Read idoma 2 ÚKLƆ́ KÚ AƆ́CƐ́ 19 Bible Online

2 ÚKLƆ́ KÚ AƆ́CƐ́ 19 - idoma bible

2 ÚKLƆ́ KÚ AƆ́CƐ́ 19

¹Ujɛhósāfati, ɔcɛ́ ā pīyɛyí gā Ujerúsālɛm ɛbɔ́.

²Ɔ̄comɛ́ɛbɛ éyi, Ujéhu, ɔyí kú Uhanáni le yɛ tá ɛgiyí Ujɛhósāfati, ɔcɛ́ gaá da ɔ́ kahíníī, “A gbɛlá ka ɔ́ɔ le kpaakpa o nyɔ̄ í tá ācobɔ̄bíipú mɛ́mla ācɛ nōo gē wɔ̄tū Óndú ā abɔ̄ nɛɛ? Ɔdā nāa yá nyā cɛ̄ lɛ Óndú ā le cɔ̄nū mla awɔ ɛɛ́.

³Amáŋ nááná, ó lɛ ɔdā o lɔhi éyi nāa yá. A le odúúdú aɔwɔ mɛ́mla aíkpɛ́cí kú Ássɛ̄ra kpó ca ŋmá ajɛ kú Ujúda. A klla cēyītikwū káā yɛ tá ɔdā nōo kwu Óndá ā ɔtū ā.”

⁴Abɔ̄ Ujɛhósāfati lā Ujerúsālɛm nááná ā, ó gē nyɔ̄ ga ɛga dóódu nɛ̄ ācɛ kú Ísrɛ̄lu bá ā gaá má uwā ojigógó. Ó gē yɛ ŋmá Ubiyɛssɛ́ba ɛháajɛ jāā ga okónōgwu kú ɔlɛ́ ɛfu kú Ɛ́frem nōo yɔ̄ ɛhícō ā, o yá ɛ́ɛ́ kóō lɛ ācɛ ā kwúcē igbīhi wā ɛgiyí Óndú, Ɔwɔicō kú aádáádā uwā.

⁵Ó le ācohɛ́pɔ̄ fu lɛ ipú igelī nɛ̄hi éyééye kú Ujúda nēé le igá hɛ́ tū ɔ̄ ā.

⁶Anɔ́ɔ ó le ukɔ́ tū uwā kahíníī, “Aá leyī kwɛcɛ gɛɛ ɛ́ɛ́ kú aá hɛ́pɔ̄. Aá gáā yúklɔ́ mla ɔfú mɛ́mla íkwu kú ɔ̄cɛ ŋ́, amáŋ íkwu kú Óndú ā abɔ̄yī nū nɛ, cɛ́ɛ́ ó kē í yɔ̄ mla aá eko nɛ̄ aá gē hɛ́pɔ̄ ā.

⁷Aá yúufi Óndú ā cɛ́ɛ́ ká aá méyīgoo kú ɔ̄cɛ dúúmā ŋ́, ohígbū ka Óndú, Ɔwɔicō kú alɔ í gē ce ɛlā bá ŋ́, ɛ́ɛ́ nɛ̄ ó gē cɛ̄lā kú ómíci oō mīyɛ lé ŋ́.”

⁸Ipú Ujerúsālɛm ā, ó le ayí Ulífāyi mɛ́mla ācogwɛ́ɛya, mɛ́mla ācɛ ojīlīmā kú igelī nɛ̄hi ā ōhī fu, kéē wɛ ācohɛ́pɔ̄ kú ācɛ nēe gē bīyíne mɛ́mla ɛpɔ̄ kú ɔdā nōo le gbo áafú lɛ ācɛ nēe lā igelī nɛ̄hi ā.

⁹Ó le ukɔ́ tū ācɛ nɛ̄ ó fu ā kahíníī, “Aá géē yúklɔ́ kú aá ipú ufi kú Óndú ā, klla í lɛyí táajɛ lɛ Óndú ā ipú ɔdā dóódu nɛ̄ aá géē yá ā.

¹⁰Ɔ́dāŋ́ ka, ɔ̄cɛ dúúmā ŋmá igelī nɛ̄hi ā lɛ ɛpɔ̄ kú ɔ̄cɛ ō ŋmó, amáŋ ka ɔ́da kú Óndú mɛ́mla ɛlā kú íne dóódu kú Óndú ā nēé bīya á nɛɛ, a géē nwū ɔ̄ ɛ́gɛ́nɛ̄ ó géē yá lɛ, eko kú ɛpɔ̄ ā, o yá ɛ́ɛ́ kéē híī lɛpɔ̄bí kú íne kú Óndú ā ō bīya ŋ́. Ɔ́dāŋ́ ka aá nwū uwā lɛ ā ŋ́, aá mɛ́mla uwā géē jɛ̄ ɔlá kú ícɔ̄nū kú Óndú ā ā. Amáŋ ɔ́dāŋ ka aá lɛ úklɔ́ kú aá yá lɔhi, aá gáā lɛ́pɔ̄bí ŋ́.

¹¹Amárīya otrɛ̄yí kú ācogwɛ́ɛya ā géē hɛ́pɔ̄ ámōōmɛ kú odúúdú ɛlā nōo yɛ lɛyíkwu ɛlā kú Óndú ā á. Ɛpɔ̄ o hile dóódu ɔhá ā, Usebadáya, ɔyí kú Íssimɛ̄lu igbómína kú Ujúda ā lɛ ɛpɔ̄ ámōōmɛ kú nū ō hɛ́ á. Āyā kú ayí Ulífāyi ā géē má ka ɛpɔ̄ dóódu nɛ̄ ācohɛ́pɔ̄ géē hɛ́ ā, ācɛ o lɛɛpɔ̄ ā í lɛyí táajɛ lɛ ɔ́ klla í bī ɔ̄ yúklɔ́ piíí. Aá lé ɔtū le ka aá lɛ ɛlā kú um nya bī yúklɔ́. Óndú ā kóō yɛce āyā nōo le kpaakpa ā.”