Read idoma 2 ÚKLƆ́ KÚ AƆ́CƐ́ 33 Bible Online

2 ÚKLƆ́ KÚ AƆ́CƐ́ 33 - idoma bible

2 ÚKLƆ́ KÚ AƆ́CƐ́ 33

¹Umanásɛ wɛ iháyí igwɛ́ɛpa ɛ́ɛ́ nɛ̄ ó lé ɔcɛ́ kú Ujúda á, ó gbō ācɛ kú Ujúda ŋmá Ujerúsālɛm iháyí ofu cɛ̄hɔ̄.

²Umanásɛ le ɔ́bíipú bī tū Óndú, Ɔwɔicō klla le íne kú nū bīya bɛ̄ɛka aéwo ɔhá nɛ̄ Óndú ā nū bɛ̄cɛ hīla ācɛ Ísrɛ̄lu ŋmá ajɛ ā. É klla yɛ tíkpa kú ɛcí nɛ̄ aéwo ɔhá gē pā ā dúú

³Aíkpɛ́cí dóódu nɛ̄ ádā nū je kpó ca tāajɛ ā, ó le odúúdú uwā kpó gwó. Ó le ede kú ubáalu gwó klla le ojibó kú ɔwɔ nɔ̄nyā, Ássɛ̄ra ma kwu ajɛ. Ó klla gbɔɔ́ ō gbā aínyílɔ́wɔ kú ɔkpáncō ɛ̄gbā dúú.

⁴Ó le ede kú ubáalu gwó kwu ipú Agblīihɔ-nɛ̄hi kú Óndú ā, Agblīihɔ-nɛ̄hi nɛ̄ Óndú ā ka, abɔ́ɔ nɛ̄ iyē kú anúɔ ɔ́ɔ géē yɔ̄ kéē gbā anúɔ ɛ̄gbā piyóó á.

⁵Ó lɛ ede ɛga nɛ̄ ācɛ í gbā aínyílɔ́wɔ kú ɔkpáncō ɛ̄gbā kpó gwó kwu odúdɔ̄lɛ́ ɛpa kú Agblīihɔ-nɛ̄hi ā.

⁶Ó kwú ɔyí nū ú gwɛ́ɛya o yɔlá dúúdú lɛ ɛcí kú nū ɔpɛ́ kú Uhínɔm. Ó gē yá imabɔ̄ mɛ́mla ɔhɛ. Ó klla gē nyɔ̄ í gwɛ́ɛbā dúú. Ó le ɔ́bíipú bī tū Óndú, Ɔwɔicō, ɛ̄nyā cɛ̄ le Óndú ā le cɔ̄nū nɛ̄hi.

⁷Ó le íkpékwūja ma kwú ipú Agblīihɔ-nɛ̄hi kú Óndú ā, ɛga nɛ̄ Óndú ā da Udéfīdi mɛ́mla ɔyí nū Usólōmɔn kahíníī, “Ipú Agblīihɔ-nɛ̄hi nyā, ipú Ujerúsālɛm amānyā, wɛ ɛga nɛ̄ n fu ŋmá ipú odúúdú ajɛ kú aípɔ́ɔma igwɛ́ɛpa kú Ísrɛ̄lu ā. N koó í wɛ ɛga nɛ̄ ācɛ géē wā í gbā um ɛ̄gbā

⁸Ɔ́dāŋ́ ka ācɛ kú Ísrɛ̄lu gē lɛ íne kú um tū klla í lɛyítáajɛ lɛ odúúdú íne kú um nɛ̄ Umósīsi je lɛ uwá ā, ayíka ń gáā nū uwā bɛ̄cɛ ŋmá ipú ajɛ nɛ̄ n je lɛ uwá ā gɛ ŋ́.”

⁹Umanásɛ plla ācɛ kú Ujúda mɛ́mla ācɛ nēe lā Ujerúsālɛm ā tū ipú ɔ́bíipú nɛ̄hi ō bī nōo kōō fíyɛ́ ákú aéwo nɛ̄ Óndú ā nū bɛ̄cɛ ŋmá ipú ajɛ ā hīla uwá ā.

¹⁰Óndú ā kɛlā klla pi Umanásɛ mɛ́mla ācɛ kú Ujúda ahɔ̄, nááná, é tá kéē jāhɔ̄ lɛ ɔ́.

¹¹Anɔ́ɔ Óndú ā cɛ̄ le aótrɛ̄yí kú aícɔ́ɔja kú Asírīya wā í le ɛfú kpó gaá gwū Ujúda á. É le Umanásɛ kwú, anɔ́ɔ é kwú uwɔ ú wu ɔ́ ɛnwū klla kwú agbá ú kpó kwu ɔ́ ikpó mla abɔ̄, anɔ́ɔ é kwú ɔ̄ ú ga Ubábīlɔn á.

¹²Ōwē nɛ̄ ó má abɔ́ɔ ā, cɛ̄ lɛ ɔ́ lɛ īyī nū túwāajɛ, Anɔ́ɔ ó kwúcē wā ɛgiyí Óndú, Ɔwɔicō kú nū, klla gbɔɔ́ ō gbā Óndú ā ɛ̄gbā, cɛ́ɛ́ kɔ́ɔ̄ tá ɔ̄ abɔ̄.

¹³Óndú ā le ɔkɔ nɛ̄ Umanásɛ gbā ā pó, anɔ́ɔ ó cɛ̄ lɛ ɔcɛ́ kú Asírīya klla kwú Umanásɛ ú kwúcē ga Ujerúsālɛm gaá ce ɔcɛ́ kú nū abɔ́ɔ kpɔ́ á. Ɔdā nōo yá nyā, yá kú Umanásɛ kóō cɛ̄ kóō klla le jé ka Óndú ā ɔ́ɔ wɛ Ɔwɔicō á.

¹⁴Igbīhi ɛnyā ā, Umanásɛ le ɔdɔ kú igelī nɛ̄hi kú Ujerúsālɛm ɔhá gwó kwu āyā kú ɛnɔ̄ɔ̄cī ā kú ɛgiyí ɔpɛ́ kú ɔkpá kú Ugíhɔn ā, ɛgiyí ɔwɛ kú ɛbéenyi ā. Ó ma ɔ́ gaá kwu ɛga nēé hī ka Ófelu ā. Ó klla le aótrɛ̄yí kú aícɔ́ɔja kpó kéē leyīkwu aícɔ́ɔja nēe bá ipú aígelī nɛ̄hi kú Ujúda nēé hɛ́ igá olɔfú tū uwā kpɛ́mm ā.

¹⁵Ó le odúúdú aɔ́wɔ mɛ́mla aójibó kú ɛcí kú aéwɔhá nɛ̄ ó ma kwu ipú Agblīihɔ-nɛ̄hi kú Óndú ā, í kpó ŋmá abɔ́ɔ, anɔ́ɔ ó klla kwú aéde kú ɛcí nēé kpó kwu ipú Ujerúsālɛm ā ú kpó ŋmá abɔ́ɔ ga eyɛ̄ɛcɛ kú ɔdɔ kú Ujerúsālɛm gaá le uwá kpó tá bónū.

¹⁶Ó lɛ ede kú Agblīihɔ-nɛ̄hi kú Óndú ā gílagwó, anɔ́ɔ ó le ɛya kú ɛbɔ́ mɛ́mla ɛya kú ahínyá oōtá gwó ɛyí nū lɛ Óndú ā. Anɔ́ɔ ó le ɔ́da je lɛ odúúdú ācɛ kú Ujúda kéē gbā Óndú, Ɔwɔicō kú Ísrɛ̄lu ɛ̄gbā.

¹⁷Nááná nɛ̄ ācɛ ā bá gē gwɛ́ɛya ɛga ɔhá ā, Óndú, Ɔwɔicō ōfōōfūnū nēé bā ī gwɛ́ɛya lɛ ɔ́ mɛ́ɛ̄ á.

¹⁸Aɔ́dā o hile ɔhá dóódu nɛ̄ Umanásɛ yá ā, kwu ɔkɔ nɛ̄ ó gbā lɛ Ɔwɔicō ā, mɛ́mla ācomɛ́ɛbɛ kú Óndú ā nēe kɛlā lɛ ɔ́ ā, é le odúúdú nū tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

¹⁹Ɔkɔ nɛ̄ ó gbā ā mla ohi nɛ̄ Ɔwɔicó tá ɔ̄ ā, mɛ́mla odúúdú aíne nɛ̄ ó bīya, mla ucē okpaakpa kú nū, kwu aíkpɛ́cí dóódu nɛ̄ ó gwó ā, mɛ́mla ojibó kú Ássɛ̄ra nɛ̄ ó ma kwu ajɛ mɛ́mla odúúdú aójibó kú ɛcí nɛ̄ ó ma kwu ajɛ, ɛ́ɛ́ nɛ̄ ó pīyabɔ̄ á, é le odúúdú uwā kpó tá tū ipú ɔkpá kú ígwú ōgbo kú ācomɛ́ɛbɛ.

²⁰Umanásɛ gekwú, anɔ́ɔ é kwú ɔ̄ ú nyi agblɔ̄cɛ́ kú nū Ujerúsālɛm, anɔ́ɔ ɔyí nū Ámɔn lɛ ɔcɛ́ lé kwɛyí nū á.

²¹Ámɔn wɛ iháyí ofu cɛɛpa ɛ́ɛ́ nɛ̄ ó lé ɔcɛ́ kú Ujúda á. Ó ce ɔcɛ́ Ujerúsālɛm iháyí ɛpa.

²²Ó le ɔ́bíipú bī tū Óndú ā ɛ́gɛ́nɛ̄ ádā nū bī ā. Ó klla pā ɛcí nɛ̄ ádā nū lɛ, klla gē pā ā.

²³Ó tū īyī nū wā ajɛ pīyabɔ̄ klla kwúcē wā ɛgiyí Óndú ā ɛ́gɛ́nɛ̄ ádā nū yá ā ŋ́. Anú ā kōō yá ɔdōbɔ̄bí fíyɛ́ ádā nū á.

²⁴Aígabɔ̄ kú Ámɔn le ujɔ̄ tū, tū ɔ́ kwú ɔ̄ ú ŋmó tá ipú agblɔ̄cɛ́ kú nū.

²⁵Ācɛ kú Ujúda lɛ ācɛ nēe ŋmó Ámɔn ā kpó ŋmó, anɔ́ɔ é kwú Ujosíya, ɔyí kú Ámɔn ú lé ɔcɛ́ kwɛyí ádā nū á.