Read idoma 1 ÚKLƆ́ KÚ AƆ́CƐ́ 16 Bible Online

1 ÚKLƆ́ KÚ AƆ́CƐ́ 16 - idoma bible

1 ÚKLƆ́ KÚ AƆ́CƐ́ 16

¹Anɔ́ɔ é lɛ Ikpati kú Ɛka kú Óndú ā bī ga ipú áklɔ̄kpɛ nɛ̄ Udéfīdi gwó lɛ ɔ́ ā. Anɔ́ɔ é lɛ ɛya ō yɔlá dúúdú mɛ́mla ɛya kú ɛbɔ́ gwó lɛ Ɔwɔicō abɔ́ɔ á.

²Eko nēé lɛ ɛya ā gwó mɛ ā, Udéfīdi bī iyē kú Óndú ā le ɔhā hɛ́ ce uwá.

³Ó klla le ɔdōlé kɔ̄ lɛ odúúdú uwā. Odúúdú ācɛ kú Ísrɛ̄lu ā, kwu ācɛnyā kwu ācɛnyīlɔ, ó je igbō mɛ́mla ɛbɛ́ o pá ɔlá mɛ́mla aíkpɔ̄cí ufáyin nōo le ŋmó lɛ uwá.

⁴Anɔ́ɔ Udéfīdi lɛ ācɛ Ulífāyi ōhī fu kéē kpó ācɛ trɛ̄yí ipú ɛ̄gbā ō gbā iyɔ̄bú Ikpati kú Ɛka kú Óndú ā abɔ́ɔ, ŋmá lɛ ō gwíijē cɛ̄tra Óndú ā.

⁵Ásāfu nōó je otrɛ̄yí kú uwā á, Usekaríya kē kpókónu ce ɔ́ á. Aɔ́há ā wɛ, Ujɛ́yɛlu, Usémīramɔ́tu, Ujehíyɛ̄lu, Umatitíya, Ɛlíyābu, Ubenáya, Obɛ́dɛ̄dɔm, mɛ́mla Ujéhīyɛlu bá ī gwō ɛ̄ngwū. Ásāfu yɔ̄ í gwó anwa kú oje.

⁶Ubenáya mɛ́mla Ujahásīyɛlu, ācogwɛ́ɛya ā bá í tá opo eko dóódu iyɔ̄bū Ikpati kú Ɛka kú Óndú ā.

⁷Eko ɔ́ɔmā nɛ̄ Udéfīdi je úklɔ́ kú ijē ōgwó lɛ Ásāfu, mɛ́mla ācɛ Ulífāyi, aɔ́mpānū á, kéē gwíijē iyɔ̄bū kú Ikpati kú Ɛka kú Óndú ā á.

⁸Aá tá Óndú ā ahínyá, ká aá dɛ̄ hī iyē nū eko dóódu. Ka ɔdā nōó yá ā lɛ odúúdú aéwo kú ācɛ.

⁹Aá gwííjē, ká aá cɛ̄tra anú. Ka ɔdā ohídáagó nɛ̄hi nōó yá ā tɛ́ɛcɛ.

¹⁰Ɔtū kóō he aá kú aá wɛ ákú nū. Odúúdú ācɛ nēe gē gbā Óndú ā kéē gwéeyē.

¹¹Tíne Óndú ā mɛ́mla ɔfú kú nū, kú ā yɔ̄ iyɔ̄bū nū yɔ̄ ī gbā ɔ̄ ɛ̄gbā eko dóódu.

¹²Aá blakwu úklɔ́ ohídáagó nɛ̄hi nɛ̄ Óndú ā yá ā. Aá gbɛlá kwú úklɔ́ ohídáagó ā mɛ́mla ɛpɔ̄ nɛ̄ Óndú ā hɛ́ ā.

¹³Ayááyí kú Ébrahām, nōo wɛ ɔ̄cocɛ̄hɔ̄ kú Óndú ā, ayááyí kú Ujékɔ̄pu nɛ̄ Ɔwɔicō fu ā, aá blakwu ɔdā nɛ̄ Óndú ā yá nēe bá abɔ́ɔ ā.

¹⁴Anú wɛ Óndú ā, nōo wɛ Ɔwɔicō kú alɔ á. Anú lɛ íkwu gē hɛ́pɔ̄ odúúdú ɛcɛ á.

¹⁵Blakwu ɛka kú nū piyóó. Ɛlā dúú nōó ka ā háyi piyóó.

¹⁶Ɛka ɔ́ɔmā nōó gbo mla Ébrahām, anú nōó kē gbɔkpá ce lɛ Áyísīki á.

¹⁷Ó klla gbɛka ɔ́ɔmā mla Ujékɔ̄pu, nōo í yō piyóó dúú.

¹⁸Ó kahíníī, “N géē je ajɛ kú Ukénan gā awɔ, kóō wɛ ɔdā úgwū kú uwɔ piyóó”

¹⁹Ācɛ kú Ɔwɔicō ā í lɛwa ajɛ kú Ukénan eko ɔ́ɔmā ŋ́, é klla wɛ aúgbɔga ipú ajɛ ā.

²⁰É yɛ ŋmá ajɛ kú éwo éyi ga ajɛ kú éwɔhá, ŋmá ajɔ̄ɔ̄cɛ́ éyi ga ajɔ̄ɔ̄cɛ́ ɔhá.

²¹Amáŋ Óndú ā í cɛ̄ lɛ ɔ̄cɛ dúúmā pīya uwá tū ŋ́. O yá kóō gbō uwā ā, ó dɛ̄gba tū aɔ́cɛ́ kú aéwɔhá ā

²²kahíníī, “Aá yá ācɛ nɛ̄ n fu ā ɔdā dúúmā ŋ́, aá lɛ abɔ̄ kwu ācomɛ́ɛbɛ kú um ŋ́.”

²³Odúúdú ācɛ kú ɛcɛ, aá gwííjē lɛ Óndú ā. Aá kɔ̄kā olɔhi tá ɛcɛ eko dóódu ka Óndú ā lɛ alɔ nyatá ɛɛ́.

²⁴Aá ka ofu nɛ̄hi kú Óndú ā tɛ́ɛcɛ ɔtáhɛ́ aéwo dóódu. Aá ka úklɔ̄ idáagó kú nū tá ɛcɛ ɔtāhɛ̄ ācɛ.

²⁵Óndú ā nwuné nɛ̄hi, ɔ̄cɛ kē cíkā ō cɛ́tra anú nwuné lɛ ā dúú. Anú cíkā ō le ojīlīma ce ɔ́ mɛ́mla ufi fíyɛ́ aɔ́wɔ ɔhá dóódu á.

²⁶Aɔ́wɔ kú aéwɔhá dóódu ā wɛ ɛcí nɛ̄ ɔlɛɛcɛ yá nɛ. Amáŋ Óndú ā yá ɔkpáncō mɛ́mla ɛcɛ á.

²⁷Ojīlīma mɛ́mla ɛgahi kú nū tá cāā nɛ̄ ɛjɛ̄ɛ̄jī ācɛ ī má. Ācɛ ī má ɔfú kú nū, ó klla ī je éeyē lɛ ācɛ ipú Agblīihɔ-nɛ̄hi kú nū.

²⁸Odúúdú ācɛ kú ɛcɛ, aá cɛ̄tra Óndú ā óoo! Aá cɛ̄tra ɛgahi, ɔfú, íkwu, mɛ́mla ojīlīmā kú Óndú ā.

²⁹Aá cɛ̄tra Óndú ā ohígbū ɔfú kú nū ā. Aá bī ɔdā kú ɛya ogwó wā iyɔ̄bū nū. Aá gbā Óndú ɛ̄gbā ā ipú otīihɔ kú nu. Aá gbā ɔ̄ ɛ̄gbā ipú ɛgahi mɛ́mla otīihɔ kú nū.

³⁰Ɛcɛ kóō fīyégbúlú iyɔ̄bū Óndú ā. Ɛcɛ ā háyi kli, nɛ̄ ɔdā dúúmā í fu ɔ́ ŋmá ajɛ glá ŋ́.

³¹Ɔkpáncō mɛ́mla ɛcɛ, aá gwéeyē. Aá ka lɛ aéwo dóódu ka Óndú ā ɔ́ɔ wɛ ɔcɛ́ á.

³²Ísu nɛ̄hi ā mɛ́mla ɔdā dóódu nēe bá ipú nū ā kéē gwó kwūūū. Ājɛ mɛ́mla ɔdā dóódu nēe bá ipú nū ā, kéē gwéeyē ká ɔtū kóō he uwā.

³³Ɔcí ɛ̄mɛ̄ɛ̄mɛ̄ mɛ́mla ɔcí kú ipú ūpū, kéē gwíijē ohígbū éeyē iyɔ̄bū Óndú ā Ohígbū ka aá jé ka Óndú ā gē wā í kɛpɔ tū odúúdú ɛcɛ.

³⁴Aá tá Óndú ā ahínyá, ohígbū ka Óndú ā lɔhi, ihɔtū kú nū kē yɔ̄ piyóó.

³⁵Aá da Óndú ā kahíníī, “Lɛ alɔ nyatá, Óndú, Ɔwɔicō nōo ī nya alɔ tá ā. Lɛ alɔ yā tɔ̄há, ká ā lɛ alɔ hɛ́tá ŋmá ipú aéwɔhá, cɛ́ɛ́ ká ālɔ̄ tá uwɔ ahínyá, ká alɔ klla cɛ̄tra iyē ōtiihɔ kú uwɔ”.

³⁶Cɛ̄tra Óndú ā, nōo wɛ Ɔwɔicō kú Ísrɛ̄lu. Cɛ̄tra anú ŋmá abālɔbányā jāā ga opiyóó. Anɔ́ɔ odúúdú ācɛ a kahíníī, “Kóō le yá lɛ ā (Aamí).”

³⁷Anɔ́ɔ Udéfīdi kwú úklɔ́ kú ō bī ijē gbā Ɔwɔicō ɛ̄gbā nyā ú tū Ásāfu mɛ́mla Ulífāyi aɔ́mpānū abɔ̄ ŋmá eko ɔ́ɔmā ā. Uwá géē bá í gwííjē nyā iyɔ̄bū Ikpati kú Ɛka kú Óndú ā eko dóódu.

³⁸Obɛ́dɛ̄dɔm, ɔyí kú Ujɛ́dūtun, mɛ́mla ācɛ ofɛtá cahātá ɔhá gē bá ī gwíijē nyā tá uwā abɔ̄ dúú. Uhósa mɛ́mla Obɛ́dɛ̄dɔm géē bá ī gbō ɔwɛ kú áklɔ̄kpɛ kú Agblīihɔ-nɛ̄hi ā.

³⁹Usádɔ̄ku mɛ́mla ācogwɛ́ɛya aɔ́mpānū ā géē leyīkwu ɛga nēé gē gbā Óndú ā ɛ̄gbā, Ugíbēyɔn á.

⁴⁰Ɔ̄cɔɔ̄cī mɛ́mla ɔ̄nɔ̄ɔ̄nɛ̄ dóódu, é gé bá ī gwɛ́ɛya ō pá ɔlá lɛ Óndú ā, ɛ́gɛ́nɛ̄ é tá ɔ̄ tāajɛ ipú íne nɛ̄ Óndú je lɛ ācɛ kú Ísrɛ̄lu lɛ ā.

⁴¹Uhɛ́mān mɛ́mla Ujɛ́dūtun nēé fu kéē bá í gwíijē cɛ̄tra Óndú ohígbū ihɔtū kú nū nōo yɔ̄ piyóó ā, bá abɔ́ɔ mɛ́mla uwá dúú.

⁴²Uhɛ́mān mɛ́mla Ujɛ́dūtun gē leyīkwu opo mɛ́mla anwa kú oje mɛ́mla aɔ́dā ɔhá nēé ī le gwííjē ā eko dúú nēé gē gwííjē ī cɛ̄tra Óndú ā á. Ācɛ kú ipɔ́ɔma kú Ujɛ́dūtun klla ī gbɔ̄ɔwɛ á.

⁴³Anɔ́ɔ ɔnyɔɔnyɛ kú uwá le pɛ́ gā ɔlɛ́ uwā á. Udéfīdi le tá ɔlɛ́ nū gaá mlɛ́nyɔ̄ mɛ́mla ācɛ ɔlɛ́ nū dúú.