Read idoma 2 ÚKLƆ́ KÚ AƆ́CƐ́ 30 Bible Online

2 ÚKLƆ́ KÚ AƆ́CƐ́ 30 - idoma bible

2 ÚKLƆ́ KÚ AƆ́CƐ́ 30

¹Uhɛsɛkíya le ɔkpá tá fu odúúdú ācɛ kú Ísrɛ̄lu mɛ́mla Ujúda, mɛ́mla ipɔ́ɔma kú Ɛ́frem mɛ́mla Umanásɛ kéē wā Agblīihɔ-nɛ̄hi kú Óndú ā Ujerúsālɛm gaá lɛ ucɛ kú onyatá ā tū.

²Ohígbū ka, ɔcɛ́ ā mɛ́mla aígabɔ̄ mɛ́mla odúúdú ācɛ ā le ojuju tū ka aá géē lɛ ucɛ kú onyatá ā tū ipú ɔyā ɔ́mpa ā.

³É le ɔ́ tū eko okpaakpa kú ɔyā aflɛ́yí kú nū ā glá ŋ́, ohígbū ka ācogwɛ́ɛya nēe tīihɔ klla le iyē gwu yēŋēē ā í lɛ ɛwa eko ɔ́ɔmā ɛɛ́ ŋ́. Ācɛ nēe jīla Ujerúsālɛm ā í klla lɛwa ŋ́.

⁴Ɔdā nōo wɛ̄ɛcɛ ŋmá ojuju ā he ɔcɛ́ mɛ́mla odúúdú ācɛ ā ɔtū.

⁵Anɔ́ɔ é lɛ ɔ́da je, klla le ɔna tá ga odúúdú kú ipú ajɛ kú Ísrɛ̄lu, jāā ŋmá Ubiyɛssɛ́ba ga Udán ka ācɛ kéē wā í jīla Ujerúsālɛm, cɛ́ɛ́ kéē lɛ ucɛ kú onyatá ā lé lɛ Óndú, Ɔwɔicō kú Ísrɛ̄lu. Ucɛ nēé lé gɛ ŋ́ iháyí alɛwa ɛɛ́ mā.

⁶Anɔ́ɔ ācotɛ̄hɔ̄ ā le pɛ́ ga odúúdú ajɛ kú Ísrɛ̄lu mɛ́mla Ujúda mɛ́mla ɔkpá nɛ̄ ɔcɛ́ mɛ́mla aígabɔ̄ kú nū tá ā. É gē da ācɛ kú Ísrɛ̄lu kéē kwúcē wā ɛgiyí Óndú, Ɔwɔicō kú Ébrahām, Áyísīki mɛ́mla Ísrɛ̄lu, cɛ́ɛ́ kú Óndú ā kɔ́ɔ̄ géē kwúcē wā ɛgiyí ācɛ ohile kú uwā nēe kwu ŋmá abɔ̄ kú ɔcɛ́ kú Asírīya ā.

⁷“Aá híī yá ucē bɛ̄ɛka aádā á mɛ́mla ayínɛ́ aá ōhī nēé lɛyí táajɛ lɛ Óndú, Ɔwɔicō kú ádā uwā a ŋ́ mā ŋ́. Aá kē má ɛ́gɛ́nɛ̄ ó kē yá uwā italā bɔ̄bíbɔ̄bí lɛ je ɔlɛ́ uwā táalácɛ̄ lɛ ā.’’

⁸É da uwá kɛ́ɛ̄ híī yá īkpɛ̄yī olɔfú ɛ́gɛ́nɛ̄ aádáádā uwā ōhī yá ā ŋ́, amáŋ kéē kwú īyī uwā ú lɛ Óndú ā, kɛ́ɛ̄ mā īyī uwā tá abɔ̄ kú nū. Ó kéē wā ipú Agblīihɔ-nɛ̄hi kú nū, nōo le tīihɔ piyóó ipú ɛcɛ nyā ā, cɛ́ɛ́ kéē gbā Óndú, Ɔwɔicō kú uwā ɛ̄gbā, cɛ́ɛ́ kóō híī cɔ̄nū mla uwá gɛ ŋ́.

⁹É da uwá ka ɔ́dāŋ́ kɛ́ɛ kwúcē wā ɛgiyí Óndú ā, ayínɛ́ uwā mɛ́mla ayí uwā mɛ́mla anyā uwā nēé kwú ga ajɛ éwɔhá ā, ó géē méyīnyinyi uwā í mā uwá tá wā ɔlɛ́. Ohígbū ka, Óndú, Ɔwɔicō kú uwā wɛ Óndú kú ɛhi mɛ́mla eyīnyinyi nɛ̄. Ó gáā je eyī kú nū tónū ŋmá ɛgiyí aá, eko nɛ̄ aá kwúcē wā ɛgiyí nū, ɛ́ɛ́ nōó gē tá aá ŋ́. Ó géē mīyɛ aá.

¹⁰Anɔ́ɔ ācɛ otɛ̄hɔ̄ ā le yɛ ŋmá igelī nɛ̄hi mɛ́mla igelī nɛ̄ŋcɛ́ dóódu ga ɔhá. O ŋmá Ɛ́frem, mɛ́mla Umanásɛ, jāā ga Usébulɔn, anɔ́ɔ é bá gē cɛ̄hɔ̄ kú ɔcɛ́ mɛ́mla aígabɔ̄ kú nū nyā lɛ ācɛ kú Ísrɛ̄lu mɛ́mla ācɛ kú Ujúda. Amáŋ é bá ī yɛhɛ tū uwā klla bá ī yá uwā ɛbɛ́.

¹¹Ācɛ kɛ́tɛ̄kɛtɛ wā ŋmá Ássa, Umanásɛ, mɛ́mla Usébulun ōfōōfú uwā wā Ujerúsālɛm á.

¹²Ɔwɔicō le úklɔ́ nɛ̄hi yá ipú ɔtū kú ācɛ Ujúda abɔ̄ ó lɛ ɔtū kú uwā yéékpó kéē lɛyítáajɛ lɛ ɔ́da nɛ̄ ɔcɛ́ mɛ́mla aígabɔ̄ kú nū je ā.

¹³Anɔ́ɔ ɛwa nɛ̄hi gaá le jīla Ujerúsālɛm ipú ɔyā ɔ́mpa ā kéē gaá lé ucɛ kú igbō nɛ̄ ó gē nū ŋ́ mā.

¹⁴Anɔ́ɔ é le odúúdú ede kú ɛcí mɛ́mla aójibó nēe bá Ujerúsālɛm ā kpó nyɔ̄ í bónū ɔpɛ́ kú Ukídirɔn.

¹⁵Ɛ̄cī ɔ́migwɛ́nɛ kú ipú ɔyā ɔ́ɔmā ā, é lɛ aálá kú ɛya ā kpó ŋmó. Ācogwɛ́ɛya mɛ́mla ayí kú Ulífāyi nēé tɛtɛ le yēŋēē ŋ́ mā, uwēyī le uwá kwú nɛ̄hi, anɔ́ɔ é lɛ īyī uwā iyē gwu yēŋēē, cɛ́ɛ́ kéē lɔfú géē gwɛ́ɛya lɛ Óndú ipú Agblīihɔ-nɛ̄hi ā glá.

¹⁶Uwá gaá mīyɛ ɛga kú uwá ipú Agblīihɔ-nɛ̄hi ɛ́gɛ́nɛ̄ íne kú Umósīsi ka lɛ ā. Anɔ́ɔ ayí kú Ulífāyi kwú oyī kú ɛya nēé gwó ā ú lɛ uwá, anɔ́ɔ é le ɔ́ mī klá ɛyí ede á.

¹⁷Abɔ̄ ācɛ alɛwa í le yēŋēē ŋ́ mā, é ŋmó ayí omlede kú ɛya kú onyatá ā glá ŋ́. Ohígbū ɔ́ɔmā ayí kú Ulífāyi klla ŋmó ayí omlede ā lɛ alɛwa kú uwā á.

¹⁸Ācɛ nēe ŋmá ipɔ́ɔma kú Ɛ́frem, Umanásɛ, Ísāka, mɛ́mla Usébūlɔn ā, í gwu īyī uwā iyē yēŋēē ŋ́, ohígbū ɔ́ɔmā, é ba í lé ucɛ kú onyatá ā mla īnyī mla ucɔ. Anɔ́ɔ Uhɛsɛkíya le ɔkɔ gbā ohígbū uwā kahíníī,

¹⁹“Óndú, Ɔwɔicō kú aádáádā alɔ, ipú eyīnyinyi mɛ́mla olɔhi kú uwɔ ā, kwú yá ācɛ nēe bá ī gbā uwɔ ɛ̄gbā ŋmá ipú ɔtū kú uwā dúúdú, amáŋ nēé le yēŋēē ŋ́ mā ɛhi.”

²⁰Óndú ā le ɔkɔ nɛ̄ Uhɛsɛkíya gbā ā pó, anɔ́ɔ ó kwú yá uwá ɛhi, anɔ́ɔ ó yá uwá ɔdā dúúmā gɛ ŋ́ má.

²¹Ɛwa nēe jīla Ujerúsālɛm ā, lé ucɛ kú igbō nɛ̄ ó gē nū ŋ́ mā mla éeyē, ɛ̄cī ahāapa. Anɔ́ɔ ɛ̄cī ɔ́mahātá ā, ācɛ Ulífāyi, mɛ́mla ācogwɛ́ɛya gwííjē ō cɛ̄tla Óndú ā mla odúúdú ɔfú kú uwá.

²²Anɔ́ɔ Uhɛsɛkíya cɛ̄tra ācɛ Ulífāyi ā nɛ̄hi ohígbū ijē éeyē kú uwā mɛ́mla ɔwɛ nēé bī ācɛ tá lɛ ipú ijē ō gwó mɛ́mla ɔkɔ ōgbā lɛ Óndú ā. Anɔ́ɔ é lé ɔdōlé kú ucɛ kú onyatá ā ɛ̄cī ahāapa á. Ipú ɛ̄cī ahāapa ā, é bá ī gwɛ́ɛya kú ɛbɔ́ klla bá ī tá Óndú ā, Ɔwɔicō kú aádā uwā ahínyá.

²³Anɔ́ɔ ācɛ ā klla cɛ̄ ka, aá klla géē lé ucɛ ā ɛ̄cī ahāapa ɔhá kpɔ́, anɔ́ɔ é lɛ ucɛ ā tū ɛ̄cī ahāapa ɔhá mla éeyē nɛ̄hi á.

²⁴Uhɛsɛkíya kwu aɛ́na úlā ɛpa ce ofigwó (1,000) mɛ́mla aálá úlā ahāapa cofigwó (3,000) ú kpó lɛ uwá kéē le gwɛ́ɛya ā, aígabɔ̄ kú nū klla kpó aɛ́na úlā ɛpa cofigwó (1,000) mɛ́mla aálá úlā ofu cɛ̄hɔ̄ (10,000). É le ācogwɛ́ɛya alɛwa iyē gwu, cɛ́ɛ́ kéē kwú yá yēŋēē dúú.

²⁵Odúúdú ācɛ Ujúda, ācogwɛ́ɛya, ayí kú Ulífāyi, mɛ́mla odúúdú Ísrɛ̄lu nēe wā í jīla abɔ́ɔ ā, mɛ́mla ugbɔga dóódu nēé lā mla uwá ā gwéeyē dúú ohígbū ucɛ ā nēé lé ā.

²⁶Odúúdú ācɛ bá gē gwéeyē ɛga dóódu kú igelī nɛ̄hi kú Ujerúsālɛm, ohígbū ka, o ŋmífī eko kú Usólōmɔn, ɔyí kú Udéfīdi ā, ɔdā ɛ́gɛ́nyā í yá Ujerúsālɛm jéjée ɛɛ́ ŋ́.

²⁷Anɔ́ɔ ācogwɛ́ɛya mɛ́mla ayí kú Ulífāyi ā cāŋjɛ, anɔ́ɔ é le ɔhā hɛ́ ce ācɛ ā, anɔ́ɔ Ɔwɔicō le ɔkɔ nēé gbā ā pó ɔlɛ́ nū ɔkpáncō, anɔ́ɔ ó mīyɛ uwá á.