Read idoma 2 ÚKLƆ́ KÚ AƆ́CƐ́ 23 Bible Online

2 ÚKLƆ́ KÚ AƆ́CƐ́ 23 - idoma bible

2 ÚKLƆ́ KÚ AƆ́CƐ́ 23

¹Eko nɛ̄ iháyí ɛhīlī le gla ā, anɔ́ɔ Ujɛhóyāda ɔ̄cogwɛ́ɛya ā le ɔtū kú nū yéékpónū kóō lɛ odée yá. Anɔ́ɔ ó gáā le pīya tɔ̄há mla aótrɛ̄yí kú aícɔ́ɔja ofɛhɛ̄ɛ̄hɔ nēe bá ā: Asárīya ɔyí kú Ujɛ́rōham, Ísimɛ̄lu, ɔyí kú Ujehóhānan, Asárīya ɔyí kú Óbɛdi, Umaásēya ɔyí kú Adisáya mɛ́mla Ɛlíssāfati, ɔyí kú Usikiri.

²É le yɛ tá odúúdú aígelī nɛ̄hi kú Ujúda, anɔ́ɔ é le ayí kú Ulífāyi mɛ́mla anyākwɔ́cɛ kú ipɔ́ɔma kpó ŋmá abɔ́ɔ wā Ujerúsālɛm á.

³Odúúdú uwā le jīla bá ipú Agblīihɔ-nɛ̄hi ā. Anɔ́ɔ é le ɛka gbo lɛ Ujówāsi, ɔyí kú ɔcɛ́ ā. Ujɛhóyāda, ɔ̄cogwɛ́ɛya ā da uwá kahíníī, “Aá má ɔ̄, ɔyí kú okwūmā ɔcɛ́ ā yɔ̄ á. Kóō kwú pīya ɔcɛ́ kú Ujúda ɛ́gɛ́nɛ̄ Óndú ā cokónu ka ipíinu kú Udéfīdi ɔ́ɔ géē lé ɔcɛ́ piyóó ā.

⁴Ɔdā nɛ̄ aá géē yá ā yɔ̄ á, eko nɛ̄ ayí Ulífāyi gā úklɔ́ ɛ̄cī Usábāti, āyā éyi ŋmá ipú ɛtá kú uwā géē bá ī gbō Agblīihɔ-nɛ̄hi ā,

⁵āyā ɔ́mpa kú uwā í bā í gbō ɔlɛ́ ɔcɛ́, aóhile kú uwā géē bá Ɔwɛ kú Ikpíinu ā. Odúúdú ācɛ o hile ā í jīla ódúdɔ̄lɛ́ kú Agblīihɔ-nɛ̄hi ā.

⁶Ɔ̄cɛ dúúmā í gáā béhē ga ipú Agblīihɔ-nɛ̄hi ā ŋ́, ayíka ācogwɛ́ɛya mɛ́mla ayí Ulífāyi nɛ̄ Óndú ā gwu uwá iyē ohígbū úklɔ́ kú Agblīihɔ-nɛ̄hi ā. Amáŋ, ācɛ o hile ɔhá ā géē lɛyí táajɛ lɛ íne kú Óndú ā kéē bá ɛcɛ.

⁷Ayí Ulífāyi géē pi ɔkpacáŋgelī kú uwá ŋmá apɛ́ wu abɔ̄, cɛ́ɛ́ é lɛ ɔcɛ́ ā yɛ jīla biílí abɔ́ é bá gē gbō ɔ̄ ɛyi ā. É géē tá ɔ̄ ɔkwu bá ī gbō ɔ̄ ɛga dúúmā nɛ̄ ó géē nyɔ̄ ā. Ɔ̄cɛ dúúmā nōo tíne ō bēé wā ipú Agblīihɔ-nɛ̄hi ā, é géē je ɔ́ ŋmó.”

⁸Ācɛ kú Ujúda mɛ́mla ayí kú Ulífāyi ā le ɔ́da nɛ̄ Ujɛhóyāda je ā bī yúklɔ́. É kpó ācɛ ā yáwa ga ɔlɛ́ ŋmá úklɔ́ ícíícɛ Usábāti ā ŋ́. Anɔ́ɔ otrɛ̄yí kú aícɔ́ɔja lɛ ācɛ nēe bá ī gwū ŋmá úklɔ́ mɛ́mla ācɛ nēe bá ī wā úklɔ́, cɛ́ɛ́ kóō bī uwā yúklɔ́.

⁹Anɔ́ɔ Ujɛhóyāda le óbō mɛ́mla ɔkplɛ́fú nɛ̄hi mɛ́mla ɔkplɛ́fú nɛ̄ŋcɛ́ kú Udéfīdi nēe bá ipú Agblīihɔ-nɛ̄hi ā kpó lɛ uwá.

¹⁰Ó le odúúdú ācɛ nēe pi ɔkpacaŋgelī wu abɔ̄ ā kpó kwāajɛ iyɔ̄bū Agblīihɔ-nɛ̄hi ā, cɛ́ɛ́ kéē gbō ɔcɛ́ ɛyí.

¹¹Anɔ́ɔ Ujɛhóyāda kwú Ujówāsi ú bī wɛ̄ɛcɛ ŋmá ɛga nēé le ɔ́ tayínū ā, anɔ́ɔ ó gaá kwú ukata kú ɔcɛ́ ú wu ɔ́ ɛyí á. Ó klla kwú ɔkpá kú íne nōo gē gbō aɔ́cɛ́ ā ú wu ɔ́ abɔ̄, anɔ́ɔ ó kwú ɔ̄ ú ce ɔcɛ́ á. Anɔ́ɔ anú mɛ́mla ayí nū, ācogwɛ́ɛya o hile ā kwú anɔ̄ ú tū Ujówāsi ɛyí, anɔ́ɔ odúúdú ācɛ le ɛgba dɛ̄ kahíníī, “Ɔwɔ kóō lé ɔcɛ́ ɛyí tá ápátɛ́cɔ̄ ooo.”

¹²Atálīya le ɛ̄gbā kú ɔcɛ́ nɛ̄ ācɛ bá gē dɛ̄ ā pó, anɔ́ɔ ó le kwu fíya gaa Agblīihɔ-nɛ̄hi kú Óndú ā, ɛga nɛ̄ ɛwa jīla bá ā.

¹³Anɔ́ɔ ó má ɔcɛ́ ɛ̄yīpɛ̄ abɔ́ɔ, háyi pī upíla kú aɔ́cɛ́ ipú Agblīihɔ-nɛ̄hi ā, aícɔ́ɔja le yɛ ɔ́ jīla tá bá ī gbō ɔ̄, ācogwɛ́ɛya klla le yɛ ɔ́ jīla bá gē tá opo. Odúúdú ācɛ kú Ujúda klla bá abɔ́ɔ bá ī gwéeyē, bá gē gwííjē, bá gē jīījē, klla bá gē gwō odée. Ɔtūnōbí cɛ̄ lɛ Atálīya le ílī kú nū híla, anɔ́ɔ ó le ɛgba dɛ̄ kahíníī, “Ibíyāajɛ nɛ oo! Ibíyāajɛ nɛ oo!.”

¹⁴Abɔ̄ Ujɛhóyāda í tíne kéē je ɔ́ ŋmó ɛgiyí Agblīihɔ-nɛ̄hi ŋ́ mā, anɔ́ɔ ó lɛ aótrɛ̄yí kú aícɔ́ɔja ā hīgwú, anɔ́ɔ ó da uwá kahíníī, “Aá kwú ɔ̄ ú nyɔ̄ ɛga nɛ̄ aícɔ́ɔja hɛ́ ɔgba ɛpa bá gē gbāajɛ ā, ɔ̄cɛ dúúmā nōo géē wā ka anúɔ gaá nya ɔ́ tá ā, aá lɛ ɔ́ ŋmó dúú.”

¹⁵É le ɔ́ kwú ŋmá abɔ́ɔ ga okónu ɔwɛ nēé hī ka Ɔwɛ kú Ɔnya ā, anɔ́ɔ é kwú ɔ̄ ú ŋmó abɔ́ɔ á.

¹⁶Anɔ́ɔ Ujɛhóyāda cɛ̄ lɛ ɔcɛ́ mɛ́mla ācɛ kú Ujúda ā le ɛka gbo lɛ Óndú ā, ka aá géē wɛ ācɛ kú anú nōo wɛ Óndú ā.

¹⁷Odúúdú uwā le pɛ́ ga agbla kú ubáalu ā gaá kwú ɔ̄ ú wúla tāajɛ. É kwu ede mla ojibó kú nū ú kpó ca, klla kwú Umátan ɔ̄cogwɛ́ɛya kú ubáalu ā ú ŋmó iyɔ̄bū ede kú ubáalu ā abɔ́ɔ.

¹⁸Ujɛhóyāda kwú ācogwɛ́ɛya ā mɛ́mla ayí kú Ulífāyi ú kpó tū úklɔ́ kú Agblīihɔ-nɛ̄hi kú Óndú ā. É gē bá ī yúklɔ́ nɛ̄ Udéfīdi je lɛ uwá ipú Agblīihɔ-nɛ̄hi ā. É klla bá gē gwɛ́ɛya kú ɔdā ō yɔlá dúúdú lɛ Óndú ā, ɛ́gɛ́nɛ̄ íne kú Umósīsi ka lɛ ā. É klla géē wɛ ācogwíijē mɛ́mla ācɛ o gwō ɔdā ō bī gwííjē lɛ Óndú ā dúú.

¹⁹Ó klla lɛ ayí kú Ulífāyi kpó gbō ɔwɛ kú Agblīihɔ-nɛ̄hi kú Óndú ā, kéē cɛ̄ lɛ ɔ̄cɛ dúúmā, nōo le tēelihɔ bēé wā ipú Agblīihɔ-nɛ̄hi kú Óndú ā ŋ́.

²⁰Anɔ́ɔ aótrɛ̄yí kú aícɔ́ɔja ā mɛ́mla Ujɛhóyāda, mɛ́mla aígabɔ̄ kú Ujúda, mɛ́mla odúúdú ācɛ o hile ā, le ɔcɛ́ bītá ŋmá abɔ́ɔ jāā wā agblɔ̄cɛ́ ā á. É le bēé ɔwɛ okpaakpa kú ɔlɛ́ ɔcɛ́ ā, anɔ́ɔ ɔcɛ́ ā gaá cīce akpa kú ɔcɛ́ kú nū á.

²¹Odúúdú ācɛ kú Ujúda ā gwéeyē nɛ̄hi abɔ̄ Atálīya gekwú ɛɛ́ mā, ɔlɛ́ kú Ujúda ā yɔ̄ ɛbɔ́ miyɔɔ.