Read idoma 1 ÚKLƆ́ KÚ AƆ́CƐ́ 20 Bible Online

1 ÚKLƆ́ KÚ AƆ́CƐ́ 20 - idoma bible

1 ÚKLƆ́ KÚ AƆ́CƐ́ 20

¹Ɛpléeko kú oō gbɔɔ́ kú ɔgwā kú iháyí ɔhá, eko nɛ̄ aɔ́cɛ́ gē ga ɔnɛ̄fú ā, Ujówābu lɛ aícɔ́ɔja kú Ísrɛ̄lu kpó gaá kpɛ́fú tú ācɛ Ámɔ̄n, lɛ ajɛ kú uwā wúlatāajɛ. Ó klla gaá le íbɔm cē tū Urába, nōo wɛ igelī nɛ̄hi ɔtāhɛ̄ kú uwā ā. Amáŋ Udéfīdi klá Ujerúsālɛm eko ɔ́ɔmā kpɔ́. Ujówābu mɛ́mla ācɛ ɔlɛ́ nū kpɛ́fú tú Urába kwú ɔ̄ ú yíífi.

²Ó lɛ ɔfulā kú oje ɔdɔ nōo gē kwu ojibó kú Umílkom, ɛcí kú Ámɔn ā, ɛyí. Oje ɔdɔ (ugoolu) gbɛnú bɛ̄ɛka igbó oje ɔdɔ (ugóolu) éyi ā. Ó kē lɛ ɛcɔ̄ ogbɔɔ́lá nɛ̄hi éyi nɛ̄ Udéfīdi je ŋmá ipú nū je kwú ɔfulā kú anú abɔ̄yī nū. Ó klla kpó iyó ŋmá igelī nɛ̄hi ɔ́ɔmā nɛ̄hi.

³Ó lɛ ācɛ kú igelī ɔ́ɔmā kpó kéē gaá hɛ́ ɔcí, gbā ɛcɔ̄, klla hɛ́hɔ̄ lɛ ɔ́. Ɛ́gɛ́nyā nōó yá mla odúúdú ācɛ kú aígelī kú Ámɔ̄n ɔhá á. Anɔ́ɔ Udéfīdi mɛ́mla aícɔ́ɔja kú nū ā kwúcē ga Ujerúsālɛm á.

⁴Igbīhāajɛ ā, ɛfú gbo ɔ́ ɔtāhɛ̄ Ísrɛ̄lu mɛ́mla ācɛ kú Ufilístiya Ugɛ́sa. Eko nyā nɛ̄ Usíbēkayi nōo ŋmá Uhússa ā ŋmó ɔbáagwu éyi nēé hī ka Usípāyi á. É kē le ācɛ Ufilístiya yálé.

⁵É kpɛ́fú igbɔhá kpɔ́. Ipú ɛfú ɔ́ɔmā nɛ̄ Ɛlhánan, ɔyí kú Ujɛ́ɛ ŋmó Ulámi, ɔyínɛ́ kú Ugolíyati nōo ŋmá Ugáti á. Ɔ́kpa kú óbō kú ɔ̄cɛ Ugáti ā cɔkpɛ́nú bɛ̄ɛka ogbló nēé gē bī gē le tá īlī ā.

⁶É kpɛ́fú ɔhá Ugáti. Abɔ́ɔ ā nɛ̄ agwu éyi nōo lɛ aíkābɔ̄ ɛhīlī mɛ́mla ayíkīkpó ɛhīlī ā yɔ̄ á. Ó wɛ ɔyí kú ipɔ́ɔma kú ɔbáagwu kú íkée ā.

⁷Ó gē wā í yá ācɛ kú Ísrɛ̄lu okónu. Anɔ́ɔ Ujonátan, ɔyí kú ɔyínɛ́ Udéfīdi, Ussiméyi kwú ɔ ú ŋmó á.

⁸Ācɛ ɛtá nɛ̄ Udéfīdi mɛ́mla ācɛ ɔlɛ́ nū kpó ŋmó nyā wɛ ayááyí kú aɔ́báagwu kú Ugati dúúdú ā.