Read idoma 2 ÚKLƆ́ KÚ AƆ́CƐ́ 10 Bible Online

2 ÚKLƆ́ KÚ AƆ́CƐ́ 10 - idoma bible

2 ÚKLƆ́ KÚ AƆ́CƐ́ 10

¹Uréhobōwam le tá Usɛ́lɛm, ɛga nɛ̄ odúúdú ipɔ́ɔma kú ɛhícō kú Ísrɛ̄lu jīla gáā je ɔ́ cɔcɛ́ ā.

²Eko nɛ̄ Ujérobōwam, ɔyí kú Unébāti nōo kwinya kú Usólōmɔn gā Íjīpiti ā lɛ pó ā, ó kwúcē wā ɔlɛ́.

³Anɔ́ɔ ācɛ kú ipɔ́ɔma igwó ā le ɛhɔ̄ tū fu ɔ́, anɔ́ɔ odúúdú uwā le pɛ́ ga ɛgiyí Uréhobōwam gaá da ɔ́ kahíníī,

⁴“Ádā uwɔ pi alɔ yúklɔ́ abɔ̄fú lɛ ɔ́ nɛ̄hi. Ɔ́dāŋ́ ka a lɔfú je iyó kú ōwē ā ŋmá alɔ ɛyí, klla lɛ oyēeyī yá tɔ́ɔtɛ́ lɛ alɔ lígíii, alɔ géē bá ɛháajɛ kú uwɔ, cɛ́ɛ́ a géē wɛ ɔcɛ́ kú alɔ.”

⁵Anɔ́ɔ Uréhobōwam da uwá ka ɛ́ɛ̄ je ɛ̄cī ɛtá lɛ anúɔ kú anúɔ leyī yɛ ɛlā nɛ́ɛ ka ā. Cɛ́ɛ́ kéē kwúcē wā ɔmɛnɛ. Anɔ́ɔ ācɛ ā kwúcē le pɛ́ tá ɔlɛ́ uwā á.

⁶Uréhobōwan le ɛlā ā miya mla anyākwɔ́cɛ nēe gē nwū ádā nū, ɛlā ā eko nɛ̄ ádā nū yēeyī ā. Anɔ́ɔ ó da uwá kahíníī, “Ɔdí nɛ̄ n géē ka lɛ ācɛ nēe bá nyā ā?”

⁷Anɔ́ɔ é tá ɔ ohi kahíníī, “Ɔ́dāŋ́ ka a le gbonɛnɛ lɛ ācɛ nēe bá nyā, nāa lɛ ohi olɔhi tá uwá, é géē wɛ ācɛ ɔlɛ́ uwɔ klla í lɛyítáajɛ gā uwɔ piyóó.”

⁸Amáŋ ó kwú eyī í gwū ɛlā nɛ̄ anyākwɔ́cɛ nwū ɔ̄ ā bónū, anɔ́ɔ ó le tá ɛgiyí aɛ́gɔ́ nū nɛ̄ ó jɛ̄ tɔ̄há ŋmáajɛ mlá uwá ā, gaá da uwá kahíníī,

⁹“Ɔdí nɛ̄ n géē yá ā? Ɔdí nɛ́ aá gbɛlá ka n̄ da ācɛ nēe bá abɔ́ɔ ā, ācɛ nēe gaá da um ka n̄ lɛ ōwē nɛ̄ ádā um ya uwā ā tú wāajɛ ā?”

¹⁰Anɔ́ɔ é da ɔ́ kahíníī, “Ɔdā nāa géē da uwá ā yɔ̄ á, ‘Ayíkābɔ̄ kú um cɔkpɛ́nú fíyɛ́ ohí kú ádā um á.’

¹¹Da uwá ka, Ádā um le iyó ogbɛnú ce aá, n géē yá kóō klla gbɛnú fíyɛ́. Ó bī itali le ŋmó aá ijē nɛɛ, ami ā géē bī itali ɛdɛ le ŋmá ijē.”

¹²Ɛ̄cī ɔmɛtá ā Ujérobōwam mla odúúdú ipɔ́ɔma igwó kú ɛhícō ā kwú pɛ́ wā ɛgiyí Uréhobōwam ɛ́gɛ́nɛ̄ ó da uwá lɛ ā.

¹³Ɔcɛ́ kwú eyī ú gwū ɛlā kú anyākwɔ́cɛ ā bónū, anɔ́ɔ ó le ɛlā olɔnɔ fíyɛ́ ka lɛ ācɛ aā á.

¹⁴Ó da ācɛ nēe jīla anú eyī ā kahíníī, “Ɔ́dāŋ́ ka ádā um gbō iyó ogbɛnú kú ōwē ce aá nɛɛ, n géē gbō iyó ogbɛnu fíyɛ́ ce ɔ́ lɛ aá kpɔ́. Ɔ́dāŋ́ ka ó bī itali le ŋmó aá ijē nɛɛ, n géē bī itali ɛdɛ le ŋmó aá ijē.”

¹⁵Ó wɛ oō yá jīla kú ɔdā nɛ̄ Óndú ā, Ɔwɔicō ka táajɛ bū okónu kú ɔ̄comɛ́ɛbɛ Ahíja lɛ Ujérobōwam, ɔyí kú Unébati ā yá jīla á. Anú yá ɛɛ́ nɛ̄ Uréhobōwam je eyī gwū ɛlā kú anyākwɔ́cɛ ā bónū á.

¹⁶Eko nɛ̄ ācɛ ā le má ka ɔcɛ́ ā ɔ́ɔ jāhɔ̄ lɛ aá gɛ ŋ́ mā, anɔ́ɔ é le ɛ̄gba dā kahíníī, “Ukpɛ̄ nyá nɛ̄ alɔ í lɛ ŋmá ipɔ́ɔma kú Udɛ́fīdi gɛ? Alɔ í lɛ úgwū dúúmā ŋmá ɛgiyí ayí kú Ujése ŋ́. Ísrɛ̄lu, ɔnyɔɔnyɛ kóō yáwaa ga ɔlɛ́ nū ooo. Ayí kú Udɛ́fīdi, aá leyīkwu ipú inū kú aá ooo.” Anɔ́ɔ odúúdú ācɛ kú Ísrɛ̄lu ā kwúcē ga ɔlɛ́ uwā á.

¹⁷Amáŋ Uréhobōwam wɛ ɔcɛ́ kú ācɛ Ísrɛ̄lu nēe bá ajɛ kú ipɔ́ɔma kú Ujúda á.

¹⁸Anɔ́ɔ Uréhobōwam lɛ Uhádōram nōo leyīkwu úklɔ́ abɔ̄fú ā tɛ̄hɔ̄ fu ācɛ kú Ísrɛ̄lu, anɔ́ɔ é lɛ ɛcɔ̄ tá klá ɔ́ lɛ ɔ́ ŋmó á. Abɔ̄ Uréhobōwam lɛ ɛ̄nyā má ā, ó kwú kwu ga ipú úgbɔ́nya kú nū gā Ujerúsālɛm.

¹⁹O ŋmá eko ɔ́ɔmā jāā kwu eko nēé tɔ́kpá nyā ā nɛ̄ aípɔ́ɔma igwó ā hímāyi bɛ́yíkwu ipɔ́ɔma kú Udéfīdi á.