Read idoma 2 ÚKLƆ́ KÚ AƆ́CƐ́ 20 Bible Online

2 ÚKLƆ́ KÚ AƆ́CƐ́ 20 - idoma bible

2 ÚKLƆ́ KÚ AƆ́CƐ́ 20

¹Eko le gla lígíí ā, aícɔ́ɔja kú Umówābu mɛ́mla ákú ācɛ Ámɔn mɛ́mla ákú ācɛ ohile nēe cɛ̄ tɔ̄há mla uwá ā, ācɛ kú Umɛ-Unāti,[7] le pɛ́ wā í le ɔfú kpó wā í gwū ācɛ Ujúda.

²Ācocɛ̄hɔ̄ éyi wā gaá le da Ujɛhósāfati ka aícɔ́ɔja alɛwa kú Ɛ́dɔm le pɛ́ ŋmá ogbeé kú ísu nēé hī ka ísu ɔmā ā wā gaá kpɛ́fú tá ɔ̄. É da ɔ́ ka ɛ́ɛ mīyɛ Uhásāsɔn, Utáma dúú ɛɛ́. (Ɛnyā wɛ iyē ɔhá kú Éngēdi.)

³Ujɛhósāfati gbɔɔ́ ō yúufi, anɔ́ɔ ó le ɔkɔ gbā lɛ Óndú ā lɛyikwú ɔdā nɛ̄ ó cíkā ō yá ā. Anɔ́ɔ ó da odúúdú ācɛ kú Ujúda kéē lɛ okónu gwū.

⁴Ācɛ hágāgā ŋmá odúúdú aígelī nɛ̄hi kú Ujerúsālɛm le jīla cɛ́ɛ́ kéē gaá da Óndú ā ɔ̄kā kú ɔdā nēé géē yá ā.

⁵Ujɛhósāfati nyɔ̄ gaá háyi iyɔ̄bū kú ācɛ nēe ŋmá Ujúda mɛ́mla Ujerúsālɛm wā í jīla ā, eyiyɛ̄cɛ kú Agblīihɔ-nɛ̄hi kú Óndú ā.

⁶Anɔ́ɔ ó le ɔkɔ cɛyí le ɔkɔ gbā gbōmgbōm kahíníī, “Óndú, Ɔwɔicō kú aádáádā alɔ, awɔ gē gbō ɔkpáncō mɛ́mla odúúdú ɛcɛ á. A lɔfú klla nwuné, ɔ̄cɛ dúúmā í yɔ̄ gbla awɔ glá ŋ́, ɛ́ɛ́ nɛ̄ ɔ̄cɛ dúúmā kōō bɛ́yíkwu uwɔ glá ŋ́.

⁷Awɔ wɛ Ɔwɔicō kú alɔ á. Eko nɛ̄ ācɛ kú Ísrɛ̄lu wā ipú ajɛ nyā ā, a lɛ ācɛ nēe lā amānyā ā kpó nū bɛ̄cɛ klla kwú ajɛ nyā ú lɛ ayí kú Ébrahām, oklóbīya uwɔ kóō kwú pīya ákú uwā piyóó ipú ɛcɛ nyā

⁸É lā amānyā klla le Agblīihɔ-nɛ̄hi kú ojīlīma kú uwɔ gwó ɛɛ́. Ohígbū kēé kahíníī,

⁹“Ɔ́dāŋ́ ka ɔdōbɔ̄bí dóódu bɛ̄ɛka ɛfú, ámāŋ ōcē obɔ̄bí, ámāŋ ɛdɔ kú ámíyā dóódu, ámāŋ ka ɔkpɛtā gaá ce uwá kóō wɛ italā kú uwā cɛ́ɛ́ kóō kpó uwá yíífi, é lɔfú wā í háyi iyɔ̄bū Agblīihɔ-nɛ̄hi kú uwɔ, ɛga nēé gē gbā uwɔ ɛ̄gbā ā. É lɔfú gbɔ̄ɔkɔ ohígbū unwalu kú uwā, a géē pó ɔkɔ nēé gbā gā uwɔ ā, a klla í nya uwá tá ŋmá unwalu kú uwā ɔ́ɔmā.

¹⁰Abālɔbányā ā, ācɛ kú Ámɔn, Umówābu, Ɛ́dɔm le ɛfú kpó í gwū alɔ ɛɛ́. Eko nɛ̄ aádáádā alɔ bɛ̄cɛ ŋmá Íjīpiti ā, á cɛ̄ lɛ uwá bū ipú ajɛ nēe bá abɔ́ɔ ā ŋ́. Ohígbū ɔ́ɔmā, é le cēbla ajɛ ā biílí, anɔ́ɔ é kpó ācɛ ā yíífi ŋ́ má

¹¹Ɔwɛ nēé bī le cíla alɔ ulé kú olɔhi ɔ́ɔmā ā yɔ̄ á. O lɛ alɔ kpó nū ŋmá ipú ajɛ nāa je lɛ alɔ ā.

¹²Awɔ wɛ Ɔwɔicō kú alɔ á. Lɛ italā yá uwā ohígbū ka alɔ í lɔfú yá ɔdā dúúmā tá ɛwa kú aícɔ́ɔja nɛ̄hi nyā glá ŋ́. Alɔ í kōō jé ɔdā nɛ̄ alɔ í yá ā ŋ́. Óndú, amáŋ alɔ leyī kpó klá uwɔ káā tá alɔ abɔ̄.”

¹³Odúúdú ācɛ kú Ujúda mɛ́mla anyā uwā mɛ́mla ayí uwā háyi iyɔ̄bū Agblīihɔ-nɛ̄hi kú Óndú ā.

¹⁴Anɔ́ɔ alelékwū kú Óndú ā wā í klá éyi kú ayí Ulífāyi nōo háyi abɔ́ɔ mla uwá ā, iyē nū lé ka Ujahásīyɛlu, ɔyí kú Usekaríya. Ó ŋmá ipɔ́ɔma kú Ásāfu, anɔ́ɔ ó ŋmá ɔkwu kú Umɛtánáya, Ujɛ́yɛlu mɛ́mla Ubenáya.

¹⁵Anɔ́ɔ Ujahásīyɛlu kahíníī, “Ɔcɛ́ mɛ́mla odúúdú ācɛ kú Ujúda mɛ́mla ācɛ kú Ujerúsālɛm, Óndú, Ɔwɔicō kú alɔ ka, ‘Aá híī yúufi ɛɛ́ nɛ̄ ɔtū gē gbenyi lɛ aá ŋ́, ɛ́ɛ́ nɛ̄ aá gē yúufi o leyī méyī mla aícɔ́ɔja kú aéwo ɔhá ɔ́ɔmā ŋ́. Ɛfú ō kpó ā ŋmá lɛ ɔfú kú Ɔwɔicō nɛ, ó wɛ ákú aá ŋ́.

¹⁶Aá nyɔ̄ í kpɛ́fú tá uwā oócí, eko nēé gā ɛgiyí ɔpɛ́ kú Usísi. Aá géē jīla mla uwá oŋmɛ́yí kú ɔpɛ́ nōo yɛ ígbíli nōo kwu Ujɛrúwɛ̄lu ajaajɛ ā.

¹⁷Ó wɛ aá gáā kpɛ́fú nyā ŋ́, ákú aá lé ka, aá má kwū ajɛ ɛfú, cɛ́ɛ́ kú aá gbēyī. Aá gēe má Óndú ā abɔ̄ ó géē yá kú aá lɛ ɛfú nyā yálé ā. Ācɛ kú Ujúda mɛ́mla ācɛ kú Ujerúsālɛm, aá híī piikpó ajɛ ɛ́ɛ́ nɛ̄ aá gē yúufi ŋ́. Aá nyɔ̄ ɛcɛ gaá kpɛ́fú ā, Óndú ā géē yɔ̄ mla aá.’”

¹⁸Anɔ́ɔ Ujɛhósāfati mɛ́mla odúúdú ācɛ nēe bá abɔ́ɔ mla anú ā túkpɛɛ́ lɛ eyī pīya klá ajɛ anɔ́ɔ é le ɔkɔ gbā lɛ Óndú ā.

¹⁹Anɔ́ɔ ayí Ulífāyi kú ipɔ́ɔma kú Ukóhāti mɛ́mla Ukóra ā cāŋjɛ le ɛgba dɛ̄ gbōmgbōm le cɛ̄tra Óndú, Ɔwɔicō kú Ísrɛ̄lu á.

²⁰Ɔ̄cɔ̄ɔ̄cī kú oŋmɔ́ɔ̄cī nū, é kwú pɛ́ ga ɛcɛ le yɛ gaá kwāajɛ ígbíli nōo kwu Utékōwa ajaajɛ ā. Abɔ̄ é bá ī gɛɛcɛ ā, Ujɛhósāfati da uwá kahíníī, “Ācɛ kú Ujúda mɛ́mla ācɛ kú Ujerúsālɛm, aá le ɔtūce Óndú, Ɔwɔicō kú aá, aá háyi ká. Aá le ɔtū kpó ce ɛlā nɛ̄ ɔ̄comɛ́ɛbɛ ka lɛ aá ā ká aá le yálé.”

²¹Eko nōó lɛ ujɔ tū mla ācɛ ā, ó da ācogwíijē ā kéē lɛ úwé kú ijē ō gwo kú uwā kpó wiyē, cɛ́ɛ́ kéē le yɛ ga iyɔ̄bū kú aícɔ́ɔja kéē yɔ̄ ī gwííjē kahíníī, “Óndú alɔ cɛ̄tra awɔ, ihɔtū kú uwɔ yɔ̄ piyóó ipú ɛcɛ nyā.”

²²Abɔ̄ é gbɔɔ́ ō gwíijē ā, Óndú ā kwú aícɔ́ɔja kú aólɛlā kú uwā ɔtū ú kpó gbájí.

²³Anɔ́ɔ ācɛ Ámɔn mɛ́mla ācɛ Umówābu gbɔɔ́ ō kpɛ́fú tá aícɔ́ɔja kú Ɛ́dɔm. Anɔ́ɔ é kwú uwā ú kpó yíífi ŋmá ajɛ dúúdú. Anɔ́ɔ é kwú eyí í pīya kwu īyī uwā gbɔɔ́ ō ŋmó iyī uwā á.

²⁴Abɔ̄ ācɛ kú Ujúda gā ɛgiyí inɔ̄ɔda nōo kwu ígbíli ā, é le icō tū gaá fēēyīkpeé má aáklɔ̄kpɛ kú ɛfú kú aólɛlā kú uwā ā, anɔ́ɔ é má ka odúúdú aólɛlā kú uwā le pīya okwū bá ajɛ gbeélé. Odúúmā kú uwá í hile ŋ́.

²⁵Anɔ́ɔ Ujɛhósāfati mɛ́mla aícɔ́ɔja kú nū le pɛ́ nyɔ̄ kéē kpó iyó kú uwā wu ŋmá ajɛ. É má aɛ́na, aíīlī, ɔdōlé mɛ́mla agbénú alɛwa ɔhá. É kpó iyó ā ɛ̄cī ɛtá nááná ā, iyó ā nwuné nɛ̄hi nēé kpó ɔ̄ mɛ ɛ̄cī ɛtá ā glá ŋ́.

²⁶Ɛ̄cī ɔ́mɛɛnɛ ā, é le jīla ɔpɛ́ kú Uberáka gaá cɛ̄tra Óndú ā ohígbū odúúdú ɔdā nɛ̄ ó yá nyā. Ɔdā nōo yá ɛɛ́ nēé hī ɔpɛ́ ā ka Uberáka ā yɔ̄ abɔ́ɔ á.

²⁷Anɔ́ɔ Ujɛhósāfati le ācɛ ɔlɛ́ nū kpó kwúcē ga Ujerúsālɛm mla ɛgba ogwú kwaáá kwaáá, ohígbū ka Óndú ā lɛ aólɛlā kú uwā yálé, klla lɛ uwá kpó ŋmó dúúdú.

²⁸Eko nēé gā igelī nɛ̄hi kú Ujerúsālɛm ā, é le yɛ ga Agblīihɔ-nɛ̄hi ā bá ī gwō ɛ̄ngwū, mɛ́mla ɔgalúmpɛ̄, klla bá ī tá opo, klla bá ī gwō uba mɛ́mla úmōlō, anɔ́ɔ é bá gē gwííjē tá Ɔwɔicō ahínyá.

²⁹Éwo ɔhá dóódu nēe lɛ ɔ̄kā kú ɛ́gɛ́nɛ̄ Óndú ā yá aólɛlā kú uwā lé lɛ ā pó, ufi gbo uwá ipú.

³⁰Anɔ́ɔ Ujɛhósāfati klla gbāajɛ ipú ɛbɔ́, ohígbū ka Óndú ā le ɛbɔ́ je lɛ ɔ́ klla lɛ ɔ́ gbō ŋmá unwalu āyā dúúdú.

³¹Ujɛhósāfati wɛ iháyí ofu ce igwɛ́ɛhɔ̄ ɛɛ́ nɛ̄ ó le ɔcɛ́ á. Ó kē ce ɔcɛ́ Ujerúsālɛm iháyí ofu ce ɛhɔ̄. Ɛ̄nɛ̄ nū wɛ Asúba, ɔyínɔ̄nyā kú Ussɛ́lihi.

³²Ó yá ɔdā nōo lɛ kpaakpa īkpēyī kú Óndú ā klla yá ɔdā nōo he Óndú ā ɔtū bɛ̄ɛka ádā nū Ása ā.

³³Amáŋ ó kpó ede mɛ́mla ikpɛ́cí kú ācɛ o pā ɛcí ā yíífi ŋ́. Ācɛ kú Ujúda ā í bī ɔtū ékpónú le gbā Ɔwɔicō kú aádáádā uwā ɛ̄gbā ŋ́.

³⁴Odúúdú ɔdā nɛ̄ Ujɛhósāfati yá, ŋmá ohútu kú eko nɛ̄ ó wá í ce ɔcɛ́ ā ga oŋmɛ́yí kú nū ā, é le ɔ́ tá tū ipú ɔkpá kú ígwú ō gbo kú Ujéhu, ɔyí kú Uhánām nōo wɛ ɔ̄cɛ éyi kú ipú ígwú ō gbo kú aɔ́cɛ́ kú Ísrɛ̄lu ā.

³⁵Eko éyi, Ujɛhósāfati lɛ okónu kú ɛbɔ́ ce mla oklóbīya éyi nēé hī ka Ahasíya, ɔcɛ́ kú Ísrɛ̄lu, nōo yá ucé kú ɔ́bíipú alɛwa.

³⁶É le aúgbéenyi o ga ipú itekwú glá gwó tɔ̄há okónu ísu kú Ɛsīyɔngɛ́ba,

³⁷Amáŋ Ɛlíyēsa, ɔyí kú Udódāfahu nōo ŋmá ipɔ́lɛ́ kú Umárēssa ā le ukɔ́ tū Ujɛhósāfati kahíníī, “Ohígbū okónu nāa ce, mla oklóbīya uwɔ Ahasíya ā, Óndú ā géē je ɔdā nāa gwó ā wúla tāajɛ klla í je ɔ́ kpó yíífi.” Anɔ́ɔ aúgbéényi ā kwú gbayibó, í klla cāŋjɛ gbóógbóō glá gɛ ŋ́ má.