Read idoma 1 ÚKLƆ́ KÚ AƆ́CƐ́ 9 Bible Online

1 ÚKLƆ́ KÚ AƆ́CƐ́ 9 - idoma bible

1 ÚKLƆ́ KÚ AƆ́CƐ́ 9

¹É le odúúdú iyē kú ayí kú Ísrɛ̄lu ā tá tū ipú ɔkpá ɛ́gɛ́nɛ̄ ipɔ́ɔma kú ɔnyɔɔnyɛ kú uwā bá ipú ɔkpá kú aɔ́cɛ́ lɛ ā. É le ācɛ kú Ujúda kpó ga Ubábīlɔn ŋmá ajɛ kú uwá ohígbū ɔ́bíipú nēé bī ā.

²Ācɛ kú aflɛ́yí nēe pīyɛyí wā Ujerúsālɛm ŋmá Ubábīlɔn ā wɛ, Ācogwɛ́ɛya, ayí kú Ulífāyi, mɛ́mla ācoyúklɔ́ kú ipú Agblīihɔ-nɛ̄hi ā.

³Ācɛ nēé ŋmá ipɔ́ɔma kú Ujúda, Ubɛ́njamīn, Ɛ́frem, mɛ́mla Umanásɛ ā pīyɛyí wā í lā Ujerúsālɛm dúú.

⁴Aípɔ́ɔ́nu kú ipɔ́ɔma kú Ujúda nēe lā Ujerúsālɛm eko ɔ́ɔmā ā wɛ úlā cofigwɛ́ɛnɛ cigwó. Otrɛ̄yí kú ayááyí kú ɔyí Ujúda, Upéresi ā wɛ, Utáyi, ɔyí kú Ammíhūdu, ɔyí kú ɔyí kú Ómri mɛ́mla Ímri mɛ́mla Ubáni.

⁵Otrɛ̄yí kú ayí kú Ussɛlá, ɔyí kú Ujúda ā wɛ Asáya.

⁶Otrɛ̄yí kú ayí kú Uséra ā wɛ Ujéwēlu.

⁷Ayí kú ipɔ́ɔma kú Ubɛ́njamīn nēe lā Ujerúsālɛm dúú ā wɛ, Usálu, ɔyí kú Uméssūlam, ɔyí kú Uhódāfiya nōo wɛ ɔyí kú Uhasenúwa ā.

⁸Ibinɛ́ya, ɔyí kú Ujɛ́rōham, Ɛ́la, ɔyí kú Úsi, ɔyí kú ɔyí kú Umíkri, Uméssūlam, ɔyí kú Ussefatíya nōo wɛ ɔyí kú Uréwɛ̄lu, ɔyí kú Ibiníja ā.

⁹Ipíinu kú uwá nēe lā Ujerúsālɛm ā wɛ úlā ɛpa cofahāapa cigwɛ́ɛhīlī (956).

¹⁰Ācogwɛ́ɛya nēe lā Ujerúsālɛm ā wɛ, Ujɛdáya, Ujɛhóyāribu, mɛ́mla Ujakín.

¹¹Asárīya, ɔyí kú Uhilkíya (Otrɛ̄yí kú ācoyúklɔ́ kú Agblīihɔ-nɛ̄hi ā) nɛ̄ ádáádā uwā wɛ Umésulámi, Usádɔ̄ku, Umeráyɔtu, Ahítūbu,

¹²Adáya, ɔyí kú Ujéhōram, nɛ̄ aádáádā nū wɛ Upásshɔ, Umálkíja, Umaási, Adiyélu, Ujásɛ̄ra, Uméssūlam, Umessílemiti mɛ́mla Ímma ā.

¹³Opīyatɔ̄há kú odúúdú ācogwɛ́ɛya nēe wɛ aótrɛ̄yí kú ipɔ́ɔma ā wɛ úlā ɛnɛ cofahātá (1,760). Odúúdú uwā wɛ ɔka kú ācoyúklɔ́ kú Agblīihɔ-nɛ̄hi kú Óndú ā.

¹⁴Ācɛ Ulífāyi nēe bá nyā lā Ujerúsālɛm á! Ussamáya, ɔyí kú Uhássūbu, ɔyí kú Asríkam, ɔyí kú Uhássábīya, nōo ŋmá ipɔ́ɔma kú Umérāri.

¹⁵Ubakubáka, Uhɛ́rɛ̄ss, Ugálal mɛ́mla Umɛtánīya, ɔyí kú Umíka nɛ̄ aádáádā nū wɛ, Usíkri mɛ́mla Ásāfu.

¹⁶Obadáya, ɔyí kú Ussémāya nɛ̄ aádáádā nū wɛ Ugálalu mɛ́mla Ujɛdútɔn. Ubɛrekíya, ɔyí kú Ása, ɔyí kú ɔyí kú Ɛlkána nōo lā aípɔ́lɛ́ kú Unétōfa ā.

¹⁷Ācogbāājɛ kú Agblīihɔ-nɛ̄hi nēe lā Ujerúsālɛm ā wɛ, Ussálum, Ákūūbu, Utálmɔn mɛ́mla Ahíman. Usálum wɛ otrɛ̄yí kú uwā á.

¹⁸Ācɛ kú ipɔ́ɔ́nū nyā gē gbō okómpīinu kú ɛnɔ̄ɔ̄cī nēé ī hī ka ákú ɔlɛ́ ɔcɛ́ ā á. Uwá gē tɛtɛ ī gbō ɔwɛ́ kú ɔlɛ́ kú ayí kú Ulífāyi dúú á.

¹⁹Ussálum, ɔyí kú Ukóre, ɔyí kú ɔyí kú Ɛbíyāsafu, nōo wɛ ɔyí kú Ukóra ā, mɛ́mla ācɛ kú ipɔ́ɔma kú Ukóra gē gbō ɔwɛ nɛ̄ ācɛ gē bū wā ipú Agblīihɔ-nɛ̄hi kpaakpa á. É mīyɛ úklɔ́ ā ŋmá ɛgiyí ádáádā uwā.

²⁰Ufínɛ̄hasi, ɔyí kú Ɛlísa ā, (Óndú ā yɔ̄ mɛ́mla anú) gē leyīkwu odúúdú uwā ɛpléeko éyi á.

²¹Usékaríya, ɔyí kú Umésselēmiya wɛ ɔ̄cogbājɛ kú ɔwɛ kú Áklɔ̄kpīihɔ kú Óndú ā dúú.

²²Odúúdú uwā nēe gē gbɔ̄ɔwɛ kú Agblīihɔ-nɛ̄hi kú Óndú ā wɛ ofigwó ce ācɛ igwɛ́ɛpa. É le iyē kú uwā tá tā ajɛ oŋmá lɛ aípɔ́lɛ́ nēé lā ā. Udéfīdi mɛ́mla Usámūwɛ̄lu, ɔ̄comɛ́ɛbɛ je úklɔ́ nyā tū ádáádā uwā abɔ̄ á.

²³Uwá mɛ́mla ācɛ kú ipɔ́ɔma kú uwā ī gbō ɔwɛ kú Agblīihɔ-nɛ̄hi kú Óndú ā piyóó á.

²⁴Ɔwɛ kú Agblīihɔ-nɛ̄hi dóódu nēe pīyeyī kwu īyī uwā ā, ɛnɔ̄ɔ̄cī, ɛnɔ̄ɔ̄nɛ̄, ɛháajɛ mɛ́mla ɛhícō ā. Éyééye kú okómpīinu ā lɛ otrɛ̄yí nōo gē leyīkwu ɔ́.

²⁵Aɔ́máapú uwā nēe lā kwu uwá ā gē cɛ̄ uwá yúklɔ́ nyā á. É gē yá fūlabɔ̄ ɛ̄cī ahāapa ɛ̄cī ahāapa.

²⁶Aótrɛ̄yí kú āyā kú okómpīinu ā ge leyīkwu odúúdú aípíinu kú ipú Agblīihɔ-nɛ̄hi ā mɛ́mla aíyó nēé gē kpó tū uwā ā á.

²⁷É lā kwu Agblīihɔ-nɛ̄hi ā ajaajɛ, ohígbū koó wɛ úklɔ́ kú uwā kéē gbō okómpīinu kú Agblīihɔ-nɛ̄hi ā, cɛ́ɛ́ kéē klla nwūla anú tɔ́ɔtɛ́ ɔ̄cɔ̄ɔ̄cī dóódu.

²⁸Ācɛ kú Ulífāyi ohile ā gē leyīkwu iyō kú ipú Agblīihɔ-nɛ̄hi ɔhá á. É gē kpó uwā wɛ̄ɛcɛ lɛ ācɛ, ɛ́ɛ́ kéē klla kpó uwā tū ɛga nēé ī kpó uwā ŋmá gaá bī uwā le yá odée ā.

²⁹Ācɛ Ulífāyi ɔhá ā gē leyīkwu ejé, anɔ̄ kú ɔcí nēé hī ka ólīifu ā, ɔtulalī, mɛ́mla aɔ́dā ō le odée kpóocu kú Agblīihɔ-nɛ̄hi ā.

³⁰Amáŋ ācogwɛ́ɛya ā gē wīya aɔ́dā ō le odée kpóocu tɔ̄há á.

³¹Umátītīya, ɔ́kplá kú Ussálum ā gē yá igbō-ō-bákánjɔ̄ kú ɛya á.

³²Ipɔ́ɔma kú Ukóhāti ī yá igbō kú Agblīihɔ-nɛ̄hi ā, ɛ̄cī Usábāti dóódu á.

³³Ayí kú Ulífāyi ōhī ā gē gwííjē ipú Agblīihɔ-nɛ̄hi á. Aótrɛ̄yí kú aípɔ́ɔ́nū ā lā ipú aínu kú Agblīihɔ-nɛ̄hi ā. É lɛ úklɔ́ ɔhá dúúmā ō yá ŋ́, ohígbū ka uwá gē leyīkwu odúúdú Agblīihɔ-nɛ̄hi ā otú kwu ɛnɔ á.

³⁴Ācɛ nōo bá nya wɛ aótrɛ̄yí kú ayí kú Ulífāyi ɔhá nēe lā Ujerúsālɛm ɛ́gɛ́nɛ̄ ipú inu kú ɔlɛ́ ádáádā uwā lɛ ā.

³⁵Ujɛ́yɛlu kwú igelī nɛ̄hi kú Ugíbēyɔn í kwaajɛ anɔ́ɔ ó gaá má lā anú abɔ́ɔ á. Ɔnyā nū lé ka Umáaka.

³⁶Ábūdɔn wɛ ɔ́kplá kú nū á. Ayí nū ɔhá ā wɛ, Usúr, Ukíss, Ubáalu, Unɛ́ɛ, Unádābu,

³⁷Ugɛ́dɔ, Ahíyo, Usékaríya mɛ́mla Umíklɔ̄tu nōo wɛ,

³⁸ádā kú Ussímēya ā. Ayááyí uwā lā ipú Ujerúsālɛm kwu aípɔ́nū ohile kú ipɔ́ɔ́ma kú uwā.

³⁹Unɛ́ɛ wɛ ádā kú Ukíss nōo ma Usɔ́ɔlu ā á. Usɔ́ɔlu ma ayí ɛnɛ nēe bá ā: Ujonátan, Umálkīssūwa, Abínādābu mɛ́mla Essbáalu.

⁴⁰Ujonátan ma Umérībáálu, nōo wɛ ádā kú Umíka ā.

⁴¹Umíka ma ayí ɛnɛ nēe bá ā, Upítɔn, Uméleki, Utérēya mɛ́mla Áhāsi.

⁴²Áhāsi ma Ujára nōo ma Áleméti, Asmáfɛ̄ti mɛ́mla Usímri á. Usímri ma Umósa,

⁴³nōo wɛ ádā kú Ubinéya á. Ubinéya ā ma Uréfāya nōo ma Ɛlísa nōo ma Ásɛ̄lu ā á.

⁴⁴Ásɛ̄lu ma ayí ɛhīlī nēe bá ā: Asríkam, Ubokéru, Íssmɛ̄lu, Ussɛ́rīya, Obadáya mɛ́mla Uhánan.