Read idoma 2 ÚKLƆ́ KÚ AƆ́CƐ́ 21 Bible Online

2 ÚKLƆ́ KÚ AƆ́CƐ́ 21 - idoma bible

2 ÚKLƆ́ KÚ AƆ́CƐ́ 21

¹Ujɛhósāfati gekwú, é kwú ɔ̄ ú nyí ikpámílī kú aɔ́cɛ́ igelī nɛ̄hi kú Udéfīdi, anɔ́ɔ ɔyí nū, Ujɛhóram lɛ ɔcɛ́ lé kwɛyí nū á.

²Ujɛhóram, ɔyí kú Ujɛhósāfati, ɔcɛ́ kú Ujúda ā, lɛ ayínɛ́ ɛhīlī nēe bá ā, Asárīya, Ujéhīyelu, Usekaríya, Asariyáhu, Umíkɛlu mɛ́mla Ussefatáya,

³Ádā uwā yá uwā ɛhi nɛ̄hi kú ugóolu (oje ɔdɔ), oje udɔ, oje nɛ̄hɛ́ mɛ́mla agbénú nɛ̄hi ɔhá. Ó klla kwú éyééye kú uwā ú yá otrɛ̄yí kú éyééye kú aígelī nɛ̄hi nēé hɛ́ igá o lɔfú nɛ̄hi tū uwā ā. Amáŋ abɔ̄ Ujɛhóram wɛ ɔ́kplá ā, Ujɛhósāfati ɔcɛ́ ā, kwú ɔ̄ cɔcɛ́ kwɛyí iyī nū.

⁴Eko nɛ̄ Ujɛhóram gaá ce akpa kú ɔcɛ́ kú nū ā, ó kwú odúúdú ayínɛ́ nū mɛ́mla aígabɔ̄ kú Ísrɛ̄lu ōhī ā ú kpó ŋmó.

⁵Ujɛhóram lé ɔcɛ́ eko nɛ̄ ó wɛ iháyí ofu ce igwɛ́ɛpa ā, ó ce ɔcɛ́ Ujerúsālɛm iháyí ahātá.

⁶Ó yɛce ɔwɛ kú ɔ́bíipú mɛ́mla ɔwɛ kú íne ō bīya kú aɔ́cɛ́ kú Ísrɛ̄lu ā. Ɛdɔ kú ɔ́bíipú nɛ̄ Áhābu, ɔcɛ́ ā bī ā, nɛ̄ ó bī dúú á. Ohígbū ka ó lɛ ɔyínɔ̄nyā kú Áhābu éyi lɛ. Ujɛhóram le ɔ́bíipú bī tū Óndú ā nɛ̄hi.

⁷Amáŋ Óndú ā í tíne ō je ipíinu kú Udéfīdi yíífi ŋ́, ohígbū okónu nɛ̄ ó ce lɛ Udéfīdi ka ipíinu kú nū ɔ́ɔ géē yɔ̄ ī lé ɔcɛ́ piyóó ipɔ́ɔma kú Ujúda á.

⁸Eko kú ɔcɛ́ Ujɛhóram ā, Ɛ́dɔm kwú hɛ́ ŋmá Ujúda, anɔ́ɔ é kwú pīya éwo kú abɔ̄yī uwā á.

⁹Anɔ́ɔ Ujɛhóram mɛ́mla aícɔ́ɔja kú nū le pɛ́ ga ɛcɛ mla úgbɔ́nya o kpɛ́fú kú uwā gaá kpɛ́fú í gwū Ɛ́dɔm. Anɔ́ɔ ācɛ kú Ɛ́dɔm gaá kwú yɛ uwá jīla tá á, amáŋ abɔ̄ nɛ̄ ó le pīya otú ā, é lɛ ɛga má peéé, anɔ́ɔ é kwú pɛ́ kwu á.

¹⁰Anɔ́ɔ ācɛ kú Ɛ́dɔm, kwu pīya ācɛ abɔ̄yī uwā ŋmá ɛgiyí ācɛ kú Ujúda jāā kwu eko nēé tɔ́kpá nyā á. Eko ɔ́ɔmā dúú ā, igelī nɛ̄hi kú Ulíbina klla kwú hɛ́ ŋmá Ujúda dúú, ohígbū ka Ujɛhóram kwúcē ŋmá ɛgiyí Óndú, Ɔwɔicō kú aádáádā nū ā.

¹¹Ó klla le aíkpɛ́cí kpó gwó Ujúda dúú. Ó klla lɛ ācɛ kú Ujúda mɛ́mla ācɛ kú Ujerúsālɛm ikpó kpó tū ɔ́bíipú ō bī tá Óndú ā.

¹²Anɔ́ɔ ɔ̄comɛ́ɛbɛ, Ɛláyíja lɛ ɔkpá tá fu Ujɛhóram kahíníī, “Óndú, Ɔwɔicō kú aádáádā aá Udéfīdi ā, le uwɔ ŋmɛ́pɔ̄bí, ohígbū ka á yɛce ɔwɛ kú aádáádā uwɔ Ása ā ŋ́.

¹³Ikɔkɔ ɔ́ɔmā ā, a gaá kwú ɔwɛ kú ínoōbīya mɛ́mla ɔ́bíipú kú aɔ́cɛ́ kú Ísrɛ̄lu ā ú. A klla lɛ ācɛ kú Ujúda mɛ́mla ācɛ kú Ujerúsālɛm ikpó kpó tū ínoōbīya mɛ́mla ɔ́bíipú ō bī. Anɔ́ɔ é yɛce Ɔwɔicō gɛ ŋ́, ɛ́gɛ́nɛ̄ Áhābu mla ipɔ́ɔnū kú nū nēe lé ɔcɛ́ kú Ísrɛ̄lu ŋmá igbīhi í cɛ̄la Ɔwɔicō ŋ́ mā. A klla kōō le ayínɛ́ abɔ̄yi uwɔ nēe wɛ ācɛ ɔkwɛ̄yi fíyɛ́ uwɔ kpó ŋmó dúú.

¹⁴Ohígbū ɛnyā ā, Óndú ā géē yá ācɛ ɔlɛ́ uwɔ, ayí uwɔ, anyā uwɔ italā. Ó klla í kpó agbénú kú uwɔ yíífi ŋmáajɛ dúúdú.

¹⁵Awɔ abɔ̄yī uwɔ géē doōcɛ̄ kú ɔdīpú nōo géē yɔ̄ ī je uwɔ ŋmó ŋmá ajɛ ɛ̄cī dóódu.”

¹⁶Ācɛ Ufilístiya mɛ́mla ācɛ Árābu lā kwu ɛga nɛ̄ ācɛ Ukússi lā ā ajaajɛ okónu ísu ā. Anɔ́ɔ Óndú ā lɛ uwá ɔtū je gicō lɛyíkwu Ujɛhóram, anɔ́ɔ é cāŋjɛ gbɔɔ́ ō kpɛ́fú tá ɔ̄ á.

¹⁷É le pɛ́ wā Ujúda gaá le odúúdú iyó mɛ́mla agbénú kú ɔlɛ́ ɔcɛ́ ā kpó. É klla lɛ anyā nū mɛ́mla ayí nū kpó ɔfiyɛ nyɔ̄ ɔlɛ́ uwā. Ahasíya, ɔyínū ōhɔ́ɔma ā nēé mā ɔ̄ tá Ujerúsālɛm ōfōōfūnū á.

¹⁸Eko nɛ̄ aɔ́dā nēe bá nyā le yá í yɛ ā, Óndú ā le ɔdīpú tū klla Ujɛhóram, anɔ́ɔ ajīlīpú kú nū gbɔɔ́ ō wā á.

¹⁹Ɛ̄cī dóódu, ōcē ā yɔ̄ ī bɔ̄bí gɔbɔ̄ɔ̄bū jāā iháyí ɛpa, anɔ́ɔ ɔnɔ kú ōcē ā kwú ɔ̄ ú ŋmó á. Amáŋ ācɛ ɔlɛ́ nū í gwɔ́ɔlá nɛ̄hi kú ikwū ō yá kú nū ɛ́gɛ́nɛ̄ é gwó eko kú aádáádā nū ā ŋ́.

²⁰Ujɛhóram wɛ iháyí ofu ce igwɛ́ɛpa ɛɛ́ nɛ̄ ó lé ɔcɛ́ á, ó ce ɔcɛ́ Ujerúsālɛm iháyí ahātá. Ikwū kú nū í kōō kwú ɔ̄cɛ dúúmā iyē ŋ́. É kwú ɔ̄ ú nyi igelī kú Udéfīdi, amáŋ é nyi ɔ́ ikpámílī kú aɔ́cɛ́ ā ŋ́. Ɔ̄cɛ dúúmā kú Ujúda mɛ́mla ācɛ kú Ujerúsālɛm í yēekwu kú nū ŋ́.