ŋ́.”

⁴Anɔ́ɔ ɔyípōklóbīya omɛ́ɛbɛ ā le yɛ,

⁵anɔ́ɔ ó má aótrɛ̄yí kú aícɔ́ɔja kú Ísrɛ̄lu ā le jīla bá í yá ojuju. Anɔ́ɔ ó da uwá kahíníī, “Ɔkpani, n lɛ ɛhɔ̄ éyi ō cē gā awɔ.” Anɔ́ɔ Ujéhu dɔɔ̄kā ka ɛ̄nyá kú aá nɛɛ? Anɔ́ɔ ó da ɔ́ ka anú nɛ, ɔkpáni.

⁶Anɔ́ɔ uwá ɛpɛplɛ́ɛpa kwú pɛ́ ga inu eyīpú, anɔ́ɔ ɔyípōklóbīya, ɔ̄comɛ́ɛbɛ ā, le anɔ̄ pīya klá anú ɛyí, anɔ́ɔ ó da ɔ́ ka Óndú ā, Ɔwɔicō kú Ísrɛ̄lu ɔ́ɔ ka anúɔ lɛ anɔ̄ tū ɔ̄ ɛyí, cɛ́ɛ́ kú ɔ̄ kwú pīya ɔcɛ́ kú ācɛ ɔlɛ́ anúɔ, Ísrɛ̄lu

⁷Ó da Ujéhu kahíníī, “A géē je ipɔ́ɔnū kú Áhābu, ɔkpáni uwɔ yíífi ŋmá ajɛ, cɛ́ɛ́ ká n géē lɛ ɔ́ci kú ācomɛ́ɛbɛ kú um mɛ́mla ákú odúúdú ācocɛ̄hɔ̄ kú um nɛ̄ Ujɛ́sēbɛlu kpó ŋmó ā gwō ɔ̄.”

⁸Ɔ̄cɛ nēé tɛ̄hɔ̄ ā klla ka kpɔ́ kahíníī, “A géē kpó odúúdú ipɔ́ɔnū kú ɔlɛ́ Áhābu ā yíífi piíí. A klla í je odúúdú ācɛnyīlɔ kú ipɔ́ɔnū kú Áhābu ā, kwu aɔ́fiyɛ, kwu ayí nū abɔ̄yīnū kpó ŋmó.

⁹N géē je ipɔ́ɔnū kú Áhābu ā yá bɛ̄ɛka ipɔ́ɔnū kú ɔcɛ́ Ujérobōwam, ɔyí kú Unɛbāti, mɛ́mla ipɔ́ɔnū kú Ubássa, ɔyí kú Ahíja ā.

¹⁰Ewō géē je ɛbɛ́ kú Ujésɛ̄bɛlu lé ipú ajɛ kú Ujésiríili. Ɔ̄cɛ dúúmā í gáā je Ujésɛ̄bɛlu nyi ŋ́.” Eko nɛ̄ ɔ̄comɛ́ɛbɛ, ɔyípōklóbīya ā le ɛlā nyā ka kwɛyí ā, ó lɛ ɔwɛ nwūla kwú kwu ŋmá abɔ́ɔ.

¹¹Eko nɛ̄ Ujéhu gā ɛcɛ ɛgiyí aótrɛ̄yí kú aɔ́cɔ́ɔja ɔ́mpa nū ā, é le ɔ̄kā da ɔ́ ka unwalu ɔ́ɔ yɔ̄ ŋ́ mɛ́ ŋ́? Ɔdíyá nɛ̄ olíla ɔ́ɔmā ɔ́ɔ wā ɛgiyí nū ā? Anɔ́ɔ ó da uwá ka ɛ́ɛ kē jé ɔ̄ mla ɛlā nɔ́ɔ gē ka ā.

¹²Anɔ́ɔ é tá ɔ̄ ohi ka ɛlā nɔ́ɔ da aá ā í wɛ ɔkwɛ̄yi ŋ́, kɔ́ɔ̄ kɛlā ɔkwɛ̄yi ā lɛ aá. Anɔ́ɔ ó da uwá kahíníī, “Ɛlā nɛ̄ ó ka gā um ā yɔ̄ á. Ó ka Óndú ā ɔ́ɔ ka anúɔ lɛ anɔ̄ tū um ɛyí ká n̄ kwú pīya ɔcɛ́ kú Ísrɛ̄lu.”

¹³Anɔ́ɔ ɔnyɔɔnyɛ kú uwā páápá kwú úwé kú nū ú plla bá ɛháajɛ ikpó kú Ujéhu klla le opo tá kahíníī, “Ujéhu lɛ ɔcɛ́ lé,” “Ujéhu wɛ ɔcɛ́.”

¹⁴Anɔ́ɔ Ujéhu le ujɔ tū tū Ujóram, ɔcɛ́ kú Ísrɛ̄lu nōo yɔ̄ Ujɛ́siríil ā. Ɛga nɛ̄ ó yɔ̄ í tá ágbe nɛ̄ ó lɛ ŋmá ɔgbɛ́fú, nɛ̄ ó kpó tá ɔcɛ́ kú Usiríya, Uhasɛ́lu,Urámɔtu ipú ajɛ kú Ugílɛ̄di ā.

¹⁵Anɔ́ɔ Ujéhu da aótrɛ̄yí kú aícɔ́ɔja ɔ́mpā nū kahíníī, “Ɔ́dāŋ́ ka aá géē yɛce um, ɔ̄cɛ dúúmā kóō kwu ŋmá ipú alɔ nyɔ̄ í pi ɔ̄cɛ dúúmā kú ipú ajɛ kú Ujésiríili ahɔ̄ nóó n.”

¹⁶Anɔ́ɔ ó le tá ipú úgbɔ́ɔnya le tá Ujésiríili, Ujóram yɔ̄ abɔ̄ í tá ágbe kú nū ā kpɔ́. Ahasíya, ɔcɛ́ kú Ujúda nōo wā í má ɔ̄, kú ágbe kú nū ā yɔ̄ abɔ́ɔ mla anú dúú.

¹⁷Ɔ̄cɛ nōo kē ce ɛyí inɔ̄ɔda olɔfú, yɔ̄ í gbāajɛ kú Ujésirííli ā le Ujéhu mɛ́mla ígwu kú ācɛ nēe yɛ mla anú ā má abɔ́ é bá yɔ̄ ī wā ā. Anɔ́ɔ ó ka anúɔ má ígwu kú ācɛ éyi bá gē wā. Anɔ́ɔ Ujóram da ɔ́ kahíníī, “Kwú ɔ̄cɛ o ce ɔnya éyi ú kóō gaá jīla uwā ɔwɛ, cɛ́ɛ́ kɔ́ɔ̄ lɛ ɔ̄kā da ɔ́ ka ɛ́ɛ wā ɛbɔ́ kɛ̄ɛ?”

¹⁸Anɔ́ɔ ɔ̄cɛ éyi kwú ɔnya ú le yɛ í jīla anú ɔwɛ. Anɔ́ɔ ó ka ɔcɛ́ ɔ́ɔ ka anúɔ lɛ ɔ̄kā da ɔ́ ka ɔ́ɔ yɔ̄ ī wɛ ɛbɔ́ kɛ̄ɛ? Anɔ́ɔ Ujéhu tá ɔ̄ ohi kahíníī, “Ɔdí nāa lɛ ō yá mla ɛbɔ́, wā gaá tá um igbīhi,” Anɔ́ɔ ɔ̄cɛ o gbāājɛ ā le ka lɛ ɔcɛ́ ā kahíníī, “Ɔ̄cɛ nāa tɛ̄hɔ̄ ā le tá ajɛ ɛgiyí uwā, amáŋ ó kwúcē wā ŋ́.”

¹⁹Anɔ́ɔ ɔcɛ́ ā klla le ɔ̄cɛ ɔ́mpa tū nyɔ̄. Anɔ́ɔ ó da Ujéhu ɔ̄kā kahíníī, “A wā ɛbɔ́ kɛ̄ɛ?” Anɔ́ɔ Ujéhu klla le ohi tá ɔ̄ kahíníī, “Ɔdí nāa lɛ ō yá mla ɛbɔ́ ā, gaá tá um igbīhi.”

²⁰Anɔ́ɔ ɔ̄cogbāājɛ ā klla le ka lɛ ɔcɛ́ ā kpɔ́ kahíníī, ɔ̄cɛ nɛ̄ ɔ́ɔ́ tɛ̄hɔ̄ ā le tá ajɛ ɛgiyí uwā, amáŋ ɔ́ kwúcē wā ŋ́. Ó klla ka ɔwɛ nēé yɔ̄ ī pɛ́ úgbɔ́ɔnya ā lɛ ā, ɔ́ɔ lɛbɛ́ɛka ɔwɛ nɛ̄ Ujéhu, ɔyí kú Unímissi ɔ́ɔ gē pɛ́ úgbɔ́ɔnya kú nū ā nɛ̄ n. Ó ka ohígbū ka úgbɔ́ɔnya ā ɔ́ɔ yɔ̄ ī kwinya nɛ̄hi.

²¹Ujóram da uwá kahíníī, “Aá lɛ úgbɔ́ɔnya kú um tútū ga um.” Anɔ́ɔ é le ɔ́ tútū á. Anɔ́ɔ Ujóram mɛ́mla Ahasíya, ɔcɛ́ kú Ujúda ā gbɔɔ́ ō nyɔ̄ í jīla anú ɔwɛ. Ɔnyɔɔnyɛ kú uwá bī úgbɔ́ɔnya kú nū. Anɔ́ɔ é gaá jīla Ujéhu ɔwɛ ipú ajɛ ɛhɔ̄ kú ɔcí ufáyin kú Unábɔ̄tu á.

²²Eko nɛ̄ Ujóram lɛ Ujéhu má ā, ó da ɔ́ ɔ̄kā kahíníī, “A wā ɛbɔ́ kɛɛ, Ujéhu?” Anɔ́ɔ Ujéhu le ohi tá ɔ̄ kahíníī, “Abɔ̄ ɛbɔ́ géē yɔ̄ lɛ glá, nɛ̄ ɔhɛ ō yá mla ɛcí ō pā kú ɛ́nɛ́ uwɔ Ujésɛbɛlu le nwuné klla le nyīla tāajɛ nyā ā?

²³Anɔ́ɔ Ujóram kwú úgbɔ́ɔnya kú nū ú pīyeyī gbɔɔ́ ō kwu ŋmá ɛgiyí Ujéhu, anɔ́ɔ ó da Ahasíya kahíníī, “Ɔ̄cɛ o yíbīyājɛ nɛ.”

²⁴Anɔ́ɔ Ujéhu pi ɔtā kú nū liiŋooo mla odúúdú ɔfú kú nū le ɔyí bū Ujóram ɛgiyí ácábɔ̄ gaá kwu ɔtū kli. Anɔ́ɔ Ujóram má gwōnū tá ipú úgbɔ́ɔnya kú nū á.

²⁵Anɔ́ɔ Ujéhu da Ubídika, ɔ̄cɛ o tá ɔ̄ abɔ̄ ā kahíníī, “Kwú okwū kú nū ú tá ga ipú ɛhɔ̄ kú Unábɔtu. Blakwu eko nɛ̄ ami mla awɔ gē ce ɔnya tá ádā nū, Áhābu ɔkwu ā, Óndú ā kɛlā nyā lɛyíkwu Áhābu ka.

²⁶“Ɛ́gɛ́nɛ̄ n má oyī kú Unábɔ̄tu amānyā ā, ɛ́gɔ́ɔmā nēé géē yá uwɔ dúú á.” Ohígbū ɔ́ɔmā, kwú okwū kú nū ú tá ga ipú ɛhɔ̄ kú Unábɔ̄tu, cɛ́ɛ́ ka ɛlā nɛ̄ Óndú ā ka ā kóō le yá jīla.”

²⁷Eko nɛ̄ Ahasíya lɛ ɔdā nōo yá nyā má ā, ó gbɔɔ́ ō kwu lɛyíkwu ɔwɛ kú Ubɛ́tihāgan. Anɔ́ɔ Ujéhu nū ɔ̄ nyɔ̄ ga abɔ́ɔ klla da uwá kahíníī, “Aá lɛ ɔ́ ŋmó.” Anɔ́ɔ é lɛ ágbe yá ɔ̄ abɔ̄ ó yɔ̄ ī pɛ́ úgbɔ́ɔnya kú nū ga ɔwɛ kú Ugɔ́ɔ nōo kwu Ibílim ajaajɛ ā. Amáŋ ó yɔ̄ ī nyɔ̄ kpɔ́ jāā ga igelī nɛ̄ŋcɛ́ kú Umegído gaá gekwú abɔ́ɔ.

²⁸Aígabɔ̄ kú ɔlɛ́ nū kwú okwū kú nū ú ga Ujerúsālɛm gaá kwú ɔ̄ ú nyi ɛgiyí únóji kú aɔ́cɛ́, igelī nɛ̄hi kú Udéfīdi.

²⁹Ahasíya lé ɔcɛ́ kú Ujúda iháyí igwóléyi, ɛ́ɛ́ nɛ̄ Ujóram ɔyí kú Áhābu lé ɔcɛ́ kú Ísrɛ̄lu á.

³⁰Abɔ̄ Ujéhu gā Ujésirííli ā, Ujésɛ̄bɛlu le pó. Anɔ́ɔ ó le ɛwɔ́ mɛ́mla úbi mɛ́mla áfū mɛ́mla odo mɛ́mla odufā, hɛ́ eyī kú nū. Ó le ɛyí yá lɔɔlɔhi klla lɛ ɔ́ gbō. Anɔ́ɔ ó lɛ eyī bū uwíndo ŋmá ɔlɛ́ ɔcɛ́ ā yɔ̄ í má ɔdā nōo gē yá Úláyi ā.

³¹Abɔ̄ Ujéhu yɔ̄ í bēé igá kú ɔlɛ́ ɔcɛ́ ā, ó da Ujéhu ɔ̄kā kahíníī, “Ɔdíyá nāa wā amānyā a, awɔ Usímīri, ɔ̄cɛ oŋmó ɔkpani nū.”[4]

³²Anɔ́ɔ Ujéhu je eyī gicō má uwíndo ā, anɔ́ɔ ó kahíníī, “Ɔnyɛ yɔ̄ abɔ́ɔ, nōo yɔ̄ āyā kú um ā? Ɔnyɛ nɛ?” Anɔ́ɔ ācɛ nēé le uwá búdá ɛpa ámāŋ ka ɛtá pīyeyī bū uwíndo le ɔ́ má.

³³Anɔ́ɔ ó da uwá kahíníī, “Aá lɛ ɔ́ tɛ́cɔ̄ ŋmá abɔ́ɔ wāajɛ.” Anɔ́ɔ é kwú Ujésɛ̄bɛlu ú tɛ́cɔ̄ wāajɛ ŋmá inīīcō. Anɔ́ɔ ōhī kú oyī kú nū le tá klá ɔdɔ mla aɔ́nya ā. Anɔ́ɔ Ujéhu le ɔnya mɛ́mla ugbɔ́ɔnya kú nū pɛ́ gaá yɛ ɛyí okwu kú ɔnyā ā á.

³⁴Ó le tá inu nyɔ̄ í le ɔdōlé lé klla le ɔdée gwá. Anɔ́ɔ ó da uwá kahíníī, “Aá má ka aá kwú okwū kú ɔnyā nēé le okónu tá lɛ ɔ́ nyā ú nyi, ohígbū koó wɛ ádā kú ɔcɛ́.”

³⁵Amáŋ eko nēé nyɔ̄ gaá je okwū kú nū nyi ā, é má ɔdā dúúmā ɛ́ɛ́ gɛ ŋ́, ayíka ákōklō ɛyí mɛ́mla ikpokwú kú ikpó mɛ́mla ɔtābɔ̄ kú nū nēé má mɛ́ɛ̄ á.

³⁶Eko nēé kwúcē wā í le ɔdā nēé má ā da Ujéhu ā, ó tá uwā ohi kahíníī, “Ɛ̄nyā wɛ ɛlā kú Óndú ā nɛ̄ ó ka bū okónu kú Ɛláyíja ɔ̄comɛ́ɛbɛ kú nū kahíníī, “Aéwō géē je okwū kú Ujɛ́sēbɛlu lé ipú ajɛ kú Ujésiríili ā.

³⁷Okwū kú Ujésēbɛ̄lu í tá ajɛ bɛ̄ɛka emī ɛna ā, ipú ajɛ kú Ujésiríilu, nɛ̄ ɔ̄cɛ dúúmā kú ipú ɔlɛ́ ā í gaá kahíníī, “Má okwū kú Ujésēbɛlu yɔ̄ á” glá ŋ́.