Read idoma 1 ÚKLƆ́ KÚ AƆ́CƐ́ 14 Bible Online

1 ÚKLƆ́ KÚ AƆ́CƐ́ 14 - idoma bible

1 ÚKLƆ́ KÚ AƆ́CƐ́ 14

¹Uhíram, ɔcɛ́ kú Utáya lɛ ɔcí kú Usɛ́da, mɛ́mla ācɛ ogwɔ́lɛ́ mɛ́mla ācogbɔ̄cí tū fu Udéfīdi kéē le agblɔ̄cɛ́ kú nū gwó.

²Anɔ́ɔ Udéfīdi le jé ka, Óndú ā ɔ́ɔ kwú anúɔ ú pīya ɔcɛ́ kú Ísrɛ̄lu, le anúɔ ikpó tú kwajɛ lɔɔlɔhi, klla yā ajɛ ɔlɛ́ anúɔ ka ɔ́ɔ̄ gɔbū lɔhi, ohígbū ācɛ ɔlɛ́ unú, Ísrɛ̄lu á.

³Udéfīdi klla lɛ anyā ɔhá lɛ tū anyā nū tɛtɛ ā, nēe klla ma ayí alɛwa lɛ Udéfīdi.

⁴Ayí nēé ma lɛ Udéfīdi Ujerúsālɛm ā bá yɔ̄ á: Ussámūwa, Ussɔ́bābu, Umátan, Usólōmɔn,

⁵Íbiha, Ɛlíssūwa, Ɛlipɛ́lɛ̄ti,

⁶Unóga, Unɛ́fɛ̄gi, Ujáfīya,

⁷Ɛlíssāma, Ubelíyada mɛ́mla Ɛlífɛ̄lɛti.

⁸Eko nɛ̄ ācɛ kú Ufílístiya le pó ka Udéfīdi ɔ́ɔ lɛ ɔcɛ́ kú odúúdú Ísrɛ̄lu lé ā, é le pɛ́ ga ɛcɛ gaá kpɛ́fú tá ɔ̄. Anɔ́ɔ Udéfīdi ga ɛcɛ wā í jīla uwá ɔwɛ kéē kpɛ́fú á.

⁹Ācɛ Ufílístiya wā gaá bá ɔpɛ́ kú Urefém ā.

¹⁰Anɔ́ɔ Udéfīdi da Óndú ā ɔ̄kā kahíníī, “Ń nyɔ̄ gaá kpɛ́fú tá Ufilístiya ā? A géē je uwá ga um ká n yá uwá lé?” Anɔ́ɔ Óndú ā da ɔ́ kahíníī, “Nyɔ̄, a géē yá uwā lé”.

¹¹Anɔ́ɔ Udéfīdi kpɛ́fú tá uwá Ubaalperásim, anɔ́ɔ ó lɛ uwá yálé. Anɔ́ɔ ó kahíníī, “Ɔwɔicō bī um le bū olɛlā kú um ipú bɛ̄ɛka éŋkpɔ̄ nōo gē cēenyi ā.” Anɔ́ɔ ó hī iyē kú abɔ́ɔ ka, “Ubaalperásim” á.

¹²Eko nɛ̄ ācɛ Ufilístiya bá í kwinya ŋmá ɛfú ga ɔlɛ́ uwá ā, é kwú aójibó kú ɛcí kú uwá í kpó mlanyī bá ajɛ abɔ́ɔ. Anɔ́ɔ Udéfīdi je ɔ́da lɛ ācɛ ɔlɛ́ nū kéē lɛ ɛcí ā kpó tɔ̄lá.

¹³Ācɛ kú Ufilístiya ōhī klla kwúcē wā gaá bá ī kpɛ́fú tá uwā ɔpɛ́ abɔ́ɔ kpɔ́.

¹⁴Anɔ́ɔ Udéfīdi klla lɛ ɔ̄kā da Ɔwɔicō kpɔ́, anɔ́ɔ Ɔwɔicō tá ɔ ohi kahíníī, “Á gáā kpɛ́fú tá uwá ŋmá abɔ́ɔ pííí ā gɛ ŋ́. Le yɛ igbīhi uwā, ɛɛ́ ká kpɛ́fú tá uwā ŋmá igbīhi, ɛgiyí ɔkwu ɔcí kú Ubálsam ā.

¹⁵Ɔ́dāŋ ka a lɛ úcɛ́ kú aícɔ́ɔja pó bá ī yɛ ɛyí ɔcí ā, ayíka a gbɔɔ́ ō kpɛ́fú mɛ́ɛnɛ, ohígbū ka n géē gbɔbū nyɔ̄ ga awɔ, gaá yá uwā lé ɛɛ́.”

¹⁶Anɔ́ɔ Udéfīdi le yá ɛ́gɛ́nɛ̄ Óndú ā ka lɛ ā, anɔ́ɔ uwá nū ācɛ kú Ufilístiya inya ŋmá Ugíbēyɔn jāā ga Ugɛ́sa.

¹⁷Éwo dóódu lɛ ofu Udéfīdi pó, anɔ́ɔ Óndú ā klla yá ká éwo dóódu ā kéē yúúfi Udéfīdi á.