Read idoma 2 ÚKLƆ́ KÚ AƆ́CƐ́ 13 Bible Online

2 ÚKLƆ́ KÚ AƆ́CƐ́ 13 - idoma bible

2 ÚKLƆ́ KÚ AƆ́CƐ́ 13

¹Ipú iháyí igwáahātá nɛ̄ Ujérobōwam ce ɔcɛ́ kú Ísrɛ̄lu ā, Ábīja le ɔcɛ́ kú Ujúda lé.

²Ó ce ɔcɛ́ Ujerúsālɛm iháyí ɛtá. Ɛ́nɛ́ nū wɛ Umayikɛ́ya, ɔyínɔ̄nyā kú Úríyelu nōo ŋmá Ugíbeya ā. Ɛfú le tū ɔtāhɛ̄ kú Ábīja mɛ́mla Ujérobōwam.

³Ábīja lɛ aícɔ́ɔja kú nū úlā bá ɛga úlā ɛpa ce úlā ofu igwó (400,000) kpó, anɔ́ɔ Ujérobōwam kē le aícɔ́ɔja kú nū úlā bá ɛga úlā ɛhɔ̄ (800,000) kpó dúú á.

⁴Aícɔ́ɔja ā gaá le jīla ipɔ́lɛ́ kú ɛfu kú Ɛ́frem. Ábīja le tá ɛyí ɛfu kú Usemaréyim, anɔ́ɔ ó le Ujérobōwam hīgwú anɔ́ɔ ó da ɔ́ ka ɔ́ɔ jāhɔ̄ lɛ anúɔ, anɔ́ɔ ó kahíníī,

⁵“Á jé ka Óndú ā, Ɔwɔicō kú Ísrɛ̄lu le okónu ce lɛ Udéfīdi mɛ́mla ayí nū keé géē yɔ̄ í lé ɔcɛ́ kú Ísrɛ̄lu piyóó ŋ́ nɛɛ?

⁶Nááná, Ujérobōwam ɔyí kú Unébāti le ikpɛ́yí olɔfú yá tú ɔkpanī nū Usólōmɔn, ɔcɛ́ ā.

⁷Igbīhāajɛ ā ó le ígwu kú ācɛ ɔdāhá kpó pī blīyī nū anɔ́ɔ é le ɛga má fu ɛgiyí Uréhobōwam, ɔyí kú Usólōmɔn nōo wɛ ɔyípɛ̄ nɛ̄hi, nɛ̄ ó jé ɔdā mɛ́mla ula bɛ̄ɛka uwá ā ŋ́ mā.

⁸Anɔ́ɔ ó da ɔ́ kahíníī, “Abālɔbányā, a le tútū káā nyɔ̄ gaá nuunu tá íkwu kú ɔcɛ́ nɛ̄ Óndú ā abɔ̄yī nū je lɛ ayááyí kú Udéfīdi, ɔcɛ́ ā. A le aícɔ́ɔja alɛwa mɛ́mla ojibó ɛna kú ugóolu (oje ɔdɔ) nɛ̄ Ujérobōwam yá le aá ka anú ɔ́ɔ wɛ ɔwɔ kú aá ā.

⁹A lɛ ācogwɛ́ɛya kú Óndú ā, ayí kú ipɔ́ɔma kú Árɔ̄ni mɛ́mla ayí Ulífāyi kpó nū bɛ̄cɛ. A klla lɛ ācɛ kú ɔtū kú uwɔ kpó kwɛyí uwā, ɛ́gɛ́nɛ̄ aéwo ɔhá nēé jé Ɔwɔicō ŋ́ mā gē yá ā. Ɔ̄cɛ dúúmā nōo lɛ ɛna éyi ámāŋ álá ahāapa bī wā ɛɛ́, lɔfú je iyī nū yá tīihɔ, cɛ́ɛ́ ó kwú pīya ɔ̄cogwɛ́ɛya kú aɔ́dā nɛ̄ a hī ka aɔ́wɔ kú uwɔ ā.

¹⁰“Amáŋ alɔ ā gē gbā Óndú, Ɔwɔicō kú alɔ ɛ̄gbā, alɔ í pīya igbīhi kwu ɔ́ ɛɛ́ ŋ́. Ācogwɛ́ɛya nēe ŋmá ipɔ́ɔma kú Árɔ̄ni ā gē gwɛ́ɛya lɛ alɔ, ɛ́ɛ́, nɛ̄ ayí kú Ulífāyi gē tá uwá abɔ̄ á.

¹¹Ɔ̄cɔ̄ɔ̄cī mɛ́mla ɔ̄nɔ̄ɔ̄nɛ̄ dóódu, alɔ gē yi ɔtulalī ɔlá lɛ Óndú ā klla í gwɛ́ɛya o yɔlá dúúdú lɛ ɔ́. Alɔ klla gē hɔ́lá kwu ulámpu kú Óndú ā ɔ̄nɔ̄ɔ̄nɛ̄ dóódu. Alɔ gē yá ɔ̄dā nɛ̄ Óndú ā jé ɔ́da ka ālɔ̄ yá ā. Amáŋ awɔ ā, kwú igbīhi ú cē kwu ɔ́.

¹²Ɔwɔicō abɔ̄yī nū wɛ ɔcɛ́ kú alɔ á. Ācogwɛ́ɛya kú nū kē bá amānyā mla opo nēé le tútū kéē tá, cɛ́ɛ́ kéē hī alɔ igwú wā ɔgbɛ́fú mla awɔ ɛɛ́. Ísrɛ̄lu, aá híī kpɛ́fú tá Óndú, Ɔwɔicō kú aádáádā aá ŋ́, ohígbū ka aá yá lé glá ŋ́.”

¹³Amáŋ eko nyā dúú ā, Ujérobōwam lɛ aícɔ́ɔja kú nū ōhī kpó gaá kwāajɛ igbihi aícɔ́ɔja kú ācɛ Ujúda ɛɛ́. Aícɔ́ɔja ohile kú ācɛ Ísrɛ̄lu ā kē bá leyī pīya kwu aícɔ́ɔja kú Ujúda.

¹⁴Eko nɛ̄ aícɔ́ɔja kú Ujúda ā pīyeyī biílí ā, anɔ́ɔ é má ka aícɔ́ɔja kú Ísrɛ̄lu ɛ́ɛ le ɔgba hɛ́ jīla tū aá oklo ɛɛ́. Anɔ́ɔ é le ikwū je klá Óndú ā kóō wā í tá uwā abɔ̄. Anɔ́ɔ ācogwɛ́ɛya ā le opo tá.

¹⁵Odúúdú aícɔ́ɔja kú Ujúda le ɛgba ogwú dɛ̄ kwaáá. Anɔ́ɔ Ábīja gbɔbū ɛfú ā á. É le ɔfú kpó kwū ācɛ ā. Anɔ́ɔ Ɔwɔicō le Ujérobōwam mɛ́mla aícɔ́ɔja kú ācɛ Ísrɛ̄lu kpó yálé ipéyī Ábīja mɛ́mla aícɔ́ɔja kú Ujúda á.

¹⁶Ācɛ kú Ísrɛ̄lu le pɛ́ kwu ŋmá ɛgiyí ācɛ kú Ujúda, anɔ́ɔ Óndú ā cɛ̄ lɛ ācɛ Ujúda le yálé á.

¹⁷Ábīja mɛ́mla aícɔ́ɔja kú ɔlɛ́ nū le āyā kú úlā igbíngbídi kú aícɔ́ɔja o lɔfú fíyɛ́ dúú kú Ísrɛ̄lu kpó ŋmó.

¹⁸Anɔ́ɔ ācɛ kú Ujúda le ācɛ kú Ísrɛ̄lu yálé, ohígbū keé le ɔtū kpóce Óndú, Ɔwɔicō kú aádáádā uwá ā.

¹⁹Ábīja nū aícɔ́ɔja kú Ísrɛ̄lu inya jāā gaá mīyɛ aígelī nɛ̄hi ōhī kú ācɛ kú Ubɛ́tɛlu, Ujessána, Éfrɔn mɛ́mla aígelī nɛ̄ŋcɛ́ kú uwā ā dúú.

²⁰Ujérobōwam, í lɔfú nōo gē yá ɔdā dúú tá Ábīja eko nɛ̄ ó yéeyī ā glá ŋ́. Igbīhāajɛ ā Óndú ā le abɔ̄ gɔ́ ɔ̄, anɔ́ɔ ó gekwú á.

²¹Igbīhi ikwú kú nū ā, Ábīja klla le ɔfú lɛ tū ɔ̄ nɛ̄hi. Ábīja le anyā igwɛ́ɛnɛ, ó ma ayínɔ̄nyīlɔ ofucɛpa mɛ́mla ayínɔ̄nyā igwɛ́ɛhīlī.

²²Odúúdú aɔ́dā o hile kú ígwú ō gbo kú Ábīja ā, ɔdā nɛ̄ ó ka mɛ́mla ɔdā nɛ̄ ó yá ā, é lɛ uwá tá tū ipú ɔkpá kú ɔ̄comɛ́ɛbɛ Íddo.