Read idoma 2 ÚKLƆ́ KÚ AƆ́CƐ́ 17 Bible Online

2 ÚKLƆ́ KÚ AƆ́CƐ́ 17 - idoma bible

2 ÚKLƆ́ KÚ AƆ́CƐ́ 17

¹Ujɛhósāfati le ɔcɛ́ lé kwɛyí ádā nū, Ása. Anɔ́ɔ ó le ɔtā kú nū túce lɛyíkwu ācɛ Ísrɛ̄lu á.

²Ó le aícɔ́ɔja kpó bá aígelī nɛ̄hi kú Ujúda nēé hɛ́ igá o lɔfú tū uwā ā, mɛ́mla odúúdú aígelī nɛ̄hi kú Ujúda mɛ́mla aígelī nɛ̄hi nɛ̄ ádā nū nú ŋmá abɔ̄ ipɔ́ɔma kú Ɛ́frem ā.

³Óndú ā le ɔhā hɛ́ ce Ujehósāfati nɛ̄hi, ohígbū ka ó yɛce ɔwɛ kú ádā nū, Udéfīdi, ɔcɛ́ ā. Ó pā ɛcí ɛ́ɛ́ nɛ̄ ó gē gbā Ubáalu ɛ̄gbā ŋ́.

⁴Ó gē gbā Ɔwɔicō kú ádā nū ā ɛ̄gbā klla gē lɛyí táajɛ lɛ odúúdú íne kú nū ā. Ó yá ucē mɛ́mla ɔdōbɔ̄bí bɛ̄ɛka ɛ̄nɛ̄ aɔ́cɛ́ kú Ujúda yá ā ŋ́.

⁵Óndú ā lɛ Ujɛhósāfati tú kwaajɛ ipú Ujúda ká. Ācɛ kú Ujúda gē bī ɛhi gé lɛ ɔ́ eko dóódu. Ɔ́ɔmā cɛ̄ lɛ ɔ́ kwú gbo agbénú klla le ojīlīmā lɛ nɛ̄hi.

⁶Ó kwú odúúdú ɛcí mɛ́mla ikpɛ́cí, mɛ́mla ojibó kú ɔwɔ nēé hī Ássɛ̄ra ā ú kpó ca tāajɛ ŋmá Ujúda. Anɔ́ɔ ó lɔfú tū iyē gē gbā Óndú, Ɔwɔicō kú nū ɛ̄gbā á.

⁷Ipú iháyí ɔ́mɛtá nɛ̄ ó ce ɔcɛ́ ā, ó lɛ ācɛ nēe bá nyā tū gaá nwū ācɛ kú Ísrɛ̄lu ɛlā mɛ́mla íne kú Óndú ā ipú aígelī nɛ̄hi kú Ujúda dóódu ā. Ācɛ ā bá yɔ̄ á, Ubenhéyilu, Obadáya, Usekaríya, Unatánīyɛlu mɛ́mla Umikáya.

⁸Ācɛ kú Ulífāyi ahāanɛ yɛce uwá nyɔ̄ dúú, mɛ́mla ācogwɛ́ɛya ɛpa. Ayí kú Ulífāyi nēe nyɔ̄ ā wɛ, Ussɛmáya, Unetánīya, Usebadíya, Ásāhɛlu Ussemírāmɔtu, Ujehónātan, Adónīja, Utóbīja mɛ́mla Utobadónīja, anɔ́ɔ ācogwɛ́ɛya ɛpa ā wɛ, Ɛlíssāma mla Ujɛhóram.

⁹Uwá kwú ɔkpá kú íne kú Óndú ā ú le yɛ ga aígelī nɛ̄ŋcɛ́ kú Ujúda dúúdú ā, anɔ́ɔ é le íne kú Óndú ā nwū odúúdú ācɛ kú Ujúda á.

¹⁰Óndú ā yá ka odúúdú aéwo nēe lā kwu Ujúda ā kéē yúufi ō nyɔ̄ í kpɛ́fú tá ācɛ kú Ujúda.

¹¹Ācɛ ohi kú Ufílīstiya bī oje nɛ̄hɛ́ mɛ́mla ugóolu (oje ɔdɔ), oje udɔ, mla aɔ́dā ɔhá wā í yá Ujehósāfati ɛhi. Ācɛ Árābu bī aálá úlā igwáahāānɛ, ce ofɛhɔ̄ (7,700), mɛ́mla aɛ́wū úlā igwáahāānɛ ce ofɛhɔ̄ (7,700) wā í yá Ujehósāfati ɛhi.

¹²Ujehósōfati yɔ̄ í lɔfú mla íkwu tōōtɔ̄ɔ̄ gɔbū. Ó le ɔdɔ olɔfú nɛ̄hi mɛ́mla igá kpó gwó tū odúúdú aígelī nɛ̄hi kú Ujúda ā, mɛ́mla

¹³ɛga nɛ̄ ó gē kpó ɛyínɛ̄hi ɔdōlé mɛ́mla iyó kú nū tū ā. Ó le aótrɛ̄yí olɔfú nɛ̄hi kú aícɔ́ɔja ā kpó bá Ujerúsālɛm,

¹⁴ɛ́gɛ́nɛ̄ ipɔ́ɔma kú uwā lɛ ā. Ádina wɛ otrɛ̄yí kú aícɔ́ɔja nōo ŋmá ipɔ́ɔma kú Ujúda á. Aícɔ́ɔja úlā bá ɛgiyí úlā, ce úlā ofu igwɛ́ɛpa ce igwó (300,000), bá ɛháajɛ kú nū á.

¹⁵Ujehóhānan nōo kpó okónu ce ɔ́ ā lɛ aícɔ́ɔja úlā bá ɛga úlā ce úlā ofu igwɛ́ɛhɔ̄ (280,000).

¹⁶Ɔ̄cɛ ɔ́mɛtá ā wɛ Amásīya, ɔyí kú Usíkiri, ó le aícɔ́ɔja úlā ba ɛga úlā, ce úlā ofɛhɔ̄ (200,000). Amásīya, kwú īyī nū ú tɛ́ɛcɛ ka anúɔ géē gbā Óndú ā ɛ̄gbā klla í yúklɔ́ lɛ ɔ́.

¹⁷Otrɛ̄yí kú aícɔ́ɔja nēe ŋmá ipɔ́ɔma kú Ubénjamīn ā wɛ, Ɛlíyāda, ó gē leyīkwu aícɔ́ɔja, úlā bá ɛga úlā ce úlā ofɛhɔ̄ (200,000). É le iyē kwú mla ɔkplɛfú mla óbō, ɔtā mla ɔyī kú uwā.

¹⁸Ɔ̄cɛ nōo kpokónu ce ɔ́ ā, wɛ, Ujehósābadi nōo gē leyīkwu aícɔ́ɔja úlā bá ɛga úlā ce úlā ofɛpa ce igwó ā (180,000). Odúúdú uwá le iyē kwú kéē kpɛ́fú eko dóódu.

¹⁹Ācɛ nēe bá nyā wɛ aícɔ́ɔja nēe gē yúklɔ́ lɛ Ujɛhósāfati, Ujerúsālɛm, mɛ́mla aóhile kú aícɔ́ɔja nēé kpó bá aígelī nɛ̄hi o hile kú Ujúda, nēé hɛ́ igá nɛ̄ ɔdɔ kú nu lɔfú nɛ̄hi tū ɔ̄ ā.