Read idoma 2 ÚKLƆ́ KÚ AƆ́CƐ́ 35 Bible Online

2 ÚKLƆ́ KÚ AƆ́CƐ́ 35 - idoma bible

2 ÚKLƆ́ KÚ AƆ́CƐ́ 35

¹Ujosíya le ucɛ kú onyatá ā lé Ujerúsālɛm kéē lɛ ojīlīmā ce Óndú ā. Ɛ̄cī igwɛ́ɛnɛ kú ɔyā éyi ā, é le aɛ́bɛ́ kú ucɛ ā kpó ŋmó.

²Ó le úklɔ́ nɛ̄ ācogwɛ́ɛya cíkā ō yá ipú Agblīihɔ-nɛ̄hi ā, kpó lɛ uwá, ó klla lɛ ɔfú tū uwá iyē kéē lɛ úklɔ́ ā yá lɔhi.

³Ó klla le ɔfú nyā tū ayí kú Ulífāyi nēe ī nwū ācɛ Ísrɛ̄lu íne ā kahíníī, “Aá kwú ikpáti kú Ɛka ā ú háyi ipú Agblīihɔ-nɛ̄hi kú Óndú ā, nɛ̄ Usólōmɔn, ɔyí kú Udéfīdi gwó ā. Ó gaá cɛgbá kú aá yɔ̄ gē bī ɔ̄ ī yɛ ŋmá ɛga éyi ga ɛga ɔhá gɛ ŋ́, amáŋ aá géē bá ī gbā Óndú ā, Ɔwɔicō kú aá mla ákú Ísrɛ̄lu ɛ̄gbā ipú Agblīihɔ-nɛ̄hi ā.

⁴Aá nyɔ̄ í bá ɛga kú aá ipú Agblīihɔ-nɛ̄hi, ipɔ́ɔma ipɔ́ɔma kú aá ɛ́gɛ́nɛ̄ úklɔ́ nɛ̄ Udéfīdi mɛ́mla ɔyí nū Usólōmɔn je lɛ aá ā lɛ ā.

⁵Aá lɛ īyī aá kɔ̄ lɔɔlɔhi cɛ́ɛ́ ká ācɛ ká aá kéē bá ipú Agblīihɔ-nɛ̄hi ā eko dóódu, o yá ɛ́ɛ́ kéē géē tá ipɔ́ɔnu éyééye kú ācɛ Ísrɛ̄lu abɔ̄.

⁶Aá géē ŋmó ayí omlede kú ucɛ kú onyatá ā mɛ́mla aɛ́wū kú onyatá ā. Aá lɛ īyī aá tū yēŋēē ɛ́ɛ́ kú aá géē gwɛ́ɛya ā, cɛ́ɛ́ ka ayínɛ́ aá Ísrɛ̄lu ā kéē yɛce íne kú Óndú ā, nɛ̄ ó je lɛ aá bū okónu kú Umósīsi ā.”

⁷Ujosíya, ɔcɛ́ ā le aálá, ayí omlede, aópī úlā ofɛtá ce úlā igwɛ́ɛhɔ̄ (30,000), mɛ́mla aɛ́na úlā ahāapa cofigwó (3,000) da kwɛyí ācɛ nēé míiyē ŋ́ mā ŋmá ipú aɔ́dāajɛ kú nū.

⁸Aígabɔ̄ kú nū klla le aɔ́dāajɛ kú abɔ̄yī uwā da lɛ ācɛ ā mɛ́mla ācogwɛ́ɛya ā mɛ́mla ayí kú Ulífāyi kéē lé dúú. Anɔ́ɔ ācogwɛ́ɛya nēe gē leyīkwu Agblīihɔ-nɛ̄hi ā, Uhilkíya otrɛ̄yí kú ācogwɛ́ɛya ā, Usekaríya, Ujɛ́hīyɛlu, le aálá úlā ɛhīlī cofigwó (2,600) mɛ́mla aɔ́bá ɛna ofigwɛ́ɛhɔ̄ (300) kpó lɛ ācɛ kéē bī le yá ucɛ kú ɛya ōgwó ā.

⁹Aótrɛ̄yí kú ayí Ulífāyi ā, Ukonaníya, Ussémāya, mɛ́mla ɔyínɛ́ nū Unatánɛlu, Uhassábīya, Ujéyɛlu, mɛ́mla Ujósābadi klla bī ayí omlede mɛ́mla ayí ɛwū úlā igwɛ́ɛpa cofigwó (5,000), mɛ́mla aɛ́na úlā ce ofɛhɔ̄ gé lɛ ayí kú Ulífāyi kéē bī le gwɛ́ɛya.

¹⁰Eko nēé lɛ ɔdā dóódu kpó tútū kwɛyí ā, ācogwɛ́ɛya ā, mɛ́mla ayí kú Ulífāyi ā le pɛ́ ga ɛgiyí úklɔ́ kú uwá ipú Agblīihɔ-nɛ̄hi ā.

¹¹Eko nēé le ayí omlede mɛ́mla ayí ɛwū ā kpó ŋmó ā, ācɛ Ulífāyi ā le ɛbɛ́ ā kpó wā, klla le ɔkpá tá ŋmá aɛ́bɛ́ iyē. Anɔ́ɔ ācogwɛ́ɛya ā kwú oyī kú uwā í mī klá ɛyí ede ā.

¹²Anɔ́ɔ é lɛ ɛbɛ́ kú ɛya o pá ɔlá ā kɔ̄ ipɔ́ɔnū ipɔ́ɔnū kú ācɛ ɔlamu kú odúúdú ācɛ kú Ísrɛ̄lu. Cɛ́ɛ́ kéē géē yá ucɛ kú onyatá ā ɛ́gɛ́nɛ̄ Óndú je íne kú nū lɛ uwá bū íne kú Umósīsi lɛ ā.

¹³Ācɛ kú Ulífāyi ā le ɛbɛ́ kú ɛya kú onyatá ā pá, klla kwú ɛga otīihɔ kú nū ā ú kpó he ɛ̄hī ɛ́gɛ́nɛ̄ íne kú nū ka lɛ ā, anɔ́ɔ é klla kwú ɛbɛ kú nū ā ú kpó kɔ̄ lɛ ācɛ a fíya-fíya

¹⁴Eko nēé lɛ ɛnyā yá ā, é lɛ ɛbɛ́ ā je lɛ īyī uwā mɛ́mla ācogwɛ́ɛya nēe ŋmá ipɔ́ɔma kú Árɔ̄ni ā, ohígbū ka ācogwɛ́ɛya ā bá ī kpó aɛ́bɛ́ nēé cíkā ō yɔlá ɛyí ede dúúdú yɔlá mla ijē kú uwā, ŋmá ɔ̄cɔ̄ɔ̄cī gbó otú. Ɛ̄nyā wɛ ipú úklɔ́ kú uwā dúú.

¹⁵Ācogwíijē nēe ŋmá ipɔ́ɔma kú Ásāfu nēe bá ɛga nɛ̄ Udéfīdi tū uwā ukɔ́ kéē bá ā wɛ, Ásāfu, Uhɛ́mān Ujɛdútɔn, ɔ̄comɛ́ɛbɛ kú ɔlɛ́ ɔcɛ́ ā. Ó cɛgbá kú ācɛ nēe gē gbō ɔwɛ kú Agblīihɔ-nɛ̄hi ā kéē bá ɛgiyí úklɔ́ kú uwā kpɔ́, ohígbū ka ācɛ Ulífāyi o hile ā bá ī yá ucɛ kú onyatá ā lɛ uwá.

¹⁶Ɛ́gɛ́nɛ̄ Ujosíya je ɔ́da lɛ ā, é lɛ ɔdā dóódu kpó yá ɛ̄cī ɔ́ɔmā o yá ɛ́ɛ́ kéē lɛ ucɛ kú onyatá lé, cɛ́ɛ́ kéē je ɔyí omlede ā gwɛ́ɛya o yɔlá ɛyí ede dúúdú lɛ Óndú ā.

¹⁷É bá abɔ́ɔ bá ī lé ucɛ kú onyatá ā mɛ́mla ucɛ kú igbō nɛ̄ ó gē nū ŋ́ mā, ɛ̄cī ahāapa

¹⁸Oŋmífī eko kú Usámūwɛ̄lu, ɔ̄comɛ́ɛbɛ ā, é lé ucɛ kú onyatá ā ɛ́gɛ́nɛ̄ é lé ɛ̄nyā ā ŋ́. Odúúmā kú aɔ́cɛ́ otɛtɛ ā, í lé ucɛ kú onyatá ā ɛ́gɛ́nɛ̄ Ujosíya, mɛ́mla ayí kú Ulífāyi, mɛ́mla ācogwɛ́ɛya, mɛ́mla ācɛ kú Ujúda, Ujerúsālɛm, mɛ́mla Ísrɛ̄lu ā lé ɔ̄ ā ŋ́.

¹⁹É lɛ ɔ́ tū ipú iháyí igwáahātá kú ɔcɛ́ kú Ujosíya ā.

²⁰Igbīhi nɛ̄ Ujosíya le odúúdú aɔ́dā nēe bá ā yá le Agblīihɔ-nɛ̄hi kú Óndú ā tútū ā, Unéko, ɔcɛ́ kú Íjīpiti le aícɔ́ɔja kú nū kpó nyɔ̄ kéē gaá kpɛ́fú tá Ukákēmissi okónu ísu kú Uyúfarétīisi ā. Anɔ́ɔ Ujosíya lɔfú tīiyē kóō lɛ uwá anú ci á.

²¹Anɔ́ɔ Unéko lɛ ɛhɔ̄ tū fu Ujosíya kahíníī, “Ɛfú nɛ̄ n yɔ̄ í kpó ā, í wɛ ɛlā uwɔ, ɔcɛ́ kú Ujúda ā ŋ́. Ń wā gaá kpɛ́fú tá uwɔ mɛ́mla ācɛ ɔlɛ́ uwɔ ŋ́. Amáŋ n gáā kpɛ́fú tá aólɛlā kú um. Óndú ā ka ami ɔ́ɔ kpɛ́fú ā fíyaa. Ɔwɔicō yɔ̄ mla um ipú ɛfú nyā, ohígbū ɔ́ɔmā, nyɛ̄ɛ̄ ŋmá ɔwɛ kú um oo n, ámāŋ Óndú ā géē je uwɔ yíífi.”

²²Amáŋ Ujosíya tá kóō pó ɛlā kú nū ā, anɔ́ɔ ó le tútū kóō kpɛ́fú tá ɔ̄ kpɔ́. Anɔ́ɔ ó tá ɛlā nɛ̄ Ɔwɔicō ka lɛ ɔ́ ā, anɔ́ɔ ó kwú úwé ɔhá ú kpó wiyē, kwú īyī nū ú pīyabɔ̄, anɔ́ɔ ó le yɛ kóō kpɛ́fú tá ɔ̄, ɔpɛ́ kú Umegído ā.

²³Eko nēé bā gē kpɛ́fú ā, ɔ̄cɛ Íjīpiti éyi lɛ ɔyī tá gaá gbo Ujosíya kli. Anɔ́ɔ Ujosíya da ācocɛ̄hɔ̄ kú nū kéē kwú anúɔ í ga ɔlɛ́ ohígbū kée le ágbe yá anúɔ ɛɛ́.

²⁴É kwú ɔ̄ ú ŋmá ipú úgbɔ́nya kú nū ā, anɔ́ɔ é kwú ɔ̄ ú tá ipú úgbɔ́nya kú nū ɔhá ga Ujerúsālɛm, anɔ́ɔ ó gekwú á. É kwú ɔ̄ ú nyi ikpámílī kú aádáádā nū ā. Ācɛ Ujúda mɛ́mla Ujerúsālɛm yēkwu kú nū ɛ̄cī alɛwa.

²⁵Anɔ́ɔ ɔ̄comɛ́ɛbɛ Ujeremíya le ije kú ekwu mla ikwu ayidɔ kú Ujosíya tá tā ajɛ. Anɔ́ɔ ije ɔ́ɔmā kwú pīya ijē uculo kú ācɛ Ísrɛ̄lu, cɛ́ɛ́ ka odúúdú uwā, kwu ācɛnyā kwu ācɛnyīlɔ, kéē gwííjē nyā eko dúúmā nēé gē blikwū kú nū. Ijē nyā yɔ̄ ipú ɔkpá kú ikwū ayidɔ kú Ujeremíya.

²⁶Aɔ́dā o hile ɔhá dóódu nɛ̄ Ujosíya yá ā, é le ɔ́ tá tā ajɛ lɛ Óndú ā mla íne kú nū.

²⁷É le odúúdú ígwú ō gbo kú nū, o gbɔɔ́ ŋmá ohútu kú oyéeyī kú nū ga oŋmɛ́yí kú nū, é le ɔ́ tá ipú ɔkpá nēé tá úklɔ́ kú aɔ́cɛ́ kú Ísrɛ̄lu mɛ́mla Ujúda tū ɔ̄ ā.