Read idoma 2 ÚKLƆ́ KÚ AƆ́CƐ́ 12 Bible Online

2 ÚKLƆ́ KÚ AƆ́CƐ́ 12 - idoma bible

2 ÚKLƆ́ KÚ AƆ́CƐ́ 12

¹Obōōbū nɛ̄ Uréhobōwam lɛ īyī nū tú kwājɛ lɔɔlɔhi ɛyí akpa kú ɔcɛ́ kú nū ā, anú mɛ́mla odúúdú ācɛ kú Ísrɛ̄lu kwú igbīhi ú cē kwu íne kú Óndú, Ɔwɔicō kú uwā.

²Ipú iháyí ɛhɔ̄ kú ɔcɛ́ kú Uréhobōwam ā, Óndú ā le italā yá uwā ohígbū kēé lɛyí táajɛ lɛ ɔ́ ŋ́ ā. Ussíssāki, ɔcɛ́ kú Íjīpiti gaá le ɛfú kpó tá Ujerúsālɛm.

³Ó bī aícɔ́ɔja kú úgbɔ́nya úlā ɛtá (1,200) mɛ́mla ācɛ o kpɛ́fu ɔnya úlā igwɛ́ɛhɔ̄ (60,000) mɛ́mla aícɔ́ɔja o hile ɔhá nɛ̄ ɛwa kú uwá í tōō gba áluka ŋ́ mā, gaá kwu aícɔ́ɔja nɛ̄ ó plla ŋmá Ulíbīya, Usúkīm, mɛ́mla Ukússi (Ɛtiyópiya) kéē wā í tá ɔ̄ abɔ̄ kpɛ́fú tū ācɛ Ujerúsālɛm ā.

⁴Ó mīyɛ igelī nɛ̄hi kú Ujúda nēé hɛ́ igá tū ɔ̄ ā. Ó le yɛ jāā ga Ujerúsālɛm.

⁵Ussɛmáya, ɔ̄comɛ́ɛbɛ ā le tá ɛga Uréhobɔ̄wam mɛ́mla ācɛ kú Ujúda nēe jīla Ujerúsālɛm, o yá ɛ́ɛ́ kéē kwu ŋmá ɛgiyí Ussíssāki ā. Anɔ́ɔ ó da uwá kahíníī, “Ɛnyā wɛ ɔlɛhɔ̄ kú Óndú ā ‘Aá le igbīhi ce kwu um, anɔ́ɔ n lɛ igbīhi ce kwu aá, kwú aá ú kpó tū Ussíssāki, ɔcɛ́ kú Íjīpiti ā abɔ̄ á.’”

⁶Anɔ́ɔ Uréhobōwam mɛ́mla anyākwɔ́cɛ kú Ujúda ā cɛ̄ ka aá le íne bīya klla le ɔ́bíipú bī tū Óndú ā ɔkwɛ̄yi. Anɔ́ɔ é kahíníī, “Óndú lé ɛpɔ̄hi kú igbīhi nɛ̄ ó cē kwu alɔ āá.”

⁷Eko nɛ̄ Óndú ā le má kēé le iyī uwā tú wāajɛ ɛɛ́ mā, ó klla da Ussémāya igbɔhá kahíníī, “Ohígbū kēé le okónu cɛ̄ íne nēé bīya ɛɛ́ mā, ń gaá kpó uwā yíífi gɛ ŋ́. Eko nɛ̄ Ussíssāki ɛfú kpó tá uwā, uwá géē hile kpɔ́. Ń gaá cɛ̄ odúúdú ícɔnū kú um klá Ujerúsālɛm ɛ́ɛ́ gɛ ŋ́.

⁸Amáŋ ɔcɛ́ kú Íjīpiti ā géē yá uwā lé, cɛ́ɛ́ kéē géē lɛ ɛyɛ́ɛ́yí kóō cɛ̄ um ɛhɔ̄ mɛ́mla ō cɛ̄ ācɛ ɔlamu ɛhɔ̄ jé.”

⁹Anɔ́ɔ Ussíssāki gā Ujerúsālɛm gaá lɛ iyó kpó ŋmá Agblīihɔ-nɛ̄hi kú Óndú ā mɛ́mla agblɔ̄cɛ́ kú Ujúda. Ó kwú odúúdú iyó ú kpó, kwu ɔkplɛ́fú kú oje ɔdɔ (ugoolu) nɛ̄ Usólōmɔn yá ā.

¹⁰Anɔ́ɔ Uréhobōwam le ɔkplɛ́fú kú udɔ yá kwɛyí nū, klla kwú uwā ú kpó lɛ ɔ̄cɛ nēe gē gbō ɔwɛ kú ɔcɛ́ ā á.

¹¹Eko dóódu nɛ̄ ɔcɛ́ gē ga Agblīihɔ-nɛ̄hi kú Óndú ā nɛɛ, é gē bī ɔkplɛ́fú ā nyɔ̄ mla anú. Eko nɛ̄ ó lɛ ɔkɔ gbā mɛ nɛɛ, é kwú ɔ̄ ú kpó cīgbīhi wā í bá ɛga o kpíyó tū ā.

¹²Abɔ̄ ó kwú ɛyí ú táajɛ lɛ Óndú ā, anɔ́ɔ Óndú ā í cɔ̄nū je uwá kpó yíífi gɛ ŋ́ má. Anɔ́ɔ Óndú ā le eyīnyinyi kú Ujúda má á.

¹³Uréhóbōwam ce ɔcɛ́ Ujerúsālɛm, anɔ́ɔ ó klla kwú iyī nū ú tú kwaajɛ lɔfú lɔfú nɛ̄hi á. Ó wɛ iháyí ofɛpa, ɛɛ́ nɛ̄ ó lé ɔcɛ́ á. Ó ce ɔcɛ́ klla gbāajɛ iháyí igwáhāapa Ujerúsālɛm, igelī nɛ̄hi nɛ̄ Óndú ā je ŋmá ipú odúúdú ajɛ kú Ísrɛ̄lu kóō kwú pīya ɛga nēé gē gbā ɔ̄ ɛ̄gbā. Ɛ́nɛ́ kú Uréhobōwam wɛ Unáama nōo ŋmá ajɛ kú Ámɔn ā.

¹⁴Ó yá ɔdā nōo bɔ̄bí nɛ̄hi, ohígbū ka ó kōō cē tíne kóō jé ɔdā nōo wɛ ɔtū kú Ɔwɔicō ā lɛyíkwu ɔdā dúúmā ŋ́.

¹⁵É le odúúdú úklɔ́ kú Uréhobōwam mɛ́mla ɛma kú nū ā tá tū ɔkpá kú ígwú ō gbo kú Ussɛmáya ɔ̄comɛ́ɛbɛ ā, mɛ́mla ɔkpá kú ɔ̄comɛ́ɛbɛ Íddo. Uréhobōwam mɛ́mla Ujérobōwam bá gē kpɛ́fú tá īyī uwā jāā gbéeko nɛ̄ uwá ɛpɛplɛ́ɛpa le pɛ́ gekwú.

¹⁶Uréhobōwam gekwú, anɔ́ɔ é kwú ɔ̄ ú nyi ikpámílī kú aɔ́cɛ́ igelī nɛ̄hi kú Udéfīdi. Anɔ́ɔ ɔyí nū Ábīja lɛ ɔcɛ́ lé kwɛyí nū á.