Read idoma 2 ÚKLƆ́ KÚ AƆ́CƐ́ 34 Bible Online

2 ÚKLƆ́ KÚ AƆ́CƐ́ 34 - idoma bible

2 ÚKLƆ́ KÚ AƆ́CƐ́ 34

¹Ujosíya wɛ iháyí ahātá ɛ́ɛ́ nɛ̄ ó lé ɔcɛ́ kú Ujúda á. Ó gbō ācɛ kú Ujúda ŋmá Ujerúsālɛm iháyí ofu cigwóléyi

²Ó yá ɔdā nōo he Óndú ā ɔtú nɛ̄hi. Ó yɛce ɔwɛ mɛ́mla íkpā kú aádáádā nū Udéfīdi, klla lɛyítáajɛ kpaakpa lɛ íne kú Ɔwɔicō dóódu.

³Ipú iháyí ɔ́mahātá nɛ̄ ó lé ɔcɛ́ ā, ó wɛ ɔyípɛ̄ nɛ̄hi, amáŋ ó gbɔɔ́ ō gbā Óndú, Ɔwɔicō kú aádáádā nū Udéfīdi ɛ̄gbā. Eko nɛ̄ ó lɛ iháyí ɛnɛ yá akpa kú ɔcɛ́ kú nū ā, ó gbɔɔ́ ō je ínu, ede mɛ́mla ojibó kú Ássɛ̄ra mɛ́mla ɛcí ɔhá dóódu nēé ma kwu ajɛ ā kpó yíífi ŋmá ajɛ kú Ujúda.

⁴Ó le ɔ́da je lɛ ācɛ kéē gaá lɛ aéde kú ubáalu mɛ́mla aéde nēé gē yi ɔtulalī ɔlá ɛyí uwā ā kpó ca tāajɛ. É le aíkpékwūja mɛ́mla aójibó kú Ássɛ̄ra ā kpó gbā, anɔ́ɔ ó kwú ɔ̄ pīya úmúlá, anɔ́ɔ é kwú úmúlá ā ú mī klá ɛyí únóji kú ācɛ nēé gē gwɛ́ɛya lɛ ɔ́ ā.

⁵Ó kwú aíkpokwú kú ācogwɛ́ɛya kú ubáalu ā ú yɔlá ɛyí ede nēé gē gwɛ́ɛya lɛ ubáalu piíí ā. Ó ŋmá lɛ ɔdā nɛ̄ ó yá ā, ó le Ujúda mɛ́mla Ujerúsālɛm gwu péee ŋmá ɛcí nēé gē pā ā.

⁶Ó le aéde mla aíkpɛ́cí kú Ássɛra mɛ́mla aíkpékwūja ā ú kpó yíífi ŋmá ajɛ kú aígelī nɛ̄hi kú Umanásɛ, Ɛ́frem, mɛ́mla Usímīyɔn jāā ga ɛhícō kú Unáfutāli ā.

⁷Ipú odúúdú ajɛ kú ipɔ́ɔma kú ɛhícō kú Ísrɛ̄lu ā, ó le aéde mɛ́mla aójibó kú Ássɛra mɛ́mla íkpékwūja kpó ca tāajɛ. Ó klla le uwá gbā jāā gbéeko nēé kwú pīya umu. Ó klla le odúúdú aéde o yi ɔtulalī ɔlá ɛyí uwā lɛ ɛcí ā kpó ca dúú. Anɔ́ɔ ó kwúcē wā Ujerúsālɛm á.

⁸Ipú iháyí igwáahātá nɛ̄ Ujosíya lé ɔcɛ́ ā, eko nōo lɛ ajɛ kú Ujúda mɛ́mla Agblīihɔ-nɛ̄hi kú Óndú ā yá tīihɔ yēŋēē ŋmá ɛcí nēé gē pā ipú nū ā, Ujosíya le Ussafán, ɔyí kú Asálīya, Umáaséya igbómína kú Ujerúsālɛm, mɛ́mla Ujówa, ɔyí kú Ujowáhāsi, éyi kú aígabɔ̄ ā tɛ̄hɔ̄ kéē gaá le Agblīihɔ-nɛ̄hi kú Óndú ā tú gílayá.

⁹É gē kpó ije nɛ̄ Ulífāyi nēe gē gbō ɔwɛ kú Agblīihɔ-nɛ̄hi ā gē mīyɛ ŋmá ɛgiyí ācɛ nēe gē wā í gbā Óndú ā ɛ̄gbā ā lɛ Uhilikíya, otrɛ̄yí kú ācogwɛ́ɛya ā. (Uwá gē mīyɛ ɛhi nyā ŋmá ɛgiyí ācɛ kú Ɛ́frem, Umanásɛ, mɛ́mla ācɛ o hile kú ipɔ́ɔma kú ɛhícō ā, mɛ́mla ɛgiyí ācɛ kú Ujúda, Ubɛ́njamīn mɛ́mla Ujerúsālɛm.)

¹⁰É le ije nyā kpó lɛ ācɛ ɛtá nēe gē leyī kwú úklɔ́ ō gílayá kú Agblīihɔ-nɛ̄hi ā, cɛ́ɛ́ é gē je lɛ

¹¹ācogbɔ̄cí, mɛ́mla ācɛ ogwíinu, mɛ́mla ācɛ ogbɛ̄cɔ̄ ā kéē lɛ lá ɔcí mɛ́mla ɛcɔ̄ nēé gbā bá ajɛ ā, mɛ́mla ígbɔ́cí ō cíla ɛyí ɔdɔ kú Agblīihɔ-nɛ̄hi kú Óndú nɛ̄ aɔ́cɛ́ kú Ujúda mā ɔ̄ tá je bīya ā.

¹²Ācɛ nēe yúklɔ́ ā, wɛ ācɛ nɛ̄ ɔtū kú uwā le yēŋēē, nēe yúklɔ́ kpaakpa ɔwɛ nōo cíkā ā. Ayí kú Ulífāyi nēe leyīkwu úklɔ́ ā wɛ Ujáhāti mɛ́mla Obadáya, ŋmá ipɔ́ɔma kú Umérāri, Usekaríya mɛ́mla Uméssūlam ŋmá ipɔ́ɔma kú Ukóhati gē leyīkwu ācoyúklɔ́ kú Agblīihɔ-nɛ̄hi kú Óndú ā ō gílayá ā á. (odúúdú ācɛ Ulífāyi ā jé ō gwíijē nɛ̄hi).

¹³Ayí kú Ulífāyi o hile ā gē leyīkwu ācɛ nēe gē kpó iyó úklɔ́ ā. É klla gē leyīkwu ācɛ nēe gē yá ɛdɔ úklɔ́ ɛyɛ́ɛyɛ́yí ā. Ayí kú Ulífāyi ōhī wɛ aɔ́málɛ o tɔ́ɔkpá, ɛ́ɛ́ nɛ̄ ācɛ ōhī kē wɛ ācogbāajɛ á.

¹⁴Eko nēé bā í kpo ije ā gɛɛcɛ ŋmá ipú Agblīihɔ-nɛ̄hi kú Óndú ā, kéē gaá le yúklɔ́ ā, Uhilikíya le ɔkpá kú íne kú Óndú ā, nɛ̄ Ɔwɔicō je lɛ Umósīsi ā pīyɛ̄.

¹⁵Anɔ́ɔ ó da Ussafán kahíníī, “N le ɔkpá kú íne kú Ɔwɔicō ā pīyɛ̄ ŋmá ipú Agblīihɔ-nɛ̄hi amānyā ɛɛ́.” Anɔ́ɔ ó kwú ɔkpá ā ú lɛ Ussafán á.

¹⁶Anɔ́ɔ Ussafán kwú ɔkpá ā ú bī gé lɛ ɔcɛ́ klla le ohi kú úklɔ́ nēé yá ā kpó lɛ ɔcɛ́ kahíníī, “Alɔ le ɔdā dóódu nāa je ɔ́da ká ālɔ̄ yá ā kpó yá ɛɛ́.

¹⁷Alɔ kwú ije nēé le tū ipú Agblīihɔ-nɛ̄hi ā ú kpó lɛ ācɛ nēe gē leyīkwu úklɔ́ kú ō gílayá kú Agblīihɔ-nɛ̄hi ā, mɛ́mla ācɛ nēe gē leyīkwu uwá ā ɛɛ́.”

¹⁸Anɔ́ɔ ó klla ka anúɔ bī ɔkpá nɛ̄ Uhilikíya ɔ́ɔ je lɛ anúɔ ā abɔ́ɔ dúú.” Anɔ́ɔ ó le ɔkpá ā jé tɛ́ɛcɛ gbōmgbōm lɛ ɔcɛ́ á.

¹⁹Eko nɛ̄ ɔcɛ́ le ɔkpá nɛ̄ ó yɔ̄ ī jé lɛ ɔ́ ā pó ā, ó le īlī kú nū híla ipú ɔtū nōbí.

²⁰Anɔ́ɔ ó le ɔ́da je lɛ Uhilkíya, Ahíkam ɔyí kú Ussafán, Ábudɔn[8] ɔyí kú Umikáya, mɛ́mla Ussafán ɔmálɛ o tɔ́kpá mɛ́mla Asáya ɔ̄cɛ nōo gē cɛ̄ ɔcɛ́ ɛhɔ̄ ā kahíníī,

²¹“Aá nyɔ̄ ká aá gaá da Óndú ā ɔ̄kā gā um, ohígbū ācɛ ohile nēe bá Ujúda mɛ́mla Ísrɛ̄lu ā lɛyíkwu ɛlā nōo yɔ̄ ipú ɔkpá nyā ā. Óndú ā le cɔ̄nū mla alɔ, ohígbū ka aádáádā alɔ í lɛyí táajɛ lɛ ɛlā kú Óndú ā ŋ́. Ɔdā nēé tá ipú íne kéē yá piíí, é kē yá uwā ŋ́ dúú.”

²²Ɛ́gɛ́nɛ̄ ɔcɛ́ je ɔ́da lɛ ā, anɔ́ɔ Uhilkíya mɛ́mla ācɛ ā le yɛ gaá le ɔ̄kā da ɔ̄cɛnyā omɛ́ɛbɛ kú Óndú ā éyi nōo lé ka Uhúlda nōo lā ɔlɛ́ ɛ̄yīpɛ̄ kú Ujerúsālɛm ā. Ɔbá nū lé ka Ussálum, ɔyí kú Utokáti, ɔyí kú ɔyí kú Uhasíra nōo gē leyīkwu úwé mɛ́mla awulú nēe bá ipú Agblīihɔ-nɛ̄hi ā. Anɔ́ɔ é le ɔdā nōo yá ā kpó ka lɛ ɔ́ á.

²³Anɔ́ɔ ó da uwá kéē kwúcē gā ɛgiyí ɔcɛ́,

²⁴gaá lɛ ohi kpó lɛ ɔ́ ɛ́gɛ́nɛ̄ Óndú ā ka kahíníī, “N klla géē bī ɛdɔ kú okónu ō tá nēé tá ipú ɔkpá kú íne nēé jé tɛ́ɛcɛ lɛ ɔcɛ́ ā le yá ācɛ Ujerúsālɛm italā.

²⁵Ācɛ kú Ujúda tá ami nōo wɛ Óndú, Ɔwɔicō kú uwā ā, gaá bá ī gbā aɔ́wɔ ɔhá ɛ̄gbā, cɛ́ɛ́ kéē yá um cɔ̄nū ohígbū odúúdú ɔdā nēé yá ā. N cāŋjɛ ipú ícɔ̄nū lɛyí kwú Ujerúsālɛm, ɔnū kú um lɛyíkwu uwá ā í gáā mɛ ŋ́.

²⁶O lɛyíkwu ɔcɛ́ kú Ujúda nōo tū aá ɛhɔ̄ ā, ɛlā nɛ̄ ami Óndú, Ɔwɔicó kú Ísrɛ̄lu ka ā yɔ̄ á, a le ɛlā nēé tá tū ipú ɔkpá ā pó.

²⁷Anɔ́ɔ a le pīyabɔ̄ klla le iyī uwɔ tú wāajɛ iyɔ̄bū um á. A le īlī kú uwɔ híla klla yɔ̄ ī jikwū, eko nāa le pó ɛ́gɛ́nɛ̄ n gaá yá ācɛ kú Ujerúsālɛm italā lɛ ā. N le ɔkɔ nāa gbā ā pó ɛɛ́.

²⁸Ń gāa yá Ujerúsālɛm italā gɛ ŋ́ jāā gbéeko nāa gekwú. N géē cɛ̄ gā awɔ ká ā nyɔ̄ í tá aádā uwɔ ipú ɛbɔ́.” Anɔ́ɔ ācɛ a lɛ ohi kú ɛhɔ̄ kú ɔ̄comɛ́ɛbɛ ā kpó gé lɛ ɔcɛ́ á.

²⁹Anɔ́ɔ Ujosíya le odúúdú anyākwɔ́cɛ kú Ujúda mɛ́mla Ujerúsālɛm kpó hīgwú wā gaá le jīla.

³⁰Anɔ́ɔ odúúdú uwá kwú pɛ́ ga ipú Agblīihɔ-nɛ̄hi ā. Uwá mɛ́mla ācogwɛ́ɛya, ayí Ulífāyi, aólɔdu, mɛ́mla aólɛhá, mɛ́mla odúúdú ācɛ o hile kú ajɛ ā bá iyɔ̄bū odúúdú uwā abɔ́ɔ. Anɔ́ɔ ɔcɛ́ le odúúdú ɔkpá kú íne nēé pīyɛ̄ ŋmá ipú Agblīihɔ-nɛ̄hi ā jé tɛ́ɛcɛ lɛ uwá gbōmgbōm abɔ́ɔ á.

³¹Anɔ́ɔ ó gaá háyi ɛga nɛ̄ aɔ́cɛ́ gē háyi ī kɛlā lɛ ācɛ ā, anɔ́ɔ ó le okónu ce ka anúɔ géē lɛyítáajɛ lɛ Óndú ā, klla í lɛ odúúdú íne mɛ́mla ɔ́da kú nū tū mla odúúdú ɔtū, odo, ɔfú mɛ́mla ɛlá ō gbo kú anúɔ. Ó ka anúɔ klla í bī odúúdú ɔdā nēé tá tū ipú ɔkpá kú íne ā le yúklɔ́.

³²Ó klla le yá ká odúúdú ācɛ kú Ujerúsālɛm mɛ́mla ācɛ ipɔ́ɔma kú Ubɛ́njamīn ā kéē lɛ okónu ce kéē lɛ ɔdā nɛ̄ ɛka nēé gbo mla Ɔwɔicō kú aádáádā uwā ā tū.

³³Ujosíya kwú odúúdú aɔ́wɔ nēe wɛ ɔdēelihɔ̄ ā ú kpó ŋmá ipú ajɛ nōo wɛ á kú Ísrɛ̄lu ā. Ó klla le yá kú odúúdú ācɛ kéē gbā Ɔwɔicō kú aádáádā uwā ɛ̄gbā. Eko nɛ̄ ó yēeyī gaá kwu ā, ācɛ ā í kwúcē ŋmá ō gbā Ɔwɔicō kú aádáádā uwā ɛ̄gbā ŋ́.