Read idoma 2 ÚKLƆ́ KÚ AƆ́CƐ́ 11 Bible Online

2 ÚKLƆ́ KÚ AƆ́CƐ́ 11 - idoma bible

2 ÚKLƆ́ KÚ AƆ́CƐ́ 11

¹Eko nɛ̄ Uréhobōwam gā Ujerúsālɛm ā, ó le aícɔ́ɔja o lɔfú fíyɛ́ dúú ā ulá bá ɛga ulá, ce ofɛpa ce igwó (180,000) kú aípɔ́ɔma kú Ujúda mɛ́mla Ubénjamīn ā kpó hīgwú tɔ̄há. Ó le tútū ō gaá kpɛ́fú tá ācɛ kú ipɔ́ɔma kú Ísrɛ̄lu ā, cɛ́ɛ́ kóō lɛ uwá cīgbīhi wā ajɔ̄ɔ̄cɛ́ kú nū.

²Amáŋ Óndú ā da ɔ̄comɛ́ɛbɛ, Ussɛmáya kóō

³nyɔ̄ gaá lɛ ɛhɔ̄ nyā cɛ̄ lɛ Uréhobōwam, ɔcɛ́ kú Ísrɛ̄lu mɛ́mla odúúdú ācɛ kú ipɔ́ɔma kú Ubénjamīn mɛ́mla Ujúda ā kahíníī,

⁴“Ami nōo wɛ Óndú ā ka ā híī nyɔ̄ gaá kpɛ́fú tá ācɛ kú Ísrɛ̄lu nēe wɛ ayínɛ́ uwɔ á ŋ́. Odúúdú aá kóō kwúcē ga ɔlɛ́. Ɔdā nōo yá ā wɛ ɔdā nɛ̄ ami nōo wɛ Ɔwɔicō ā miya táajɛ ā nɛ.” Anɔ́ɔ odúúdú uwā lɛyítáajɛ lɛ ɛlā kú Óndú ā, anɔ́ɔ é klla nyɔ̄ gaá kpɛ́fú tá Ujérobōwam gɛ ŋ́ má.

⁵Uréhobōwam lā Ujerúsālɛm, anɔ́ɔ ó le igá hɛ tū aígelī nɛ̄hi nēe bá nyā, ipɔ́ɔma kú Ujúda mɛ́mla ákú Ubɛ́njamīn:

⁶Ubɛ́tilɛhɛ̄m, Étam, Utékōwa,

⁷Ubɛtisɔ́ɔ, Usóko, Adulám,

⁸Ugáti, Umárēsa, Usífu,

⁹Adorám, Ulákissi, Asɛ́ka,

¹⁰Usóra, Áíjālɔn, mɛ́mla Uhɛ́burɔn.

¹¹Ó lɛ igá olɔfú hɛ́ tū uwā nɛ̄hi, anɔ́ɔ ó le aógbénjūwā kpó cɛ́ɛ́ kéē leyīkwu aígelī nɛ̄hi. Aígelī nɛ̄hi nēe bá ā nɛ̄ ó gē kpó aíyó kú ɔdōlé kú nū bɛ̄ɛka anɔ̄ kú ɔcí nēé hī ka ólīfu, ejé,

¹²mɛ́mla óbō mɛ́mla ɔkplɛ́fú tū á. Ɔwɛ nyā ó bī le kwú ipɔ́ɔma kú Ujúda mɛ́mla ipɔ́ɔma kú Ubɛ́njamīn bá ɛháajɛ ɔfú kú iyī nū á.

¹³Acogwɛ́ɛya mɛ́mla ayí kú Ulífāyi ā le pɛ́ ŋmá ɛjɛ̄ɛ̄jī ajɛ kú Ísrɛ̄lu ā wā Ujúda.

¹⁴Ayí kú Ulífāyi ā nyɛ̄ɛ̄ ŋmá ajɛ̄ɛ̄hɔ̄ mɛ́mla ajɛ nɛ̄ aálá kú uwā ī má ácí lé glá ā, anɔ́ɔ é le pɛ́ wā Ujúda mɛ́mla Ujerúsālɛm á, ohígbū ka Ujérobōwam mɛ́mla ayí nū le uwá kpó nū ŋmá úklɔ́ kú ɛya ō gwó lɛ Óndú ā.

¹⁵Anɔ́ɔ ó lɛ ācogwɛ́ɛya ákú abɔ̄yīnū fu kéē gwɛ́ɛya lɛ aɛ́cí kú nū, mɛ́mla ɛ̄gbā ō gbā ebilíi mɛ́mla ɛcí nēé ma lɛbɛ̄ɛka ɛna ā.

¹⁶Ācɛ nēe ŋmá ipɔ́ɔma kú Ísrɛ̄lu dóódu, nēe tíne kéē gbā Óndú ā, Ɔwɔicō kú Ísrɛ̄lu ā ɛ̄gbā ŋmá ɔtū ékpónú ā, gē tɔ́ɔgwu ayí kú Ulífāyi ā wā Ujerúsālɛm, cɛ́ɛ́ kéē lɔfú gwɛ́ɛya lɛ Óndú ā, Ɔwɔicō kú aádáádā uwā kwɛyí uwā glá.

¹⁷Ucē nyā nēé gē yá ā cɛ̄ lɛ Ujúda kwú lɔfú iyē. Anɔ́ɔ ipú iháyí ɛtá ā,é le okwúukwu kwu Uréhobowam, ɔyí kú Usólōmɔn igbīhi. Ohígbū ka ipú iháyí ɛtá ɔ́ɔmā, é yɛce ɔwɛ mɛ́mla Udéfīdi, ɔcɛ́ mɛ́mla Usólōmɔn, ɔcɛ́ ā.

¹⁸Uréhobōwam lɛ Umáhālati ɔyínɔ̄nyā kú Ujɛ́rīmɔtu, ɔyí kú Udéfīdi lɛ, ɛ́nɛ́ nū wɛ Abíhēlu, ɔyínɔ̄nyā kú Ɛlíyābu, ɔyí kú ɔyí kú Ujése.

¹⁹É ma ayí ɛtá. Ujéyusi, Usimárīya mɛ́mla Usáham.

²⁰Igbīhāajɛ ā, ó klla lɛ Umáaka, ɔyínɔ̄nyā kú Ábsālɔm lɛ. Ɔnyā ā ma ayí ɛnɛ lɛ ɔ́, iyē kú uwā bá yɔ̄ á: Ábīja, Atāyi, Usíba, mɛ́mla Usélōmiti.

²¹Uréhobōwam lɛ anyā igwáahātá mɛ́mla anyā ō ciikpó kú nū ofɛɛtá, ó ma ayínɔ̄nyīlɔ ofɛnɛ ce ahātá mɛ́mla ayínɔ̄nyā ofɛtá. Umáaka he ɔ́ ɔtū fíyɛ́ odúúdú anyā nū mɛ́mla anyā ó cikpó kú nū dóódu á.

²²Ɔyí nū Ábīja ā he ɔ́ ɔtú fíyɛ́ odúúdú ayí ɔhá nɛ̄ anyā ɔhá ma lɛ ɔ́ á. Anú nɛ̄ ó je lé ɔcɛ́ kwɛyí īyī nū á.

²³Uréhobɔ̄wam lɛ úklɔ́ kpó kɔ̄ lɛ odúúdú ayí nū, anɔ́ɔ ó klla lɛ uwá kpó bá odúúdú ipɔ́ɔma kú Ujúda mɛ́mla Ubénjamīn ā. Ó leyīkwu uwá lɔhi klla lɛ anyā alɛwa kpó lɛ lɛ odúúdú uwá.