Read idoma 2 ÚKLƆ́ KÚ AƆ́CƐ́ 26 Bible Online

2 ÚKLƆ́ KÚ AƆ́CƐ́ 26 - idoma bible

2 ÚKLƆ́ KÚ AƆ́CƐ́ 26

¹Ācɛ kú Ujúda kwú ɔyí kú Amásīya Usíya nōo wɛ iháyí igwɛ́ɛhīlī ā ú cɔcɛ́ kwɛyí Ádā nū.

²Usíya mīyɛ igelī nɛ̄hi kú Ɛ́lāti ŋmá abɔ̄ kú ācɛ nēe mīyɛ ɔ́ gbɔbū ā, le ɔ́ tú gwó ɛ̄yīpɛ̄, anɔ́ɔ ó kwú ɔ̄ ú kwúcē lɛ ācɛ kú Ujúda igbīhi ikwū kú Amásīya, ɔcɛ́ ā.

³Usíya lé ɔcɛ́ eko nɛ̄ ó wɛ iháyí igwɛ́ɛhīlī ā, ó ce ɔcɛ́ Ujerúsālɛm iháyí ofu cɛpa. Ɛ́nɛ́ nū wɛ Ujekolíya, nōo ŋmá Ujerúsālɛm ā.

⁴Ó yɛ tííkpa kú ádā nū ipú ɔdā okpaakpa ō yá īpéyī kú Óndú, Ɔwɔicō

⁵eko nɛ̄ Usekaríya nɛ̄ o gē nwū ɔ̄ kóō lɛ ojīlīmā ce Óndú ā yēeyī gaá kwu ā, ó le ojīlīmā ce Ɔwɔīcō. Ɔdā nōo yá nɛ̄ ó gē le ojīlīmā ce Óndú ā, ó géē cɛ̄ lɛ ɔ́ jɛ̄ gɔbū ipú ɔdā dóódu nɛ̄ ó gē yá ā.

⁶Usíya le ɛfú kpó tá ācɛ kú Ufílīstiya. Ó le ɔdɔ kú igelī nɛ̄hi kú Ugáti, Ujamína, mɛ́mla Ássdɔ̄du kpó ca tāajɛ. Anɔ́ɔ ó le aígelī nɛ̄hi nēé le igá cē tū uwā ā kpó gwó kwu Ássidɔ̄du ajaajɛ mɛ́mla ɛga o hile kú ipú ajɛ kú Ufilístiya.

⁷Ɔwɔicō cɛ̄ lɛ ɔ́ lɛ ācɛ Ufílīstiya mɛ́mla ācɛ Árābu kú Ugɔ́baalu, mɛ́mla Umeyúnīte ā kpó yálé.

⁸Ó le Ámɔn yálé dúú. Anɔ́ɔ ācɛ Ámɔn gbɔɔ́ ō da ijɔ̄ɔ̄lɛ́ lɛ ɔ́ á. Ɔfú kú Usíya kwú nwuné nɛ̄hi klla le nyīla jāā kwu Íjīpiti.

⁹Ó yá ɛɛ́ kú ɔdɔ kú igelī nɛ̄hi kú Ujerúsālɛm ā kóō le lɔfú nɛ̄hi ā, ó le inɔ̄ɔda gwó kwu Ɔwɛ kú ɔ́kíkā mɛ́mla Ɔwɛ kú ɔpɛ́, mɛ́mla ɛga nɛ̄ ɔdɔ ā pīya yɛ ā.

¹⁰Ó klla gwó inɔ̄ɔda kwu ɛcɛ péee klla bū obugā alɛwa ohígbū kōó lɛ aálá alɛwa nɛ̄hi bá o yɛ ga ɛnɔ̄ɔ̄nɛ̄ kú ikpɛ́fu ā mɛ́mla ajɛ o tá gbādāā. Abɔ̄ ɛhɔ̄ he ɔ́ ɔtū kóō hí nɛ̄hi ā, ó le ɔfú tū aɔ́gɛ́ɛjí iyē kéē hɛ́ɛhɔ̄ kú ɔcí ufáyin mɛ́mla o je ajɛ olɔhi kú aípɔ́lɛ́ ā kpó hɛ́ɛhɔ̄.

¹¹Ó klla le aícɔ́ɔja alɛwa nɛ̄hi. Ujɛ́yɛlu mɛ́mla Umanásɛ gē tá ɔdā dóódu kú nū a tāajɛ lɛ ɔ́ á. Umaaníya gē leyīkwu uwá á. Odúúdú uwā wɛ (ācɛ o yúklɔ́) ɔlɛ́ ɔcɛ́ kpɛ́mm.

¹²Aótrɛ̄yí kú aícɔ́ɔja úlā ɛhīlī ce ofu igwó (2,600) gē leyīkwu aícɔ́ɔja kú nū á.

¹³Aícɔ́ɔja nēe bá ɛháajɛ kú uwā nēe gē kpó ɛdɔ ɛfú dóódu tá aólɛlā kú uwā glá ā wɛ, úlā bá ɛga ulā, ce úlā ofu igwáahātá ce ahātá ce ofu igwɛ́ɛhɔ̄ (307,000).

¹⁴Ó lɛ óbō, ɔkplɛ́fú, ɔtā, ɔyī, ítū mɛ́mla ɛcɔ̄ kú ítū, mɛ́mla iyɔ́fú dóódu kpó lɛ aícɔ́ɔja kú nū ā.

¹⁵Ó lɛ ācɛ ipú Ujerúsālɛm nōo yá umácíni ō tá ɔyī mɛ́mla ɛ̄nɛ̄ é gē bī tá ígbɛ́cɔ̄ ŋmá ɛyí inɔ̄ɔda mɛ́mla ɔ́kíkā kú ɔdɔ kú igá kú igelī nɛ̄hi ā. Anɔ́ɔ ó le lóofu kwu ɛga dóódu á. Ó klla kwú pīya ɔcɛ́ o lɔfú nɛ̄hi, ohígbū ka Ɔwɔicō tá ɔ̄ abɔ̄ nɛ̄hi.

¹⁶Amáŋ eko nɛ̄ Usíya le ɔfú lɛ nɛ̄hi ā, ó gbɔɔ́ ō yɔ́bɔ́ɔcɛ, nōo wɛ ɔkwu kú ífi kú nū ā. Ó le Óndú, Ɔwɔicō iye tēelihɔ o ŋmá lɛ oō nyɔ̄ í yi ɔtulalī ɔlá abɔ̄yī nū, ɛyí ede kú Agblīihɔ-nɛ̄hi kú Óndú ā.

¹⁷Asárīya, ɔ̄cogwɛ́ɛya ā, mɛ́mla ācogwɛ́ɛya ofɛnɛ ɔhá ā le pɛ́ nyɔ̄ gaá da ɔ́ kahíníī,

¹⁸“Usíya, á lɛ íkwu dúúmā káā yi ɔtulalī ɔlá lɛ Óndú ā ɛyí ede ŋ́. Ācogwɛ́ɛya nēe ŋmá ipɔ́ɔma kú Árɔ̄ni ā ōfōōfū uwā nēé le anɔ̄ tū uwā ɛyí kéē yi ɔtulalī ɔlá á. Nyɛ̄ɛ̄ ŋmá ɛga o tīihɔ ā. Ohígbū ka a le íne kú Óndú ā bīya ɛɛ́, Ɔwɔicō í klla gáā lɛ ojīlīmā ce uwɔ ɛ́ɛ́ gɛ ŋ́.’’

¹⁹Usíya le cɔ̄nū nɛ̄hi mla ācogwɛ́ɛya ā, abɔ́ɔ ó háyi le ocíbú kú ɔlá kú ɔtulalī ā wu abɔ̄ kpɔ́ ā. Anɔ́ɔ ɔkwɔɔkwu ɔ́ɔmā, agwú kwú bɛ̄cɛ gaá bá ɔ̄ údɔ̄bū.

²⁰Anɔ́ɔ Asárīya mɛ́mla ācogwɛ́ɛya o hile ā leyīkwu ɔ́ údɔ̄bū cíí ipú ufi, anɔ́ɔ é kwú ɔ̄ ú nū ga ɛcɛ fíyaa ŋmá ipú Agblīihɔ-nɛ̄hi ā. Ohígbū ka Óndú ā le italā yá ɔ̄ ɛɛ́.

²¹Usíya kwú gbagwú ŋmá eko ɔ́ɔmā jāā gbéeko nɛ̄ ó kwú. Ohígbū agwú kú nū ā, ó má lā ɛga ɛyɛ́ɛ́yí hɛ ācɛ o hile ā tá, ó klla wā ipú Agblīihɔ-nɛ̄hi kú Ɔwɔicō glá ɛ́ɛ́ gɛ ŋ́, ɛɛ́ nɛ̄ ó gē yúklɔ́ kú ɔcɛ́ kú nū dúúmā glá gɛ ŋ́. Anɔ́ɔ ɔyí nū Ujótām gbɔɔ́ ō gbāājɛ kú Ujúda mɛ́mla Ujerúsālɛm lɛ ɔ́ á.

²²Ɔ̄comɛ́ɛbɛ Ayisáya, ɔyí kú Amɔ̄si le odúúdú ɔdā nɛ̄ Usíya yá, eko kú ɔcɛ́ kú nū ā tá tāajɛ kpɛ́mm.

²³Usíya gekwú, anɔ́ɔ é kwú ɔ̄ ú nyi únóji ɔlamu, ohígbū ōcē kú agwú nōo yá ɔ̄ ā. É nyi ɔ́ okwū ɔcɛ́ ŋ́. Anɔ́ɔ ɔyí nū Ujɔ́tam lɛ ɔcɛ́ lé kwɛyí nū á.