Read idoma 2 ÚKLƆ́ KÚ AƆ́CƐ́ 25 Bible Online

2 ÚKLƆ́ KÚ AƆ́CƐ́ 25 - idoma bible

2 ÚKLƆ́ KÚ AƆ́CƐ́ 25

¹Amásīya wɛ iháyí ofu cɛ̄hɔ̄ ɛɛ́ nɛ̄ ó lé ɔcɛ́ kú Ujúda á. Ó gbō ācɛ kú Ujúda mɛ́mla Ujerúsālɛm iháyí ofu cahāanɛ.

²Ó yá ɔdā okpaakpa nōo he Óndú ā ɔtū.

³Ɔkwɔɔkwu nɛ̄ ó gaá ce akpa kú ɔcɛ́ ā, ó kwú ācɛ ɛpa nēe ŋmó ádā nū ā ú kpó ŋmó.

⁴Amáŋ Amásīya í kē ŋmó ayí uwā mla uwá ŋ́. Ohígbū ka ó yɛce íne nɛ̄ Óndú ā je lɛ Umósīsi kahíníī, “É gáā ŋmó ɛ́nɛ́ mɛ́mla ádā kwɛyí ɔdōbɔ̄bí nɛ̄ ayí uwā ŋ́, ɛɛ́ nēé gē ŋmó ayí kwɛyí ɔdōbɔ̄bī kú ádā mɛ́mla ɛ́nɛ́ ŋ́. É gē ŋmó ɔnyɔɔnyɛ kwɛyí ɔdōbɔ̄bí nɛ̄ ó yá ā.”

⁵Amásīya le odúúdú ācɛ kú Ujúda mɛ́mla ācɛ kú Ubɛ́njamīn kɔ̄ ígwíígwu kú aícɔ́ɔja. Anɔ́ɔ ó le aótrɛ̄yí fu lɛ ígwu kú ācɛ úlā ɛpa cofu igwó (1,000), igwú kú ācɛ ofɛhɔ̄ (100). Odúúdú ācɛ Ujúda mɛ́mla Ubɛ́njamīn nēe ŋmá iháyí ofu gɔbū ā wɛ ipú aícɔ́ɔja ā dúú. Odúúdú uwā wɛ ācɛ úlá bá ɛga úlā ce úlā ofu igwáhāapa cigwó (300,000). Ɛjɛ̄ɛ̄jī uwā wɛ ígwu kú ayípōklóbīya nēe le tútū kéē bī óbō mɛ́mla ɔkplɛ́fú, ɔtā mɛ́mla ɔyī le kpɛ́fú.

⁶Ó klla bī ɛkpa kú ije le pūla aícɔ́ɔja úlā ofigwɛ́ɛpa cigwó (100,000) ŋmá ɛgiyí ācɛ Ísrɛ̄lu.

⁷Amáŋ ɔ̄comɛ́ɛbɛ kú Óndú ā gaá da ɔ́ kahíníī, “Ā híīī bī aícɔ́ɔja kú Ísrɛ̄lu nyɔ̄ mla iyī uwɔ ŋ́, ohígbū kú Óndú ā í yɔ̄ mla ipɔ́ɔma kú ācɛ ɛhícō ā ŋ́.

⁸A gbɛlá ka uwá ɔ́ɔ géē lɔfú tū anúɔ iyē ɛfú ā glá, amáŋ Óndú, Ɔwɔicō í cɛ̄ lɛ ɔ̄cɛ ī yá ɛfú lé klla ī cɛ̄ lɛ ɛfú gē yá ɔ̄cɛ lé á. Óndú ā géē cɛ̄ lɛ aólɛlā kú uwɔ yá uwɔ lé, ɔ́dāŋ ka é le yɛ mla awɔ.”

⁹Anɔ́ɔ Amásīya da ɔ̄comɛ́ɛbɛ ā ka ulé kú ācɛ ā nɛ̄ anúɔ gbā ā bɛ́ɛ? Anɔ́ɔ ɔ̄comɛ́ɛbɛ ā tá ɔ̄ ohi ka Óndú ā ɔ́ɔ géē je ije nōo fíyɛ́ ɔ́ɔmā kwúcē lɛ ɔ́.

¹⁰Anɔ́ɔ Amásīya kwú ācɛ nōo pūla ŋmá Ísrɛ̄lu ā ú kpó nū ga ɔlɛ́. Anɔ́ɔ é kwúcē le tá ɔlɛ́ uwā mla ɔtū nōbí nɛ̄hi mɛ́mla íwɔ́tū kú ācɛ Ujúda ā.

¹¹Anɔ́ɔ Amásīya kwú ɔtú kú nū ú yéékpónú anɔ́ɔ ó le aícɔ́ɔja kú nū kpó gaá kwāajɛ ɔpɛ́ nēé hī ka ɔpɛ́ kú ɔmā á. Abɔ́ɔ ā, é le ɛfú kpó tá aólɛlā kú uwā, anɔ́ɔ é ŋmó aícɔ́ɔja kú Ɛ́dɔm úlā ofu cigwó (10,000).

¹²É le aícɔ́ɔja úlā ofu cigwó (10,000) ɔhá kpó kwú ga ɔlɛ́ uwā. Anɔ́ɔ é lɛ ācɛ nēé kpó kwú ā kpó ga ɔ́kɔngɔ̄ kú ɛyí ɛfu kú Ussɛlá ā, anɔ́ɔ é le uwá kpó tɛ́ɛcɔ̄ ŋmá abɔ́ɔ wā í ca klá ɛcɔ̄ ɛháajɛ, cɛ́ɛ́ kéē lɛ pɛ́ gekwú.

¹³Amáŋ aícɔ́ɔja kú Ísrɛ̄lu nɛ̄ Amásīya kpó nū ga ɔlɛ́ ā le pɛ́ nyɔ̄ í lɛ ɛfú kpó tá aígelī kú Ujúda nēe bá ɔtāhɛ̄ kú Usamérīya mɛ́mla Ubɛti Uhórɔn ā. É le ācɛ kú Ujúda úlā ahāapa ce ofu igwó (3,000) kpó ŋmó klla kwú iyó kú uwá ú kpó wu ga ɔlɛ́ uwā.

¹⁴Eko nɛ̄ Amásīya pīyɛyí ŋmá ɛfú kú Ɛ́dɔm nɛ̄ ó yálé ā, ó le aɛ́cí kú ācɛ Ɛ́dɔm kpó gaá kpó tāajɛ Ujerúsālɛm. Anɔ́ɔ é gbɔɔ́ ō gbā uwā ɛ̄gbā klla gbɔɔ́ ō yi ɔtūlalī ɔlá lɛ ɔ́ dúú.

¹⁵Ɔdā nēé yá nyā le tū Óndú ā íwɔ́tū nɛ̄hi, anɔ́ɔ ó le ɔ̄comɛ́ɛbɛ éyi tɛ̄hɔ̄ fu Amásīya kóō da ɔ́ ka ɔdíyá nēé gē pā ɛcí kú éwɔhá nɛ̄ ó kōō nya ācɛ ɔlɛ́ nū tá ŋmá abɔ̄ kú nū glá ŋ́ mā ā. Anɔ́ɔ ɔ̄comɛ́ɛbɛ ā da ɔ́ ka anúɔ le jé ka Óndú ā ɔ́ɔ le tútū kɔ́ɔ̄ je ɔ́ yíífi ɛɛ́, anú ɔ́ɔ yá ɛɛ́ nɛ̄ ɔ́ cɛ̄ lɛ anúɔ kɛlā ŋ́ má.

¹⁶Anɔ́ɔ abɔ̄ ó yɔ̄ í kɛlā gɔbū ā, ɔcɛ́ ā da ɔ́ ɔ̄kā kahíníī, “Alɔ le uwɔ yá ɔ̄cɛ o nwū ɔcɛ̄ ɛlā nɛɛ? Lɛ okónu klá cíí. Ɔdíyá nāa tíne kéē lɛ uwɔ ŋmó tónū icííci ā mɛ́ɛ̄?” Anɔ́ɔ ɔ̄comɛ́ɛbɛ ā kwú okónu ú klá cíí, amáŋ ó da ɔ́ kahíníī, “N jé ka Ɔwɔicō kwú abɔ̄ ú kwú ɔtū kóō kwú ɔ̄ ú yíífi, ɔ́ɔma yá ɛ́ɛ́ nɛ̄ á jāhɔ̄ lɛ ɛlā kú um ŋ́ má.”

¹⁷Amásīya le ojuju yá mla aígabɔ̄ kú nū, anɔ́ɔ ó lɛ ɛhɔ̄ tū fu Ujɛhówāssi ɔcɛ́ kú Ísrɛ̄lu, ɔyí kú Ujɛ́hōhassi, ɔyɔ́ɔ́yí kú Ujéhu kɔ́ɔ̄ wā kú aá kpɛ́fú.

¹⁸Anɔ́ɔ Ujɛhówāssi le ɛhɔ̄ tū fu Amásīya kahíníī, “Ɛ̄cī éyi, ɔcí ujē kú ɛyí ɛfu kú Ulébānɔn le ɛhɔ̄ tū fú ulóko kú ipú ūpū kú Ulɛ́bānɔn ka, ‘Kwú ɔyí uwɔ ú gā um ká n̄ le lɛ lɛ ɔyí um.’ Anɔ́ɔ ɛbɛ́ ipácí nɛ̄hi gaá yɛ kwú ɔcí ujē ā ú da tāajɛ á.”

¹⁹Ó klla da ɔ́ kahíníī, “Amásīya, a yɔ̄ ī gwō ka anúɔ lɛ ācɛ kú Ɛ́dɔm yálé, ɔ́ɔmā kóō jé uwɔ, cɛ́ɛ́ ká ā klá ɔlɛ́ uwɔ mla ɔbɔ́cɛ kú uwɔ cíí mɛ́ n̄. Ɔdíyá nāa gē nyɔ̄ ī pūla unwalu nōo géē bī ífi mɛ́mla ikwū wā í klá uwɔ mla ācɛ ɔlɛ́ uwɔ ā?”

²⁰Amáŋ, Amásīya tá kóō jāhɔ̄, ohígbū ka Óndú ā le tútū kóō kwú ɔ̄ ú yíífi ohígbū ɛcí kú ācɛ Ɛ́dɔm nɛ̄ ó kpó wā ɔlɛ́ gē pā ā.

²¹Anɔ́ɔ Ujɛhówāssi, ɔcɛ́ kú Ísrɛ̄lu le tá ɛfú mla Amásīya, ɔcɛ́ kú Ujúda á. É gaá le jīla ɔpɛ́ kú Ubɛti Ussémessi ipú ajɛ kú Ujúda.

²²Ísrɛ̄lu le aícɔ́ɔja kú Ujúda yálé, anɔ́ɔ aícɔ́ɔja kú Ujúda kwú pɛ́ kwu ga ɔlɛ́ uwā á.

²³Ujehōwāssi le Amásīya kwú, anɔ́ɔ ó kwú ɔ̄ ú ga ɔlɛ́ nū Ujerúsālɛm. Abɔ́ɔ ā ó gaá le ɔdɔ kú Ujerúsālɛm kpó wúla tāajɛ ŋmá okónu igá kú Ɛ́frem jāā ga okónu ɔ̄kíkā kú igá ā, ipéeyī Amásīya. Olīkpō kú ɛga nɛ̄ ó ca ā lɛbɛ̄ɛka uyádi ofigwó ā.

²⁴Ó kwú odúúdú ugóolu (oje ɔdɔ), oje udɔ mɛ́mla oje nɛ̄hɛ́ kú Agblīihɔ-nɛ̄hi ā ú kpó ga Usamérīya. Ó klla kwú odúúdú iyó ɔhá kú Agblīihɔ-nɛ̄hi kú Óndú ā mɛ́mla ákú agblɔ̄cɛ́ nɛ̄ ayí kú ipɔ́ɔma kú Obédi Ɛdɔm gē gbō ā ú kpó ga Usamérīya dúú. Ó klla lɛ ācɛ kpó kwu ŋmá Ujerúsālɛm ga Usamérīya.

²⁵Amásīya, ɔcɛ́ kú Ujúda yēeyī iháyí igwɛ́ɛhɔ̄ igbīhi nɛ̄ Ujɛhówāssi, ɔcɛ́ kú Ísrɛ̄lu ā gekwú ā.

²⁶Odúúdú ɔ́dā o hile ɔhá nɛ̄ Amásīya yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda mla Ísrɛ̄lu.

²⁷Ācɛ gbɔɔ́ ō yá ojuju kéē je ɔ́ ŋmó ŋmífī nōo gbo ɔ́ ō yá īkpɛ́yí olɔfu tá Óndú ā. Anɔ́ɔ ó le kwú ŋmá Ujerúsālɛm gaá tayínū igelī nɛ̄hi kú Ulákissi. Amáŋ aólɛlā kú nū ā tá ɔgwu nū jāā ga abɔ́ɔ, gaá kwú ɔ̄ ú ŋmó.

²⁸Anɔ́ɔ é kwú okwū kú nū ú ce ɔnya ŋmá abɔ́ɔ ga Ujerúsālɛm gaá kwú ɔ̄ ú nyi ikpámílī kú aɔ́cɛ́, ipú igelī nɛ̄hi kú Udéfīdi.