Read idoma 2 ÚKLƆ́ KÚ AƆ́CƐ́ 14 Bible Online

2 ÚKLƆ́ KÚ AƆ́CƐ́ 14 - idoma bible

2 ÚKLƆ́ KÚ AƆ́CƐ́ 14

¹Ábīja gekwú, anɔ́ɔ é kwú ɔ̄ ú nyi ikpámílī kú aɔ́cɛ́, Ujerúsālɛm igelī nɛ̄hi kú Udéfīdi. Anɔ́ɔ ɔyí nū, Ása le ɔcɛ́ lé kwɛyí nū á. Ācɛ kú Ujúda bá ɛbɔ́ iháyí igwó eko kú ɔcɛ́ kú Ása ā.

²Ása yá ɔdā nōo he Óndú, Ɔwɔicō kú nū ɔtū. Ó klla yá ɔdā nōo le kpáakpá.

³Ó le ede kú ɛcí kú éwɔhá mɛ́mla íkpɛ́cí mɛ́mla aɔ́kpa nēé bu tāajɛ ā kpó ca bónū. Ó klla kwú ojibó kú Ássɛ̄ra, ɛcí nēé ma ā ú ca dúú.

⁴Anɔ́ɔ ó le da ācɛ kú Ujúda kéē yá ɔdā nōo wɛ ɔtū kú Óndú ā, Ɔwɔicō kú aádáádā uwá ā. Ó klla da uwá kéē lɛyí táajɛ lɛ íne mla ɔdā nɛ̄ ó gē nwū ā dóódu.

⁵Abɔ̄ ó kwu ɛcí ō pā ú ci ajɛ kú Ujúda klla kwú ɛcí mɛ́mla ikpɛ́cí ú kpó ca ŋmá ajɛ kú Ujúda, eko nɛ̄ ó ce ɔcɛ́ ā, ajɛ kú nū yɔ̄ ɛbɔ́.

⁶Ó le igá kpó hɛ́ tū aígelī nɛ̄hi kú Ujúda eko nɛ̄ ó ce ɔcɛ́ ā. Iháyí alɛwa ó kpɛ́fú mla ɔcɛ́ ɔhá dúúmā ŋ́, ohígbū ka Óndú ā le ɛbɔ́ je lɛ ɔ́.

⁷Ó da ācɛ kú Ujúda kahíníī, “Ālɔ̄ lɛ ɔdɔ mɛ́mla ɔwɛ nɛ̄ alɔ géē gwū mɛ́mla inɔ̄ɔda ā kpó gwó tū aígelī nɛ̄hi kú Ujúda. Abɔ̄ kú alɔ bī ajɛ kú alɔ ícɛ, ohígbū ka alɔ gē lɛyítáajɛ lɛ Óndú ā. Anɔ́ɔ alɔ klla í yá ɔdā nōo wɛ ɔtū kú nū. Anú yá ɛ́ɛ́ nɛ̄ Óndú ā gē gbō alɔ āyā dóódu á.” Anɔ́ɔ é le ɔdɔ, ɔwɛ, mɛ́mla inɔ̄ɔda a kpó gwó tū aípɔ́lɛ́ kú uwá á.

⁸Ása le aícɔ́ɔja úlā bá ɛgiyí úlā ce úlā ofu igwáhāapa ce igwó (300,000) ŋmá ipɔ́ɔma kú Ujúda, mɛ́mla úlā bá ɛga úlā ce úlā ofu igwɛ́ɛhɔ̄ (280,000) ŋmá ipɔ́ɔma kú Ubɛ́njamīn. É bī óbō mɛ́mla ɔkplɛ́fú kú uwā. Odúúdú uwā wɛ aícɔ́ɔja olɔhi nēe klla lɛ ɔtú nɛ̄hi.

⁹Anɔ́ɔ ɔcɛ́ kú Ɛtiyópiya éyi nēé hī ka Usɛ́ra ā mla aícɔ́ɔja kú nū úlá igbíngbídi mɛ́mla úgbɔ́nya kú ɛfú ofu igwɛ́ɛhɔ̄ (300) le pɛ́ wā gaá kpɛ́fú tá Ujúda. É yɛ jāā wā Umárēssa.

¹⁰Anɔ́ɔ Ása gaá jīla anú ɔwɛ kéē kpɛ́fú á. Anɔ́ɔ uwá ɛpɛlɛ́ɛpa kwu ɔgba kéē kpɛ́fú ɔpɛ́ kú Uséfāta nōo kwu Umárēssa ajaajɛ ā.

¹¹Ása le ɔkɔ gbā lɛ Óndú ā kahíníī, “Kócōō, Óndú, Ɔwɔicō kú um, ó tɔ́ɔtɛ́ gā awɔ ká ā lɔfú tá aícɔ́ɔja okwáhi mɛ́mla aícɔ́ɔja o lɔfú nɛ̄hi iyē glá. Tá alɔ abɔ̄ abālɔbányā, Óndú, Ɔwɔicō kú alɔ, ohígbū ka alɔ lɔtūce uwɔ. Iyē kú uwɔ nɛ̄ alɔ bī wā gáā kpɛ́fú tá aícɔ́ɔja o lɛwa nɛ̄hi nyā má. Awɔ kē wɛ Ɔwɔicō kú alɔ á, ɔ̄nyɛ lɔfú yá uwɔ lé ɔgbɛ́fú glá ā?”

¹²Anɔ́ɔ Óndú ā le aícɔ́ɔja kú Ukússi (Ɛtiyópiya) ā yálé. Eko nɛ̄ Ása gbɔɔ́ ō kpɛ́fú tá uwā ā, é kwú pɛ́ kwu.

¹³Anɔ́ɔ Ása mɛ́mla aícɔ́ɔja kú nū, nū uwā inya jāā ga Ugɛ́ra. É le ɛyí nɛ̄hi kú aícɔ́ɔja kú Ukússi ā kpó ŋmó. Aá ɛ̄nɛ̄ o hile ŋmá ipú uwá í klla lɔfú kpɛ́fú glá gɛ ŋ́. Anɔ́ɔ Óndú ā mɛ́mla aícɔ́ɔja kú nū, Ujúda ā le uwá yálé klla lɛ iyó kú uwá kpó wu ga ajɛ kú Ujúda.

¹⁴Anɔ́ɔ é klla le ɛjɛ̄ɛ̄jī aígelī nɛ̄hi ā kpó wúla tāajɛ, le iyó kú uwá kpó.

¹⁵É klla nyɔ̄ í le unu nu tá ācɛ ogbáálá ā. É le aálá mɛ́mla inyankwūlūmī kú uwā alɛwa kpó. Anɔ́ɔ é kwúcē wā Ujerúsālɛm á.