Read idoma 1 ÚKLƆ́ KÚ AƆ́CƐ́ 18 Bible Online

1 ÚKLƆ́ KÚ AƆ́CƐ́ 18 - idoma bible

1 ÚKLƆ́ KÚ AƆ́CƐ́ 18

¹Igbīhāajɛ ā, Udéfīdi lɛ ɛfú kpó tú ācɛ kú Ufilístiya klla lɛ uwá yálé. Ó mīyɛ igelī nɛ̄hi kú Ugáti mɛ́mla aípɔ́lɛ́ nēe yɛ ɔ́ jīla tá ā.

²Ó klla lɛ ācɛ kú Umówābu yálé, nɛ̄ ācɛ Umówābu kwú pīya ācocɛ̄hɔ̄ kú nū, klla gbɔɔ́ o télí lɛ Udéfīdi.

³Ɔ̄cɛ ɔhá nɛ̄ Udéfīdi yálé ā wɛ Uhadadésa, ɔcɛ́ kú Usóba nōo yɔ̄ ipú ajɛ kú Usiríya, lɛyíkwu Uhámáti ā. Uhadadésa yɔ̄ í nyɔ̄ kóō gaá mīyɛ ajɛ nōo kwu ísu kú Uyúfarētīisi ɛhícō ā.

⁴Udéfīdi lɛ aúgbɔ́ɔnya o bī kpɛ́fu kú nū úlā ɛpa cofigwó (1,000), ācɛ o cɔnya kpɛ́fú úlā igwáahāapa cofigwó (7,000) mɛ́mla aícɔ́ɔja o yɛ ikpó kpɛ́fú úlā ofɛpa cigwó (20,000) kpó kwú ŋmá abɔ̄ nū. Ó lɛ aɔ́nya nēe gē jɛ̄ aúgbɔ́ɔnya ofɛhɔ̄ glá kpó báajɛ, anɔ́ɔ́ ó le aóhile ā ikpó kpó ce á.

⁵Eko nɛ̄ ācɛ Usiríya nēe bá Udamáskɔ̄si ā lɛ aícɔ́ɔja tɛ̄hɔ̄ gaá tá Uhadadésa abɔ̄ ā, Udéfīdi klla kpɛ́fú tá uwā dúú lɛ úlā ofɛpa cuúlā igwɛ́ɛhɔ̄ (22,000) kú uwá kpó ŋmó.

⁶Anɔ́ɔ ó kwú aícɔ́ɔja kú nū ā ú kpó bá ɔlɛ́ uwā, Udamáskɔ̄si abɔ́ɔ, anɔ́ɔ é kwú pīya ācocɛ̄hɔ̄ kú nū gbɔɔ́ ō télí lɛ ɔ́ á. Ɛga dóódu nɛ̄ Udéfīdi kpɛ́fú ā, Óndú ā cɛ̄ lɛ ɔ́ le yálé.

⁷Aɔ́kplɛfú kú oje ɔdɔ (ugoolu) nɛ̄ otrɛ̄yí kú aícɔ́ɔja kú Uhadadésa bī ā, Udéfīdi mīyɛ klla kwú kpó ga Ujerúsālɛm.

⁸Ó klla kpó oje udɔ nɛ̄hi ŋmá igelī nɛ̄hi kú Utíbāti mɛ́mla Ukún, nɛ̄ Uhadadésa gē gbō ā. Oje udɔ nyā nɛ̄ Usólōmɔn je kpó yúklɔ́ kú utánki, Upíla mɛ́mla iyó kú úklɔ́ kú Agblīihɔ-nɛ̄hi kú Óndú ā, nōó gwó ā á.

⁹Anɔ́ɔ Utɔ́yi, ɔcɛ́ kú Uhámati le pó ka Udéfīdi ɔ́ɔ lɛ odúúdú aícɔ́ɔja kú Uhadadésa yálé dúúdú á.

¹⁰Anɔ́ɔ ó lɛ ɔyí nū, Ujóram tɛ̄hɔ̄ fú Udéfīdi gaá je ɔ́ abɔ̄ ogwú gicō kú oyálé nōo yá Uhadadésa, ɔ̄cɛ nɛ̄ Utɔ́yi húmáyī kpɛ́fú mɛ́mla anú igbalɛwa ā lé ā. Utɔ́yi klla bī oje ɔdɔ (ugóolu), oje udɔ, oje nɛ̄hɛ́ gaá yá Udéfīdi ɛhi eko ɔ́ɔmā dúú.

¹¹Udéfīdi kwú uwā ú kpó lɛ Ɔwɔicō mɛ́mla oje ɔdɔ (ugóolu), oje udɔ, mɛ́mla oje nɛ̄hɛ́ ɔhá nōó kpó ŋmá Ɛ́dɔm, Umówābu, Ámɔn, Ufilístiya mɛ́mla Ámālɛ̄ki nōo yálé ɛfú ā.

¹²Abísāyi, ɔyí kú Userúya lɛ ācɛ kú Ɛ́dɔm, yálé ɔpɛ́ kú ɔmā ā, klla lɛ ācɛ ɔlɛ́ uwā úlā ofɛpa cɛ̄hɔ̄ (18,000) kpó ŋmó.

¹³Ó klla lɛ aícɔ́ɔja kú nū kpó bá Ɛ́dɔm, anɔ́ɔ ācɛ kú Ɛ́dɔm ga ɛháajɛ kú Udéfīdi klla gbɔɔ́ ō télí lɛ Udéfīdi á. Ɛga dúúmā nɛ̄ Udéfīdi gē ga ɛfú ā, Óndú ā gē cɛ̄ le ɔ́ yá ācɛ lé eko dóódu.

¹⁴Udéfīdi wɛ ɔcɛ́ kú ācɛ Ísrɛ̄lu dúúdú á, ó má kéē bá í kɛpɔ̄ okpaakpa lɛ ācɛ kú Ísrɛ̄lu eko dóódu.

¹⁵Abíssāyi, ɔyínɛ́ kú Ujówabu wɛ otrɛ̄yí kú aícɔ́ɔja kú Udéfīdi á. Ujɛhóssāfāti, ɔyí kú Ahilúdu gē leyīkwu ɔdā o tá tāajɛ dóódu á.

¹⁶Usádɔ̄ku, ɔyí kú Ahítūbu mɛ́mla Ahímɛ́lɛ̄ki, ɔyí kú Abíyāta wɛ ācogwɛ́ɛya kú nū á. Useráya wɛ ɔmálɛ otɔkpá kú ɔlɛ́ ɔcɛ́ á.

¹⁷Ubenáya, ɔyí kú Ujɛhōyáda ā wɛ otrɛ̄yí kú aícɔ́ɔja nōo gē gbō Udéfīdi abɔ̄yī nū á. Ayí kú Udéfīdi abɔ̄yī uwā klla lɛ āhɔ̄ nɛ̄hi ipú úklɔ́ kú ɔcɛ́ ā dúú.