Read idoma 2 ÚKLƆ́ KÚ AƆ́CƐ́ 29 Bible Online

2 ÚKLƆ́ KÚ AƆ́CƐ́ 29 - idoma bible

2 ÚKLƆ́ KÚ AƆ́CƐ́ 29

¹Uhɛsɛkíya le ɔcɛ́ kú Ujúda lé, eko nɛ̄ ó wɛ iháyí ofu cɛ̄hɔ̄ ā. Ó gbō ācɛ kú Ujúda ŋmá Ujerúsālɛm iháyí ofu ce ahāanɛ. Ɛ́nɛ́ nū lé ka, Ábīja, ɔyínɔ̄nyā kú Usekaríya.

²Ó yɛ tííkpa kú aádáádā nū Udéfīdi, le ɔdā nōo lɔhi mɛ́mla ɔdā nōo he Óndú ā ɔtū yá.

³Ipú ɔyā aflɛ́yí kú iháyí nɛ̄ ó lé ɔcɛ́ ā, ó lɛ ɔwɛ kú Agblīihɔ-nɛ̄hi nɛ̄ ádā nū kpó gwu ā, kpó nwūla, klla le ɔwɛ ā kpó gílayá.

⁴Ó le odúúdú ācogwɛ́ɛya, mɛ́mla ācɛ Ulífāyi ā kpó hīgwú wā í le jīla ɛnɔ̄ɔ̄cī kú ódúdɔ̄lɛ́ kú Agblīihɔ-nɛ̄hi ā.

⁵Anɔ́ɔ ó le ɛlā ka lɛ uwá abɔ́ɔ kahíníī, “Aá nēe wɛ ayí kú Ulífāyi, aá lɛ īyī aá iyē gwu, cɛ́ɛ́ ká aá kē lɛ Agblīihɔ-nɛ̄hi kú Óndú, Ɔwɔicō kú aádáádā aá ā yá tīihɔ dúú. Aá lɛ ɔdā nōo je Agblīihɔ-nɛ̄hi ā tēelihɔ ā, kpó bónū ŋmá ipú Agblīihɔ-nɛ̄hi ā.

⁶Ádáádā alɔ ohi ā í lɛyítáajɛ lɛ Óndú, Ɔwɔicō kú uwā kpaakpa ŋ́. É le ɔdōbɔ̄bí yá Óndú ā klla kwú igbīhi ú cē kwu Agblīihɔ-nɛ̄hi kú nū ā ɛga nɛ̄ ó lā ā.

⁷É kwú ɔwɛ kú Agblīihɔ-nɛ̄hi ā ú kpó gwū, klla kwú ɔlá kú agege kú Óndú ā ú nyí. É yi ɔtulalī ɔlá lɛ Óndú ā ɛ́ɛ́ nēé gē gwɛ́ɛya ō yɔlá dúúdú lɛ Ɔwɔicō kú Ísrɛ̄lu ipú Agblīihɔ-nɛ̄hi kú nū ā gɛ ŋ́.

⁸Ohígbū ɔ́ɔmā, Óndú ā húmáyī cɔ̄nū mla ācɛ Ujúda mɛ́mla ācɛ Ujerúsālɛm. Ɔdā nɛ̄ Óndú ā yá uwá ohígbū ɔdā nēé yá nyā, le hɛ́ ācɛ idáagó. Ó klla le tū uwā ufi. Aá bī īkpēyī abɔ̄yī aá le odúúdú ɔdā nōo yá ā má lɔɔlɔhi dúú.

⁹É le aádā alɔ kpó ŋmó ɔgbɛ́fú, anɔ́ɔ é le anyā alɔ mɛ́mla ayí alɔ kpó bɛ̄ɛka aálagbá ŋmá ɔlɛ́ alɔ á.

¹⁰Ó ka abālɔbányā, anúɔ géē gbo ɛka lɛ Óndú, Ɔwɔicō kú Ísrɛ̄lu, cɛ́ɛ́ kú ɔ̄ híī cɔ̄nū mla aá gɛ ŋ́.

¹¹Ó ka kpɔ́ kahíníī, “Ayí um, aá nɛ̄ Óndú ā fu ká aá yi ɔtulalī ɔlá, cɛ́ɛ́ ká aá klla gwɛ́ɛya lɛ ɔ́ ā, aá híī ci úklɔ́ ɔ́ɔmā ō yá ɛ̄cī dúúmā ŋ́. Aá kpó ācɛ tɔ̄ɔkwu cɛ́ɛ́ kú aá gbā Óndú ā ɛ̄gbā eko dóódu.”

¹²Anɔ́ɔ ayí kú Ulífāyi ŋmá ipɔ́ɔma kú Ukɔ́hāti, Uméhāti, ɔyí kú Amasáyi, Ujówɛ̄lu, ɔyí kú Asárīya, ŋmá ipɔ́ɔma kú Umérāri. Ukíss, ɔyí kú Ábudi mɛ́mla Asárīya, ɔyí kú Ujɛhalɛ́lɛl, ŋmá ipɔ́ɔma kú Ugɛ́ssɔn. Ujówa, ɔyí kú Usíma, mɛ́mla Éden, ɔyí kú Ujówa,

¹³Ó ŋmá ayínɔ̄nyīlɔ kú ipɔ́ɔma kú Ɛlísāfan, Usímri mɛ́mla Ujeyɛ́lu nōo ŋmá ipɔ́ɔma kú Ásāfu Usekariya mɛ́mla Umɛtánīya.

¹⁴Ācɛ nēe ŋmá ipɔ́ɔma kú Uhɛ́mān ā wɛ Ujéhúli mɛ́mla Ussímēyi. Ācɛ nēe kē ŋmá ipɔ́ɔma kú Ujɛdútɔn ā wɛ Ussemáya mɛ́mla Usīyelu.

¹⁵É le ayí kú Ulífāyi aɔ́mpa uwā túbá. Anɔ́ɔ é le īyī uwā mɛ́mla odúúdú ipɔ́ɔma kú uwá iye gwu á. Anɔ́ɔ ɛ́gɛ́nɛ̄ ɔcɛ́ da uwá kéē yá ā, é gbɔɔ́ ō yá Agblīihɔ-nɛ̄hi kú Óndú ā tīihɔ, ɛ́gɛ́nɛ̄ é tá ɔ̄ ipú íne kú Óndú ā, kéē yá ɔ̄ tīihɔ eko nēé le ɔ́ nyílá ā.

¹⁶Ācogwɛ́ɛya ā kwú pɛ́ ga ipú Agblīihɔ-nɛ̄hi kéē yá ɔ̄ tīihɔ. Anɔ́ɔ é le ɔdā dóódu nēe bá ipú Agblīihɔ-nɛ̄hi nēe le tēelihɔ nēé tīihɔ gɛ ŋ́ mā kpó wā í bá ódúdɔ̄lɛ́ kú Agblīihɔ-nɛ̄hi. Anɔ́ɔ ayí kú Ulífāyi kwú uwā ú kpó ŋmá abɔ́ɔ ga ɔpɛ́ kú Ukídirɔn.

¹⁷É gbo úklɔ́ ā ŋmá ɛ̄cī éyi kú ɔyā aflɛ́yí kú iháyí ā jāā ga ɛ̄cī ɔ́mahātá kú ɔyā aflɛ́yí kú iháyí ɔ́ɔmā piíi ā. Anɔ́ɔ é kwú úklɔ́ ō yá tīihɔ kú Agblīihɔ-nɛ̄hi ā ú yá mɛ á. É klla kwú aínu kú ɔwɛ kú Agblīihɔ-nɛ̄hi ā í yá tīihɔ kpɔ́ dúú. É klla gbɔɔ́ ō je Agblīihɔ-nɛ̄hi ā yá tīihɔ kpɔ́, o gbɔɔ́ ŋmá ɛ̄cī ɔ́mahātá ā jāā ga ɛ̄cī igwɛ́ɛhīlī kú ɔyā ɔ́ɔmā. Anɔ́ɔ é kwú ɔ̄ ú tútū nɛ̄ ācɛ lɔfú gbā Óndú ā ɛ̄gbā ipú nū glá.

¹⁸Anɔ́ɔ ayí kú Ulífāyi le ohi kpó gé lɛ Uhɛsɛkíya ka aá ɔ́ɔ le odúúdú Agblīihɔ-nɛ̄hi ā yá tīihɔ kpɛ́mm ɛɛ́, kwu ede, utébulu kú nū mɛ́mla odúúdú iyó kú ipú Agblīihɔ-nɛ̄hi dóódu ā.

¹⁹Ɔdā dóódu nɛ̄ Áhāsi kpó ŋmá ipú Agblīihɔ-nɛ̄hi, ipú iháyí nōo kwúcē hɛ Óndú tá ā, é ka aá ɔ́ɔ kwú uwā ú kpó kwúcē wā ipú Agblīihɔ-nɛ̄hi kú Óndú ā ɛɛ́. É ka odúúdú uwā ɛ́ɛ bá iyɔ̄bú ede kú Óndú ā.

²⁰Ɔkwɔɔkwu ɔ́ɔmā, Uhɛsɛkíya le odúúdú aígabɔ̄ mɛ́mla ācɛ kú igelī nɛ̄hi ā kpó hīgwú, anɔ́ɔ é le tá Agblīihɔ-nɛ̄hi kú Óndú ā.

²¹Anɔ́ɔ é le aálá ahāapa, aómlede ahāapa, mɛ́mla aɛ́wū ahāapa kú ɛya ō gwó kú ɔlɛ́ ɔcɛ́, kú ācɛ kú Ujúda mɛ́mla ō bī le gwu Agblīihɔ-nɛ̄hi nēe tēelihɔ ā. Ó le aɔ́dā nēe bá ā kpó gé lɛ ācogwɛ́ɛya ā, anɔ́ɔ ó da ācogwɛ́ɛya, ayí kú Árɔ̄ni ā kéē kwú aɛ́bɛ́ ā ú kpó gwɛ́ɛya ɛyí ede ā.

²²Anɔ́ɔ ācogwɛ́ɛya ā, le aɛ́na ahāapa ā kpó ŋmó aflɛ́yí, aálá ahāapa ā gbocē ɔ́, aómlede ahāapa ā gboce ɔ́. Anɔ́ɔ ó le oyī kú ɛbɛ́ nēé kpó gwɛ́ɛya ā mī klá ɛyí ede ā.

²³Anɔ́ɔ ó kwú aópī ahāapa ā ú kpó wā ɛgiyí ɔcɛ́ mɛ́mla ācɛ o hile a, anɔ́ɔ ɔcɛ́ mɛ́mla ācɛ ā le abɔ̄ kú uwā kpó ce aópī ā ɛyí,

²⁴anɔ́ɔ ɔ̄cogwɛ́ɛya ā kwú aópī á ú kpó ŋmó, anɔ́ɔ é kwú oyī kú nū ú pīya klá ɛyí ede ā, cɛ́ɛ́ kɔ́ɔ̄ wɛ ɛya nēé gwó kú Óndú ā kóō je íne nɛ̄ ācɛ ā bīya ā yá uwā ɛhi. Ohígbū ka ɔcɛ́ ā da uwá kéē le ɛya kú ɔdā ō yɔlá dúúdú ā gwó kóō lɛ íne nɛ̄ odúúdú ācɛ Ísrɛ̄lu bīya ā kpó nyɔ̄.

²⁵Anɔ́ɔ ɔcɛ́ a klla yɛce íne nɛ̄ Óndú, Ɔwɔicō je lɛ Udéfīdi bū okónu kú Ugádi, ɔ̄comɛ́ɛbɛ ā, mɛ́mla Unátan, ɔ̄comɛ́ɛbɛ ā. Ó le ācɛ Ulífāyi kpó bá ipú Agblīihɔ-nɛ̄hi ā, le aódōbīgwíijē kpó bī abɔ̄.

²⁶Ɔdōbīgwíijē bɛ̄ɛka ɛ̄nɛ̄ Udéfīdi bī le gwííjē ā. Anɔ́ɔ ācogwɛ́ɛya ā klla háyi abɔ́ɔ mla opo kú uwā dúú.

²⁷Anɔ́ɔ Uhɛsɛkíya lɛ ɔ́da je kéē gbɔɔ́ ō gwɛ́ɛya o yɔlá dúúdú. Abɔ̄ é gbɔɔ́ ō gwɛ́ɛya bōōbū ā, ācɛ bī opo, ɛ̄ngwū, uba, ɔgalúmpɛ̄ mɛ́mla odúúdú ɔ́dōbīgwíijē kú uwā, cɛ́ɛ́ kéē gbɔɔ́ ō gwííjē ō cɛ̄tra Ɔwɔicō.

²⁸Odúúdú ācɛ nēe bá abɔ́ɔ ā gaá wɛ ipú uculo kú ɛ̄gbā ō gbā Óndú ā dúú. Anɔ́ɔ é gwííjē jāā gbéeko nēé lɛ ɛya ā gwó mɛ.

²⁹Anɔ́ɔ ɔcɛ́ ā mɛ́mla odúúdú ācɛ ā le okwúukwu kpó kwaajɛ le ɛ̄gbā gbā Ɔwɔicō á.

³⁰Uhɛsɛkíya, ɔcɛ́ ā mɛ́mla aígabɔ̄ kú Ujúda ā, da ācogwíijē kú Ulífāyi ā kɛ́ɛ̄ gwííjē kɛ́ɛ̄ cɛ̄tla Óndú ā, ɛ́gɛ́nɛ̄, Udéfīdi, mɛ́mla Ásāfu ɔ̄comɛ́ɛbɛ ɔ́ɔ tá tū ɔkpá lɛ ā. Odúúdú uwā le okwúukwu kpó kwaajɛ, anɔ́ɔ é bá gē gwííjē mla éeyē nɛ̄hi gē gbā Ɔwɔicō ɛ̄gbā á.

³¹Anɔ́ɔ Uhɛsɛkíya, ɔcɛ́ ā da ācɛ ā ka abɔ̄ nɛ́ɛ le iyē gwu, kwú yá yēŋēē klla kwú tīihɔ ɛɛ́ mā, ɛ́ɛ̄ nyɔ̄ í gwó ɛya kú ahínyá ō tá Óndú ā mɛ́ɛ́nɛ. Anɔ́ɔ é cɛ̄lā kú ɔcɛ́ ā, anɔ́ɔ ācɛ ōhī kú uwá le ɛbɛ́ bī wā í gwɛ́ɛya o yɔlá dúúdú lɛ Óndú ā.

³²É bī aɛ́na ofɛtá cigwó, aálá ofɛhɔ̄, mla aómlede ofigwó (200) wā í gwɛ́ɛya o yɔlá dúúdú lɛ Óndú ā,

³³é klla bī aɔ́bá ɛna úlā ce ofu igwó (600), mɛ́mla aálá úlā ahāapa ce ofigwó wā (3,000) í le yá ofídākā lɛ ācɛ ā kéē lé.

³⁴Abɔ̄ ācogwɛ́ɛya í lɛwa jɛ̄ nēe gē ŋmó klla wā aɛ́wū ā glá ŋ́ mā, ayí kú Ulífāyi tá uwā abɔ̄ jāā gbéeko nɛ̄ úklɔ́ ā mɛ. Eko ɔ́ɔmā dúú ā ācogwɛ́ɛya alɛwa le iyē kpó gwu dúú ɛɛ́. (Ayí kú Ulífāyi ā géē lɛ īyī uwā tīihɔ fíyɛ́ ācogwɛ́ɛya á.)

³⁵Ɔda ɔhá nɛ̄ ācogwɛ́ɛya ā gē yá mla ɛya o yɔlá dúúdú ā iyē ā wɛ, o kpó ijē kú ɛbɛ́ kú ɛya nɛ̄ ācɛ lé ā yɔlá dúúdú, mɛ́mla o pīya ijē kú ɛya ā klá ɛyí ede kú Óndú ā. O ŋmá ɛ̄nyā, anɔ́ɔ é gbɔɔ́ ō gbā Ɔwɔicō ɛ̄gbā ipú Agblīihɔ-nɛ̄hi ā kpɔ́ á.

³⁶Ɔtū le he Uhɛsɛkíya mɛ́mla odúúdú ācɛ kú Ujúda mɛ́mla ācɛ Ujerúsālɛm nɛ̄hi, ohígbū ka Óndú, Ɔwɔicō tá uwā abɔ̄ lɛ úklɔ́ ā yá mɛ fíyaa.