Read idoma 1 ÚKLƆ́ KÚ AƆ́CƐ́ 12 Bible Online

1 ÚKLƆ́ KÚ AƆ́CƐ́ 12 - idoma bible

1 ÚKLƆ́ KÚ AƆ́CƐ́ 12

¹Eko nɛ̄ Udéfīdi klá Usíklagi, ɛga nōó kwu ŋmá ɛgiyí Usɔ́ɔlu, ɔcɛ́ kú Ísrɛ̄lu nyɔ̄ ā, ācɛ olɔfú nēe jē ō kpɛ́fú nɛ̄h nēe bá ā wā gaá bá mɛ́mla anú.

²É ŋmá ipɔ́ɔma kú Ubɛ́njamīn, ɛga nɛ̄ Usɔ́ɔlu ŋmá ā. É gē bī abɔ̄lúfīyē mɛ́mla abɔ̄lɔ́ná lɛ tá ɔyī mɛ́mla ɛcɔ̄ nɛ̄hi.

³Ahíyēsa mɛ́mla Ujówāsi, ayí kú Ussémaa nōo ŋmá Ugíbēya ā wɛ aótrɛ̄yí kú uwā á. Ācɛ ohile ā wɛ, Ujésīyelu mɛ́mla Upéleti, ayí kú Asmáfɛ̄ti, Uberáka mɛ́mla Ujéhu nōo ŋmá Ánatɔ̄ɔtu ā,

⁴Íssmāya ŋmá Ugíbiyɔn, éyi kú “Aícɔ́ɔja olɔtū Ofu cigwó ā,” Ujeremíya, Ujahásīyɛlu, Ujohánna mɛ́mla Ujósābadi ŋmá Ugɛdɛ́ra,

⁵Ɛlúsāyi, Ujérīmɔtu, Ubéyalíya, Ussemárīya mɛ́mla Ussɛfatíya nōo ŋmá Uhárifu ā,

⁶Ɛlkána, Isssíya, Asárɛlu, Ujowésa mɛ́mla Ujassobéyam ŋmá ipɔ́ɔma kú Ukóra,

⁷Ujówēla mɛ́mla Usebadíya, ayí kú Ujɛ́rōham ŋmá Ugɛ́dɔ.

⁸Aɛ́nyā wɛ aícɔ́ɔja nɛ̄hi nōo ŋmá ipɔ́ɔma kú Ugádi wā ɛgiyí Udéfīdi ipú ígbíli á. É jé ō bī óbō, ɔkplɛ́fú mɛ́mla ɔtā mɛ́mla ɔyī kpɛ́fú nɛ̄hi. É tūūfi ō má eyī nɛ̄hi bɛ̄ɛka ágábá ā, klla ī kwinya nɛ̄hi fíyɛ́ ogbo.

⁹É wɛ, Ésa, Obadáya, Ɛlíyābu,

¹⁰Umíssmána, Ujeremíya,

¹¹Átāyi, Ɛlíyēlu,

¹²Ujohánan, Ɛlsábādi,

¹³Ujeremíya mɛ́mla Umakibannáyi.

¹⁴Ōhī kú uwá wɛ aótrɛ̄yí kú aícɔ́ɔja úlúúlā, ācɛ ɔhá klla gē leyīkwu ígwu kú aícɔ́ɔja ofɛhɛ̄ɛ̄hɔ̄.

¹⁵Ipú ɔyā aflɛ́yí kú iháyí éyi eko nɛ̄ Ísu kú Ujɔ́dan cēenyi klá ɛcɛ ā, anɔ́ɔ é kē le bēhé ísu kú Ujɔ́dan ā gaá kwú ācɛ nēe lā ɔpɛ́ kú Ujɔ́dan ā ú kpó pahīla, kwu ācɛ kú ɛnɔ̄ɔ̄cī mɛ́mla ɛnɔ̄ɔ̄nɛ̄ kú Ujɔ́dan ā.

¹⁶Ācɛ ŋmá ipɔ́ɔma kú Ubɛ́njamīn mɛ́mla Ujúda gā ɛgiyí Udéfīdi ipú ígbíli ɛga nōó yɔ̄ ā.

¹⁷Udéfīdi nyɔ̄ í jīla uwá ɔwɛ, anɔ́ɔ ó da uwá kahíníī, “Ɔ́dāŋ ka aá wā ɛgiyí um ká aá wɛ aóklóbīya um, gaá tá um abɔ̄, ayíka aá máabā. Amáŋ ɔ́dāŋ ka aá gē wā mla ula ká aá géē je um lɛ aólɛlā kú um nɛɛ, nɛ̄ ń kē yá aá ɔdā dúúmā ŋ́ náaná a, Óndú ā, nōo wɛ Ɔwɔicō kú aádáádā alɔ ā jé ɛ́gɛ́nɛ̄ ó géē cíla aá ulé lɛ ā.

¹⁸Anɔ́ɔ alelékwū kú Óndú ā le tá ipú iyē kú ɔ̄cɛ éyi kú uwā nōo lé ka Amásāyí, nōo je pīya aótrɛ̄yí kú “Aícɔ́ɔja olɔtū ofu cigwó ā”, anɔ́ɔ ó le ɛgba dɛ kahíníī, “Udéfīdi, ɔyí kú Ujése, alɔ wɛ ákú uwɔ nɛ! Ɛbɔ́ kóō yɔ̄ mla awɔ, ɛbɔ́ kóō yɔ̄ lɛ ācɛ dóódu nēe gē tá uwɔ abɔ̄ ā. Ohígbū ka Ɔwɔicō yɔ̄ mla uwɔ klla ī tá uwɔ abɔ̄.’’ Anɔ́ɔ Udéfīdi lɛ uwá būla klla kwú uwá ú kpó tū aícɔ́ɔja kú nū ā ipú á.

¹⁹Eko nɛ̄ Udéfīdi yɔ̄ í ga ɔgbɛ́fú mɛ́mla ācɛ kú Ufilístiya kóō gaá kpɛ́fú tá Usɔ́ɔlu ā, aícɔ́ɔja ōhī ŋmá Umanásɛ wā í kwu ācɛ ɔlɛ́ Udéfīdi. Amáŋ Udéfīdi í kpɛ́fú mɛ́mla uwá ɛ́ɛ́ gɛ ŋ́, ohígbū ka ācɛ kú Ufilístiya bá gē yúúfi ka Udéfīdi ɔ́ɔ í je ɔkwu cē kwu aá klla í gbɔɔ́ ō kpɛ́fú tá aá lɛ ɔkpani nū, Usɔ́ɔlu nɛ. Anɔ́ɔ é kwú ɔ̄ ú nū ŋmá ɔgbɛ́fú á.

²⁰Eko nɛ̄ Udéfīdi yɔ̄ gē pīyɛyí ŋmá abɔ́ɔ, wā Usíkilagi ā, aícɔ́ɔja nēe ŋmá Umanásɛ wā ɛgiyí nū ā bá á: Ádna, Ujósābadi, Ujɛdíyɛ̄lu, Umáyíkɛ̄lu, Ujósābadi, Ɛlíhu, mɛ́mla Usilétāyi. Odúúdú uwá tɛtɛ wɛ aótrɛ̄yí kú ígwíígwu kú aícɔ́ɔja, úlā ɛpa cofigwó (1,000).

²¹É kwú pīya aótrɛ̄yí kú aícɔ́ɔja kú Udéfīdi gē cē ɔ̄ gē nū ɔ́wá kú ācɛ o wā í wu ɔlɛ́, ohígbū kéē wɛ aícɔ́ɔja nēe wɛ ɔka kú ɛfú ō kpó.

²²Ɔ́ɔmā lé ka ɛ̄cī dóódu ācɛ ɛ̄yīpɛ̄ gē wā ī wɛ ipú aícɔ́ɔja kú Udéfīdi. Ɛ̄nyā yá kú aícɔ́ɔja kú nū kóō kwú nwuné nɛ̄hi bɛ̄ɛka aícɔ́ɔja kú Ɔwɔicō ā.

²³Eko nɛ̄ Udéfīdi yɔ̄ Uhɛ́brɔn ā, ígwu kú aícɔ́ɔja alɛwa kwú pɛ́ wā ɛgiyí nū klla gaá tá ɔ̄ abɔ̄ kóō kwú pīya ɔcɛ́ kwɛyí Usɔ́ɔlu ɛ́gɛ́nɛ̄ Óndú ā ka lɛ ā.

²⁴Aícɔ́ɔja nēe ŋmá ipɔ́ɔma kú Ujúda mla ɔtā, óbō, ɛ̄wā mɛ́mla ɔkplɛ́fú kú uwá wā ɛgiyí Udéfīdi ā wɛ, úlā ofu igwáahātá (6,800).

²⁵Ipɔ́ɔma kú Usímīyɔn ā wɛ, úlā igwáahāapa cofigwɛ́ɛhɔ̄ (7,100).

²⁶Ipɔ́ɔma kú Ulífāyi ā wɛ, úlā igwɛ́ɛhīlī cofigwó (4,600),

²⁷Uwá nēe wā mɛ́mla Ujɛ́hōyāda ŋmá ipɔ́ɔma kú Árɔ̄ni ā wɛ, úlā ahāanɛ cofɛhɔ̄ (3,700).

²⁸Aótrɛ̄yí kú ícɔ́ɔ́ja nēe ŋmá ipɔ́ɔma kú ádā kú Usádɔ̄ku ā wɛ, ofu cɛpa.

²⁹Ācɛ Ipɔ́ɔma kú Ubɛ́njamīn nēe wɛ ipɔ́ɔma kú Usɔ́ɔlu abɔ̄yī nū wɛ, Úlā ahāapa cofigwó (3,000). Ācɛ kú Ubɛ́njamīn alɛwa aóhī ā yɛce Usɔ́ɔlu jāā ga ajɛ.

³⁰Ācɛ ipɔ́ɔma kú Ɛ́frem ā wɛ, úlā ofɛpa cigwɛ́ɛhɔ̄ (20,800).

³¹Ācɛ ipɔ́ɔma kú ɛnɔ̄ɔ̄nɛ̄ kú Umanásɛ ā wɛ, úlā ofɛpa cɛ̄hɔ̄ (8,000).

³²Ācɛ ipɔ́ɔma kú Ísāka ā wɛ, ofigwó (200). Ācɛ nēe bá nyā jé ɔdā nɛ̄ Ísrɛ̄lu cíkā ō yá ā klla í yā ɔ̄ eko.

³³Ācɛ ipɔ́ɔma kú Usébūlɔn ā wɛ, ācɛ úlā ofigwɛ́ɛhīlī cɛ̄hɔ̄ (50,000). Éwá jé ō bī ɛdɔ iyɛ́fú dóódu kpɛ́fú.

³⁴Ācɛ ipɔ́ɔma kú Unáfutāli ā wɛ, aótrɛ̄yí úlā ɛpa cofigwó (1,000) mɛ́mla aícɔ́ɔja kú uwā, úlā ofɛnɛ cigwɛ́ɛpa cofigwó (37,000) nēe bī ɔkplɛ́fu mɛ́mla óbō.

³⁵Ācɛ ipɔ́ɔma kú Udáni ā wɛ ācɛ Úlá ofɛtá cigwóléyi ce ācɛ ofigwó nēe le iyɛ́fú ō kpo nwū.

³⁶Ipɔ́ɔma kú Ása ā wɛ, ācɛ úlā ofɛhɔ̄ (40,000), nēe wɛ ɛ́nɛ́nɛ̄ aícɔ́ɔja.

³⁷Ipɔ́ɔma kú ɛnɔ̄ɔ̄cī kú Ujɔ́dan kú ipɔ́ɔma kú Urúbɛn, Ugádi mɛ́mla ɛnɔ̄ɔ̄cī ohile kú ayí kú Umanásɛ ā wɛ, úlā ofigwɛ́ɛhɔ̄ (120,000) nēe lɛ iyɛ́fú dóódu.

³⁸Odúúdú aícɔ́ɔja nēe bá nyā le tá ɛgiyí Udéfīdi Uhɛ́brɔn klla le tútū ō je ɔ́ cɔcɛ́ kú odúúdú Ísrɛ̄lu. Odúúdú ācɛ ohile kú Ísrɛ̄lu ā cɛ̄ lɛ ā dúú.

³⁹É yá ɛ̄cī ɛtá abɔ́ɔ klla bá í lé ɔdōlé klla bá í gwá, ohígbū ka ayínɛ́ uwā ā le tútū ō mīyɛ uwá.

⁴⁰Jāā kwu ipɔ́ɔma kú ɛhícō kú Ísāka, Usébūlɔn mɛ́mla Unáfutāli ā, ācɛ gē wā bī iyó ɔdōlé ɛyí aíjakī, aínyankwūlūmī, aɔ́nya mɛ́mla aɛ́na. É bī ɔdōlé bɛ̄ɛka umu ikpɔ̄dɛ̄hɔ̄, aíkpɔ́cí ufíg, aíkpɔ̄cí kú ufáyin nēe le ŋmó, ejé mɛ́mla anɔ̄ kú ólīifu. É klla bī aɛ́na mɛ́mla aálá wā kéē ŋmó lé kéē cābɔ̄ omafú kú éeyē kú uwā ipú odúúdú ajɛ kú Ísrɛ̄lu ā.