Read idoma 1 ÚKLƆ́ KÚ AƆ́CƐ́ 23 Bible Online

1 ÚKLƆ́ KÚ AƆ́CƐ́ 23 - idoma bible

1 ÚKLƆ́ KÚ AƆ́CƐ́ 23

¹Eko nɛ̄ Udéfīdi kwu hīla ókplícī nɛ̄hi ā, ó kwú ɔyí nū Usólōmɔn ú cɔcɛ́ ɛɛ́ nōó kwú á.

²Udéfīdi lɛ odúúdú aótrɛ̄yí kú Ísrɛ̄lu ā mɛ́mla ācogwɛ́ɛya mɛ́mla ācɛ Ulífāyi ā hīgwú tɔ̄há.

³Odúúdú ayí kú Ulífāyi nēe wɛ iháyí ofu cigwó gɔbū ā, ó lɛ uwá gbaáluka. Ɛwa kú odúúdú uwá wɛ úlā ofɛnɛ cuúlā igwɛ́ɛhɔ̄ (38,000).

⁴Udéfīdi lɛ ācɛ úlā ofɛtá (24,000) kú uwá kpó tū úklɔ́ kú Agblīihɔ-nɛ̄hi. Ācɛ úlā igwɛ́ɛhɔ̄ ā géē bá ī tá ɔkpá tū ajɛ, klla í bá ī hɛ́pɔ̄ kú ācɛ ā á.

⁵Ācɛ úlā igwó (4,000) kú uwā gē bá ī gbɔ̄ɔwɛ kú Agblīihɔ-nɛ̄hi ā. Ācɛ úlā igwó (4,000) kú uwá ɔhá ā gē bá ī gwíijē ipú Agblīihɔ-nɛ̄hi mla ɔdā ō bī gwííjē dóódu nɛ̄ ɔcɛ́ kpó bá ipú Agblīihɔ-nɛ̄hi kéē bī gwííjē lɛ Óndú ā.

⁶Udéfīdi klla lɛ ācɛ Ulífāyi a kɔ̄ ígwu ɛtá, ɛ́gɛ́nɛ̄ ipɔ́ɔma kú uwá lɛ a Ugɛ́ssɔn, Ukóhati mla Umerári.

⁷Ugɛ́ssɔn ma ayí ɛpa: Uládan mɛ́mla Ussímēyi.

⁸Uládan ma ayí ɛtá: Ujɛ́hīyɛlu, Usetán mɛ́mla Ujówɛ̄lu.

⁹Uwá ā wɛ aótrɛ̄yí kú aípɔ́ɔma nēe ŋmá ayí kú Uládan ā á. Ussíméyi ma ayí ɛtá: Ussélōmɔtu, Uhásīyɛlu mɛ́mla Uháran.

¹⁰Ussímēyi ma ayí ɛnɛ: Ujáhāti, Usína, Ujéyuss mɛ́mla Ubérīya.

¹¹Ujéyuss mɛ́mla Ubérīya í ma ayí lɛwa ŋ́ ma, é lɛ uwá ka tɔ̄há ipɔ́ɔma ékpónú.

¹²Ukóhati ma ayí ɛnɛ: Ámram, Ísiha, Uhɛ́brɔn mɛ́mla Usíyelu.

¹³Ɔ́kplá kú nū, Ámram ā wɛ ádā kú Umósīsi mɛ́mla Árɔ̄ni á. Árɔ̄ni mɛ́mla ayí nū ā bá ī yúklɔ́ kú ɔdā otīihɔ piyóó ipú Agblīihɔ-nɛ̄hi kú Óndú ā. É géē gwɛ́ɛya klla í yi ɔtulali ɔlá ipú Agblīihɔ-nɛ̄hi ā, klla í yɔ̄ í hɔ́hā ce ācɛ kú Ísrɛ̄lu bī iyē kú Óndú ā eko dóódu á.

¹⁴Amáŋ ayí kú Umósīsi, ɔ̄cɛ kú Ɔwɔicō ā í wɛ ipú ācogwɛ́ɛya ā ŋ́, amáŋ é wɛ ipɔ́ɔma kú Ulífāyi.

¹⁵Umósīsi lɛ ayínɔ̄nyīlɔ ɛpa, Ugɛ́ssɔm mɛ́mla Ɛlíyēsa

¹⁶Otrɛ̄yí kú ayí kú Ugɛ́ssɔm ā wɛ Ussébūwelu.

¹⁷Ɛlíyēsa ma ɔyí ékpónú: Uréhabīya. Amáŋ, Uréhabīya ma ayí alɛwa.

¹⁸Ɔyí kú Ukóhati ɔ́mpa ā, Ísiha ā ma ɔyí éyi: Ussélɔ̄miti, nōo klla wɛ otrɛ̄yí kú ipɔ́ɔma ā.

¹⁹Ɔyí kú Ukóhati ɔ́mɛtá ā, Uhɛ́brɔn ma ayí ɛnɛ: Ujɛríya, Amárīya, Ujɛhásīyɛlu mɛ́mla Ujɛkaméyam.

²⁰Ɔyí kú Ukóhati ɔ́mɛnɛ ā, Usíyɛ̄lu ma ayí ɛpa: Umíka mɛ́mla Íssīya.

²¹Umérári ma ayí ɛpa: Umáhli mɛ́mla Umússi. Umáhli ma ayí ɛpa, Ɛlísaa mɛ́mla Ukíss.

²²Amáŋ Ɛlísaa í ma ɔyínɔ̄nyīlɔ dúúmā ɛɛ́ nōó kwú ā ŋ́. Ayínɔ̄nyā ōfōōfū uwā nōo ma á.

²³Umússi ma ayí ɛtá: Umáhli, Éda mɛ́mla Ujɛ́rɛ̄mɔtu.

²⁴Aɛ́nyā wɛ ayí kú Ulífāyi nēé tá iyē kú uwá tāajɛ ipú inu dóódu kú ācɛ kú uwá nēe ŋmá iháyí ofu gabū ā á. Ɔ̄cɛ dóódu kú uwá nēe ŋmá iháyí ofu gɔbū ā lɛ úklɔ́ nēé gē yá ipú Agblīihɔ-nɛ̄hi kú Óndú ā.

²⁵Anɔ́ɔ Udéfīdi kahíníī, “Óndú ā, nōo wɛ Ɔwɔicō kú Ísrɛ̄lu ā, lɛ ɛbɔ́ je lɛ ācɛ ɔlɛ́ nū, Ísrɛ̄lu ɛɛ́. Anú abɔ̄yī nū, Óndú ā í lā Ujerúsālɛm piyóó.

²⁶Ó lɛ ā, ayí kú Ulífāyi í klla gáā bá ī kpó áklɔ̄kpīihɔ kú Óndú ā mɛ́mla iyó úklɔ́ kú nū ā yɔ̄ ī yɛ gicō gājɛ piyóó ɛɛ́ gɛ ŋ́.”

²⁷Ɛ́gɛ́nɛ̄ Udéfīdi ka lɛ ā, ɔ̄cɛ kú Ulífāyi dóódu nēe kwú pīya iháyí ofu, é lɛ iyē kú nū tá tāajɛ kóō yúklɔ́ ipú Agblīihɔ-nɛ̄hi kú Óndú ā.

²⁸Ɛdɔ úklɔ́ nēe bá ī yá ā bá yɔ̄ á. Kéē tá ācogwɛ́ɛya nēe ŋmá ipɔ́ɔma kú Árɔ̄ni ā abɔ̄, eko nēe ī gbɛ̄gbā, kéē leyīkwu eyīyɛ̄ɛcɛ mɛ́mla eyīpú kú Agblīihɔ-nɛ̄hi ā, cɛ́ɛ́ kéē leyīkwu ɔdā otīihɔ dóódu a kéē híī je ɔ́ tēelihɔ ŋ́,

²⁹kéē leyīkwu igbō nɛ̄ ācɛ gē bī gē lɛ Óndú ā, ipú Agblīihɔ-nɛ̄hi ā, mɛ́mla umu nēé gē bī yá igbō nōó gē nū ŋ́ mā, igbō kú ɛya mɛ́mla umu nēé gē lɛ anɔ̄ ɔcí olīifu tū ɔ̄ ā, kéē miya iyó ɛ̄gbā kú Agblīihɔ-nɛ̄hi ā,

³⁰kéē gwíije cɛ̄tra Óndú ā ɔcɔɔ̄cī mɛ́mla ɔnɔɔ̄nɛ̄ dóódu,

³¹mɛ́mla eko dóódu nēé géē gwɛ́ɛya ō yɔlá dúúdú lɛ Óndú ā ɛ̄cī Usábāti ā, ɛ̄cī kú ucɛ kú ɔyā ɛ̄yīpɛ̄ ā mɛ́mla ucɛ ɔhá dóódu ā. É le íne tū kú áluka kú ācɛ kú Ulífāyi nēe géē yúklɔ́ ɔgbɔɔgba, igbo áluka nēé cɛgbá ā. Ācɛ kú Ulífāyi ā gē yúklɔ́ kú ɛ̄gbā ō gbā Óndú ā eko dóódu á.

³²Uwá gē leyīkwu áklɔ̄kpīihɔ kú Óndú ā, mɛ́mla Agblīihɔ-nɛ̄hi kú Óndú ā abɔ̄yī nū á. É klla í tá ayí kú Árɔ̄ni ā abɔ̄ ipú úklɔ́ kú ɛya nēe ī gwó lɛ Óndú ā ipú Agblīihɔ-nɛ̄hi ā á.