Read idoma 2 ÚKLƆ́ KÚ AƆ́CƐ́ 15 Bible Online

2 ÚKLƆ́ KÚ AƆ́CƐ́ 15 - idoma bible

2 ÚKLƆ́ KÚ AƆ́CƐ́ 15

¹Alelékwū kú Óndú ā wā gaá kwú Asárīya, ɔyínɔ̄nyīlɔ kú Óbɛ́di ú.

²Anɔ́ɔ ó le tá ɛgiyí Ása, ɔcɛ́ ā gaá da ɔ́ kahíníī, “Jāhɔ̄ gā um, ɔcɛ́ Ása, awɔ mɛ́mla odúúdú ācɛ kú Ujúda mla ācɛ kú Ubénjamīn. Óndú ā yɔ̄ mla awɔ eko dúú nāa yɔ̄ mla anú. Ɔ́dāŋ́ ka a tíne nū, ó géē wā gaá yɔ̄ mla uwɔ, amáŋ ɔ́dāŋ ka a kē kwú igbīhi ú cē kwu ɔ́, ó kē géē cīgbīhi kwu uwɔ dúú.

³Iháyí alɛwa nyā Ísrɛ̄lu í lɛ Ɔwɔicō ɔkwɛ̄yi ā ŋ. Ɔ̄cogwɛ́ɛya í yɔ̄ ɛɛ́ nōo gē nwū uwá odée ŋ́, ɛɛ́ nēé gē le íne kú Ɔwɔicō tū ŋ́.

⁴Amáŋ, eko dúú nɛ̄ unwalu gaá ce uwá nɛ, é kwúcē wā ɛgiyí Ɔwɔicō gaá gbɔɔ́ ō dɔɔ̄kā nū gbéeko nēé lɛ ɔ́ pīyɛ̄.

⁵Eko kú ígbíli ɔ́ɔmā, ɔ̄cɛ dúúmā í yɛ ŋmá ajɛ éyi ga ajɛ ɔhá ɛbɔ́ glá ŋ́, ohígbū ka unwalu yɔ̄ ɛga dóódu kú ajɛ ā.

⁶Éwo éyi, ī yá éwɔhá ŋmó, igelī nɛ̄hi éyi gē lɛ abɔ̄ da igelī nɛ̄hi ɔhá ɛyí tāajɛ. Ohígbū ka Óndú ā yɔ̄ ī bī unwalu mɛ́mla ífi wā í klā uwá.

⁷Amáŋ le ɔtū lé, ká abɔ̄ kú uwɔ kóō le lɔfú. Ohígbū kēé géē cíla awɔ ulé kú úklɔ́ kú uwɔ.”

⁸Eko nɛ̄ Ása lɛ ɛlā kú ɛbɛ oōmá kú Óbɛ́di, ɔyí kú Asárīya nyā pó ā, iyē kú nū kwú lɔfú. Anɔ́ɔ ó kwú odúúdú ɛcí nōo bá ipú ajɛ kú Ujúda, Ubɛ́njamīn mɛ́mla odúúdú aígelī nɛ̄hi kú ɛyí ɛfu nɛ̄ ó mīyɛ ā ú kpó bónū ŋmá ipú ajɛ kú nū. Anɔ́ɔ ó klla lɛ ede kú Óndú ā nōo yɔ̄ ipú Agblīihɔ-nɛ̄hi ā tū gwó.

⁹Ása le odúúdú ācɛ Ujúda mɛ́mla Ubénjamīn kpó hīgwú, mɛ́mla ācɛ nēe ŋmá ipɔ́ɔma kú Ɛ́frem, Umanásɛ mɛ́mla Usímīyɔn nēe húmáyī lā ipú ajɔ̄ɔ̄cɛ́ kú nū ā, ohígbū ka ācɛ alɛwa ŋmá Ísrɛ̄lu le pɛ́kwu wā ɛgiyí nū eko nēé le má ka Óndú ā ɔ́ɔ yɔ̄ mla anú ā.

¹⁰É jīla Ujerúsālɛm ipú ɔyā ɔ́mɛtá kú iháyí igwɛ́ɛhɔ̄ nɛ̄ Ása ce ɔcɛ́ ā.

¹¹Ícíícɛ ɔ́ɔmā, ó le aɛ́nɛ úlā ce ofu igwɛ́ɛhɔ̄ (700) mɛ́mla aálá úlā igwáhāapa ce ofu igwó (7,000) kpó gwɛ́ɛya lɛ Óndú ā ŋmá ipú aɛ́nɛ̄ ó kpó ŋmá ɔgbɛ́fú ā.

¹²Anɔ́ɔ é le okónu ce ka aá ɔ́ɔ géē gbā Óndú, Ɔwɔicō kú aádáádā aá ā ɛ̄gbā mla ɔtú ékpónú mɛ́mla odo kú aá.

¹³Ɔ̄cɛ dúúmā, kwu ācɛnyā mɛ́mla ācɛnyīlɔ, mɛ́mla ayípɛ̄, ɔ̄cɛ dúúmā nōó gbā Óndú ā ɛ̄gbā ŋ́, é géē je ɔ́ ŋmó.

¹⁴Anɔ́ɔ odúúdú uwā je ɔkɔ gicō bī iyē kú Óndú ā le ɔkpá gbo ka ɛka nɛ̄ aá ɔ́ɔ gbo lɛ Óndú ā, aá ɔ́ɔ géē lɛ ɔ́ tū. Anɔ́ɔ é le ɛgba dɛ̄ klla le opo tá tālúúú á.

¹⁵Ɔtú he odúúdú ācɛ kú Ujúda ā nɛ̄hi, ohígbū ka é le ɛka gbo mla Óndú ā mla odúúdú ɔtū kú uwā. Ó he uwá ɔtū kéē gbā Óndú ā ɛ̄gbā eko dóódu. Óndú ā mīyɛ uwá klla le ɛbɔ́ je lɛ uwá ŋmá ābɔ̄ dóódu.

¹⁶Ɛ́nɛ́ kú Ása nɔnyākwɔ́cɛ nēé je lé ɔcɛ́ kú anyā á. Ása kwú ɔ ú tá ajɛ ŋmá āhɔ̄ ɔ́ɔmā, ohígbū ka ó le ɔwɔ kú ɛcí nēé hī ka Ássɛ̄ra ā hɛ́ kwaajɛ. Ɔ́ɔmā wɛ ɔdēelihɔ. Ása kwú ɔcí kú ɔwɔ kú Ássɛ̄ra ā ú tú klla kwú ikpɛ́cí kú nū nōo bá ipú ajɛ kú Ujúda ú kpó ca bónū ɔpɛ́ kú Ukídrɔn.

¹⁷Abɔ̄ Ása í je odúúdú ɛcí mla ikpɛ́cí kú ipú ajɛ kú Ujúda ā kpó ca tāajɛ dúúdú ŋ́ nááná ā, ó lɛyítáajɛ klla yɛce Óndú ā jāā gbéeko ikwū kú nū.

¹⁸Ása kwú odúúdú ɔdā kú ɛ̄gbā kú ugóolu (oje ɔdɔ), oje udɔ, oje nɛ̄hɛ́ nɛ̄ ádā nū Ábīja kpó lɛ Ɔwɔicō ā, mɛ́mla ɛ̄nɛ̄ anú abɔ̄yī nū je ā ú kpó bá Agblīihɔ-nɛ̄hi kú Óndú ā.

¹⁹Ɛfú okpó ɔhá í klla yɔ̄ ipú ajɛ kú nū gɛ ŋ́, jāā gbó iháyí ɔ́mofu ce igwɛ́ɛhɔ̄ kú eko nɛ̄ ó ce ɔcɛ́ ā.