Read idoma 2 ÚKLƆ́ KÚ AƆ́CƐ́ 32 Bible Online

2 ÚKLƆ́ KÚ AƆ́CƐ́ 32 - idoma bible

2 ÚKLƆ́ KÚ AƆ́CƐ́ 32

¹Igbīhi ɛnyā, eko nɛ̄ Uhɛsɛkíya yɔ̄ í gbā Óndú, Ɔwɔicō kpaakpa ā, Usénākeribu, ɔcɛ́ nɛ̄hi kú Asírīya le ācɛ ɔlɛ́ nū kpó wā gáā kpɛ́fú tá ācɛ Ujúda. É gaá le íbɔm cē tū aígelī nɛ̄hi kú Ujúda nēé cē igá olɔfú nɛ̄hi tū uwā ā. Anɔ́ɔ ó le ɔ́da je kéē kwú ɔdɔ ā kpó ca tāajɛ dúúdú.

²Eko nɛ̄ Uhɛsɛkíya le jé ka, Usénākéribu ɔ́ɔ le miya ipú ɔtū kú nū ka anúɔ í kpɛ́fú tá Ujerúsālɛm dúúā.

³Anɔ́ɔ ó le miya mɛ́mla aígabɔ̄ mɛ́mla ācɛ o lɔfú nɛ̄hi kú ɔlɛ́ nū, cɛ́ɛ́ kéē lɛ njɔlɔ kú éŋkpɔ̄ nēe bá iyɛ̄ɛcɛ kú igelī nɛ̄hi ā kpó gwū. Anɔ́ɔ é gaá le abɔ̄ tá ɔ̄ á.

⁴Ɛwa nɛ̄hi kú ācɛ le jīla gaá kwú odúúdú njɔlɔ kú éŋkpɔ̄ mɛ́mla áyɔ́kpá dóódu nēe gē pɛ́ bū ipú ajɛ ā kpó gwū. Anɔ́ɔ é ka ɔdíyá nɛ̄ ɔcɛ́ kú Asírīya gē wā í má éŋkpɔ̄ gwá ā.

⁵Ɛga dóódu nɛ̄ ɔdɔ kú igelī nɛ̄hi ā catāajɛ ā, ó le úklɔ́ yá lɔfú nɛ̄hi kéē lɛ ɔ́ ma gicō. É klla le inɔ̄ɔda kpó gwó kwu ɔdɔ ā ɛyí. Ó klla le aɔ́dɔ kú ɛnɔ̄ɔ̄cí ā kpó ma gicō ŋmá ajɛ. Ó klla le aóbō mɛ́mla aɔ́kplɛ́fú alɛwa nɛ̄hi kpó yá lɛ aícɔ́ɔja kú nū.

⁶Ó kwú odúúdú ācɛ kú igelī nɛ̄hi ā ú kpó bá ɛháajɛ kú aótrɛ̄yí kú aícɔ́ɔja, anɔ́ɔ ó le uwá hīgwú wā í jīla ɛyí ɔpū kú okónu igá kú igelī nɛ̄hi ā, anɔ́ɔ ó le ɔfú tū uwā iyē klla da uwá kahíníī,

⁷“Aá lɛ ɔtū ká aá yéékpó, kú aá yúufi ŋ́. Aá híī yúufi kú ɔcɛ́ nɛ̄hi kú Asírīya, ámāŋ ka aícɔ́ɔja kú nū nɛ̄ ó kpó tɔ̄ɔkwu ā ŋ́, ohígbū ka ɔ̄cɛ nōo yɔ̄ mla alɔ ā, nwuné fíyɛ́ ɔ̄cɛ nōo yɔ̄ mla uwá ā.

⁸Ó bī ɔfú kú ɔlɛɛcɛ, amáŋ Óndú, Ɔwɔicō kú alɔ yɔ̄ mla alɔ. Anú gaá kpɛ́fú lɛ alɔ á.” Anɔ́ɔ ɔtū kú ācɛ ā le tū kwu ɔtū, ohígbū ɛlā nɛ̄ Uhɛsɛkíya, ɔcɛ́ ka lɛ uwá ā.

⁹Eko nɛ̄ Usénākeribu mla aícɔ́ɔja kú nū bá Ulákisi ā, ó le ɛhɔ̄ tū fu Uhɛsɛkíya mla odúúdú ācɛ kú Ujúda mla Ujerúsālɛm kahíníī,

¹⁰“Ami Usénākéribu, ɔcɛ́ nɛ̄hi kú Asírīya ā da aá ka, ‘Ɔdí nɛ̄ aá lɔtūce ɔ́ ɛ́ɛ́, nɛ̄ aá bá Ujerúsālɛm kpɔ́ ā?’

¹¹Ó wɛ ō plla aá, nɛ̄ Uhɛ́sɛkíya gē plla aá kú ɛmiyɛ mɛ́mla ijēnyi kóō lɛ aá kpó ŋmó bónū ā ŋ́ nɛɛ. Ó gē da aá ka, ‘Óndú, Ɔwɔicō kú alɔ ɔ́ɔ géē hɛ́ alɔ tá ŋmá abɔ̄ kú ɔcɛ́ kú Asírīya ā’

¹²Ó wɛ anú Uhɛsɛkíya, ɔ́ɔmā pií ā je ede kú aá, nēe bá ɛga dóódu kpó wúla tāajɛ klla ma ede éyi fú lɛ aá ka abɔ́ɔ nɛ̄ aá ɔ́ɔ géē gbā Óndú, Ɔwɔicō kú aá ɛ̄gbā á, ó klla ka aá ɔ́ɔ gē gwɛ́ɛya lɛ ɔ́ Ujerúsālɛm ā ŋ́ nɛɛ?

¹³Aá jé ɔdā nɛ̄ ami mɛ́mla ádā um yá ajɛ kú aéwo ɔhá ā ŋ́ nɛɛ? Iní nɛ̄ aɔ́wɔ kú aéwo dóódu nēe bá ɔ́ɔmā bá, nēé lɔfú nya uwá tá ŋmá abɔ̄ kú um glá ŋ́ mā?

¹⁴Eko nyá nɛ̄ aá pó ka odóódu kú aɔ́wɔ kú éwɔhá, nɛ̄ ami mɛ́mla aádā um je kpó yíífi ɔ́ɔmā, nya uwá tá ŋmá abɔ̄ kú alɔ ɛɛ́ nɛ̄ aá gē lɔtūce ka Óndú, Ɔwɔicō kú aá ɔ́ɔ géē nya aá tá ŋmá abɔ̄ kú alɔ gllá ā?

¹⁵Ohígbū ɔ́ɔmā, aá híī cɛ̄ lɛ Uhɛsɛkíya plla aá, ɛ́ɛ́ nóō gē kpó aá nyíleyī lɛ ā ŋ́. Aá kpɔ́tūce ɛlā kú nū ŋ́, ohígbū ka ɔwɔ dúúmā í yɔ̄ ipú éwo ámāŋ ɛyí ajɛ dúúmā nōo nya ācɛ tá ŋmá abɔ̄ kú alɔ jējēe ɛ́ɛ́ ŋ́. Ɛ́ɛ́ nɛ̄ Ɔwɔicō kú aá gē nya aá tá ŋmá abɔ̄ kú alɔ glá ŋ́.”

¹⁶Anɔ́ɔ ācocɛ̄hɔ̄ nɛ̄ Usénākéribu tɛ̄hɔ̄ ā klla kɛlā obɔ̄bí ɔhá nɛ̄hi klá Óndú, Ɔwɔicō mɛ́mla Uhɛsɛkíya kpɔ́.

¹⁷Ɔcɛ́ nɛ̄hi kú Asírīya klla le ɔkpá tá wā í cá Óndú, Ɔwɔicō kú Ísrɛ̄lu ɛcá gē kahíníī, “ɛ́gɛ́nɛ̄ ɔwɔ kú aéwo ɔhá ī nya uwá tá ŋmá abɔ̄ kú um glá ŋ́ mā, ɛ́gɔ́ɔmā, nɛ̄ Ɔwɔicō kú Uhɛsɛkíya í gáā nya ācɛ ɔlɛ́ nū tá ŋmá abɔ̄ kú um glá ŋ́ dúú á.”

¹⁸Anɔ́ɔ ācɛ nɛ̄ ɔcɛ́ kú Asírīya tɛ̄hɔ̄ le ɛlā ā ka gbōmgbōm okónu Uhíbru, cɛ́ɛ́ kú ācɛ kú Ujúda nēe ce ɛyí ɔdɔ bá ī jāhɔ̄ ā kéē pó, cɛ́ɛ́ ká ɔtū kú uwā kóō gbenyi, cɛ́ɛ́ kú Asírīya kóō géē mīyɛ igelī nɛ̄hi ā fíyaa.

¹⁹É gē kɛlā lɛyíkwu Ɔwɔicō kú Ujúda mɛ́mla Ujerúsālɛm ɔwɛ ékpónú nēé gē kɛlā lɛyíkwu aɔ́wɔ kú ācɛ ɔhá nēe wɛ íkpékwūja nɛ̄ ācɛ bī abɔ̄ kú uwā yá ā.

²⁰Anɔ́ɔ Uhɛsɛkíya mɛ́mla ɔ̄comɛ́ɛbɛ, Ayisáya, ɔyí kú Ámɔ̄si le ɔkɔ gbā klla le ikwū je klá Óndú ā ga ɔkpáncō kɔ́ɔ̄ wā í tá uwā abɔ̄.

²¹Óndú ā le alelékwū kú nū tɛ̄hɔ̄ gaá lɛ odúúdú aótrɛ̄yí kú aícɔ́ɔja kú ɔcɛ́ kú Asírīya kpó ŋmó. Anɔ́ɔ ɔcɛ́ nɛ̄hi ā kwúcē mla uwēyī le tá Asírīya á. Ɛ̄cī éyi, ó klá ipú inu ɛcí kú nū, anɔ́ɔ ayí nū ōhī bī ɔkpacaŋ́gelī gāa kwú ɔ̄ ú ŋmó tá abɔ́ɔ á.

²²Ɔwɛ nyā nɛ̄ Óndú ā bī le hɛ́ Uhɛsɛkíya mɛ́mla odúúdú ācɛ kú Ujerúsālɛm tá ŋmá abɔ̄ kú Usénākéribu, ɔcɛ́ nɛ̄hi kú Asírīya mɛ́mla odúúdú aólɛlā kú uwá ohile á. Ó yá ka ācɛ kú Ujúda kéē lā ɛbɔ́ mɛ́mla odúúdú aóladógbe kú uwá dóódu.

²³Ācɛ alɛwa le pɛ́ wā Ujerúsālɛm bī ɛhi gé lɛ Óndú ā ipú Agblīihɔ-nɛ̄hi ā. É klla bī gé lɛ Uhɛsɛkíya, ɔcɛ́ ā dúú. Anɔ́ɔ o ŋméeko ɔ́ɔmā, odúúdú aéwo kú ɛcɛ gē lɛ ojīlīmā ce Uhɛsɛkíya á.

²⁴Ɛpléeko ɔ́ɔmā, Uhɛsɛkíya gbɔɔ́ ō doōcē nɛ̄hi gáā kwú. Anɔ́ɔ ó le ɔkɔ gbā, anɔ́ɔ Óndú ā le ɔdā ocābɔ̄ je lɛ ɔ́ ká, ɔ́ɔ géē nyatá ŋmá ipú ōcē ā.

²⁵Amáŋ ɔbɔ́ɔ̄cɛ í cɛ̄ lɛ Uhɛsɛkíya tá Óndú, Ɔwɔicō ahínyá kú ɔdá nɛ̄ ó yá lɛ ɔ́ ā ŋ́. Ohígbū ɔ́ɔmā Ɔwɔicō le cɔ̄nū da anú mɛ́mla ācɛ Ujúda mɛ́mla ācɛ Ujerúsālɛm.

²⁶Igbīhāajɛ ā, Uhɛsɛkíya mɛ́mla ācɛ kú Ujúda le īyī uwā tú wāajɛ, anɔ́ɔ Óndú ā í klla yá ācɛ Ujúda italā gɛ ŋ́ jāā gbéeko nɛ̄ Uhɛsɛkíya kwú á.

²⁷Eko nɛ̄ Uhɛsɛkíya kwú gbo agbénú nɛ̄ ācɛ dóódu gbɔɔ́ ō ce ɔ́ ojīlímā nɛ̄hi ā, ó lɛ inu ō kpó iyó tū kú agbénú kú ugóolu (oje ɔdɔ), oje udɔ, ije nɛ̄hɛ́, ɔtángbéde, anɔ̄, ɔkplɛ́fú, mɛ́mla ɔdā kú ojīlīmā ɛ́gɔ́ɔmā ɔhá ā gwó.

²⁸Ó klla le inu ɔhá gwó nɛ̄ ó gē kpó īkpɔ̄dā, ejé mɛ́mla anɔ̄ kú ɔcí nēé hī ka ólīfu kú nū tū ɔ̄. Ó klla le ɛga o kpó aɛ́na, aálá mɛ́mla aɛ́wū kú nū tū ā gwó dúú.

²⁹Igbīhi ɛ̄nyā ā, Ɔwɔicō klla le aálá, aɛ́na, aɛ́wū, aómlede mɛ́mla aɔ́dāajɛ mɛ́mla agbénú ɔhá nɛ̄hi kpó lɛ ɔ́, nɛ̄ ó klla lɛ ɔlɛ́ kpó gwó lɛ uwá dúú.

³⁰Uhɛsɛkíya wɛ ɔ̄cɛ nōo gwū ɔkpá kú Ugíhɔn klla je ɔ́ bū gaá yɛ ipú ɔdɔ kú Ujerúsālɛm á. Ɔdā dóódu nɛ̄ Uhɛsɛkíya yá ā le kpaakpa.

³¹Kwu eko nɛ̄ ācɛ o kwɛyí ācɛ Ubábīlɔn wā gaá dɔɔ̄kā ohígbū ɔdā idáagó nōo yá ipú ajɛ ā, Ɔwɔicō cɛ̄ lɛ Uhɛsɛkíya le yɛ ɔwɛ kú nū cɛ́ɛ́ kóō má ucē mla ohílīpú kú nū.

³²Aɔ́dā ɔhá o hile dóódu nɛ̄ Uhɛsɛkíya yá ā, mɛ́mla ɛ́gɛ́nɛ̄ ó je īyī nū lɛ Ɔwɔicō lɛ ā, é lɛ ɔ́ tá tū ipú ɔkpá kú ɔ̄comɛ́ɛbɛ Ayisáya, ɔyí kú Ámɔ̄si mɛ́mla ipú ɔkpá kú ígwú ō gbo kú aɔ́cɛ́ kú Ujúda mla Ísrɛ̄lu.

³³Uhɛsɛkíya gekwú, anɔ́ɔ é kwú ɔ̄ ú nyi ɛhícō kú ikpámílī kú aɔ́cɛ́ á. Odúúdú ācɛ kú Ujúda mɛ́mla Ujerúsālɛm jikwū nū klla le ekwu kú nū yɔ̄ dúú. É klla le ojīlīmā ce okwú kú nū nɛ̄hi. Anɔ́ɔ ɔyí nū, Umanásɛ lɛ ɔcɛ́ lé kwɛyí nū á.