Read idoma 1 ÚKLƆ́ KÚ AƆ́CƐ́ 19 Bible Online

1 ÚKLƆ́ KÚ AƆ́CƐ́ 19 - idoma bible

1 ÚKLƆ́ KÚ AƆ́CƐ́ 19

¹Igbīhi ɛ̄nyā ā, Unáhāssi, ɔcɛ́ kú Ámɔn ā gekwú, anɔ́ɔ ɔyí nū Uhánɔn lɛ ɔcɛ́ lé kwɛyí nū á.

²Anɔ́ɔ Udéfīdi kahíníī, “N géē yá oklóbīya tá Uhánɔn ɛ́gɛ́nɛ̄ n yá tá ádā nū ā.” Anɔ́ɔ Udéfīdi lɛ ācɛ tɛ̄hɔ̄ fu ɔ́ gaá ce ɔ́ abīyē kú ikwū kú ádā nū á. Eko nɛ̄ uwá ga ajɛ Ámɔn klla ga ɔlɛ́ ɔcɛ́ a,

³aótrɛ̄yí kú Ámɔn da Uhánɔn, ɔcɛ́ ā kahíníī, “Ā gbɛlá ka ojīlīmā nɛ̄ Udéfīdi le ce ádā uwɔ ɛ́ɛ́ nōó tū ācɛ nēe bá nyā ɛhɔ̄ wā í ce uwɔ abīyē kú ikwū kú ádā uwɔ ā nóó. Ó tū uwā ɛhɔ̄ wā kéē gaá má, klla jīla ajɛ kú uwɔ wɛɛlɛ, cɛ́ɛ́ kóō géē wā í mīyɛ ajɛ ā nɛ̄.”

⁴Anɔ́ɔ Uhánɔn lɛ aócɛ̄hɔ̄ kú Udéfīdi ā kpó kwú, lɛ uwá ɔnwāgba āyā éyi kpó wā, mā āyā ɔhá tá kwu ɔ́, klla le īlī kpó hīla tū uwá ɔkwu, lɛ uwá nū.

⁵Uwēyī í cɛ̄ lɛ uwá kwúcē ga Ujerúsālɛm nōo wɛ ɔlɛ́ uwá ā ŋ́. Amáŋ eko nɛ̄ Udéfīdi lɛ ɔdā nōo yá nyā pó ā, ó lɛ ɛhɔ̄ tū fu uwá kéē bá Ujérīko jāā gbéeko nɛ̄ ɔnwāgba kú uwá ā le kpó bū.

⁶Abɔ̄ ācɛ kú Ámɔn mɛ́mla Uhánɔn, ɔcɛ́ ā le jé ka aá kwú Udéfīdi ú pīya olɛlā kú uwā ā, é bī ije nɛ̄hɛ́ ulɛpa cofigwó (1,000) gaá lɛ aúgbɔ́ɔnya mɛ́mla ācɛ o pɛ́ úgbɔ́ɔnya ā pula ŋmá ɛhícō kú Umesopotámīya mɛ́mla Umáaka mɛ́mla Usóba, aájɔ̄ɔ̄cɛ́ kú Usiríya ā.

⁷Aúgbɔ́ɔnya úlā ofɛnɛ cɛ̄hɔ̄ (32,000) ā mɛ́mla aícɔ́ɔja nēé gaá pula ŋmá abɔ̄ kú ɔcɛ́ kú Umáaka ā wā í le aáklɔ̄kpɛ kú ɛfú kpó ce kwu ajaajɛ kú Umédēba. Ācɛ kú Ámɔ̄n le tútū ɛfú ú kpo ŋmá odúúdú aígelī kú uwā.

⁸Eko nɛ̄ Udéfīdi le ofu ɛfú ā pó ā, ó lɛ Ujówābu tɛ̄hɔ̄ mɛ́mla odúúdú aícɔ́ɔja kú ɔlɛ́ nū ā.

⁹Anɔ́ɔ ācɛ Ámɔ̄n ga ɛcɛ gaá le hɔgba kú ɛfú okónu kú igá kú igelī nɛ̄hi kú Urába ā á. Aɔ́cɛ́ nēe wā í tábɔ̄ ā gaá bá odúdɛcɛ ipácí ā.

¹⁰Eko nɛ̄ Ujówābu má kéē le hɔ́ɔgba kú ɛfú igbīhi mɛ́mla iyɔ̄bū ā, ó lɛ ācɛ kú Ísrɛ̄lu ōhī fu le hɔ́ɔgba ɛfú leyīkwu ācɛ kú Usiríya,

¹¹ācɛ ɔhá ā kē bá ɛháajɛ kú Abíssāyi, ɔyínɛ́ nū, leyīkwu ācɛ kú Ámɔ̄n.

¹²Anɔ́ɔ ó da Abíssāyi kahíníī, “Ɔ́dāŋ ka ācɛ kú Usiríya le lɔfú fíyɛ́ um abɔ̄ nɛɛ, a wā í tá um abɔ̄. Ɔ́dāŋ nɛ̄ ācɛ kú Ámɔ̄n le lɔfú fíyɛ́ ɔ̄ abɔ̄ nɛɛ, n géē wā í tú uwɔ abɔ̄.

¹³Lɛ ɔtū lɛ kú ālɔ̄ nuunu bɛ̄ɛka ācɛnyīlɔ ohígbū ācɛ ɔlɛ́ alɔ, mɛ́mla aígelī kú Ɔwɔicō kú alɔ. Ká Óndú ā kóō le ɔdā nōó tíne ā yá.”

¹⁴Anɔ́ɔ Ujówābu mɛ́mla ācɛ nēe bá mɛ́mla anú ā, gbɔɔ́ ō kpɛ́fú tú ācɛ kú Usiríya, anɔ́ɔ ācɛ kú Usiríya ā gbɔɔ́ ō kwinya á.

¹⁵Abɔ̄ ācɛ kú Ámɔ̄n má bá ācɛ kú Usiríya bá ī kwinya ā, é gbɔɔ́ ō kwinya ŋmá iyɔ̄bū Abíssāyi, ɔyínɛ́ kú Ujówābu, ga ɔlɛ́ uwā. Anɔ́ɔ Ujówābu kwúcē wā Ujerúsālɛm á.

¹⁶Amáŋ, eko nɛ̄ ācɛ kú Usiríya má ka ācɛ kú Ísrɛ̄lu ɛ́ɛ le yálé ɛɛ́ mā, é lɛ ɛhɔ̄ tū gé lɛ ācɛ kú Usiríya nēe bá ogbeé kú isú kú Uyúfarētīisi ā lɛ uwá hīgwú. Ussófāki, otrɛ̄yí kú aícɔ́ɔja kú Uhadadésa, ɔcɛ́ kú Usóba kpó uwā trɛ̄yí wā á.

¹⁷Eko nɛ̄ Udéfīdi le pó ā, ó lɛ ɛjɛ̄ɛ̄jī aícɔ́ɔja kú Ísrɛ̄lu túbá egéégéyi, le bēhé ísu kú Ujɔ́dan ga ɛgiyí uwā gaá kpɛ́fú tú ācɛ kú Usiríya kpɔ́. Eko nɛ̄ Udéfīdi gbɔɔ́ ō kpɛ́fú tú uwā ā, é kē gbɔɔ́ ō nuunu tú ɔ́ dúú.

¹⁸Anɔ́ɔ ācɛ kú Usiríya ā kwú igbīhi ú ce kwu ācɛ kú Ísrɛ̄lu gbɔɔ́ ō kwinya á. Udéfīdi ŋmó ācɛ ocɔnya kú Usiríya úlā igwɛ́ɛhɔ̄ cofigwó (7,000) klla ŋmó aícɔ́ɔja ɔlamu úlā ofɛhɔ̄ (40,000). Ó lɛ Ussófaki, otrɛ̄yí kú uwā ā ŋmó dúú.

¹⁹Anɔ́ɔ eko nɛ̄ Uhadadésa má ka Ísrɛ̄lu ɔ́ɔ lɛ aá yálé ā, é lɛ ɛbɔ́ yá ɔtāhɛ́ kú uwā mɛ́mla Udéfīdi, anɔ́ɔ uwá kwú pīya ācocɛ̄hɔ̄ kú Udéfīdi á. Abɔ̄ ó lɛ ā ā, ācɛ kú Usiríya í tíne ō cɛ̄ kéē tá ācɛ Ámɔ̄n abɔ̄ gbógbóō gɛ ŋ́ má.