Read idoma 2 ÚKLƆ́ KÚ AƆ́CƐ́ 28 Bible Online

2 ÚKLƆ́ KÚ AƆ́CƐ́ 28 - idoma bible

2 ÚKLƆ́ KÚ AƆ́CƐ́ 28

¹Eko nɛ̄ Áhāsi wɛ iháyí ofu ā, é kwú ɔ̄ ú lé ɔcɛ́ kú Ujúda. Ó ce ɔcɛ́ Ujerúsālɛm iháyí igwɛ́ɛhīlī dúú. Ó yɛ tííkpa kú aádáádā nū Udéfīdi, ɔcɛ́ ā ŋ́.

²Amáŋ, ikɔkɔ ɔ́ɔmā ó kwú yɛ tá ɔwɛ obɔ̄bí kú aɔ́cɛ́ kú Ísrɛ̄lu ā. Ó kōō le ojibó kú ɔwɔ nēé hī ka Ubáalu ā ma kwaajɛ dúú.

³Ó klla gē yi ɔtulalī ɔlá lɛ Ubáalu ɔpɛ́ kú Uhínnɔm, klla kwú ɔyí abɔ̄yī nū nɔ̄nyīlɔ ú ŋmó gwɛ́ɛya ō yɔlá dúúdú lɛ ɛcí kú ubáalu ā dúú. Ó klla yɔ̄ í yá ucē kú ācɛ ōpɛ̄cí kú ajɛ abɔ́ɔ, nɛ̄ Ɔwɔicō nū bɛ̄cɛ ŋmá ajɛ ɔ́ɔmā hīla ācɛ kú Ísrɛ̄lu abɔ́ɔ é yɔ̄ gē wā ā.

⁴Ɔkwu ɔcí dóódu mɛ́mla ikpɛ́cí dóódu nēe gwó bá ɛyí ɛfu ipú ajɛ kú Ujúda ā, ó gē yi ɔtulalī ɔlá klla ī kpó odée gwɛ́ɛya lɛ ɛcí kú nū ā.

⁵Ohígbū íne nɛ̄ Áhāsi, ɔcɛ́ bīya ā, Óndú, Ɔwɔicō kú nū cɛ̄ lɛ ɔcɛ́ kú ācɛ Usiríya kwú ɔ̄ ú yálé ɔgbɛ́fú. Ɔcɛ́ ā klla le ācɛ alɛwa nɛ̄hi kú ācɛ Ujúda kpó ga Udamáskɔ̄si kéē wɛ aálagbá kú ɛfú. Óndú ā klla cɛ̄ le ɔcɛ́ kú Ísrɛ̄lu le ɔ́ yálé klla le ācɛ ɔlɛ́ nū alɛwa kpó ŋmó ɔgbɛ́fú.

⁶Anɔ́ɔ Upéka, ɔyí kú Uremálīya lɛ Áhāsi yálé klla le aícɔ́ɔja kú Ujúda nēe lɛ ɔtú nɛ̄hi ā, úlā ofu igwɛ́ɛhɔ̄ (120,000) kpó ŋmó ɛ̄cī ékpónú. Ohígbū ka ācɛ kú Ujúda kwú igbīhi ú cē kwu Óndú, Ɔwɔicō kú uwā.

⁷Usíkiri, éyi kú aícɔ́ɔja olɔfú nɛ̄hi kú Ísrɛ̄lu le ɔyí kú Áhāsi Umaásēya ŋmó, mɛ́mla Asiríkam otrɛ̄yí kú úklɔ́ kú agblɔ̄cɛ́, mɛ́mla Ɛlkána nōo kpókónu ce ɔ́ ā.

⁸Náaná nɛ̄ Ujúda mɛ́mla Ísrɛ̄lu wɛ ayínɛ́ iyī uwā a, Ísrɛ̄lu le ācɛnyā mɛ́mla ayípɛ̄ kú Ujúda úlā ba ɛga úlā ce úlā ofɛhɔ̄ (200,000) kpó kwú kéē wɛ aálagbá kú ɛfú ga ɔlɛ́ uwā Usamérīya. Ó klla le iyó kú Ujúda kpó wu ga ɔlɛ́ uwā Usamérīya dúú.

⁹Óbɛ́di, ɔ̄comɛ́ɛbɛ kú Óndú ā nōo lā Usamérīya ā, jīla ācɛ kú Ísrɛ̄lu ɔwɛ, abɔ́ɔ é bá ī wā ɔlɛ́ mla aálagbá kú ācɛ Ujúda nēe kpó kwú ŋmá Ujúda ā. Abɔ̄ é gáā bēé ga igelī nɛ̄hi ā, anɔ́ɔ ó da uwá kahíníī, “Óndú, Ɔwɔicō kú aádáádā aá le cɔ̄nū mla Ujúda, ohígbū ɔ́ɔmā, ó cɛ̄ lɛ aá lɛ uwá yálé. Amáŋ Óndú ā kē pó ɛ́gɛ́nɛ̄ aá bī íwɔ́tū le ŋmó ācɛ alɛwa kú uwá lɛ ā.”

¹⁰Ó klla da uwá kpɔ́ kahíníī, “Aá ī tíne kú aá kwú anyā mɛ́mla ayípɛ̄ kú Ujúda mɛ́mla ákú Ujerúsālɛm ú kpó pīya ɔfiyɛ kú aá. Aá jé ka aá abɔ̄yī aá le íne kú ami nōo wɛ Óndú bīya dúú ŋ́ nɛɛ?

¹¹Aá pó, aálagbá mɛ́mla aɔ́fiyɛ nɛ̄ aá kpó kwú ŋmá Ujúda ā wɛ ayínɛ́ aá nɛ̄ n. Aá mā uwā tá kéē kwúcē ga Ujúda mɛ́mla Ujerúsālɛm, ámāŋ Óndú ā géē bī íwɔ́tū nɛ̄hi lɛ yá aá italā.”

¹²Anɔ́ɔ aígabɔ̄ kú Ísrɛ̄lu ōhī, Asárīya, ɔyí kú Ujehóhānan, Ubɛrɛkíya, ɔyí kú Umésilemɔtu, Ujɛhiskíya, ɔyí kú Ussálum mɛ́mla Amása, ɔyí kú Uhádilayi klla le ucē nɛ̄ aícɔ́ɔja kú Ísrɛ̄lu yá ɔ́ɔmā ŋmó ɛpɔ̄bí dúú.

¹³Anɔ́ɔ é da aícɔ́ɔja ā kahíníī, “Aɔ́fiyɛ nɛ̄ aá kwú ɔ́ɔmā, aá híī bī uwā wā amānyā ŋ́. Ohígbū ka alɔ abɔ̄yī alɔ le ɔ́bíipu bī tū Óndú ā jɛ̄ nōo cíkā ō yá alɔ italā dúú. Aá klla bá ī yá ɔdā nōo géē yá ká alɔ lé ɛpɔ̄bí tū ɔ̄ kpɔ́.”

¹⁴Anɔ́ɔ aícɔ́ɔja ā kwú ācɛ nēe kwú ŋmá Ujúda ā ú kpó lɛ ācɛ ɔlɛ́ uwā mɛ́mla aótrɛ̄yí kú uwā á.

¹⁵Anɔ́ɔ é le aígabɔ̄ ɛnɛ ā fu cɛ́ɛ́ kéē lɛ īlī kpó lɛ ācɛ nēe tóohɛ́ɛwa, mɛ́mla áblákpá, mɛ́mla ɔdōgwá mɛ́mla ɔdōlé kpó lɛ ācɛ kú Ujúda ā, ŋmá ipú aíyó nēé wu ŋmá ɔgbɛ́fú ā. É le anɔ̄ tū ágbe kú uwā, é klla le ācɛ nēe gbagbafú ā kpó ce ijakī kú uwā. É le odúúdú ācɛ nēé kwú ŋmá ɔgbɛ́fú ā, kpó kwúcē le tá ajɛ kú Ujérīko, igelī nɛ̄hi kú ɔcí alī. Anɔ́ɔ ācɛ kú Ísrɛ̄lu kwúcē le tá ɔlɛ́ uwā Usamérīya á.

¹⁶Áhāsi le ɛhɔ̄ tū fu ɔcɛ́ kú Asírīya kɔ́ɔ̄ wā í tá anúɔ abɔ̄,

¹⁷Ohígbū ka ācɛ kú Ɛ́dɔm klla le ɛfú kpó wā í gwū ācɛ kú Ujúda klla le ācɛ alɛwa kú uwā kpó kwú bɛ̄ɛka aálagbá ā ga Ɛ́dɔm.

¹⁸Eko ɔ́ɔmā dúú ā, ācɛ kú Ufilístiya bā gē kpɛ́fú tá igelī nɛ̄hi kú ɛnɔ̄ɔ̄nɛ̄ kú ikpɛ́fu kú ācɛ kú Ujúda ā. É mīyɛ Ubɛti Ussímɛ̄ssi, Áíjālɔn, Ugɛdɛ́rōti mɛ́mla igelī nɛ̄hi kú Usóko, Utímina, mɛ́mla Ugímso, mɛ́mla odúúdú ígelī nɛ̄ŋcɛ́ kú uwā ŋmá ɛgiyí ācɛ kú Ujúda klla má lā abɔ́ɔ.

¹⁹Aɔ́dā nēe bá nyā yá ācɛ kú Ujúda, ohígbū ka Áhāsi, ɔcɛ́ kú Ujúda ā le íne kú Óndú, Ɔwɔicō kú nū bīya, ó klla ci ācɛ ɔlɛ́ nū ínoōbīya ŋ́ dúú.

²⁰Ikɔkɔ nɛ̄ Utigati Upilinésa, ɔcɛ́ nɛ̄hi kú Asírīya í tá Áhāsi abɔ̄ ā, ó kwú ɛyí bú kwu ɔ́ klla kwú ɔ̄ tá ipú unwalu fíyɛ́.

²¹Áhāsi gaá le ugóolu (oje ɔdɔ) kpó ŋmá ipú Agblīihɔ-nɛ̄hi, agblɔ̄cɛ́, mɛ́mla ɔlɛ́ odúúdú aígabɔ̄ kú nū, anɔ́ɔ ó kwú ú kpó gé lɛ ɔcɛ́ nɛ̄hi kú Asírīya á. Ɔdā nɛ̄ ó yá nyā nááná í kōō cē unwalu kú nū ā tū ŋ́.

²²Eko nɛ̄ unwalu ā le tá ágēnégēne kú nū ā, o klɔ́dɔ́ɔ́ nɛ̄ Áhāsi ɔcɛ́ kú Ujuda, jé ō bīya íne gɔbɔ̄ɔ̄bū á.

²³Ó gbo ɔ́ gwɛ́ɛya lɛ ɛcí kú ācɛ Usiríya nɛ̄ ō gáā yá ɔ̄ lé ā. Anɔ́ɔ ó ka ɛcí kú ācɛ Usiríya ɔ́ɔ tá uwá abɔ̄ ɛɛ́ nēé yá anúɔ lé á. Ó ka ohígbū ɔ́ɔmā, ɔ́dāŋ ka anúɔ lɛ ɛya gwó lɛ ɛcí ɔ́ɔmā, ɔ́ɔ géē tá anúɔ abɔ̄ dúú. Amáŋ ɔdā nɛ̄ ó yā le ífi bī wā í klá anú mɛ́mla éwo kú ɔlɛ́ nū.

²⁴Abɔ̄ ɛcí nōó gbɔɔ́ ō pā ā í bɔ̄bí tū ɔ̄ ŋ́ mā, ó gaá le odúúdú iyó kú Agblīihɔ-nɛ̄hi kú Óndú ā kpó ca nyɛŋɛnyɛŋɛ. Ó kwú Agblīihɔ-nɛ̄hi kú Óndú ā ú gwu klla le ede kú ɛcí kpó ma kwaajɛ ɛga dóódu kú Ujerúsālɛm.

²⁵Ó le ɛcí kpó ma kwaajɛ ɛga dóódu kú ipú aígelī nɛ̄hi mɛ́mla aígelī nɛ̄ŋcɛ́ kú Ujúda mɛ́mla Ujerúsālɛm. Ó klla le ikpɛ́cí kpó gwó tū ɔ̄, anɔ́ɔ ācɛ kú Ujúda gē gwɛ́ɛya klla gē yi ɔtulalī ɔlá lɛ aɔ́wɔ kú aéwɔhá á. Ó le iwɔ́tū kú Óndú, Ɔwɔicō kú aádáádā nū pi klá īyī nū.

²⁶Odúúdú ɔ́dā ohile ɔhá nɛ̄ Áhāsi yá ā, é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda mla Ísrɛ̄lu.

²⁷Áhāsi, ɔcɛ́ gekwú, anɔ́ɔ é kwú ɔ̄ ú nyi Ujerúsālɛm, amáŋ, é nyi ɔ́ ikpámílī kú aɔ́cɛ́ ŋ́. Anɔ́ɔ ɔyí nū Uhesekíya le ɔcɛ́ lé kwu ɛyí nū á.