Read idoma 2 ÚKLƆ́ KÚ AƆ́CƐ́ 24 Bible Online

2 ÚKLƆ́ KÚ AƆ́CƐ́ 24 - idoma bible

2 ÚKLƆ́ KÚ AƆ́CƐ́ 24

¹Ujówāsi le ɔcɛ́ kú Ujúda lé eko nōo wɛ iháyí ahāapa ā. Ó gbō ācɛ kú Ujúda iháyí ofɛpa. Ɛ́nɛ́ nū wɛ Usíbīya nōo ŋmá Ubiyɛssɛ́ba ā.

²Ujehóyāda yá ɔdā nōo he Óndú ā ɔtū jāā gbéeko nɛ̄ ó kwú ā.

³Ujehóyāda lɛ anyā ɛpa lɛ Ujówāsi. É ma ayínɔ̄nyīlɔ mɛ́mla ayínɔ̄nyā lɛ ɔ́.

⁴Eko nɛ̄ ó ce ɔcɛ́ kpií ā, Ujówāsi le tútū o glá Agblīihɔ-nɛ̄hi kú Óndú ā yá.

⁵Anɔ́ɔ ó le da ācogwɛ́ɛya mla ayí kú Ulífāyi kéē yɛ ga aígelī nɛ̄hi dóódu gaá mīyɛ ije ŋmá ɛgiyí ācɛ dóódu kú Ujúda, ó kē ī yɛ lɛ ā iháyí dóódu, cɛ́ɛ́ kéē bī le glá Agblīihɔ-nɛ̄hi kú Óndú ā yá. Ó da uwá kéē lɛ úklɔ́ ā yá fíyaa, amáŋ ayí kú Ulífāyi pi úklɔ́ ā ɔkwajɛ.

⁶Ó le Ujehóyāda, otrɛ̄yí kú uwā hīgwú, anɔ́ɔ ó da ɔ̄kā kahíníī, “Ɔdíyá nɛ̄ á tū ayí Ulífāyi ɛhɔ̄ kéē nyɔ̄ gaá mīyɛ ije ŋmá ɛgiyí ācɛ kú Ujúda mɛ́mla ācɛ kú Ujerúsālɛm ŋ́ mā ā? Ije nɛ̄ Umósīsi ɔ̄cocɛ̄hɔ̄ kú Óndú da uwá kéē géē gbā iháyí dóódu, kú úklɔ́ kú Agblīihɔ-nɛ̄hi kú Óndú ā ā.”

⁷Ohígbū ka ācɛ nēe gē yɛce Atálīya, ɔnyā obɔ̄bí mɛ́mla akwuna ɔ́ɔmā, le Agblīihɔ-nɛ̄hi ā bīya. É klla le iyó otīihɔ kú nū ōhī kpó gaá gbā ubáalu ɛ̄gbā.

⁸Anɔ́ɔ Ujówāsi le da ācɛ Ulífāyi ā kéē lɛ ikpati nēé géē kpó ije nɛ̄ ācɛ í da ā tū ɔ̄ ā gbā, cɛ́ɛ́ kéē kwú ɔ̄ ú háyi okómpinu kú Agblīihɔ-nɛ̄hi ā.

⁹Anɔ́ɔ é lɛ ɛhɔ̄ tū fu ācɛ kú Ujúda mɛ́mla ācɛ kú Ujerúsālɛm dóódu ka ije kú Agblīihɔ-nɛ̄hi kú Óndú ā nɛ̄ Umósīsi ɔ́ɔ hɛ́ lɛ uwá ipú ígbíli ā, ɛ́ɛ́ le bī wā í kpó tū ipú ikpati kú Agblīihɔ-nɛ̄hi ā.

¹⁰Ɛ̄nyā he aígabɔ̄ mɛ́mla ācɛ kú Ujúda ɔtū nɛ̄hi, anɔ́ɔ é le ije kú uwā kpó wā í le ikpati ā mu á.

¹¹Ɛ̄cī dóódu, ācɛ Ulífāyi ā gē je ikpati ā gé lɛ ɔ̄cɛ nōo gē leyīkwu ɔ́ ā. Eko dúú nɛ̄ ó kwú mu, ɔmálɛ otɔ́kpá kú ɔlɛ́ ɔcɛ́ ā mla ɔ̄cɛ okwɛyí kú otrɛ̄yí kú ācogwɛ́ɛya ā gē le ije ā kpó wɛ̄ɛcɛ, cɛ́ɛ́ ó le ɔ́ gbaáluka klla kwú ikpati ā ú kwúcē ga ɛgīyí nū. É le ije nēé gē bī le yúklɔ́ kú Agblīihɔ-nɛ̄hi ā lɛ nwuné ŋmá ɔwɛ nyā.

¹²Ɔcɛ́ ā mɛ́mla Ujehóyāda gē je ije ā lɛ ācɛ nēe gē leyīkwu úklɔ́ kú oōgllayá kú Agblīihɔ-nɛ̄hi ā, cɛ́ɛ́ kéē bī ɔ̄ le pla ācɛ ogbɛ̄cɔ̄, ācogbɔ̄cí, ācɛ oyúklɔ́ oje mɛ́mla acogwínu, kéē lɛ Agblīihɔ-nɛ̄hi ā gílayá.

¹³Odúúdú ācoyúklɔ́ kú Agblīihɔ-nɛ̄hi ā yúklɔ́ nɛ̄hi, anɔ́ɔ é le Agblīihɔ-nɛ̄hi ā gílayá bɛ̄ɛka ɛ́gɛ́nɛ̄ ó tɛtɛ lɛ eko nɛ̄ Usólōmɔn gwó ɔ̄ ā.

¹⁴Abɔ̄ é le úklɔ́ kú uwá yá kwɛyí ā, é kwú oje udɔ, ugóolu (oje ɔdɔ), mɛ́mla oje nɛ̄hɛ́ nōo hile ā ú kpó lɛ ɔcɛ́ mɛ́mla Ujehóyāda, anɔ́ɔ é bī ɔ̄ le yá ocíbú mɛ́mla iyó kú Agblīihɔ-nɛ̄hi kú Óndú ā igbɔhá á. Eko nɛ̄ Ujehóyāda yēeyī gaá kwu ā, é bá ī gwɛ́ɛya ipú Agblīihɔ-nɛ̄hi kú Óndú ā eko dóódu.

¹⁵Eko nɛ̄ Ujɛhóyāda kwú pīya iháyí ofu ɛhīlī ce igwó ā, ó gekwú.

¹⁶Anɔ́ɔ é kwú ɔ̄ ú nyi ikpámílī kú aɔ́cɛ́ ohígbū úklɔ́ nōo yá lɛ Ɔwɔicō mɛ́mla ācɛ kú Ísrɛ̄lu ipu Agblīihɔ-nɛ̄hi kú Óndú ā.

¹⁷Ɔkwɔɔkwu nɛ̄ Ujehóyāda gekwú ā, anyākwɔ́cɛ kú Ujúda je unwalu lɛ Ujówāsi jāā gbéeko nōo gbɔɔ́ ō jāhɔ̄ lɛ ɛlā nēé gē nwū ɔ̄ ā.

¹⁸Anɔ́ɔ é gbɛ̄ɛ̄gbā lɛ Óndú ā, Ɔwɔicō kú aádáádā uwā ipú Agblīihɔ-nɛ̄hi kú Óndú ā ɛ́ɛ́ gɛ ŋ́ má. Anɔ́ɔ é gbɔɔ́ ō pā ɛcí klla gbɔɔ́ ō gbā ɛcí nēé hī ka Ássɛ̄ra ā ɛ̄gbā. Ɔ́bíipú nēé bī ā le wú Óndú ā ɔtū nɛ̄hi, anɔ́ɔ ó le cɔ̄nū nɛ̄hi lɛyíkwu Ujúda mɛ́mla Ujerúsālɛm.

¹⁹Óndú ā le ācomɛ́ɛbɛ tɛ̄hɔ̄ fu uwá kéē kwúcē wā ɛgiyí anúɔ, amáŋ é bī ɛlā ā yúklɔ́ ŋ́.

²⁰Anɔ́ɔ alelékwū kú Óndú ā gaá kwú Usekaríya, ɔyí kú Ujehóyāda ú, anɔ́ɔ ó gaá háyi ɛga nɛ̄ ācɛ géē má ɔ̄ ā. Anɔ́ɔ ó le ɛgba dɛ kahíníī, “Óndú ā gē da aá ɔ̄kā, ɔdā nōo yá ɛ́ɛ́ nɛ̄ aá tá ō tɛ́yí wāajɛ lɛ ɔ́, nɛ̄ aá gē bī ífi wā í klá īyī aá ā. Abɔ̄ aá le igbīhi cē kwu Óndú ā, Óndú ā le igbīhi ce kwu aá dúú ɛɛ́.”

²¹Anɔ́ɔ Ujówāsi mɛ́mla ācɛ kú Ujúda ā le ujɔ tū kéē kwú Usekariya ú ŋmó, anɔ́ɔ ɔcɛ́ ā le ɔ́da je kéē lɛ ɛcɔ̄ tá klá ɔ́, anɔ́ɔ é le ɛcɔ̄ tá klá ɔ́, kwú ɔ̄ ú ŋmó tá ódúdɔ̄lɛ́ kú Agblīihɔ-nɛ̄hi ā.

²²Ɔcɛ́ ā kwú mlanyī úklɔ́ ogbonɛnɛ nɛ̄ Ujehóyāda, ádā kú Usekaríya yá lɛ ɔ́ ā, anɔ́ɔ ó cɛ̄ lɛ ācɛ le Usekaríya ŋmó. Eko nɛ̄ Usekaríya yɔ̄ ī kwú ā, ó le ɛgba dɛ̄ ka, “Óndú ā kóō lɛ ɔdā nɛ̄ aá gē yá nyá má, cɛ́ɛ kóō lɛ ulé nū cíla aá.”

²³Eko nɛ̄ ɔgwā le gbo iháyí ɔ́ɔmā ā, ācɛ kú Usírīya gaá le ɛfú kpó tá Ujúda mɛ́mla Ujerúsālɛm anɔ́ɔ é le uwá yálé klla le ɛyí nɛ̄hi kú uwā kpó ŋmó. É le iyó kú uwā kpó ga Udamáskɔsi.

²⁴Abɔ̄ aícɔ́ɔja kú Usírīya í lɛ ɛwa ŋ́ nááná a, Óndú ā bī uwā le ɛwa kú aícɔ́ɔja kú Ujúda yálé. Óhígbū ka é kwúcē ŋmá ɛgiyí anú nōo wɛ Óndú, Ɔwɔicō kú aádáádā uwā ā. Ɔwɛ nyā, nɛ̄ Óndú ā bī le yá Ujówāsi italā á.

²⁵É le Ujówāsi yá ágbe nɛ̄hi ɔgbɛ́fú ā dúú, abɔ̄ aícɔ́ɔja kú Usiríya nyɛ̄ɛ̄ ŋmá Ujúda ā, ó gaá gwutá ipú inu yɔ̄ í tá ágbe kú nū. Anɔ́ɔ aígabɔ̄ kú nū ɛpa lɛ ujɔ̄ tū gaá kwú ɔ̄ ú ŋmó tá ipú inu abɔ́ɔ kwɛyí ɔyí kú Ujehóyāda, ɔ̄cogwɛ́ɛya nɛ̄ ó je ŋmó ā. É kwú ɔ ú nyi igelī nɛ̄hi kú Udéfīdi, amáŋ é nyi ɔ́ ikpámīlī kú aɔ́cɛ́ ŋ́.

²⁶Ācɛ nēe tū ujɔ je ɔ́ ŋmó ā wɛ Usádi, ɔyí kú ɔnyā kú Ámɔn éyi nēé hī ka, Ussímīitu, mɛ́mla Ujehósābadi, ɔyí nɔnyā éyi kú Umówābu nēé hī ka, Usímīriti a.

²⁷Odúúdú ɔ̄kā o hile kú Ujówāsi ā, kwu ɛbɛ nēé má lɛyíkwu ɔ́, mɛ́mla ɛ́gɛ́nɛ̄ ó tū Agblīihɔ-nɛ̄hi kú Óndú ā gwó lɛ ā, é lɛ ɔ́ tá tāajɛ ipú ɔkpá kú ɔ̄kā kú aɔ́cɛ́. Anɔ́ɔ ɔyí nū Amásīya lɛ ɔcɛ́ lé kwɛyí nū á.